གསང་ཆེན་ཆོས་འཁོར་མཐོ་རིམ་བཤད་གྲྭ།

<mediawiki xmlns="http://www.mediawiki.org/xml/export-0.11/" xmlns:xsi="http://www.w3.org/2001/XMLSchema-instance" xsi:schemaLocation="http://www.mediawiki.org/xml/export-0.11/ http://www.mediawiki.org/xml/export-0.11.xsd" version="0.11" xml:lang="dz">
  <siteinfo>
    <sitename>Wikipedia</sitename>
    <dbname>dzwiki</dbname>
    <base>https://dz.wikipedia.org/wiki/%E0%BD%98%E0%BC%8B%E0%BD%A4%E0%BD%BC%E0%BD%82%E0%BC%8D</base>
    <generator>MediaWiki 1.47.0-wmf.1</generator>
    <case>first-letter</case>
    <namespaces>
      <namespace key="-2" case="first-letter">Media</namespace>
      <namespace key="-1" case="first-letter">Special</namespace>
      <namespace key="0" case="first-letter" />
      <namespace key="1" case="first-letter">Talk</namespace>
      <namespace key="2" case="first-letter">User</namespace>
      <namespace key="3" case="first-letter">User talk</namespace>
      <namespace key="4" case="first-letter">Wikipedia</namespace>
      <namespace key="5" case="first-letter">Wikipedia talk</namespace>
      <namespace key="6" case="first-letter">File</namespace>
      <namespace key="7" case="first-letter">File talk</namespace>
      <namespace key="8" case="first-letter">MediaWiki</namespace>
      <namespace key="9" case="first-letter">MediaWiki talk</namespace>
      <namespace key="10" case="first-letter">Template</namespace>
      <namespace key="11" case="first-letter">Template talk</namespace>
      <namespace key="12" case="first-letter">Help</namespace>
      <namespace key="13" case="first-letter">Help talk</namespace>
      <namespace key="14" case="first-letter">Category</namespace>
      <namespace key="15" case="first-letter">Category talk</namespace>
      <namespace key="710" case="first-letter">TimedText</namespace>
      <namespace key="711" case="first-letter">TimedText talk</namespace>
      <namespace key="828" case="first-letter">Module</namespace>
      <namespace key="829" case="first-letter">Module talk</namespace>
      <namespace key="1728" case="first-letter">Event</namespace>
      <namespace key="1729" case="first-letter">Event talk</namespace>
    </namespaces>
  </siteinfo>
  <page>
    <title>གསང་ཆེན་ཆོས་འཁོར་མཐོ་རིམ་བཤད་གྲྭ།</title>
    <ns>0</ns>
    <id>9047</id>
    <revision>
      <id>39706</id>
      <timestamp>2026-05-10T13:38:58Z</timestamp>
      <contributor>
        <username>Sangchen Chokhor Buddhist College</username>
        <id>13478</id>
      </contributor>
      <comment>Created page with &quot;== དཔལ་ལྡན་འབྲུག་པ་ངག་དབང་རྣམ་རྒྱལ་གྱི་ལོ་རྒྱུས་སྙིང་བསྡུས། == ༉  རྒྱལ་ཀུན་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་དབང་སྐུ་དངོས་མིའི་སྐྱེ་བ་བཞེས་ཏེ་བྱོན་པའི་དཔལ...&quot;</comment>
      <origin>39706</origin>
      <model>wikitext</model>
      <format>text/x-wiki</format>
      <text bytes="44147" sha1="4i7qb87xyjjgwcsmh05l9hkgnmwo5rl" xml:space="preserve">== དཔལ་ལྡན་འབྲུག་པ་ངག་དབང་རྣམ་རྒྱལ་གྱི་ལོ་རྒྱུས་སྙིང་བསྡུས། ==
༉  རྒྱལ་ཀུན་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་དབང་སྐུ་དངོས་མིའི་སྐྱེ་བ་བཞེས་ཏེ་བྱོན་པའི་དཔལ་ལྡན་འབྲུག་པ་རིན་པོ་ཆེ་མཐུ་ཆེན་ཆོས་ཀྱི་རྒྱལ་པོ་ངག་དབང་རྣམ་པར་རྒྱལ་བའི་སྡེ་ཟེར་མཚན་སྙན་འཇིག་རྟེན་གསུམ་དུ་ཉི་མ་དང་ཟླ་བ་བཞིན་ཡོངས་སུ་གྲགས་ཏེ་ཡོད་པའི་སྐྱེས་མཆོག་དེ་ཉིད་རང་དོན་ཆོས་ཀྱི་སྐུའི་ངང་ལས་གཡོ་བ་མེད་རུང་། གཟུགས་སྐུ་ཆུ་ནང་གི་ཟླ་བ་ལྟར་ སེམས་ཅན་གྱི་དོན་ལ་བསམ་བཞིན་དུ་བྱོན་པ་དེ་ཡང་། ཐུགས་རྗེ་ཆེན་པོ་འཁོར་བ་ལས་སྒྲོལ་གྱི་རྒྱུད་ལས། 

