လင်ႇၵႃႇသိပ်းႁူဝ်

<mediawiki xmlns="http://www.mediawiki.org/xml/export-0.11/" xmlns:xsi="http://www.w3.org/2001/XMLSchema-instance" xsi:schemaLocation="http://www.mediawiki.org/xml/export-0.11/ http://www.mediawiki.org/xml/export-0.11.xsd" version="0.11" xml:lang="shn">
  <siteinfo>
    <sitename>ဝီႇၶီႇပပ်ႉ</sitename>
    <dbname>shnwikibooks</dbname>
    <base>https://shn.wikibooks.org/wiki/%E1%81%BC%E1%82%83%E1%82%88%E1%82%81%E1%80%B0%E1%80%9D%E1%80%BA%E1%82%81%E1%82%85%E1%81%B5%E1%80%BA%E1%82%88</base>
    <generator>MediaWiki 1.47.0-wmf.10</generator>
    <case>first-letter</case>
    <namespaces>
      <namespace key="-2" case="first-letter">သိုဝ်ႇၶၢဝ်ႇ</namespace>
      <namespace key="-1" case="first-letter">ၶိုၵ်ႉတွၼ်း</namespace>
      <namespace key="0" case="first-letter" />
      <namespace key="1" case="first-letter">ဢုပ်ႇၵုမ်</namespace>
      <namespace key="2" case="first-letter">ၽူႈၸႂ်ႉတိုဝ်း</namespace>
      <namespace key="3" case="first-letter">ဢုပ်ႇၵုမ် ၽူႈၸႂ်ႉတိုဝ်း</namespace>
      <namespace key="4" case="first-letter">ဝီႇၶီႇပပ်ႉ</namespace>
      <namespace key="5" case="first-letter">ဢုပ်ႇၵုမ် ဝီႇၶီႇပပ်ႉ</namespace>
      <namespace key="6" case="first-letter">ၾၢႆႇ</namespace>
      <namespace key="7" case="first-letter">ဢုပ်ႇၵုမ် ၾၢႆႇ</namespace>
      <namespace key="8" case="first-letter">မီႇတီႇယႃႇဝီႇၶီႇ</namespace>
      <namespace key="9" case="first-letter">ဢုပ်ႇၵုမ် မီႇတီႇယႃႇဝီႇၶီႇ</namespace>
      <namespace key="10" case="first-letter">ထႅမ်းပလဵတ်ႉ</namespace>
      <namespace key="11" case="first-letter">ဢုပ်ႇၵုမ် ထႅမ်းပလဵတ်ႉ</namespace>
      <namespace key="12" case="first-letter">လွင်ႈၸွႆႈထႅမ်</namespace>
      <namespace key="13" case="first-letter">ဢုပ်ႇၵုမ် လွင်ႈၸွႆႈထႅမ်</namespace>
      <namespace key="14" case="first-letter">ပိူင်ထၢၼ်ႈ</namespace>
      <namespace key="15" case="first-letter">ဢုပ်ႇၵုမ် ပိူင်ထၢၼ်ႈ</namespace>
      <namespace key="102" case="first-letter">ပပ်ႉတူမ်ႈႁုင်</namespace>
      <namespace key="103" case="first-letter">ဢုပ်ႇၵုမ် ပပ်ႉတူမ်ႈႁုင်</namespace>
      <namespace key="108" case="first-letter">ထရၼ်ႇသ်ဝီႇၶီႇ</namespace>
      <namespace key="109" case="first-letter">ဢုပ်ႇၵုမ် ထရၼ်ႇသ်ဝီႇၶီႇ</namespace>
      <namespace key="110" case="first-letter">ဝီႇၶီႇလုၵ်ႈဢွၼ်ႇ</namespace>
      <namespace key="111" case="first-letter">ဢုပ်ႇၵုမ် ဝီႇၶီႇလုၵ်ႈဢွၼ်ႇ</namespace>
      <namespace key="112" case="first-letter">ပၢႆး</namespace>
      <namespace key="113" case="first-letter">ဢုပ်ႇၵုမ် ပၢႆး</namespace>
      <namespace key="710" case="first-letter">TimedText</namespace>
      <namespace key="711" case="first-letter">TimedText talk</namespace>
      <namespace key="828" case="first-letter">မေႃႇၵျူး</namespace>
      <namespace key="829" case="first-letter">ဢုပ်ႇၵုမ် မေႃႇၵျူး</namespace>
      <namespace key="1728" case="first-letter">Event</namespace>
      <namespace key="1729" case="first-letter">Event talk</namespace>
    </namespaces>
  </siteinfo>
  <page>
    <title>လင်ႇၵႃႇသိပ်းႁူဝ်</title>
    <ns>0</ns>
    <id>4748</id>
    <revision>
      <id>11984</id>
      <parentid>11982</parentid>
      <timestamp>2026-07-12T14:31:20Z</timestamp>
      <contributor>
        <username>Saimawnkham</username>
        <id>8</id>
      </contributor>
      <origin>11984</origin>
      <model>wikitext</model>
      <format>text/x-wiki</format>
      <text bytes="106705" sha1="k7h11dy8yw4xgml6ymgyhjx28zrfgj4" xml:space="preserve">'''လၢင်ႇၵႃႇသိပ်းႁူဝ် ( ႁိုဝ် ) ၸိူင်းရႃႇမယꧣ

ပေႃးဝႃႈ လၢင်ႇၵႃႇသိပ်းႁူဝ် ၼႆ တေဢွၼ်ၵၼ်ၵႂႃႇ ႁၼ်မႅၼ်ႈၽဵင်းၵႂၢမ်း ၸၢႆးသၢႆမၢဝ်း ႁွင်ႉဝႆႉ ဢၼ်ဝႃႈ * ပိူၼ်ႈဝႃႈ ႉႉႉႉ လၢင်ႇၵႃႇသိပ်းႁူဝ် ၼႃႈမၼ်း ၼမ်ၼႃႇ ႉႉႉႉႉႉႉႉ * ၼၼ်ႉ ယူႇ ။ ၼႂ်းၽဵင်း ၼၼ်ႉ တႄႉ ဢဝ် လၢင်ႇၵႃႇသိပ်းႁူဝ် မႃးတႅၵ်ႈၼိူင်း တင်း ၼၢင်းယိင်း ၵေႃႉၸ်ႂၼမ် ဝႆႉ ၸူႉ လၢႆၵေႃႉ ၼၼ်ႉ ယဝ်ႉ ။ 

တီႈတေႉ ၼႂ်းၸိူင်း လၢင်ႇၵႃႇသိပ်းႁူဝ် ဢၼ်ၵေႃႉ ၸိုဝ်ႈ ၻသၵီရိ ၼႆႉ ပႅၵ်ႉသမ်ႉဝႃႈ ႁူဝ် ( ၼႃႈ ) မၼ်းၼမ် မီးပဵၼ်သိပ်းလုၵ်ႈ သေတႃႉမၼ်း ဢမ်ႇ ၸႂ်ႈ ၵူၼ်း( ၽၢႆး )ၸႂ်ၼမ် ။ မၼ်းပဵၼ် ၸဝ်ႈဝွေုင်ႉ မိူင်းလင်ႇၵႃႇ ( မိူင်းၽၢႆး ) ဢၼ်မေႃႁၵ်ႉ မေႃဝႆႉ ၵႃႊၶၼ်ထိုင် ၵေႃႉဢၼ်မၼ်းႁၵ်ႉ ၼၢင်းသီႇတႃႇ ၼၼ်ႉ သေ ပႅၵ်ႉသမ်ႉ ဝႃႈ လႆႈထုၵ်ႇ ပိုၼ်ႉပႅတ်ႈ ဝၢႆႇၽၢတ်ႈ ၵႂႃႇသေတႃႉ ဢမ်ႇဢဝ် လၢႆးႁၢဝ်ႈ လၢႆးၵျၢမ်း ။ ၵူၺ်း ဢဝ်လၢႆးဢူၼ်ႈဢွၼ်ႇ လၢႆးၵွမ်း ၼွမ်း သေ ႁူၺ်းသူၼ်း ဢုပ်ႇလၢတ်ႈ ႁႂ်ႈၶိုၼ်းႁၵ်ႉလႆႈမၼ်းမႃး ၼၼ်ႉ ယဝ်ႉ ။ လိုၼ်းသုတ်း ၵေႃႈ တွၼ်ႈတႃႇ ၼၢင်းယိင်း ၵေႃႉဢၼ်မၼ်းႁၵ်ႉၼၼ်ႉ သေ လႆႈၶၢမ်ႇပဵၼ်သိုၵ်း ပဵၼ်သိူဝ် ယဝ်ႉ ဝၢၼ်ႈမိူင်းပေႃး လႆႈပဵၼ်ၽိုၼ်း ပဵၼ်ၾႆး ၵႂႃႇသဵင်ႈၵွၼ်ႇ ယဝ်ႉ ။ 

ၸိူင်းလၢင်ႇၵႃႇသိပ်းႁူဝ်ၼႆႉ ပေႃးတူၺ်း ၼႂ်းၽိုၼ်လိၵ်ႈလူင် တႆး ႁဝ်း ၵမ်ႈၼမ်ၼႆ တေလႆႈႁၼ် ဝႃႈ ပဵၼ်ထမ်းတြႃးၸၢတ်ႈဢလွင်း ဢၼ်ၽြႃး ပဵၼ်ၸဝ်ႈ ႁေႃး လၢတ်ႈမႃး ၼႆ ယဝ်ႉ ။ 

တီႈတေႉ ၸိူင်း ရႃႇမယꧣ လၢင်ႇၵႃႇ သိပ်းႁူဝ် ၼႆႉ ၵေႃႉတႅမ်ႈမၼ်းပဵၼ် ၵၿျႃႇၵဝိ ဝႃႇလႃႉမီႉၵီႇ ယဝ်ႉ ။ ငဝ်ႈပပ်ႉမၼ်းပဵၼ်ၽႃႇသႃႇ သၵ်ႉၵတ သေ ၶဝ်ႈပႃးဝႆႉ ၵႃႇထႃႇ သွင်ႁဵင်သီႇပၢၵ်ႇ လႄႈ တွၼ်ႊၵၼ်ႊ ၸဵတ်းတွၼ်ႊ ယဝ်ႉ ။ ၽိုၼ်လိၵ်ႈၼႆႉ လႅပ်ႈတေတႅမ်ႈဝႆႉမိူဝ်ႈ ၸူဝ်ႈပၢၵ်ႇပီႊ (BC 6 – BC 3 ) ၼၼ်ႉ ၼႆ ၸဝ်ႈ ႁူႉမေႃၶဝ် လၢမ်းၶၢတ်ႈဝႆႉယူႇယဝ်ႉ ။ ၸိူင်းသၢင်း ရႃႇမယꧣ ၼႆႉ လုၵ်ႉမိူင်းဢိၼ်ႇတိယ သေ လႅပ်ႈတေ ၽႄႈ တိူၼ်းမႃး ၽၢႆႇမိူင်းဝၼ်းဢွၵ်ႇ ဢေးသျႃး ဢၼ်ပဵၼ် မိူင်းႄၶႇ မိူင်းၽၢင်တီႉပႅတ်ႉ မိူင်းမၢၼ်ႊ မိူင်းတႆး မိူင်းလၢၼ်ႉၸၢင်ႉ (လၢဝ်း) မိူင်းလၢၼ်ႉၼႃး ( မိူင်း ထႆး) မိူင်းၵမ်ႇပေႃးတီးယႃး မလေး ဢိၼ်ႇတူဝ် ဝႅတ်ႉၼမ်း ၵျႃႇပၢၼ်ႇ ၶဝ် မိူဝ်ႈၸူဝ်ႈပၢၵ်ႇပီႊ ၼိူင်ႈ ၼၼ်ႉ ၼႆဢွၼ်လၢမ်းၶၢတ်ႈဝႆႉယူႇယဝ်ႉ ။ 