བདུད་འཇོམས་རྡོ་རྗེ་ཞེས་བྱ་བ། །གསང་སྔགས་བསྟན་པའི་བདག་པོ་ཞིག །

ཐར་པར་འདྲེན་པའི་དེད་དཔོན་འབྱུང་། །ཞལ་མཐོང་ཙམ་གྱིས་ངན་འགྲོའི་སྐྱེ་སྒོ་གཅོད། །

ཅེས་དང་། སྟག་གཤམ་དགོངས་འདུས་ལས། 

ནམ་མཁའི་སྙིང་པོ་རང་འོད་འབྲུག་གི་མཚན། །ངག་གི་མིང་ཅན་ལྷོ་རོང་ཕྱོགས་སུ་འབྱུང་། །

ངག་གི་མིང་ཅན་དྲག་སྔགས་གྲུབ་པ་འདིས། །མོན་ཁྲི་བཟུང་ནས་བོད་འབྲུག་གསོས་སུ་གྱུར། །

ཞེས་ ཡིད་ཆེས་པའི་ལུང་མང་པོས་གསལ་བར་ལུང་བསྟན་ཏེ་ཡོདཔ་བཞིན་དུ་ སྟོན་པའི་འདས་ལོ་ ༢༦༥༡ དབྱིན་ ལོ་ ༡༥༩༤ རབ་བྱུང་བཅུ་པའི་ཤིང་རྟ་ལོར་ ཡབ་དཔལ་ལྡན་འབྲུག་པའི་གདུང་བརྒྱུད་རིན་པོ་ཆེ་ མི་ཕམ་ བསྟན་པའི་ཉི་མ་དང༌། ཡུམ་བསོད་ནམས་དཔལ་གྱི་བུ་ཁྲིད་གཉིས་ཀྱི་སྲས་ལུ་ འབྲུག་སེ་བ་བྱང་ཆུབ་གླིང་ གི་གཞི་ཀ་མགར་གྲོང་ཟེར་སར་སྐུ་འཁྲུངས། དེ་ནས་དབྱིན་ལོ་༼༡༦༡༦༽ གི་ལོར་ཆིབས་ཁ་ལྷོ་རུ་ བསྒྱུར་ཏེ་ཙནྡན་བཀོད་པའི་ལྗོངས་འདིར་བྱོན། རྒྱལ་ཁབ་ཀྱི་ཕྱི་ནང་གསང་གསུམ་གྱི་ཕས་ཀྱི་རྒོལ་བ་ ཐམས་ཅད་ཚར་བཅད་དེ། ཆོས་སྲིད་ལུགས་གཉིས་ཀྱི་སྲོལ་བཟང་པོ་གཏོད་དེ་འབྲུག་རྒྱལ་ཁབ་མཐའ་དབུས་མེད་པ་དབང་བསྒྱུར་བར་མཛད་པའི་བཀའ་དྲིན་ལ་བརྟེན་ཏེ་  སྔར་ཡུལ་ལ་མོན་དང་ མི་ལ་མོན་པ་ ཟེར་སྲོལ་ཡོད་པ་འདི་ཡང་ དུས་དེ་ལས་བཟུང་ དཔལ་ལྡན་འབྲུག་པའི་ཆོས་ཀྱི་མིང་རྒྱལ་ཁབ་དང་མི་ལ་ བཏགས་ཏེ་ ཡུལ་ལ་འབྲུག་དང་མི་ལ་འབྲུག་པ་ཟེར་བའི་མིང་གཏམ་གང་ནི་ལས་སྙན་པ་སྦེ་འཛམ་གླིང་ རྒྱལ་ཁབ་ཡོངས་ལ་དར་ཁྱབ་སོང་འདུག དེ་ནས་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས་ དཔལ་ལྡན་འབྲུག་པ་རིན་པོ་ཆེ་དེ་ཉིད་རིམ་གཉིས་ཀྱི་རྣལ་འབྱོར་ལ་བཞུགས་ན་ མཐའ་དམག་བཟློག་པའི་ཁར་བསྟན་པ་འཕེལ་ཞིང་ཡར་རྒྱས་འོང་བའི་ལུང་བསྟན་གནང་བ་མ་ཚད་ དཔལ་མགོན་ལྕམ་དྲལ་ ཆོས་སྲུང་དྲེགས་པ་སྡེ་བརྒྱད་ཀྱི་ཚོགས་དང་བཅས་པས་ཀྱང་དེ་བཞིན་གསོལ་བ་བཏབ་པ་ལ་བརྟེན་ ཐུགས་དམ་རིམ་གཉིས་ཀྱི་ངང་ལ་བཞུགས་རྒྱུའི་ཐུགས་བཞེད་གནང་སྟེ། སྤྱི་ལོ་ ༡༦༥༡ དང་རབ་བྱུང་ ༡༡ པའི་ལྕགས་ཡོས་ཧོར་ཟླ་གསུམ་པའི་ཡར་ངོ་ཚེས་བཅུའི་དུས་ཆེན་ལ། བདག་ཅག་གི་སྐྱབས་མགོན་ གོང་མ་ཞབས་དྲུང་རིན་པོ་ཆེ་དེ་ཉིད་ཐུགས་དམ་ཟུང་འཇུག་ཆེན་པོའི་དབྱིངས་ལུ་བཞུགས་གནང་ནུག །  

= ཞབས་དྲུང་གསུང་སྤྲུལ་རིམ་བྱོན་གྱི་སྐོར། =
གདུང་སྲས་སྐུ་ཕྲེང་གཉིས་པ་ཀུན་དགའ་རྒྱལ་མཚན་གྱི་སྐབས། སྐྱབས་མགོན་ཞབས་དྲུང་གི་སྐུ་གདུང་རིན་པོ་ཆེའི་མདུན་དུ་ སྤྲུལ་སྐུ་མྱུར་བྱོན་གྱི་གསོལ་བ་བཏབ་སྟེ་ཐུགས་དམ་གསང་རྒྱ་བརྟོལ་བའི་ཚེ། སྐུ་གདུང་རིན་པོ་ཆེའི་སྐུ་གསུང་ཐུགས་ལས་སྒྱུ་འཕྲུལ་རྣམ་པར་གསལ་བྱེད་ཀྱི་འོད་ཟེར་གསུམ་བཀྱེས་ནས། འབྲས་ལྗོངས་དང། དར་དཀར་ནང་། བོད་ཡུལ་གྲྭ་ནང་གསུམ་དུ་བབ་པ་ལས། སྐུའི་སྤྲུལ་པ་འབྲས་ལྗོངས་ རྒྱལ་པོའི་སྲས་སུ་འཁྲུངས་ཡང༌། དེའི་སྐབས་ནང་འཁྲུགས་ཀྱི་རྐྱེན་གྱིས་རྟེན་འབྲེལ་འཕྱུགས་ཏེ་གདན་སར་གདན་འདྲེན་མ་ཚུགས་པའི་བར། གཞོན་ནུའི་དུས་ནས་གཟུགས་སྐུ་དབྱིངས་སུ་བསྡུས་པས། དེ་ནས་བཟུང་སྐུའི་སྤྲུལ་པ་ཡོངས་གྲགས་སུ་མ་བྱོན་ནོ།།  གསུང་སྤྲུལ་དང༌། ཐུགས་སྤྲུལ་སྐུ་ཕྲེང་རིམ་པ་བཞིན་དུ་བསྟན་འགྲོའི་དཔལ་ལ་བྱོན་པ་ལས།  གསུང་གི་སྤྲུལ་པ་ན་རིམ་གྱི་སྐོར་ཞུ་བ་ལ། 