ဢိင်ဢဝ်ၸိူင်းရႃႇမသေ မိူင်းလႂ်မိူင်းၼၼ်ႉဢဝ်ႁဵတ်း ပဵၼ် ၾူးၸိူင်း ၾၢင်ႁၢင်ႊ ၸိူဝ်ႉၶိူဝ်း ၽႃႇသႃႇ ၸဝ်ႈ ၵဝ်ႇသေ မႄးတႅင်ႇတႅမ်ႈ ပၢၼ်းပၢႆး ၸွမ်း ႄလႈ ပိူင်သၢင်ႇ ၸိူင်းရႃႇမ ၵေႃႈ မီးၵႂႃႇ ၵူႊပိူင် သေ ၼႂ်းလိၵ်ႈလၢႆး လၢင်ႇၵႃႇ ဝွၵ်းလႂ် ၽဵင်းၵႂၢမ်းလႂ် ၸိူင်း ၼႄႁၢင်ႊလႂ် တႅမ်ႈႁၢင်ႊ( ပၢၼ်းသီ) လႂ် ၸၢင်ႈမႆႉ ၶႅၵ်းမႆႉ သၢၼ်မႆႉ ၶိူင်ႈယူၼ်း ၶဝ်လႂ် ၸၢင်ႈလိၼ် ၶွၵ်းၶႅၵ်း ၶဝ်လႂ် ၼႂ်းၵၢၼ်ပၢႆးမွၼ်း ၵူႊသမ်ႇသႅၼ်ပိူင် ၸိူဝ်းၼၼ်ႉ တေလႆႈႁၼ်လွၵ်းၸိူင်း ရႃႇမၶဝ် ဢဝ်တီႈယူႇဝႆႉယူႇယဝ်ႉ။ 

တီႈၼႂ်း တႆးႁဝ်းၵေႃႈ လိၵ်ႈလူင်လၢင်ႇၵႃႇသိပ်းႁူဝ် ၼႆႉ လႆႈႁၼ်မီးဝႆႉ လၢႆလၢႆၽိုၼ်သေ ၵေႃႉတႅမ်ႈမၼ်းၵေႃႈ လိူဝ်သေ ၸဝ်ႈၵၢင်းသိူဝ် ယင်း မီးထႅင်ႈလၢႆလၢႆၸဝ်ႈ တႅမ်ႈပဵၼ်ၽိုၼ်လိၵ်ႈလူင်ဝႆႉ တင်းၼမ် သေ ပဵၼ် လၢႆးၽႂ် ပိူင်မၼ်းဝႆႉယူႇ ယဝ်ႉ။

ၼႂ်းၽိုၼ်လိၵ်ႈလူင် ၼႂ်းမိူင်းတႆးၵူၺ်းဢမ်ႇၵႃး မိူင်းတႆးၶမ်ႈတီႈ မိူင်း သိပ်းသွင်ပၼ်းၼႃး မိူင်းလၢဝ်း မိူင်းထႆးၵေႃႈ မီးၽိုၼ်လိၵ်ႈ ဢၼ် တႅမ်ႈဝႆႆႉ ၸိူင်းလၢင်ႇ ၵႃသိပ်းႁူဝ်ၼႆႉ တင်းၼမ် တင်းလၢႆသေ ၽူႈ ၶူၼ်ႉ ၶႂႃႉ လမ်းတိုၼ်းလွင်ႈရႃႇမၵူႊမိူင်းမိူင်း ၶဝ် လႆႈ
လဵပ်ႈႁဵၼ်းဢိင်ဢဝ် တႅၵ်ႈ ထွင်ၵၼ် မႃးယူႇ ယဝ်ႉ ။ 
ၽိုၼ်လိၵ်ႈ လမ်းတိုၼ်း လွင်ႈရႃႇမယꧣ ၵေႃႈ ၼႂ်းတၢင်ႇၶိူဝ်း မိူၼ်ၸၢဝ်းမၢၼ်ႊ ၶဝ် မီးပဵၼ်လၢႆႊလၢႆႊၽိုၼ် ၵူၼ်းလမ်းတိုၼ်း မၼ်း မီးပဵၼ်လၢႆလၢႆၵေႃႉ သေတႃႉ ၼႂ်းပႃႇလိၵ်ႈလၢႆး တႆး ႁဝ်း တႄႉ ဢမ်ႇပႆႇႁၼ်ၽႂ်တူၵ်ႇ ၽႂ်လၢတ်ႈလႄႈ ႁဵတ်းႁႂ်ႈၵဝ်ၶႃႈ တိူဝ်းသူၼ်ၸႂ်ၼိူဝ် ၸိူင်းရႃႇမ ဢၼ် ပဵၼ်လင်ႇၵႃႇသိပ်းႁူဝ်ၼၼ်ႉမႃးယူႇယဝ်ႉ ။ 

ၼင်ႇသူၼ်ၸႂ် ၼၼ်ႉ ၵဝ်ၶႃႈ လႆႈၸွပ်ႇထၢမ် ၸဝ်ႈၸရေး ၶဝ် လၢႆလၢႆ ၵေႃႉ လွင်ႈပပ်ႉ ၽိုၼ်လင်ႇၵႃႇသိပ်းႁူဝ် မႃးတင်းႁိုင်ယဝ်ႉ ။ သၢင်ႇတေႃႇ ႄလႈ မိူဝ်ႈ ၵွၼ်ႇၽရႅၼ်ႉလိၵ်ႈလူင် တီႈမၢၼ်းတလေး ၼၼ်ႉ လႆႈထူပ်း တင်း ၸရေးမိူင်းၼၢႆး သေ လႆႈႁူႉဝႃႈ တီႈမိူင်းၼၢႆး မီးဝႆႉၼႆ လႄႈ ၸင်ႇ လႆႈပိုင်ႈၸရေး ၵၼ်ႇတမႃႇ ထုတ်ႇၵူးပၼ်ယဝ်ႉ။ ၽိုၼ်လိၵ်ႈ ဢၼ်လႆႈ မႃး တီႈမိူင်းၼၢႆး ၼႆႉ ၵေႃႉတႅမ်ႈမၼ်းပဵၼ်ၸရေး ပၢင်ႇ ပၢင်မူ တပႄး ၸဝ်ႈ မိူင်းၼွင် ၼႆယဝ်ႉ ။ ၼႂ်းလိၵ်ႈၼၼ်ႉ တႅမ်ႈဝႆႉဝႃႈ ယွၼ်ႉ ၽိုၼ်လိၵ်ႈၵဝ်ႇ ၼၼ်ႉ ပဵၼ်ၼမ်ႉၵႂၢမ်းသွင်ၵိဝ် ဢမ်ႇလီလူ ၼႆသေ မၼ်း ၸဝ်ႈၶိုၼ်း ဢဝ်ၼမ်ႉၵႂၢမ်းသၢမ်ၵိဝ် တႅမ်ႈဝႆႉ ဝႃႈၼႆ ၵူၺ်းႄလႈ ၵေႃႉတႅမ်ႈ ၽိုၼ် ငဝ်ႈမၼ်းတႄႉ ဢမ်ႇလႆႈႁူႉ။ 

ပဵၼ်ႁိုဝ်ၵေႃႈယဝ်ႉ ယွၼ်ႉလႆႈလူ လႆႈႁူႉ ၼမ်ႉၵႂၢမ်းလိၵ်ႈလူင်လၢင်ႇၵႃႇ ၸိူင်းရႃႇမ ဢၼ်ပဵၼ်ၽႆၢႇတႆး ႄလႈ ပဵၼ်ဢၼ်လႆႈၸူမ်းသိူဝ်း သေ ၶႂ်ႈၶိုၼ်း ယိုၼ်ႈမႅင်ႇ ထိုင် ႄလႈ ၸင်ႇလႆႈတႅမ်ႈလိၵ်ႈပိုတ်ႇ ၼႆႉၶႃႈ ယဝ်ႉ။ 

ၼႂ်းၽိုၼ်လိၵ်ႈလူင် ၼၼ်ႉ ႄၽဝႆႉ သိပ်းသွင် ၵၼ်ႊတွၼ်ႊ( ၶၢၼ်း )သေ တႅမ်ႈၽွၺ်း ဝႆႉႄလႈ တီႈၼႆ ႈႄတႉဢမ်ႇၸႅၵ်ႇတွၼ်ႊၵၼ်ႊ တေႁုပ်ႈ သေတႅမ်ႈဢဝ် လၢႆးပွတ်း မၼ်းၵူၺ်းယဝ်ႉ။ 

မိူဝ်ႈၵၢပ်ႈပၢၼ် ၸဝ်ႈဝွေုင်ႉ ၶုၼ်မႁႃႇဝမ်ႇသ ယၵ်ႉၶႃႉပိူင်ၸိုင်ႈ ႄလႈ ၸၼ်ႇတႃႉမုၵ်ႉၶီႇ မႁႃႇတေႇဝီႇ ၶဝ် ၽွင်းငမ်းမိူင်းလင်ႇၵႃႇသိင်းၶူဝ်ႇ ၼၼ်ႉ ဝၢၼ်ႈမိူင်း ၼိမ်ယဵၼ်ၵတ်းၸိုၼ်ႈ ဢမ်ႇမီးလိုမ်လႂ်တၵ်းတွၼ်း ၵျွၼ်းလႂ်တၵ်းတိူင်း မိူင်းလႂ်တၵ်းပဵင်း ဝဵင်းလႂ်တၵ်းထူး ၶုၼ်ၽလူး ၵုင်ႇ ၽုင်း ၶဵင်ႈၶႅင်ဝႆႉၼႆယဝ်ႉ။ သွင်ၸဝ်ႈ မီးလုၵ်ႈယိင်း ၸိုဝ်ႈသီရိမၢၼ်ႇ လႃႇ ၵေႃႉ ၼူၵ်ႈၼိၵ်ႈၽူမ်ၼႃၵျႃၼီႇ သီႇသင်ႈသၢမ်သွၺ်ႇ ဢယွၺ်ႇၼုပျုဝ်ႇ ၵူဝ်ႇယဵၼ်ႇၶမ်းၶဵၼ်ႇ ၼ
တွင်းသွင်ႇပဵမ်ႇၵႅမ်ႈ လဝ်းႁၢၼ်ႇပၢၼ်း သပိင်းယွင်ႇ ။ ယွၼ်ႉပဵၼ်ၶိူဝ်းသၢင် ၶူင်းၵၢင်လူင်းထုၼ်း တမ်ႈ ၵုၼ်ၵျွၼ်း သိင်းၶူဝ်ႇႄလႈ ပေႃႈႄမႈ ႁၼ်ၵႃႊလုၵ်ႈယႂ်ႇ ထူၼ်ႈဢူၼ်ဢိူၼ် ႁၢင်ႊၶိူင်ႇ ၼုပျူဝ်ႇ ပဵၼ်ၽႃလၢၼ်းမိူင်းဝႆႉ ၼင်ႇႁိုဝ်သၢႆၸိူဝ်ႉႁိူဝ်ႇငိူၼ်ႈၶိူဝ်း တၵ်း ႄၽႈ တိူၼ်းလိူင်ႇၼမ် မီးလုၵ်ႈယဝ်ႉၶႂ်ႈမီးလၢၼ် မီးလၢၼ်ယဝ်ႉ သမ်ႉၶႂ်ႈ မီးလိၼ်ပဵၼ်ၵေႃ တႅၼ်းႁေႃ ၶိူဝ်းမိူင်း သိုပ်ႇတူဝ်းပႂႃး တိုၵ်းသူၼ်း
ၼၢင်း ဢဝ်ၽူဝ်ၸူဝ်းသိူဝ်း သိုပ်ႇသၢႆၶိူဝ်း ပဵမ်ႇၶၢင်းသွင် ႁူမ်ႈမူၼ်ႊ ယဝ်ႉ ။ 

မိူဝ်ႈၸိူင်ႉၼၼ် ဢၵ်းတၵ်းဢိုင်တိုင် ထုၵ်ႇၶိုင်တၼ်းသႃႇ သီႇရိမၢၼ်ႇလႃႇ သပျႃႇၺူဝ်ႇၽူမ်ပျူဝ်ႇ ၵူဝ်ႇ ၼု ၼႃႈၶွင်ႇၸိုၼ်ႈလိူင်ႁမ်ႉတွၼ်းၵဝ်ႇႄလႈ ပႅင်း ၼၢင်းၵၢင်းၶၢဝ်သုတ်းႁုတ်း ၼုတ်းၵူမ်ယိင်းဝႅၼ်း ၵႅၼ်းတႃၵူၼ်း ၸၢႆး ငႃႈရၢႆးၽူမ်ၼၢင် သဝ်ႈပူႇမႆႈ ဝႆႉယဝ်ႉ ။ 

ၼေႃႇၸွၺ်ႉ မၼ်းၼၢင်း ဢမ်ႇၶႂ်ႈယူႇမူၼ်ႊ မေႇထုင်ႇ ၵႃႇမၵုင်ႇ မုင်ႇယဵမ်ႈ ၸၢႆႉဝိၼ်ႇၼႃႈ ဢမ်ႇၶႂ်ႈပူးဢိူၵ်ႇထင်ၼွၼ်း ငိၼ်းႁၢင်ႈ ဢဵတ်ႇသဵတ်ႇ လီႁင်ႈ မိူဝ်ႇၸၢၼ်ႈ ၸင်းၸိုတ်ႇ ၵူၺ်းၶႂ်ႈပိုတ်ႇၸႂ် သဝ်း ၼၢင် ႁၢင်းၶိင်း ၼိူဝ်ႁေႃၼၼ်းလႃး ပုင်ၶျႃးယူႇဢိူမ်ႈ ၵွၺ်းတူဝ် တေႃႇထဝ်ႈ ၼႆသေ လႃးလႃး မဝ်ႇဢဝ် မဝ်ႇဢိူဝ်ႈ သၢႆၵႂၢမ်းႁၢင်းသႅင် သွင်ပႃး ။ 

လိုၼ်းလႃးဝၢႆးမႃး ၼၢင်းယွၼ်းၶႂၢင်ႉတီႈၸဝ်ႈပေႃႈၸဝ်ႈမႄႈ တႃႇမိူဝ်း သဝ်းသၢင်ႈ ၼႂ်းထိူၼ်ႇပႃႇလူင်ႊတေႃး ၽိုၵ်းၵမ်ၽႃႇဝၼႃႇ ယူႇလိူၺ်ႈ သိၼ်ထမ်းတြႃး ၼႆယဝ်ႉ။ ၼၢင်းၶဝ်ႈ ထိူၼ်ႇ မိူဝ်းဢဝ် ၶေႃႈသင်ႇသွၼ် တီႈ ရသေႉၵေႃးတမ်ႇ သေၵေႃႈ ၽိုၵ်းၵမ်ယူႇမႃးၶၢဝ်းႁိုဝ် ။ မီးဝၼ်းၼိူင်ႈ ၽီသၢင်လူင် လူင်းယၢၼ်တၼ်းသဝ်း ငဝ်းလၢႆၼၼ်းထီး 
ၽုင်ႇသၢင်မိူင်း လူင်းသူႇ ဢရွင်ႇသွင်ႇႁိူဝ်ႈ ၽိူဝ်ႈတူဝ်တူၼ်တွင်း တုမ်ႇတွၵ်ႇတဵၼ်းလႅင်း ၵႂႃႇသၢင်းဝၢင်း ။ 

ၼၢင်းၵေႃႈ ၸင်ႇပိတ်းဢဝ်မၢၵ်ႇမူင်ႈ သၢမ်ၵိင်ႇ ။ ၵိင်ႇၼိူင်ႈ မီးမၢၵ်ႇမၼ်း သိပ်းလုၵ်ႈ ။ ၵိင်ႇၼိူင်ႈ သမ်ႉမီးလုၵ်ႈလဵဝ် ပဵၼ်လုၵ်ႈႁူၺ်ႇယႂ်ႇ ။ ထႅင်ႈၵိင်ႇ ၼိူင်ႈသမ်ႉ လုၵ်ႈလဵဝ်ႁွမ်ႁူၺ်း ႁၢင်ႊလီ ။ ၼၢင်းဢဝ်သၢၵ်ႈၶုၼ်သၢင် ႁႂ်ႈ ဢၼ် ၽီပူင်လူင်းပၼ် လၢင်း ၸၢႆး ၶမ်းႁၢႆး ၼေႃႇငဝ်းသႅင်မႅင်ႇ ႁႂ်ႈ ။ ပေႃးယဝ်ႉ ၼေႃႇၸွႆႉ ၸင်ႇတၵ်း ဝႆဝိၼ်ႇ ပိၼ်ႇဢဝ် ၸုတ်ႇလုတ်ႇလင် ၽူမ်ၼုၽိူၵ်ႇၸိုၼ်ႈ မိုၼ်ႈၼေႃႇၸူးၸဝ်ႈသၢင် မိူင်း ။ ၸင်ႇတၵ်း ပိုတ်ႇ ပၢၵ်ႈ သိူဝ်ႈမွၵ်ႇၶူဝ်းငဝ်း လွင်သၢင်းဝၢင်းႄလႈ မိုဝ်းၶႂႃၶုၼ်သၢင် ဝၢင်း ၽၢင်ၼိူဝ်လင်ၼုတ်းၶၢဝ်ၵူမ်ၼူၼ်း လုပ်ႈလင်ၽၢင်း သၢမ်ပွၵ်ႈ ။ 

ဢမ်ႇႁိုင် ၼၢင်း တႄႇသၼ်ႇထေႇ ၵိူတ်ႇမႃး လုၵ်ႈသၢမ်ၵေႃႉ ။ ၽွၼ်းပၢင်ႈ မၢၵ်ႇမူင်ႈသိပ်းလုၵ်ႈၼၼ်ႉ ၵိူတ်ႇမႃး လုၵ်ႈၵေႃႉယႂ်ႇ လင်ႇၵႃႇသိပ်းႁူဝ် တသၵီရိ ။ ၽွၼ်ႈပၢင်ႈ မၢၵ်ႇမူင်ႈလုၵ်ႈလူင် ၼၼ်ႉ ပဵၼ်မႃး ၵေႃႉၵၢင် ၵုင်ႇၽၵၼ်ႇၼႃႇ ၵေႃႉမႃႇမၼ်ႈႁႅင်းၵိုၼ်း ။ မၢၵ်ႇမူင်ႈႁူၺ်ႇႁွမ် ၼၼ်ႉ ပဵၼ် မႃး ပီၸိရၼႃႇ ၵေႃႉၵွၺ် ၽူႈ မီးသိၼ်သီႇလသမႃႇထီႉ ပၺ်ၺႃႇယႂ်ႇ ။  

သၢမ်ၸဝ်ႈ ယႂ်ႇဝၢင်ႈထမ်ႈၵၢင်ဢူးမၢင်ႇ လုၵ်ႈၵူင်ႇပႄလွၺ်လႃးသေ ၼုတ်းၸွမ်းလိူၼ်ပီႊ လီၸွမ်းလိူၼ်လၢဝ် ၶၢဝ်ၸွမ်းဢုတူး ၼူးၸွမ်း ၼူမ်းဝၢၼ်လႃၶမ်း ယႂ်ႇသုင်မႃးဢိုင်တိုင် ။ ထၢမ်ႁႃဢူႈပေႃႈ လႆႈႁူႉဝႃႈ ပဵၼ်သၢင်လႄႈ ၵၢဝ်ႇႁႃ ။ ၶုၼ်သၢင်လူင်းထိုင် သၢမ် ၸဝ်ႈ ယွၼ်းၽွၼ်း ။ သၢင်ၸင်ႇပၼ်သူး တီႈ ၵေႃႉပီႈ တသၵီရိ လိူဝ်သေ ၵူၼ်း ၊ လိင်း ႄလႈ လၢပ်ႇၸၢၵ်ႈ တေဢမ်ႇလႆႈတၢႆယွၼ်ႉ ၶိူင်ႈၼၢၵ်ႈသင်သေ ႁႂ်ႈလႆႈ ပေႉ ပုၼ်ႈ ၵွၼ်းပွင်ႁူမ်ႇလွမ်ႉ ၶူင်းၵၢင် ။ တႃႇၵေႃႉယီႈသမ်ႉ ပၼ်ၽွၼ်း ယႃႇ ႁႂ်ႈလႆႈ မီးလွင်ႈၶီၸႂ် သုၵ်ႉၸႂ်သေ ႁႂ်ႈလႆႈလိုမ်းၸႂ်လိုမ်းၶေႃး ၼွၼ်းဝၢၼ် သိပ်းသွင်လိူၼ် ၸင်ႇတိုၼ်ႇ ၼိူင်ႈသွပ်ႉ ။ တႃႇ ၼွင်ႉသၢမ်သမ်ႉ ႁႂ်ႈလႆႈ ႁဵတ်းၵေႃႉ ၽူႈလီၵူၼ်းမျၢတ်ႈ သေ ႁႂ်ႈလႆႈဢဝ်ပေႉ ႄၽးၶဵၼ်တင်းလၢႆ ၼႆ ယဝ်ႉ။ 