==== '''གསུང་སྤྲུལ་དང་པ་ཕྱོགས་ལས་རྣམ་རྒྱལ་ནི།''' ====
འཁྲུངས་ཡུལ་དར་དཀར་བཀྲ་ཤིས་གཡང་རྩེའི་རྫོང་གི་ཉེ་འདབས་ ཉི་གདུགས་ཁར། ཡབ་ཤེས་རབ་བསྟན་འཛིན་དང་ཡུམ་ཀུན་དགའ་རྒྱལ་མོ་གཉིས་ཀྱི་སྲས་སུ་ རང་ལུགས་འདས་ལོ་ལྔ་བཅུ་ང་བརྒྱད་དང་ རབ་བྱུང་བཅུ་གཉིས་པའི་ས་བྱི་ སྤྱི་ལོ་༼༡༧༠༨༽ཀྱི་ལོར་འཁྲུངས། ཞལ་ལས་གསུང་ཐོག་མར་བྱོན་པའི་སྐབས་ ང་ངག་དབང་རྣམ་རྒྱལ་ཡིན་ཞེས་གསུངས་པ་དང་། འཇམ་དཔལ་རྡོ་རྗེ་བདག་གི་བུ་ཡིན་ཟེར་གསལ་བར་གསུངས་པ་ལ་བརྟེན་ སྐྱེ་བོ་ཀུན་གྱིས་ཞབས་དྲུང་རིན་པོ་ཆེ་སྐུ་དངོས་ཡིན་པའི་དད་པ་བསྐྱེད་དེ་ དགུང་ལོ་བརྒྱད་ལས་ སྡེ་སྲིད་བརྒྱད་པ་འབྲུག་རབ་རྒྱས་ཀྱིས་སྤྱན་དྲངས་ཏེ། གདན་སའི་གསེར་ཁྲིར་མངའ་གསོལ་མཛད་འདུག མཚན་ཞབས་དྲུང་ཕྱོགས་ལས་རྣམ་རྒྱལ་ཞེས་གསོལ་བ་ལས། ཕྱིས་ཀྱི་གསུང་སྤྲུལ་རིམ་བརྒྱུད་པ་རྣམས་ལ་ཡང་ཕྱོགས་ལས་སྤྲུལ་སྐུ་ཟེར་ཞུ་སྲོལ་དར་ཁྱབ་སོང་འདུག རྗེ་མཁན་བཟོད་པ་ཕྲིན་ལས་ཀྱི་ཞབས་ལས་སྡོམ་པའི་བསླབ་ཚིགས་དང༌། ཡོངས་འཛིན་བཟོད་པ་པད་དཀར་དང་། ཀོམ་འཕྲང་ཡེ་ཤེས་དངོས་གྲུབ་ལས་སྒྲ་དང་ཚད་མ་ལ་སོགས་པ་ཐུན་མོང་དང་ཐུན་མིན་གྱི་གཞུང་ལུགས་སྤྱི་དང༌། ཁྱད་པར་དུ་ཤིན་ཏུ་ཐུན་མིན་རང་ལུགས་སྡོང་པོ་གསུམ་དྲིལ་གྱི་ཁྱད་ཆོས་རྣམས་བཤད་པས་གཏན་ལ་ཕབ་ཅིང༌། སྒྲུབ་པས་ཉམས་སུ་བཞེས་ཏེ་ཚིག་ཁྲིད་བློ་ལ་ཐེབས་པ། མྱོང་ཁྲིད་ཉམས་སུ་མྱོང་བ། དོན་ཁྲིད་རྒྱུད་ལ་སྐྱེས་པའི་སྒོ་ནས་རྣམ་གྲངས་མ་ཡིན་པའི་དོན་དམ་ཕྱག་རྒྱ་ཆེན་པོའི་རྟོགས་པ་འཁྲུངས། ལྷག་པར་མགྲིན་པའི་རྩ་མདུད་གྲོལ་ནས་ རྟོགས་པའི་མགུར་དབྱངས་འཁྲོལ་བ་སོགས་ སྙན་ཚིག་གི་རྣམ་འགྱུར་ཅི་དང་མི་མཉམ་པའི་གྲགས་པ་ཐོན། ལྷག་པར་དུ་རྗེ་འདིའི་དབང་ལུང་གསན་བསམ་གྱི་རིམ་པ་གཅིག་ཏུ་བསྡེབས་པའི་བསྟན་བཅོས་པོ་ཏི་གཅིག་གིས་གཙོས་ཆབ་ཤོག་གི་རིགས་མང་པོ་བརྩམས། དུས་ཚོད་འདི་ཡི་སྐབས་ སྡེ་སྲིད་འབྲུག་རབ་རྒྱས་དང་། སྤུངས་རྫོང་པ་ བསྟན་པ་དབང་ཕྱུག་གཉིས་ཀྱི་བར་ནང་འཁྲུགས་ཐོན། རྗེ་འདིའི་ཡོན་བདག་ཡོངས་གྲགས་སུ་སྡེ་པ་རྒྱ་བོར་གྲགས་པའི་ཕྱོགས་ལྷུང་ཅན་འདིས། རྒྱལ་སྲས་ཀུན་དགའ་རྒྱལ་མཚན་དང་ གཏེར་སྟོན་འབྲུག་སྒྲ་རྡོ་རྗེས་གཙོས་སྐྱེས་ཆེན་དམ་པ་རྣམས་དང་སྤུངས་རྫོང་བསྟན་པ་དབང་ཕྱུག་འཁོར་དང་བཅས་པ་རྩ་མེད་དུ་བཏང་བའི་རྣམ་སྨིན་མཐོང་ཆོས་སུ་སྨིན་པའི་དུས། རྗེ་འདིའང་གཞན་གྱི་ཞོར་བརྡབས་ལས་རེ་ཞིག་ཧད་གླང་ཆུ་ཚོན་བྱོལ་ཀྱང་རྗེས་ཟིན་ཏེ་སྐུ་མཉེལ་བྱུང་བས་ཐུགས་ཕམ་སྟེ་གསུང་ལས་  ངས་སྔར་བླ་མ་ཁག་ལྔ་པོ་ཡུལ་ནས་བཏོན་པའི་རྣམ་སྨིན་ཡིན་ཞེས་གསུངས་ནས་ཆོས་སྲིད་གཉིས་ཀའི་ཐུགས་འགན་གང་ཡང་མ་བཞེས་པར་བཞུགས་པའི་མཐར། དགུང་ལོ་ཉེར་དགུ་པ་མེ་འབྲུག་ སྤྱི་ལོ་༼༡༧༣༦༽ལོ་ལུ་སྐུ་གཤེགས་འདུག ། 