ဝၢႆးၼၼ်ႉ သၢမ်ၼေႃႇ ဢဝ်လင်ၸွပ်ႇ ႄမႈၸဝ်ႈယဝ်ႉ မိူင်းႁႃ ၸဝ်ႈပူႇ ၸဝ်ႈ ၼၢႆး ၶဝ်သေ ၸဝ်ႈလူင် လင်ႇၵႃႇသိပ်းႁူဝ် ၻသၵီရိ လႆႈၽွင်း ငမ်းႁဵတ်းဝွေႃင်ႉ မိူင်းသီႇႁူဝ်ႇ သိင်းၶူင်ႇ ယဝ်ႉ။ ၸဝ်ႈသၢမ် ပီႇၸိရၼႃႇ ပဵၼ်ၵႅမ်မိူင်းယဝ်ႉ ။ လင်ႇၵႃႇသိပ်းႁူဝ် ၵွၼ်းပွင် မိူင်းသိင်းၶူဝ်ႇ တင်းၵႃႊ သိပ်းပၢႆႁူၵ်းတိူင်း တင်းမိူင်းဢမ်ႇၵိုတ်း ဝၢင်းၼွမ်းၵွမ်းသဵင်ႈ ၽႅဝ်ၸဵမ် သၢင်လိၼ်တိၼ်လွၺ်သဝ်မိူင်း ၸိုင်ႈလိုမ်တိူင်းသူႇရႃႇ ၽႅဝ်ထိုင် ၼၵေႃႇ ဢူးရႃႇ ဝရုင်ႇၼႃႇ ၵူႊတီႈ
ၼမ်ၼႃႇမႃးၵွမ်း ။ 

ၸဝ်ႈၶုၼ်သူႇရႃႇ ဢဝ်လုၵ်ႈယိင်း ဢၼ်ၸိုဝ်ႈ ၼၢင်းဝိမႃႇလႃႇ ( မၼေႃႇ ႁရီ ) မႃးသၢၵ်ႈႄလႈ ၸဝ်ႈလင်ႇၵႃႇ ဢဝ်ၶိုၼ်ႈပဵၼ် ၼၢင်းတိုဝ်း ၸုမ်ႈ သေ မီးမႃးလုၵ်ႈၸၢႆး ၵေႃႉၸိုဝ်ႈ မေႇၷၼႃၻ (ၸၼ်ႇၻသူႇရႃႇ ) ။ 

မီးဝၼ်းၼိူင်ႈ ၸဝ်ႈလင်ႇၵႃႇ ၶီႇၽွင်ႇၸၵ်ႉၵျႃႇ မိၼ် ၵၢင်ႁၢဝ် ၽႅဝ်ထိုင် မိူင်းသုၵိင်ႇတႃႇ တီႈၶုၼ်လိင်း မၵြꩪရႃႇၸႃႇ ၿႃႇလီႇ ၽွင်းငမ်း ၼၼ်ႉ ။ မႅၼ်ႈ မိူဝ်ႈ ၽွင်း ၶုၼ်လိင်းတိုၵ်ႉသၢႆႇႁူဝ်ဢၢပ်ႇၼမ်ႉ တီႈပၢင်ႇလၢႆႇယူႇ ၼၼ်ႉ လႆႈႁၼ် ၸဝ်ႈလင်ႇၵႃႇပူၼ်ႉၶၢမ်ႈႁူဝ်မၼ်းႄလႈ &quot; &quot; ဢရၵႃး ဢေႁေႉ ၵေႃႉၼႆႉ မၼ်းပဵၼ်ၽီ သင် ၵူၼ်းသင် ယင်းမႃးၸွၵ်ႈၵႃး ၵၼ် မလေႇ မလႃႇ ၼပ်ႉတေႃႈၶီႇၽွင်ႇ ယွင်ႇၶိုၼ်ႈၾႃႉ ပႃႉၵႂႃႇၼိူဝ်ႁူဝ်ၵဝ် ၵဝ်တၵ်း မိူဝ်းငမ်ၵမ်ဢဝ် သိပ်း ႁူဝ်ၶိင်းမႂ်း တိုတ်ႉတွၼ်သေၶေႃး ထိုမ်ႈတူၵ်း လူင်းမိူဝ်းၸၢတ်ႈ ႁႂ်ႈမႂ်းသဵင်ႈၸူဝ်ႈ လႅဝ်လႅၵ်ႇ ႁူဝ်တႅၵ်ႇ ၽူင်ႉၸၢတ်ႈ ႁေႈႁၵ်းၶၢတ်ႇႁၢမ်းပွၵ်ႈထိုင် မိူင်းမႂ်း &quot;&quot; ၼႆသေ ၸင်ႇဢဝ် ႁၢင်မၼ်းၶဵၼ်း ၽွင်ႇၸၵ်ႇၵျႃႇ ၸဝ်ႈလင်ႇၵႃႇသေ ထိုမ်ႈပႅတ်ႈႄလႈ ၸဝ်ႈလင်ႇၵႃႇ ၵေႃႈ ယွၼ်ႉၶုၼ်သၢင် ဢမ်ႇပၼ်သူး တႃႇပေႉလိင်း ၼႆႄလႈ ၸင်ႇယွၼ်းတွင်း ပၢၼ်ႇယဝ်ႉ ႁႂ်ႈလႆႈႁဵတ်း ဢူၺ်းလီၵၼ်ၼႆယဝ်ႉ ။  

ၶုၼ်လိင်း မိူင်းသုႉၵိင်ႇတႃႇ ၵေႃႉၸိုဝ်ႈၿႃႇလီႇ ၼႆႉ မီးလုၵ်ႈၸၢႆး ၵေႃႉၸိုဝ်ႈ ဢွင်ႇၵွတ်ႉ ႄလႈ ၼွင်ႉၸၢႆး သုၸိင်ႇၸၢမ်ႇ ဢမ်ႇၼၼ် သုၵျိၵ်ႈ ၼႆယဝ်ႉ။ 

မိူဝ်ႈၽွင်းၼၼ်ႉ လင်ႇၵႃႇသိပ်းႁူဝ် မိူဝ်းၵဝ်းမိူဝ်း ၽီႁူၵ်းၶူင်း ႄလႈ ၽီၶဝ် ၸင်ႇမိူဝ်း ၵၢဝ်ႇ ၶုၼ်သၢင်လူင်ယဝ်ႉ။ ပေႃးဝႃႈလႆႈႁူႉဝႃႈ ၶုၼ်သၢင်လူင် ဢမ်ႇပၼ်ဝႆႉသူး ဢၼ်လင်ႇၵႃႇသိပ်းႁူဝ် တေပေႉၼၼ်ႉ ပဵၼ် ၵူၼ်းလႄႈ လိင်းၼႆႄလႈ ၶုၼ်ၽီ သီႇၸဝ်ႈ လူင်းတႄႇပဵၼ် ရႃႇမၶဝ်ပီႈၼွင်ႉသေ ႄလႈ ၽီၶဝ်တင်းၼမ် လူင်းႄတႇသၼ်ႇထေႇ ပဵၼ်လိင်း တီႈမိူင်း သုၵိင်ႇတႃႇ တႃႇဢဝ်ပေႉ လင်ႇ ၵႃႇသိပ်းႁူဝ် ၼႆ ယဝ်ႉ။ 

ၼႂ်းမိူင်းသုၵိင်ႇတႃႇ ၼၼ်ႉ မီးလိင်းမႄႈ တူဝ်ၼိူင်ႈ ဢၼ်ႁၢင်ႊၾၢင် လႅတ်းသႅဝ်း ၼၼ်ႉ လႆႈယူႇလိူၺ်ႈၸွမ်း ၶုၼ်လူမ်းသေ ၵိူတ်ႇမီးမႃး လိင်း တူဝ် ၼိူင်ႈ ၸိုဝ်ႈမၼ်းႁွင်ႉဝႃႈ ဢၼုမမ်ႇ ၼႆယဝ်ႉ။ တီႈမီႄမႈ ဢၼ်ပဵၼ် ၵေႃႉၵၼ် တင်းလိင်းမႄႈ ၼၼ်ႉၵေႃႈ ၵိူတ်ႇမႃး လုၵ်ႈ တူဝ်ၼိူင်ႈ ဢၼ် ၸိုဝ်ႈဝႃႈ ၸမ်ႇပူႉမမ်ႇ ဢၼ်ပဵၼ်မေႃယႃသေးတမႃး ပိင်းတေႃး ၵျၢမ်း ႁေႃး ၼၼ်ႉယဝ်ႉ ။ 

ဢၼုမမ်ႇ ( မႁႃႇၼုမမ်ႇ )လိင်းလူင် ၼႆႉ တူဝ်သုင် ၵျွၵ်းၽႂ်း ဝႅၼ်ၼိူင်ႈ ပွၵ်ႈ ထိုင်ပဵၼ် ႁဵင်ယူႇၸၼႃႇ ၼႆယဝ်ႉ ။ယွၼ်ႉတူဝ်မၼ်း မေႃၽၢၼ်ႇ သၢင်ႈယႂ်ႇၼႃႇႄလႈ တူၺ်းႁၼ်ၵၢင် ဝၼ်း ၶီႁူဝ်လွၺ် ထၢင်ႇပဵၼ် မၢၵ်ႇၼွတ်ႈ သၽၢၼ်း ၼႆသေ ၶီႇ ဢဵၼ်ႈယူႇႄလႈ ၸဝ်ႈၶုၼ်ဝၼ်း မိူဝ်းၵၢဝ်ႇ ၶုၼ်ၽီသိၵျႃး ။ သိၵျႃး ၵေႃႈ လႆႈႁူႉဝႃႈ ပဵၼ် လုၵ်ႈ ၶုၼ်လူမ်းႄလႈ ၸင်ႇဝၢင်းၶႂၢင်ႉပၼ်ယဝ်ႉ။ မိူဝ်ႈၸိူင်ႉၼၼ် ႁႃႇၼုမမ်ႇ ၶႅၼ်းႁုၵ်ႉႁၢႆႉသေ မိူဝ်းၵဝ်း ထိူၼ်ႇပႃႇ ဢၼ်ၸဝ်ႈ ရသေး ၶဝ်ယူႇ ထင် သဝ်း ။ ဝၢႆးၼၼ်ႉ 
ရသေး ဢဝ်ၵႃႇထႃႇပဝ်ႇသႂ်ႇလႄႈ ႁႃႇၼုမမ်ႇ ၶိုၼ်း ပဵၼ်တူဝ်လဵၵ်ႉ ႁႅင်းယွမ် ၶေႃႉၶႄႇ ဢမ်ႇၶႅင်မိူၼ်
ၵဝ်ႇႄလႈ ၸင်ႇႁႂ်ႈ ဢၢႆႈၵေႃႉ မၼ်း မေႃယႃႇ မီလူင် ၸမ်ႇပူႈမမ်ႇ ယူတ်းယႃႇပၼ် ။ ႁဵတ်းႁိုဝ်ယႃ ၵေႃႈ ဢမ်ႇၶႅၼ်းႄလႈ ၸမ်ႇပူမမ်ႇ ၸင်ႇႁွင်ႉၵႂႃႇ တွင်းပၢၼ်ႇၸဝ်ႈရသေး ။ ၸဝ်ႈရသေး မုင်ႈႁၼ်ၶၢဝ်းၼႃႈသေ လၢတ်ႈဝႃႈ သင်မီးၵေႃႉၸၢႆး ၵူၼ်းလီ မီးသိၼ်မီးထမ်း ဢၼ်ပဵၼ်ၸဝ်ႈရႃႇမ ၼၼ်ႉ လုပ်ႈပၼ်ၵွင်းလင် မႂ်းသၢမ် ၵမ်းၸိုင်ၸင်ႇၸၢင်ႊ ၶႅၼ်းၶိုၼ်း မိူၼ်ၵဝ်ႇ ၼႆ ပၼ်သူးထိုင် ယဝ်ႉ။  