==== '''གསུང་སྤྲུལ་ལམ་ཕྱོགས་སྤྲུལ་གཉིས་པ་ཤཱཀྱ་བསྟན་འཛིན་ནི།'''   ====
འཁྲུངས་ཡུལ་ཐིམ་གཞུང་དཀར་སྦིས་ འབྱུང་བཞི་ནང་དུ། རང་ལུགས་འདས་ལོ་བརྒྱད་ཅུ་ག་དྲུག་པ་རབ་བྱུང་བཅུ་གཉིས་པའི་མེ་འབྲུག་ སྤྱི་ལོ་ ༼༡༧༣༦༽ལོར་འཁྲུངས། རྗེ་མཁན་པོ་ཤཱཀྱ་རིན་ཆེན་དང༌། ཡོངས་འཛིན་ཀུན་དགའ་རྒྱ་མཚོ་སོགས་ནས་སྡོམ་པའི་བསླབ་ཚིགས་ཀྱིས་གཙོས་མདོ་སྔགས་རིག་གནས་དང་བཅས་པའི་གསན་བསམ་དང༌། སྨིན་གྲོལ་གདམས་སྐོར་རྣམས་ལ་སྦྱངས་སྒོམ་གནད་དུ་བསྣུན་པར་མཛད་དེ་དོན་དམ་སེམས་ཀྱི་རྡོ་རྗེ་མངོན་དུ་གྱུར། མཁས་པ་དང་གྲུབ་པའི་སྙན་གྲགས་ཕྱོགས་ཀྱི་མཐའ་ལ་ཁྱབ་སྟེ་  རྒྱ་ནག་རྒྱལ་པོ་དང་ མཐུན་ལམ་བྱུང་སྟེ་ཕར་ཚུར་ལག་རྟགས་དང་ཡི་གེ་སོགས་གཏོང་ལེན་མཛད་གནང་ཡོད་པ་མ་ཟད། ལྷག་པར་དུ་རིན་སྤུངས་སྤྱི་བླ་དཀར་སྤེ་དོན་གྲུབ་ཀྱི་དབུ་བླ་མཛད་དེ་ སྤྱི་ལོ་༼༡༧༦༥༽འི་ལོར་ སྤ་གྲོ་གསང་ཆེན་ཆོས་འཁོར་གྱི་གདན་ས་གཙུག་ལག་ཁང་ཆེན་པོ་ཕྱག་བཏབ་སྟེ་སྤ་རོ་ལུང་པའི་མི་མང་ཡོངས་ལ་ཕན་པ་དང་བདེ་བའི་འགྲོ་དོན་རླབས་ཆེན་མཛད་གནང་བའི་ཁར། གཙང་མཁན་ཆེན་དཔལ་ལྡན་རྒྱ་མཚོ་ནས་བརྒྱུད་པའི་རགས་ཕུར་གྱི་གཞུང་ཆོག་ཁྲིགས་སུ་མཛད་པ་ལས་  ཕུར་པ་གསང་འཁོར་པའི་ ལུགས་ཟེར་བ་ཡ་དེ་ནས་ཡོངས་གྲགས་སོང་འདུག  ཕྱིས་ཧད་བྱག་ནག་སྡིངས་ཁའི་གདན་ས་ཕྱག་བཏབ་པའི་མཐར། དགུང་ལོ་ཞེ་ལྔ་པ་ལྕགས་བྱི་ སྤྱི་ལོ་༼༡༧༨༠༽འི་ལོར་དགོངས་པ་ཆོས་དབྱིངས་སུ་ཐིམ་འདུག ། 

==== '''གསུང་སྤྲུལ་གསུམ་པ་ཡེ་ཤེས་རྒྱལ་མཚན་ནི།''' ====
འཁྲུངས་ཡུལ་ཐིམ་རྫོང་ཆ་འོག་ ཝང་ཡུལ་ ཁ་གསར་ ཁར། རང་ལུགས་འདས་ལོ་ཆིག་བརྒྱ་སོ་གཅིག་པ་རབ་བྱུང་བཅུ་གསུམ་པའི་ལྕགས་གླང་ སྤྱི་ལོ་ ༼༡༧༨༡༽ གི་ལོར་འཁྲུངས། མཁན་ཤེས་རབ་སེང་གེ་ལས་བསླབ་ཚིགས་སྔ་མ་གཉིས་དང་སྨིན་གྲོལ་ཐོར་བུ། ཡོངས་འཛིན་འཇམ་དབྱངས་རྒྱལ་མཚན་ལས་བསླབ་ཚིགས་ཕྱི་མས་གཙོས་མདོ་སྔགས་རིག་གནས་ཀྱི་གསན་བསམ་དང༌། སྨིན་གྲོལ་གདམས་པས་ཐུགས་རྒྱུད་སྨིན། དགུང་ལོ་ཉེར་བདུན་ལ་ མཁན་ཁྲི་ཉི་ཤུ་པའི་གོ་གནས་ལོ་བཞི་བཟུང་ནས་བསྟན་པ་བསྐྱངས། དེ་ནས་སྡེ་ཁྲིར་བྱོན། རྒྱ་ནག་རྒྱལ་པོ་ དང་སྐུ་གོང་མ་ཤཱཀྱ་བསྟན་འཛིན་རྣམ་གཉིས་ཕན་ཚུན་གཅིག་གིས་གཅིག་ལ་གུས་བསྐུར་ཡོད་པ་ལས་བརྟེན། ཕྱོགས་ལས་རྒྱ་ནག་ལ་གདན་འདྲེན་ཞུས་ཏེ། རྒྱ་ནག་རྒྱལ་པོ་དང་མཆོད་ཡོན་གྱི་འབྲེལ་བ་རྒྱ་ཆེར་བྱུང་བའི་ཁར་  རྒྱ་ནག་རྒྱལ་པོས་འབུམ་གསེར་བྲིས་མ་ལ་སོགས་པའི་འབུལ་བ་གཏོས་ཆེན་དང་ གཟེངས་བསྟོད་ཀྱི་གོ་གནས་ཀྱང་ཕུལ་གནང་། དེ་ནས་གསང་ཆེན་ཆོས་འཁོར་གྱི་གདན་སར་བྱོན་ བཞུགས་པའི་མཐར། དགུང་ལོ་ལྔ་བཅུ་བཞེས་པའི་ལྕགས་སྟག་ སྤྱི་ལོ་༼༡༨༣༠༽ལོར་དགོངས་པ་ཆོས་ཀྱི་དབྱིངས་སུ་ཐིམ།