ၽွင်းၼင်ႇၼၼ် မႅၼ်ႈမိူဝ်ႈ ၶုၼ်သူႇရႃႇ လႄႈ လႅင်လွၼ်သိၵျႃး ပဵၼ်သိုၵ်း ၵၼ်ၼၼ်ႉ ၶုၼ်သူႇရႃႇဢမ်ႇပေႉ ႄလႈယွၼ်းတၢင်းၸွၺ်ႈ ထႅမ်မႃးတီႈ လုၵ်ႈ ၶူၺ်မၼ်း ၶုၼ်လင်ႇၵႃႇ ။ ၶုၼ်လင်ႇၵႃႇ ၵေႃႈ ၸင်ႇ ႁႂ်ႈလုၵ်ႈၸၢႆး မၼ်းၵႂႃႇတိုၵ်းၸွၺ်ႈ ပူႇၶဝ်လႄႈ ပေႉၶုၼ်သိၵျႃး ၵႂႃႇ ။ ၶုၼ်သူႇရႃႇ ဢဝ် ၵၢင်ႇၶႃသႅင်တွၼ်ႈပၼ် လၢၼ်မၼ်းသေ ဢဝ် လဝ်ႈၶၢဝ် တွၼ်ႈပၼ် ၸဝ်ႈ လင်ႇၵႃႇၻသၵီရိ ။ ၸဝ်ႈလင်ႇၵႃႇသိပ်း ႁူဝ် မဝ်းလဝ်ႈ သေ ယႃႉလူႉပႃႇထိူၼ်ႇႄလႈ ၸဝ်ႈသိၼ်ထမ်း ရသေးၶဝ် ပၢႆႊၶဝ်ႈမိူဝ်းသဝ်း မိူင်းဢယုၵ်ႉတရ ။

တီႈမိူင်းဢယုၵ်ႉတရ (မိူင်းၵိင်ႇၼလႃႇ )ၼၼ်ႉ ၶုၼ် ဢင်ႇၵုရႃႇၸႃႇ (ၻသႁတႃႇ )ၽွင်းငမ်း သေ မီးၼၢင်းမိူင်းသၢမ်ၸဝ်ႈ ။ ၼၢင်းလူင်ပဵၼ် ၵေႃးသလႃႇ ။ ၼၢင်းၵၢင် ပဵၼ် ၵေႇၵေႇ ။ ၼၢင်းသၢမ်ပဵၼ် သုမတ်ႉတႃႇ ။ မိူဝ်ႈၶုၼ်သိၵျႃး တင်းၶုၼ်သူႇရႃႇ ပဵၼ်
သိုၵ်းၵၼ်ၼၼ်ႉ ၶုၼ်သူႇရႃႇ ဢဝ် တၢင်း ၸွၺ်ႈထႅမ်လၢၼ်မၼ်းသေတိုၵ်းပေႉႄလႈ ၶုၼ်သိၵျႃး ၸင်ႇမႃး ယွၼ်းတၢင်းၸွၺ်ႈထႅမ်တီႈ ၸဝ်ႈဢင်ႇၵုရႃႇၸႃႇ ယဝ်ႉ။ ဝၢႆးၼၼ်ႉ ၶုၼ် သိၵျႃး ၶိုၼ်းပေႉလႄႈ ၸင်ႇ ဢဝ် ပိုၼ်သွင်ႇၾႃႉ ၵၢင်ႇမႄႈႁူင်ၸၵျႃႇၶႃၶမ်း တွၼ်ႈပၼ် ၸဝ်ႈမိူင်းၵိင်ၼလႃႇယဝ်ႉ။ 

မိူဝ်ႈၽွင်းၸဝ်ႈ တိုၵ်းသိုၵ်း မိူဝ်းမႃး ႁိူဝ်ႉမွၺ်ႈ ဢူၼ်ႈၼူၼ်းၼႃႇလႄႈ ၵေႃႉပဵၼ်ၼၢင်းၵၢင် ၵေႇၵေႇ လုမ်းလႃးတူၺ်းထိုင် ႄလႈ လႆႈၶႅၼ်းလီ လီသေ ၵေႃႈ ၸဝ်ႈၸွမ် ယိၼ်းၸူမ်းၼႃႇႄလႈ ၶႂ်ႈလႆႈသင် ပဵၼ်သင် ၵေႃႈ ႁႂ်ႈၼၢင်းယွၼ်းထိုင်ယဝ်ႉ။ ၼၢင်း ၵေႃႈဝႃႈ မိူဝ်ႈလဵဝ်တႄႉ ပႆႇၶႂ်ႈလႆႈ သင် ပေႃးမီးမိူဝ်ႈၶႂ်ႈလႆႈမႃးၸင်ႇယွၼ်းဢဝ် ၼႆသေ မၢႆဝႆႉၼႂ်းၸႂ်
ယဝ်ႉ။ 

ပေႃးဝႃႈၸဝ်ႈမိူင်းၵိင်ႇၼလႃႇ ၸိုၼ်ႈၶႅၼ်းမႃးလီလီယဝ်ႉ။ ယွၼ်ႉၶႂ်ႈ ၸၢမ်းတူၺ်း ၵၢင်ၶႃၶမ်း ဢၼ်သိၵျႃးပၼ်ၼၼ်ႉလႄႈ ၸင်ႇၸူဝ်းတင်း ဢမၢတ်ႈ သုၸၼ်ႇတႃႇ ၵႂႃႇထိုင်ၼႂ်းလူင်ႊထိူၼ်ႇယဝ်ႉ။ မိူဝ်ႈၽႅဝ်ၵႂႃႇ တီႈ ၼွင်ၼမ်ႉတီႈၼိူင်ႈၼၼ်ႉ ယွၼ်ႉၸဝ်ႈငိၼ်းသဵင် တိၼ်ဢၼ်လူင်း မႃး ၵိၼ်ၼမ်ႉလႄႈ ၸဝ်ႈၸင်ႇလုၵ်ႉတီႈၵႆသေ ပိုတ်းယိုတ်းၵႂႃႇယဝ်ႉ။ မိူဝ်ႈဝႃႈ လႆႈငိၼ်းသဵင်ၵူၼ်းယဝ်ႉ ၸင်ႇႁူႉဝႃႈ ဢၼ်ယိုၼ်းၸပ်းၼၼ်ႉ ပဵၼ်ၵူၼ်း ၼႆ သေ ၸင်ႇလႆႈႁူႉဝႃႈ ပဵၼ်ရသေး ဢွၼ်ႇ ဢၼ်လုမ်းလႃးႁႃလဵင်ႉ ရသေး ပူႇယႃႈဢၼ်တႃမွတ်ႇၼၼ်ႉ ၼႆယဝ်ႉ ။ 

( ၵၼ်ႊတွၼ်ႊၼႆႉတႄႉ တင်းၽိုၼ်ပပ်ႉၽၢႆႇမၢၼ်ႊလႂ် ပပ်ႉဢၼ် ၸရေးလၢႆးသႂ်ၵဵင်းလူမ်းတႅမ်ႈ ၸိူဝ်းၼၼ်ႉ မိူၼ်ၵၼ်ယူႇသေတႃႉ ၼႂ်းပပ်ႉဢၼ် ၸရေးပၢင်ႇ ပၢင်မူ ( မိူင်းၼၢႆး )တႅမ်ႈၼၼ်ႉ သမ်ႉ ဢၼ်ၸဝ်ႈဢင်ႇၵုရႃႇၸႃႇ ယိုဝ်းၸပ်းၼႆႉ ပဵၼ်ၼူၵ်ႉၵိင်ႇၼရႃႇ ၼႆယဝ်ႉ။ )

မိူဝ်ႈႁူႉဝႃႈ ရသေးဢွၼ်ႇတေတၢႆ ယဝ်ႉ ၼႆၵေႃႈ ပေႃႈမႄႈ ရသေႉ ၸင်ႇ ၵၢဝ်ႇၵိၼ်ႇဝႃႈ ႁႂ်ႈၸဝ်ႈဢင်ႇၵုရႃႇၸႃႇ ၵေႃႈ လႆႈတၢႆယွၼ်ႉ လုၵ်ႈ ၸၢႆး ၼႆသေယဝ်ႉ။ မိူဝ်ႈၽွင်းၼၼ်ႉ ၸဝ်ႈဢင်ႇၵုရႃႇၸႃႇ ၸင်ႇဝႃႈ မၼ်း ဢမ်ႇ မီးလုၵ်ႈၸၢႆးၼႆလႄႈ ရသေး ၵေႃႈဝႃႈ သင်ၶႂ်ႈလႆႈလုၵ်ႈၸၢႆးၼႆ ႁႂ်ႈၵႂႃႇၸူး ရသေးလူင် တၢင်းလွၺ်ၽၢႆႇၸၢၼ်းၼၼ်ႉၼႆယဝ်ႉ။

ပေႃးၸဝ်ႈ ဢယုၵ်ႉတယ ၵႂႃႇၸူး ရသေး ၵေႃႈ ၸဝ်ႈရသေး ၸင်ႇပၼ် ၵူၺ်ႈသွင်လုၵ်ႈတႃႇလဵင်ႉၼၢင်းမိူင်းၶဝ်ယဝ်ႉ ။ ၼၢင်းမိူင်းသၢမ်ၼၢင်းၵေႃႈ ၸင်ႇမႃးႄၽၵၼ် ၼၢင်းမိူင်းလူင် ႄၽဢဝ် ပွတ်းၼိူင်ႈ ပၼ်ၼၢင်းၵွၺ် ။ ၼၢင်းၵၢင်ၵေႃႈ ၽႄဢဝ်ပွတ်း ၼိူင်ႈပၼ် ၼၢင်းၵွၺ် ။ ႁဵတ်းၼႆသေ ၼၢင်းလူင် ၵိူတ်ႇမႃး ၸဝ်ႈရႃႇမ ။ ၼၢင်းၵၢင် ၵိူတ်ႇမႃး ၸဝ်ႈၿၿတႃႇ ။ ၼၢင်းၵွၺ် ၵိူတ်ႇ ၸဝ်ႈလၵ်ႉၶၼႃႇ လႄႈ ၸဝ်ႈဢရတႃႇ ။ ရႃႇမလႄႈ လၵ်ႇၶၼႃႇ ပဵၼ်ၵူၺ်ႈလုၵ်ႈလဵဝ် လႄႈ တိူဝ်း ႁၵ်ႉၵၼ် ။ ၿၿတႃႇႄလႈ ဢရတႃႇ ပဵၼ်လုၵ်ႈလဵဝ်ႄလႈ ၸႂ်ၶဝ် မိူၼ်ၵၼ် ။ 

မိူဝ်ႈပွၵ်ႈၼိူင်ႈ ၸဝ်ႈလၢင်ႇၵႃႇသိပ်းႁူဝ် မိူဝ်းၵဝ်းၼၢင်းၽီ ၵၼ်ႇၻၿ ႄလႈ ၼၢင်း ၽီၼၼ်ႉ ၵိၼ်ႇဝႃႈ ႁႂ်ႈၵဝ်မိူဝ်းတၢႆပဵၼ်ၵူၼ်းသေ ႁႂ်ႈလႆႈမိူဝ်းပဵၼ် မႄး ၼၢင်း ၸဝ်ႈၶုၼ်ၸၢႆး ဢၼ်လႆႈဢဝ်ပေႉ လင်ႇၵႃႇသိပ်းႁူဝ်ၼႆသေ ဝႅၼ်ၶဝ်ႈၾႆး တၢႆယဝ်ႉ။ တီႈဢၼ်ၼၢင်းဝႅၼ်ၶဝ်ႈၾႆးၼၼ်ႉ ဢွၵ်ႇမႃး မွၵ်ႇ မူဝ်သေ ၵိူတ်ႇ ဢွၵ်ႇမႃးၼၢင်းဢွၼ်ႇၵေႃႉၼိူင်ႈ ။ ၽီလူးၶဝ် ဢဝ်မိူဝ်း သၢၵ်ႈ ၸဝ်ႈလင်ႇၵႃႇသေ ယွၼ်ႉၵူဝ် ၵႂၢမ်းၵိၼ်ႇ ၼၼ်ႉလႄႈ ၸင်ႇသႂ်ႇ တိူၵ်ႈလဵၵ်း ယဝ်ႉ ၶၢတ်ႈပႄးသေ လွင်ႈၼမ်ႉယဝ်ႉ။ (ၸင်ႇဝႃႈ လိၵ်ႈမၢင်ႊ ၽိုၼ် ႁၼ်တႅမ်ႈဝႆႉဝႃႈ ၼၢင်းပႄးသီႇတႃႇၼႆယဝ်ႉ။ ) ပႄးၼၼ်ႉ ၵႂႃႇၶင်ႉဝႆႉ တီႈ ၽင်ႇၼမ်ႉ မိူင်း မိၵ်ႉထိလႃႇ ဢၼ်ၸဝ်ႈၸၼၵ ႄလႈ ၼၢင်းမိူင်း မႃႇလႃႇ ၽွင်းငမ်းၼၼ်ႉ ယဝ်ႉ။ ယွၼ်ႉၸဝ်ႈရသေး ႁၼ်မႃးၼႂ်းဢႃႇႁုင်ႇ ယဝ်ႉ ၸင်ႇႁႂ်ႈၸဝ်ႈမိၵ်ႉထိလႃႇ ႁဵတ်းပွၺ်း ထႆၼႃးႁိမ်းၽင်ႇၼမ်ႉ လႄႈ ၸင်ႇထႆႁၼ်တိူၵ်ႈလဵၵ်းၼၼ်ႉယဝ်ႉ။ ၽိူဝ်ႇၽုၺ်ႇတူၺ်း ႁၼ်ၼၢင်းဢွၼ်ႇ လႄႈ ၸင်ႇဢဝ်မိူဝ်းလဵင်ႉယဝ်ႉ ။
(တွၼ်ႊၵၼ်ႊၼႆႉ ၼႂ်းၽိုၼ်လိၵ်ႈရႃႇမ မိူင်းလၢဝ်း ၼၼ်ႉတႅမ်ႈဝႆႇဝႃႈ ယွၼ်ႉၽုၺ်ႇတိူၵ်ႈႁၼ် ၼၢင်း ဢွၼ်ႇတိုၵ်ႉ သီတႃ ဝႆႉလႄႈ ၸင်ႇႁိၵ်ႈႁွင်ႉၼၢင်းသီတႃ ဝႃႈၼႆ ။)

ပေႃးဝႃႈၼၢင်းသီႇတႃႇ ပဵၼ်သၢဝ်လဝ်းသုင် ၵၢင်ၽုင်ၵူၼ်းလိုဝ်းဢူၵ်း ပိုဝ်းၸုၼ်ၸွၼ် မိူၼ်လွၼ် ၼေႃးမူၼ်း လူၼ်းသိူဝ်းၵိုင်ႇၶင်းသွင် ၵေႃႇ ၸၢတ်ႈ ၼႆၸိုင် ပၢၵ်ႇၸဝ်ႈၸွင်ႈၵူႊမိူင်းမိူင်းၶဝ် မႃးတွင်ႈမႃးထၢမ်ယဝ်ႉ။ ၸဝ်ႈမိၵ်ႉထိလႃႇၵေႃႈ ၵူဝ်ပဵၼ်ပၢင်တိုၵ်းႁိမ်ၼၢင်းႄလႈ ၸင်ႇႁဵတ်းပွၺ်း တၢင်ႇၵၢင်ႇ ၸၢၵ်ႈ ဢၼ် ၽီလူင် မႁေႇသရ ပၼ်ဝႆႉၼၼ်ႉ ယဝ် ႉ။ သင်ဝႃႈ ၽႂ်ၵေႃႉလႂ် ယုၵ်ႉဢဝ်လႆႈ ၵၢင်ႇၸၢၵ်ႈသေ ၸၼ်ယိုတ်ႈ ၵွင်ႉလႆႈသၢႆ မၼ်းယဝ်ႉ ယိုဝ်းပိုတ်းလႆႈ ပိုၼ်သၢမ်လႅမ်ႈၸိုင်တၵ်း ဢဝ်ၼၢင်း သွၼ်ႉမိင်ႈ ပၼ် မၼ်းၼႆယဝ်ႉ ။

ၽီ မႁေႇသရ ၼႆႉ ပဵၼ်ၽီဢၼ် ပေႉလႆႈ ၽီတင်းလၢႆလႄႈ ၽုင်းတၼ်း ၶူဝ်းမၼ်းယႂ်ႇလူင်ယႂ်ႇလၢင်တေႉယဝ်ႉ။ မီးမိူဝ်ႈပွၵ်ႈၼိူင်ႈ မိူဝ်ႈၽွင်း ၶုၼ် ၽီသိၵျုး လႄႈ ၽီဝရုၼႃႇ ၽီၵုဝေရ ၽီငႃႈရၢႆး ၶဝ် တိုၵ်ႉႁဵတ်းပၢင် ၵုမ် ယူႇၼၼ်ႉ ၶုၼ်မႁေႇသရ ၶီဝူဝ်းဢုၵ်ႇသၿ ၽႅဝ်မႃးသေၵေႃႈ ၽီသိၵျႃး ၽၢၼ်ႇႁဵတ်း ၼူၵ်ႉယုင်းသေ ပၢႆႊပႅပ်ႉၼႂ်းမၼ်း ။ ၽီဝရုၼႃႇ ၽၢၼ်ႇ ႁဵတ်း ၼူၵ်ႉႁၢင်းသႃႇ သေ ပၢႆႊပႅပ်ႉ။ ၽီၵုဝေရ သမ်ႉၽၢၼ်ႇႁဵတ်း ဢၢၵ်ႇၶၢင် သေ ပၢႆႊပႅပ်ႉ။ ၽီငႃႈရၢႆးၽၢၼ်ႇႁဵတ်း ၵႃၵဝၼ်ႇၼႃ ၵႃလမ်သေ ပၢႆႊပႅပ်ႉ။ ပေႃး ဝႃႈ ၽီလူင်မႁေႇသရ ပူၼ်ႉၵႂႃႇယဝ်ႉၵေႃႈ သၢမ်ၸဝ်ႈ ၸင်ႇပၼ် သူးတီႈ သတ်းသီႇတူဝ် ၼူၵ်ႉယုင်းႁႂ်ႈႁၢင်ႊလီၾၢင်ႁိူဝ်ႈ ။ ႁၢင်းသႃႇႁႂ်ႈ လႆႈယူႇၵတ်းယူႇယဵၼ်ၼင်ႇၼမ်ႉ ။ ဢၢၵ်ႇၶၢင် ႁႂ်ႈတၢင်းၵိၼ် လိူင်ႇၼမ် ၼင်ႇငွၵ်းႁူဝ် ။ ၵႃလမ် ထဝ်ႈယဝ်ႉၵေႃႈ ႁႂ်ႈလႆႈၶိုၼ်းၼုမ်ႇ ၼႆယဝ်ႉ။ 

ပေႃးဝႃႈၵႃလမ် လႆႈသူးၼင်ၼၼ်ယဝ်ႉ ၵေႃႈ မီးၸႂ်ၽႅၼ်သုင် သေ ၶဝ်ႈ ၵဝ်းၵိၼ်ယႃႉလူႉ တၢင်းၵိၼ်တၢင်းယႅမ်ႉ မၢၵ်ႇမႆႉမၢၵ်ႇတွၵ်ႇၸဝ်ႈ ရသေႉ ယဝ်ႉ။ မိူဝ်ႈၸိူင်ႉၼၼ် ၸဝ်ႈရသေႉၷေႃးၻမ်ႇ ၵေႃႈ ဢဝ် ၺၢၼ်ႇ မုင်ႈ တူၺ်း ၵေႃႉဢၼ်တေယိုဝ်းလႆႈ ၵႃၵဝၼ်ႇၼႃႇ ၼႆႉ လႆႈႁၼ်ပဵၼ် ၸဝ်ႈ ရႃႇမလႄႈ ၸင်ႇမိူဝ်းႁွင်ႉယဝ်ႉ။ ၸဝ်ႈရႃႇမ ၵေႃႈ ႁွင်ႉတင်း ၼွင်ႉ တမ်း ၸႂ် လၵ်ႉၶၼႃႇသေ မိူဝ်းသင်ႇသွၼ် ၵႃ လႄႈ လႆႈ ဢွင်ႇပေႉ ၵႂႃႇ ယဝ်ႉ။ ပေႃးယဝ်ႉ ၸဝ်ႈရသေးၵေႃႈ ၸူဝ်း ၸဝ်ႈရႃႇမ သွင်ပီႈ ၼွင်ႉသေ မိူဝ်းၶဝ်ႈတူၺ်းပွၺ်းတၢင်ႇၵၢင်ႇ မိူင်းမိၵ်ႇထိလႃႇယဝ်ႉ။ 
ပေႃးဝႃႈ ပွၺ်းယွင်ႈၵၢင်ႇ တႄႇယဝ်ႉၵေႃႈ ပၢၵ်ႇၸဝ်ႈ ၸွင်ႈတင်းလၢႆ မႃးယုၵ်ႉတူၺ်း ၽႂ်ၵေႃႈဢမ်ႇယုၵ်ႉလႆႈ ႁႂ်ႈၵၢင်ႇတူင်ႉလႆႈသေၵေႃႉ ။ 