==== ''' གསུང་སྤྲུལ་བཞི་པ་འཇིགས་མེད་རྡོ་རྗེ་ནི།''' ====
འཁྲུངས་ཡུལ་བུམ་ཐང་སྟང་ལ། རང་ལུགས་འདས་ལོ་ཆིག་བརྒྱ་ག་གཅིག་དང་རབ་བྱུང་བཅུ་བཞི་པའི་ལྕགས་ཡོས་༼༡༨༣༡༽གི་ལོར་སྐུ་འཁྲུངས། གཞུང་ལྷན་ནས་ གོང་མའི་གདན་སར་སྤྱན་དྲངས་ཏེ་གསེར་ཁྲི་མངའ་གསོལ་མཛད། རྗེ་མཁན་ཤེས་རབ་རྒྱལ་མཚན་ནས་བསླབ་ཚིགས་གཉིས་དང་སྨིན་གྲོལ་གྱི་བདུད་རྩི་བཞེས་ཏེ། གོང་མའི་གདན་ས་གསང་སྔགས་ཆོས་འཁོར་དང་། ཀུན་སྣང་འོད་གསལ་གཉིས་སུ་སྐུ་ཡོན་གསན་སྦྱོང་མཛད་བཞུགས་བཞིན་པའི་མཐར། དགུང་གྲངས་ཉི་ཤུ་པ་ལྕགས་ཁྱི་སྤྱི་ལོ་༼༡༨༥༠༽ལོར་མཚན་དཔེའི་ཟླ་ཚེས་ནམ་མཁར་ཡལ། 

==== '''གསུང་སྤྲུལ་ལྔ་པ་ཡེ་ཤེས་དངོས་གྲུབ་ནི།''' ====
འཁྲུངས་ཡུལ་བུམ་ཐང་སྡེ་བཞིའི་ནང་ཚན་སྟངས་ལ། རང་ལུགས་འདས་ལོ་ཉིས་བརྒྱ་བཅུ་མེད་གཅིག་དང་རབ་བྱུང་བཅུ་བཞི་པའི་ལྕགས་ཕག་ སྤྱི་ལོ་ ༼༡༨༥༡༽གི་ལོར་འཁྲུངས། གཞུང་ནས་གདན་འདྲེན་ཏེ་གོང་མའི་གདན་ས་ལ་མངའ་གསོལ་མཛད། རྗེ་མཁན་ཡོན་ཏན་རྒྱལ་མཚན་དང༌། ཡོངས་འཛིན་ངག་དབང་དོན་ལྡན་སོགས་ལས་བསླབ་ཚིགས་ནས་བཟུང་མདོ་སྔགས་རིག་གནས་དང༌། སྨིན་གྲོལ་གདམས་པའི་གནད་རྣམས་བཅུད་དུ་སྨིན་པར་མཛད། གསང་ཆེན་ཆོས་འཁོར་གྱི་གདན་ས་བཟུང་ནས་སྤ་རོའི་ལུང་པ་རྣམས་སུ་ཁྲིད་ཐེངས་བཅུ་གསུམ་ཙམ་གནང་བའི་སྒོ་ལས་གདུལ་བྱ་བསྐྱངས།  རབ་བྱུང་བཅོ་ལྔ་པའི་ཆུ་ཡོས་དགུང་ལོ་ང་གསུམ་བཞེས་སྐབས་སྡེ་ཁྲིར་བྱོན། དགུང་ལོ་ང་དྲུག་བཞེས་དུས་སྡེ་ཁྲི་ལས་དགོངས་ཞུས་མཛད་ནས་དབེན་པར་བྱོན། དེ་ཡི་སྐབས་ སྤ་གྲོ་ཀུན་དགའ་ཆོས་གླིང་གི་གདན་ས་བཏབ། སླར་དགུང་ལོ་རེ་ལྔར་སོན་པའི་ཚེ་ཡང་རྗེ་མཁན་ ཁྲི་རབས་ང་གསུམ་པའི་ཁྲིར་བྱོན། མཁན་ཁྲི་ལོ་གཉིས་བཟུང་བའི་མཐའ་རུ། དགུང་ལོ་རེ་བདུན་བཞེས་པའི་མེ་སྦྲུལ་ སྤྱི་ལོ་༼༡༩༡༧༽ལ་ཁྲི་ཐོག་ལ་བཞུགས་བཞིན་པར་གཤེགས།  