မိူဝ်ႈၽွင်းၼၼ်ႉ ၸဝ်ႈလင်ႇၵႃႇသိပ်းႁူဝ် ၽႅဝ်မႃးလႄႈ မၼ်းၸဝ်ႈ လၢတ်ႈဝႃႈ ....... မီးယင်းလိၼ်လိူင်မၢၵ်ႈၼႃးမွၼ်း သူႈမီးၶဝ်ႈၵေႃႇသွၼ်း မဵတ်ႉမၢၵ်ႈ ၊  
မီးႁွင်ႈၵႂၢင်ႈၼမ်ႉၶေးသႂ်သႂၢင်ႇ သူႈမီးပႃၶမ်းၶွင်ႇ ၽုတ်းလုၺ်း ၊ မီးၵဝ်ၸဝ်ႈမုၼ်ယႂ်ႇၽုင်းဢႃး သူႈမီး မေးၼၢင်းႁၢင်ႊလီ သီေၶျႃး ၶေႃးၶၢဝ် ၶႅပ်ႇၽႅင် ပႃးၵူပ်ႉၵူႊ ။ 
ၼၢင်းသီတႃႇၼႆႉ တိုၼ်းပဵၼ်ၶွင်ၵဝ်ယဝ်ႉ ၼႆသေ ၶဝ်ႈယုၵ်ႉ ၵၢင်ႇၸၢၵ်ႈ ယဝ်ႉ။ ယုၵ်ႉလႆႈယဝ်ႉ ၸဝ်ႈယိုတ်ႈဢဝ်သၢႆၵူင်ႇ ႁဵတ်းႁိုဝ် ယိုတ်ႈ ၵေႃႈ ဢမ်ႇယိုတ်ႈလႆႈ ။ လႃးလႃး ဝၢႆးလိုၼ်း ဢမ်ႇၸၢင်ႊႁဵတ်း ႁိုဝ်လႄႈ လႆႈယွမ်းၽႃႈပႅတ်ႈယဝ်ႉ ။ မိူဝ်ႈၽွင်းၼၼ်ႉ ၸဝ်ႈရႃႇမၶဝ်ၵေႃႈ ၽႅဝ်မႃးသေ ၸဝ်ႈရသေႉ ၸင်ႇႁႂ်ႈ ၸဝ်ႈရႃႇမ ၵႂႃႇယုၵ်ႉယဝ်ႉ။ ပေႃး ၸဝ်ႈ ရႃႇမ ယုၵ်ႉလႆႈယဝ်ႉ ယိုတ်ႈသၢႆၵၢင်ႇ ယိုဝ်းပိုၼ် သၢမ်လႅမ်ႈ ယဝ်ႉၵေႃႈ ပွၺ်းယွင်ႈၵၢင်ႇ ၼႆႉ သုတ်းယွတ်ႈ ၵႂႃႇ ယဝ်ႉ။ ၸဝ်ႈရႃႇမ လႆႈ ၼၢင်း သီႇတႃႇ ယဝ်ႉ။ ၸဝ်ႈလၢင်ႇၵႃႇသိပ်းႁူဝ် လႄႈ ပၢၵ်ႇၸဝ်ႈၸွင်ႈ တင်းလၢႆ ဢမ်ႇထုၵ်ႇၸႂ်ပဵင်းပေႃးၵေႃႈ ဢမ်ႇၸၢင်ႊ ႁဵတ်းႁိုဝ်ယဝ်ႉ။ 

လိူၵ်ႈမိူဝ်ႈလီဝၼ်းသႃႇ ႁဵတ်းပွၺ်းၵူပ်ႉၵူႊ ယဝ်ႉၵေႃႈ ၸဝ်ႈရႃႇမ ႁွင်ႉ ၼၢင်း သီႇတႃႇ မိူဝ်းမိူင်း ၵိင်ၼလႃႇ ဢယုၵ်ႉတယယဝ်ႉ။ မိူဝ်ႈထိုင်ပွတ်း တၢင်းၼၼ်ႉ ယွၼ်ႉၸဝ်ႈရႃႇမ လႆႈၼၢင်းသီႇတႃႇမိူဝ်းလႄႈ ဢၼ်ပဵၼ် ၸဝ်ႈၵလိင်ႇၵလိတ်ႉ ၸိၵ်ႉတိရႃႇမ ဢၼ်ၸိုဝ်ႈမိူၼ်ၵၼ် တင်း ၸဝ်ႈရႃႇ မ ၼၼ်ႉ ၸွမ်းၵဝ်းၸွမ်းႁိမ်ၼၢင်းႄလႈ ၸဝ်ႈရႃႇမ ဢဝ်လၢပ်ႇၸၢၵ်ႈ ထိမ်ႈသႂ်ႇသေၵေႃႈ ၸိၵ်ႉတိရႃႇမ ပၢႆႊသွင်ႉပႅတ်ႈၵႆၵႆယဝ်ႉ။ 

ပေႃးဝႃႈ ၸဝ်ႈရႃႇမ ထိုင်ၶိုၼ်း မိူင်းဢယုၵ်ႉတယ ၵေႃႈ ၸဝ်ႈဢင်ႇၵု ရႃႇၸႃႇ ဢၢၼ်းယွင်ႈဢဝ် ၸဝ်ႈယႃႇမ ပဵၼ်ၵႅမ်မိူင်းယဝ်ႉ ။ မိူဝ်ႈယၢမ်း ၼၼ် မႅၼ်ႈမိူဝ်ႈၽွင်း ၼွင်ႉၸဝ်ႈသွင်ၵေႃႉ ၿၿတႃႇ လႄႈ ဢရတႃႇ ၵႂႃႇ ၸႂ်းပူႇၶဝ် မိူင်းၵေႃးၵႃႇရ ဢၼ်ပဵၼ်မိူင်းမႄႈၶဝ် ၵေႇၵေႇ ၼၼ်ႉယဝ်ႉ။ ပေႃးဝႃႈလႆႈႁူႉဝႃႈ ၸဝ်ႈ ဢင်ႇၵုရႃႇၸႃႇ တေပၼ်ၸဝ်ႈရႃႇမ ပဵၼ်ၵႅမ်မိူင်း ၼႆၸိုင် ဢၼ်ပဵၼ်မႄႈ ၼႃႉ ၶဝ် ၵုၵ်ႉၿၸိ ၼွင်ႉယိင်းၼၢင်း မိူင်းၵေႇၵေႇ ၼၼ်ႉ ယွၼ်ႉၶႂ်ႈႁႂ်ႈလၢၼ်မၼ်း ပဵၼ်ၵႅမ်မိူင်းလႄႈ ၸင်ႇတိုၵ်းသူၼ်း ႁႂ်ႈ လႆႈ ဢဝ်သုၼ်ႇတိုဝ်ႉတၢင်းၼႆႉသေ ယွၼ်းပိုင်ႈၵႂၢမ်းမၼ်ႈ ဢၼ်လႆႈမီးဝႆႉ မိူဝ်ႈလုမ်းလႃး ၸဝ်ႈလူင်ၼၼ်ႉသေ ႁႂ်ႈလႆႈ ဢဝ်လၢၼ်မၼ်း ၸဝ်ႈၿၿ တႃႇ ပဵၼ်ၵႅမ်မိူင်းၼႆယဝ်ႉ။ 

မၼ်းလၢတ်ႈဝႃႈ ႁႂ်ႈလိုပ်ႈၸဝ်ႈရႃႇမ ဢွၵ်ႇမိူင်း ယူႇၼႂ်းထိူၼ်ႇ သိပ်းသွင် ပီႊ သေ ၸင်ႇၶိုၼ်းပွၵ်ႈမႃး ၼႆယဝ်ႉ ။ ပေႃးဝႃႈ ၸဝ်ႈလူင် လႆႈငိၼ်းယဝ်ႉ ၵေႃႈ ၸွမ်းလိူၺ်ႈ မီးဝႆႉၵႂၢမ်းမၼ်ႈၵၼ် လႄႈ ပႅၵ်ႉသမ်ႉဝႃႈ ဢမ်ႇၶႂ်ႈႁဵတ်း ၸွမ်းၵေႃႈ ၵႃႊလႆႈလိုပ်ႈၸဝ်ႈရႃႇမ ဢွၵ်ႇမိူင်း ၵႂႃႇယဝ်ႉ။ ၸဝ်ႈရႃႇမၵေႃႈ ဢမ်ႇၶႂ်ႈႁႂ်ႈ ၸဝ်ႈပေႃႈ ယၢပ်ႇၸႂ်လႄႈ ႁွင်ႉဢဝ် ၼၢင်းသီႇတႃႇ ၼွင်ႉၸဝ်ႈ လၵ်ႉၶၼႃႇသေ ဢွၵ်ႇမိူင်းၵႂႃႇယဝ်ႉ ။ 

ၸဝ်ႈလူင်ၵေႃႈ ပေႃးဝႃႈ လႆႈႁူႉၸဝ်ႈရႃႇမၶဝ် ဢွၵ်ႇမိူင်းၵႂႃႇ ၵေႃႈ ၼင်ႇမီး ဝႆႉ ၵႂၢမ်းၵိၼ်ႇၸဝ်ႈရသေး မိူဝ်ႈၵႂႃႇၸၢမ်းယိုဝ်း ၵၢင်ႇၶႃၶမ်း ဢၼ်သိၵျႃး ပၼ်ၼၼ်ႉ သေ လႆႈလိူတ်ႇမႆႈၶေႃးၶူမ် ထိုင်ၸႂ်ထိုင်ၶေႃး ယိၼ်းဢီးလူ လုၵ်ႈၸၢႆးလူင် ႄလႈ ဢမ်ႇပဵၼ်ၵိၼ်ပဵၼ်ၼွၼ်းသေၵေႃႈ လႆႈၶဝ်ႈပူၼွၼ်း ၽေးၵႂႃႇယဝ်ႉ။ 

ပေႃးဝႃႈ ၸဝ်ႈလူင်ၼွၼ်းၽေးယဝ်ႉၵေႃႈ ၽွင်းမိူင်းလႄႈ ၼၢင်းမိူင်းၶဝ် မိူင်းႁွင်ႉ သွင်ၸဝ်ႈၿၿတႃႇတင်း ဢရတႃႇ ဢၼ်ၵႂႃႇမီးတၢင်းမိူင်းပူႇၶဝ် ၵေႃးၵႃႇရ ၼၼ်ႉ သေ သွင်ၸဝ်ႈလႆႈမိူဝ်း ၸွမ်းမႃး ။ ၽိူဝ်ႇၽႅဝ်ထိုင် ဝၢၼ်ႈၵဝ်ႇမိူင်းလင်ယဝ်ႉ ၸင်ႇလႆႈႁူႉဝႃႈ ၸဝ်ႈပေႃႈ ၼွၼ်းၽႄး ၵႂႃႇယဝ်ႉ သေ လႆႈလိုပ်ႈၸဝ်ႈပီႈရႃႇမ ဢွၵ်ႇမိူင်း ၼႆသေၵေႃႈ ၸဝ်ႈၿၿတႃႇ ၸင်ႇ မိူဝ်းႁွင်ႉၸဝ်ႈရႃႇမ မႃးႁဵတ်းၸဝ်ႈၸွမ် မိူင်းဢယုၵ်ႉတယ ယဝ်ႉ။ 