==== '''ཕྱོགས་སྤྲུལ་དྲུག་པ་འཇིགས་མེད་བསྟན་འཛིན་ནི།''' ====
འཁྲུངས་སའི་ཡུལ་ཏ་ལོ་གསང་སྔགས་ཆོས་གླིང་གི་གཙུག་ལག་ཁང་དང་ཉེ་བའི་མཚམས་ཁང་ནང་ལ། ཡབ་གདོང་དཀར་ལའི་སྤྲུལ་སྐུ་སངས་རྒྱས་བསྟན་འཛིན་དང་ ཡུམ་ ཞབས་དྲུང་འཇིགས་མེད་རྡོ་རྗེའི་སྤུན་མཆེད་ཆེ་བ་ཨ་ཞེ་རྡོ་རྗེ་དབང་མོ་གཉིས་ཀྱི་སྲས་སུ་ རང་ལུགས་འདས་ལོ་ཉིས་བརྒྱ་རེ་དགུ་པ་རབ་བྱུང་བཅོ་ལྔ་པའི་ས་ལུག་གི་ལོར་དགེ་མཚན་དུ་མའི་ལྟས་བཟང་པོ་དང་བཅས་ཏེ་སྐུ་འཁྲུངས།  དགུང་ལོ་གསུམ་བཞེས་པ་ན་ སྔོན་གནས་རྗེས་དྲན་གྱི་གསུང་གསལ་བར་གསུངས་པ་ལས་ མི་ཐམས་ཅད་ཡིད་ཆེས་ཀྱི་གནས་སུ་གྱུར། དགུང་ལོ་ལྔར་བཀྲ་ཤིས་ཆོས་རྫོང་གི་དབུ་རྩེའི་ནང་། ཞང་པོ་ཞབས་དྲུང་རིན་པོ་ཆེ་འཇིགས་མེད་རྡོ་རྗེའི་སྐུ་མདུན་ལ་ཁྲི་མངའ་གསོལ་མཛད། དེ་ནས་རང་གི་མེས་པོ་མཁས་མཆོག་ ཀུན་དགའ་རྒྱལ་མཚན་ནམ་སྐུ་མཚམས་གོས་སེར་པོས་ཡོངས་འཛིན་མཛད་དེ། གོང་མའི་གདན་ས་གསང་ཆེན་ཆོས་འཁོར་ལ་དགུང་ལོ་བཅུ་བཞིའི་རིང་བསྐྱེད་ཆོག་གི་ཕྱག་ལེན་དང་དཔལ་ལྡན་འབྲུག་པའི་ཆོས་སྐོར་གསན་བསམ་མཛད། ཨ་ཞང་ཞབས་དྲུང་རིན་པོ་ཆེ་འཇིགས་མེད་རྡོ་རྗེའི་ཞབས་ལས་ འབྲུག་ལུགས་ཀྱི་དབང་ཁྲིད་གདམས་ངག་སོགས་བུམ་པ་གང་བྱོའི་ཚུལ་དུ་གསན་བཞེས་གྲུབ། བསྟན་པའི་ཆག་རྐྱེན་ལས་ ཨ་ཞང་ཞབས་དྲུང་རིན་པོ་ཆེ་དགོངས་པ་རྫོགས། གསང་ཆེན་ཆོས་འཁོར་མེས་ཚིག། པ་གྲོ་དཔོན་སློབ་ ཚེ་རིང་དཔལ་འབྱོར་གིས་སྡང་བའི་དགྲ་བཞིན་གཟིགས་ཏེ་བཞུགས་པས་ དགུང་ལོ་བཅོ་ལྔ་ལས་བོད་ཕྱོགས་སུ་སྐུ་ཟུར་བྱོན་དགོས་པ་བྱུང་། བོད་ཀྱི་གནས་རྣམས་རིམ་པ་བཞིན་དུ་གཟིགས་ཏེ་ ལྗང་རྩེའི་ཕྱོགས་སུ་བཞུགས་པའི་སྐབས། གོང་གཟིམས་ བསོད་ནམས་སྟོབས་རྒྱས་ཀྱིས་ཀ་སྤུངས་ལ་གདན་འདྲེན་ཏེ་དེར་བཞུགས། སླར་འབྲུག་ལུ་བྱོན། ཧད་ ཤེལ་དཀར་བྲག་ལ་ ཡབ་ལས་བཀའ་འགྱུར་གྱི་ལུང་དང་ཕྱག་ཆེན་སོགས་ཞུ་སྟེ་ ཧད་འབྱུང་གནས་བྲག་ལ་ལོ་གསུམ་ཕྱོགས་གསུམ་གནང་། ལོ་ངོ་བརྒྱད་ཙམ་གྱི་རིང་སྐུ་མཚམས་བཞུགས་པའི་སྐབས་སུ་ཡང་ དཔོན་སློབ་ཚེ་རིང་དཔལ་འབྱོར་གྱིས་ ཞབས་དྲུང་གི་གཞི་ནོར་ཁང་གསུམ་འཕྲོག་བཅོམ་བྱས་རུང་ ད་དུང་ ཡིད་མི་ཚིམ་པར་ཕྱོགས་ལས་སྤྲུལ་སྐུ་ལ་མ་རངས་པར་བཞུགས་པས། གསུང་སྤྲུལ་རིན་པོ་ཆེ་སླར་ཀ་སྤུངས་སུ་བྱོན་ཏེ་སྤོས་སྡོང་དགོན་པར་བཞུགས་གདན་བཅགས་ཏེ་གདུལ་བྱའི་མཐའ་མ་བསྐྱངས། གོང་གཟིམས་གྱིས་མི་དབང་འཇིགས་མེད་དབང་ཕྱུག་དང་མཇལ་ཏེ་ཕྱོགས་ལས་སྤྲུལ་སྐུ་སླར་འབྲུག་ཏུ་བྱོན་ཆོག་པའི་གནང་བ་ཞུ་དོན་ལྟར་བཀའི་གནང་བ་གྲོལ་ཏེ།  ཧ་སྟི་ས་ནས་བརྒྱུད་ཀྲོང་གསར་མང་སྡེ་ཀུན་ དགའ་རབ་བརྟན་ལ་བྱོན། དེ་ཁར་ཞག་ཁ་ཤས་བཞུགས་པའི་སྐབས་ཕྱི་ལྟར་ཚད་པའི་ནད་ཀྱིས་བསྙུན་ཐེབས་པའི་ཚུལ་བསྟན་ཀྱང་། ནང་ལྟར་སྙིགས་མའི་འགྲོའི་རང་གཤིས་ངན་པས་ཐུགས་སུན་ཏེ་ ཀྲོང་གསར་སྟག་རྩེ་དགོན་པར་བྱོན་ཏེ། གསུང་གི་མཐའ་མ་ངེད་ཀྱི་གདུལ་བྱ་དེ་ཙམ་གྱིས་རྫོགས་པ་ཡིན། ད་ནི་ སྐྱེ་བ་ཡང་མི་ལེན་ཟེར་ཞལ་ཆེམས་རྒྱས་པར་གསུངས་ཏེ་དགུང་གྲངས་སོ་གཅིག་བཞེས་པའི་ས་གླང་སྤྱི་ ལོ་༼༡༩༤༩༽འི་རང་ཟླ་ ༥ པའི་ཚེས་ ༡ ལ་གཟུགས་སྐུ་ཞི་བའི་དབྱིངས་སུ་ཐིམ། 

'''དྲན་གསོ།''' སྔོན་ཕྱོགས་ལས་ཤཱཀྱ་བསྟན་འཛིན་གྱིས་བཞེངས་གནང་མི་ལྷ་ཁང་ཐོག་གསུམ་པ་ནང་རྟེན་དང་བཅས་པ་ འདི་ སྤྱི་ལོ་ ༡༩༣༢ ལ་ཕངས་སི་སི་འབད་མེ་ལྷའི་ཞལ་དུ་ཚུད་དེ་ཐལ་བར་བརླགས་ཚར་འདུག ཨིན་རུང་ ཤུལ་ལས་རིན་སྤུངས་སྤྱི་བླ་རྟ་མགྲིན་གྱིས་འགོ་འདྲེན་ཐོག་ཕྱོགས་ལས་ཡེ་ཤེས་དངོས་གྲུབ་ཀྱི་སློབ་མ་ཚུ་ གིས་ཉམས་གསོ་ལེགས་པར་ཞུས་ཏེ་སྐུ་གསུང་ཐུགས་ཀྱི་རྟེན་ཁྱད་འཕགས་ཅན་ལེ་ཤ་བཞུགས་སུ་གསོལ་ཏེ་གྲུབ་སྟོན་རབ་གནས་ཀྱང་རྒྱས་ཤིང་རྒྱས་པར་མཛད་གནང་འདུག དེ་ཡང་དབྱིན་ལོ་ ༡༩༧༠ དོན་གྲངས་ཤིག་ན་མེ་མཆོད་བཞེས་ནུག དེ་ལས་ལྷ་ཁང་མེ་མཆོད་བཞེས་པའི་སྐབས་ཀྱི་རྫོང་དཔོན་དོའུ་དཀྲུགས་ཟེར་མི་འདི་གིས་ལྷ་ཁང་གི་མཆོད་གཞི་ལས་ཟད་འགྲོན་བཏང་སྟེ་ལྷ་ཁང་ཐོག་གཅིག་མ་གཅིག་ བཞེངས་ཡོད་རུང་འདི་ནང་མཆོད་མེ་ཕུལ་མི་སྐུ་གཉེར་ཟེར་ཡང་མེད་པར་ཚར་གཅིག་བསྟན་པ་ཉམས་སག་སག་རང་འགྱོ་ནུག ཨིན་རུང་ང་བཅས་རང་བསོད་ནམས་བྲེ་གིས་རྫོགས་རུང་ཕུལ་གྱིས་མི་རྫོགས་ཟེར་དོ་བཟུམ་ད་ལྟ་རང་རེའི་མིག་གི་ཡུལ་དུ་མཇལ་ནི་ཡོད་པའི་བཤད་གྲྭ་འདིའི་སྐོར་མདོར་བསྡུས་ཙམ་ཞུ་ན། 

==== '''ཞིང་གཤེགས་དྲག་ཤོས་ཨྱོན་རྡོ་རྗེ་མཆོག།''' ====
མི་དབང་རྒྱལ་ཡུམ་ལྷན་རྒྱས་རྣམས་ཀྱི་ཡབ་ཞིང་གཤེགས་དྲག་ཤོས་ཨྱོན་རྡོེ་དང་ འགུབ་ལྷན་སྐྱེས་རྒྱལ་མཚན་གཉིས་བསྟུན་བགྲོས་མཛད་དེ་  དབྱིན་ལོ་༡༩༨༠༽འི་ལོ་ལས་བཟུང་ཕྱོགས་ལས་ཀྱི་གདན་ས་ གསང་ཆེན་ཆོས་འཁོར་གྱི་རྫོང་ཉམས་གསོའི་ཕྱག་ལས་འགོ་བཙུགས།  དབྱིན་ལོ་ ༡༩༩༡ གི་ལོར་ སུམ་ཅུ་རྩ་གསུམ་ལྷའི་ཕོ་བྲང་རྣམ་རྒྱལ་ཁང་བཟང་སའི་སྟེང་ན་བབས་པ་ལྟ་བུའི་གཙུག་ལག་ཁང་གང་བས་མཛེས་པ་འདི་བཞེངས་གནང་འདུག   

'''དཔལ་ལྡན་འབྲུག་པའི་གདན་ས་གསང་ཆེན་ཆོས་འཁོར།'''

སྐུ་རྟེན་གྱི་རིགས་ སྟེང་ཐོག་བླ་མའི་ལྷ་ཁང་གི་ནང་དུ་ཞབས་དྲུང་རིན་པོ་ཆེ་དང་ཕྱོགས་ལས་སྤྲུལ་སྐུ་རིམ་བྱོན་གྱི་སྐུ་འབག་བྱིན་ཅན་ཚེ་ལྷ་རྣམ་གསུམ་ཀྱི་སྐུ་འདྲ་  རྒྱལ་ཆེན་རྣམ་ཐོས་སྲས་དང་ཚེ་རིང་མཆེད་ལྔའི་སྐུ་འདྲ་སོགས་མང་པོ་ཡོད། ཐོག་འོག་མའི་ནང་མི་དབང་རྒྱལ་བཙུན་ལྷན་རྒྱས་རྣམས་ཀྱིས་སྦྱིན་བདག་མཛད་དེ་རྒྱུ་གསེར་ཟངས་ལས་གྲུབ་པའི་ གུ་རུ་སྣང་སྲིད་ཟིལ་གནོན་གྱི་སྣང་བརྙན་ཆེན་པོ་ཐོག་ཚད་མས་གཙོས་ སྤྲུལ་པའི་གུ་རུ་མཚན་བརྒྱད། སྤྱན་རས་གཟིགས། རྒྱལ་བ་བྱམས་པ་ལ་སོགས་པའི་སྐུ་རྟེན་གྱི་རིགས་ ཞལ་མཇལ་བ་ཙམ་གྱིས་ངན་སོང་གི་སྐྱེ་སྒོ་གཅོད་དེ་ཐར་པའི་ས་བོན་རྒྱུད་ལ་བསྐྲུན་ནུས་པའི་བྱིན་རླབས་ཅན་རྣམས་ཀྱི་གཟུངས་གཞུག་གདུང་རིང་བསྲེལ་ལ་སོགས་པའི་རིགས་ ༧སྐྱབས་རྗེ་ རྗེ་མཁན་རིན་པོ་ཆེ་ཁྲི་རབས་ ༧༠ པ་འཇིགས་མེད་ཆོས་གྲགས་མཆོག་གིས་ཕུལ་གནང་འདུག། གཡས་ཕྱོགས་སུ་དཔལ་མགོན་ལྕམ་དྲལ་གྱི་མགོན་ཁང་བརྗིད་ཉམས་ཅན་དང་། ལྷ་ཁང་གོང་འོག་གཉིས་ཀྱི་གྱང་ངོས་སུ་ཐུབ་དབང་གནས་བཅུ་དང་བཀྲ་ཤིས་ཚེ་རིང་མ་ལ་སོགས་པའི་ལྡེབས་རིས་གསེར་རིས་ཅན་རྣམས་ཀྱང་ལྷ་བྲིས་མཁས་མཆོག་ཚོས་བཞེངས་གནང་ཡོད་པ་མ་ཚད་ མཆོད་ཆས་དང་མཆོད་རྫས་ཀྱི་རིགས་ ཡབ་ཞིང་གཤེགས་རང་གི་སྐུ་སྒེར་ཕྱག་མཛོད་ནས་ཟད་འགྲོན་ཕངས་མེད་བཏང་སྟེ་  གཙུག་ ལག་ཁང་ཕྱི་ཁྱམས་དང་བཅས་རྩ་བ་ནས་ཉམས་གསོ་ལེགས་པར་གྲུབ་པའི་དགའ་སྟོན་རབ་གནས་རྟེན་འབྲེལ་འདི་ཡང་དབྱིན་ལོ་ ༡༩༩༡ ཟླ་ ༥ པའི་ཚེས་ ༢༨ རང་ལུགས་ས་ག་ཟླ་བའི་ཡར་ཚེས་ ༡༥ འི་དུས་ཆེན་དང་བསྟུན་ འབྲུག་གི་སྐྱབས་རྗེ་རྗེ་མཁན་ཁྲི་རབས་ ༦༩ པ་ ཞིང་གཤེགས་དམ་པ་དགེ་འདུན་རིན་ཆེན་མཆོག་གདན་འདྲེན་ཞུས་སྟེ་བཀྲ་ཤིས་པའི་རབ་གནས་རྒྱས་ཤིང་རྒྱས་པ་ཉིན་གྲངས་གསུམ་གྱི་རིང་གནང་སར་ སྐུ་མགྲོན་གྱི་གཙོ་བོ་སྤྱི་ནོར་དམ་པ་མི་དབང་འབྲུག་རྒྱལ་བཞི་པ་དང་མི་དབང་རྒྱལ་བཙུན་ལྷན་རྒྱས་སྲས་སྲོས་དང་བཅས་ཆིབས་བསྐྱོད་གནང་ཡོད་པ་མ་ཚད་ མི་དབང་མངའ་བདག་རྒྱལ་པོའི་ཞབས་ལས་ རབ་གནས་ཀྱི་རྟེན་འབྲེལ་མཛད་སྒོ་ཉིན་གསུམ་པར་ ཡབ་རྗེ་ཞིང་གཤེགས་དྲག་ཤོས་ཨྱོན་ རྡོ་རྗེ་ལ་དཔོན་གཉིས་སྐལ་མའི་གོ་གནས་འབུ་རས་དམར་པོ་དཔའ་རྟགས་བཅས་གནང་འདུག ཡབ་རྗེ་ མཆོག་ལ་སྔར་ནས་ཐུགས་འདོད་ཡོད་པ་ལྟར་ ཕན་བདེའི་གཞི་མ་རྒྱལ་བའི་བསྟན་པ་ཡུན་རིང་གནས་པའི་ཐབས་སུ་ཐུགས་བཞེད་རྒྱ་ཆེ་ས་ལས་བཞེས་ཏེ་ གསང་ཆེན་ཆོས་འཁོར་གྱི་གནས་ཆེན་འདིར་ ཐོག་མར་དགེ་སློང་ཞལ་གྲངས་ ༢༥ བྱས་པའི་བཤད་གྲྭ་ཞིག་ དབྱིན་ལོ་ ༡༩༩༡ ཟླ་ ༥ པའི་ཚེས་ ༢༨ རང་ ལུགས་ས་ག་ཟླ་བའི་ཡར་ཚེས་ ༡༥འི་དུས་ཆེན་དང་བསྟུན་གཞི་བཙུགས་གནང་བའི་ཉིན་ཐོག་མའི་ཆོས་ ཐུན་ཡང་ ༧སྐྱབས་རྗེ་དགེ་འདུན་རིན་ཆེན་དཔལ་བཟང་པོའི་ཞབས་ནས་ཤེས་རབ་འཕེལ་བའི་ཐབས་ རྗེ་བཙུན་འཇམ་པའི་དབྱངས་ཀྱི་བསྟོད་པ་གང་བློ་མའི་ཐོག་ནས་གནང་བ་དེ་ནས་བཟུང་ད་ཚུན་གྱི་རིང་དགེ་འདུན་པའི་ཞལ་གྲངས་ལོ་རེ་བཞིན་དུ་ཡར་སེང་སོང་སྟེ་ རིག་གནས་གཞུང་ལུགས་དང་བཅས་པ་འཆད་རྩོད་རྩོམ་གསུམ་གྱི་སྒོ་ལས་རྒྱལ་བའི་བསྟན་པ་སྤྱི་དང་བྱེ་བྲག་དཔལ་ལྡན་འབྲུག་པའི་རིང་ལུགས་འཛིན་སྐྱོང་སྤེལ་གསུམ་གྱི་ཐོག་ལས་དར་ཤིང་རྒྱས་ཏེ་གནས་ཡོད་མི་འདི་ཡང་ གཙོ་བོ་འབྲུག་རྒྱལ་ཁབ་འདི་ནང་ཞི་བདེ་དང་དགའ་སྐྱིད་བྱུང་ཐབས་ལུ་དུས་ནམ་ཡང་རྣམ་དཀར་དགེ་བའི་ཕྱག་ལས་གནང་ནི་ལུ་ཐུགས་ཀྱི་གདིང་ལས་རང་སྤྲོ་བ་དཔག་ཏུ་མེད་པར་བཞེས་བཞུགས་མི་ཡབ་རྗེ་ ཞིང་གཤེགས་དམ་པ་དྲག་ཤོས་ཨྱོན་རྡོེའི་སྐུ་དྲིན་ཉག་ཅིག་ཡིན་པར་ཁུམས་སོ།།

ཞེས་པའང་རང་ལུགས་ ལྕགས་བྱི་ཟླ་དྲུག་པའི་ཡར་ཚེས་བཞིའི་ཉིན་བདེན་བཞི་ཆོས་འཁོར་བསྐོར་བའི་དུས་ཚོད་བཟང་པོར་སྒྲིག་པ་པོ་ནི་ཕྲན་ཟླ་བ་ནོར་བུའོ།།  

ཤར་རི་ཡི་རྩེ་ལས་ཤར་བའི། །མདངས་ཆེ་བའི་དཀར་གསལ་ཟླ་བ། །ལྷོ་འཛམ་གླིང་མུན་པའི་སྨག་རུམ། །

མ་ལུས་པ་སེལ་བའི་ཆེད་དུ། །ནུབ་རྒྱ་མཚོ་བསྲུབས་ལས་བྱུང་བ། །སྤྱིར་སྐྱེ་འགྲོ་ཡོངས་ཀྱི་བསོད་ནམས། །

བྱང་ཁ་བའི་ལྗོངས་ནས་འཁྲུངས་པའི། །བྱིན་ཆེ་བའི་ངག་དབང་རྣམ་རྒྱལ། །ལྷོ་མོན་པ་ཡོངས་ཀྱི་སྐྱིད་སྡུག །

མ་ལུས་པ་སེལ་བའི་ཆེད་དུ། །ཐུགས་བྱམས་བརྩེའི་ངང་ནས་བྱོན་པ། །ནང་འབྲུག་མི་ཡོངས་ཀྱི་བསོད་ནམས། ། 

བཀའ་དྲིན་ཆེ།</text>
      <sha1>4i7qb87xyjjgwcsmh05l9hkgnmwo5rl</sha1>
    </revision>
  </page>
</mediawiki>