ယွၼ်ႉလႆႈဢိူဝ်ႈဝႆႉၵႂၢမ်းၸဝ်ႈပေႃႈ ဝၢႆးသိပ်းသွင်ပီႊ ၸင်ႇတေပွၵ်ႈမိူင်းၼႆ လႄႈ ၸဝ်ႈရႃႇမ ၸင်ႇပၼ် သွၵ်းတိၼ်ၸၵျႃႇ မၼ်း တႃႇတႅၼ်းတၢင် မၼ်း ၸဝ်ႈသေ ၽွင်းငမ်းမိူင်း ၵႂႃႇ ယဝ်ႉ။ 

ၸဝ်ႈရႃႇမ လၵ်ႉၶၼ လႄႈ တင်း ၼၢင်းသီႇတႃႇ ယူႇသဝ်းၼ်ႂး လူင်ႊ ထိူၼ်ႇ တီႈဢၼ်ၸဝ်ႈရသေး ထင်သဝ်းၼၼ်ႉသေ ဝၼ်းၼိူင်ႈ မီးၽၢႆးသွင်တူဝ် ၶဝ်ႈမႃးၵဝ်းယႃႉလႄႈ ၸဝ်ႈရႃႇမ ၸင်ႇဢဝ်လၢပ်ႇၸၢၵ်ႈ ယိုဝ်းသႂ်ႇလႄႈ ၽၢႆးဢွၼ်ႇသွင်တူဝ်လႆႈတၢႆၵႂႃႇ ။ ၽၢႆးပီႈၼွင်ႉ သွင်ၵေႃႉၼႆႉ ပဵၼ်လုၵ်ႈၼၢင်းၽၢႆး ဢသုတိၵတႃႇ ဢၼ်ပဵၼ်ၼွင်ႉ လၢင်ႇၵႃႇသိပ်းႁူဝ် ၼၼ်ႉယဝ်ႉ။ ပေႃးဝႃႈ လႆႈႁူႉ ၸဝ်ႈရႃႇမ ဢဝ်တၢႆလုၵ်ႈမၼ်း ဢၼ်ပဵၼ် တုသ လႄႈ ၶရ ၼႆၵေႃႈ ၼၢင်းၽၢႆး မိူဝ်းတိူၵ်ႇ (ၵၢဝ်ႇ) ၸဝ်ႈလင်ႇၵႃႇ ယဝ်ႉ။ 

ဝၢႆးၼၼ်ႉ ၼၢင်းၽၢႆးပွမ်ႁဵတ်း တိုင်ၶမ်းသေ ဢွၺ်ႇ ၸႂ် ၼၢင်းသီႇတႃႇ ယဝ်ႉ လိင်ႉလႅၼ်ဢဝ်ၸဝ်ႈရႃႇမ တင်းလၵ်ႇၶၼႃႇ ႁႂ်ႈၸွမ်းတီႉပၼ် တိုင်ၶမ်း ၼၼ်ႉသေၵေႃႈ ၸဝ်ႈလင်ႇၵႃႇ သိပ်းႁူဝ် ပွမ်ႁဵတ်းရသေး သေ လၵ်ႉဢဝ်ၼၢင်းသီႇတႃႇ မိူဝ်းမိူင်းသိင်း ၶူဝ်ႇယဝ်ႉ ။ 

မိူဝ်ႈၸဝ်ႈရႃႇမ တင်းလၵ်ႉၶၼႃႇ လမ်းလူၺ်း တိုင်ၶမ်း သေ ဝၢႆႇပွၵ်ႈမႃး ၼၼ်ႉ ဢမ်ႇႁၼ်ၼၢင်းသီႇတႃႇ လႄႈ ၸင်ႇၼႅတ်ႈၸွမ်းၶႆႊႁႃ ၽႅဝ်ၵႂႃႇ ၼႂ်း ထိူၼ်ႇ မိူင်းၵိင်ႇတႃႇ ဢၼ်ၶုၼ်လိင်းမၵြꩪရႃႇၸႃႇဢမ်ႇ ၼၼ် ပႃႇလီ ၽွင်းငမ်းၼၼ်ႉယဝ်ႉ။ မိူဝ်ႈၽွင်းၼၼ်ႉ မႅၼ်ႈမိူဝ်ႈ ၶုၼ်လိင်းပႃႇလီႇ သိမ်း ဢဝ် ႄမးၼၢင်း ၼွင်ႉၸၢႆးၸဝ်ႈသုၵျိၵ်ႈ သေ လိုပ်ႈမၼ်းဢွၵ်ႇမိူင်းလႄႈ သုၵျိၵ်ႈ ၵေႃႈၽႅဝ်ဝႆႉၼႂ်းလူင်ႊထိူၼ်ႇ မိူင်းၵိင်ႇတႃႇ ၼၼ်ႉယဝ်ႉ ။ 

မိူဝ်ႈ ၽွင်း ၸဝ်ႈလင်ႇၵႃႇဢဝ် ၼၢင်းသီႇတႃႇ ပၢႆႊ ၼၼ်ႉ သုၵျဵၵ်ႈ လႆႈႁၼ်သေ ၼၢင်းသီႇတႃႇ ၸင်ႇဢဝ် မင်းၵူၺ်းလင်ၸွပ်ႇဝုတ်ႉပၼ် သုၵျဵၵ်ႈ ႁႂ်ႈမိူဝ်း ပွင်ႇ ၶၢဝ်ႇ ပၼ်ၸဝ်ႈရႃႇမ ယဝ်ႉ။ 
ၸဝ်ႈရႃႇမ ၶဝ်ပီႈၼွင်ႉၵေႃႈ တဝ်သွၵ်ႈၼႂ်းလူင်ႇထိူၼ်ႇ သေ မႃးလိုဝ်ႈႁိူဝ်ႉ တႂ်ႈတူၼ်ႈမႆႉ ဢၼ် လိင်းသုၵျဵၵ်ႈ ယူႇထင်ဝႆႉၼၼ်ႉယဝ်ႉ။ ၸဝ်ႈရႃႇမ ႁိူဝ်ႉ မွၺ်ႈၼႃႇလႄႈ ၼွၼ်းသႂ်ႇၼိူဝ်တၵ်း ၼွင်ႉလၵ်ႉ ၶၼႃႇ ယဝ်ႉ။ မိူဝ်ႈၽွင်း ၼၼ်ႉမီး လိူၵ်ႇ တူဝ် ၼိူင်ႈ ဢၼ်ယႂ်ႇတၢၼ်ႇၵႆႇႄမႈဢွၼ်ႇၼၼ်ႉ ၶူပ်းၵွင်း လင် လၵ်ႇၶၼႃႇ လိူတ်ႈပေႃးယွၺ်ႉ လႆဝႆႉယူႇယဝ်ႉ ။ ယွၼ်ႉၵူဝ် ၸဝ်ႈပီႈ ရႃႇမ တိုၼ်ႇလႄႈ လၵ်ႇၶၼႃႇ ၸဵပ်းၵႅၼ်းသေတႃႉ ဢမ်ႇသိူဝ်း ၼိုင် သိူဝ်းတူင်ႉ ။ ပိူင်ပဵၼ်ဢၼ်ၼႆႉ သုၵျဵၵ်ႉ လုၵ်ႉတီႈၼိူဝ်တူၼ်ႈမႆႉ ၼၼ်ႉ ႁၼ်သေ ယိၼ်းပဵၼ်ၸႂ်ဢမ်ႇလီ ယဝ်ႉ ၶွၺ်ဢၢမ်း တၢင်းႁၵ်ႉ သွင် ပီႈၼွင်ႉ ၼၼ်ႉ ၵႅၼ်ႇပေႉမႃး ဢမ်ႇမိူၼ် ႁဝ်းပီႈၼွင်ႉ ၼႆသေ ၼမ်ႉတႃ ယွတ်ႉတူၵ်း လႆလူင်းသႂ်ႇ ၼႃႈဢူၵ်းၸဝ်ႈရႃႇမ ယဝ်ႉ။ မိူဝ်ႈၸိူင်ႉ ၼၼ် ၸဝ်ႈရႃႇမတိုၼ်ႇမႃးသေ ထၢမ်လွင်ႈထၢမ်တၢင်းယဝ်ႉ သုၵျဵၵ်ႉၸင်ႇဢဝ် မင်းၵူၺ်း ၼၢင်းသီတႃ ပၼ် ၸဝ်ႈရႃႇမ ။ ယၢမ်ႈၼၼ် ၸင်ႇလႆႈႁူႉဝႃႈ လင်ႇၵႃႇသိပ်း ႁူဝ် ဢဝ်ပၢႆႊၼၢင်းသီႇတႃႇ မိူဝ်းမိူင်းမၼ်းၼႆ ယဝ်ႉ။ 

ပေႃးၸိူင်ႉၼၼ် တႃႇတေၽူတ်ႇဢဝ် ၼၢင်းသီတႃ ၼႆႉ တေလႆႈႁႅၼ်း သိုၵ်း သေ ႁႂ်ႈပေႃးတိုၵ်းလႆႈ မိူင်းသိင်းၶူဝ်ႇ ၼၼ်ႉတေလႆႈႁဵတ်းႁိုဝ်ၼႆ သၢမ်ၸဝ်ႈ ဢုပ်ႇၵုမ်ၵၼ်ယဝ်ႉ။ 

ၸဝ်ႈသုၵျဵၵ်ႉလၢတ်ႈဝႃႈ သင်ဝႃႈၸဝ်ႈရႃႇမ တိုၵ်း ၸွၺ်ႈမၼ်း ႁႂ်ႈလႆႈမိူင်း ၵိင်ႇတႃႇ ဢၼ်ပီႈဢၢႆႈမၼ်းၵူတ်ႉဢဝ်ႄမးၼၢင်းမၼ်းၸိုင် မၼ်းတၵ်း တေ ၸွၺ်ႈၸဝ်ႈရႃႇမ တိုၵ်းသိမ်းဢဝ်မိူင်းသိင်းၶူဝ်ႇသေ ၽူတ်ႇဢဝ် ၼၢင်းသီႇတႃႇႁႂ်ႈလႆႈ ၼႆ ယဝ်ႉ။ ၸဝ်ႈရႃႇမၵေႃႈ ၸင်ႇႁႂ်ႈသုၵျဵၵ်ႉ သူၼ်းႁႂ်ႈပႃႇလီ ဢွၵ်ႇမႃး သေ ႁႂ်ႈလိင်းသွင်တူဝ်ၵွၺ်း တိုၵ်းၵၼ် ။ မိူဝ်ႈၽွင်း ၼၼ်ႉ ၸဝ်ႈ တေ ဢဝ်လၢပ်ႇၸၢၵ်ႈ ယိုဝ်းသႂ်ႇ ပႃႇလီႇၼႆ လၢတ်ႈၵၼ်ဝႆႉ ယဝ်ႉ။ 

ၵူၺ်းၵႃႊ မိူဝ်ႈလိင်းသွင်တူဝ် မင်ၵၼ်ယူႇၼၼ်ႉ ၸဝ်ႈရႃႇမ ဢမ်ႇၸႅၵ်ႇ ႁူႉလႆႈ ၽႂ်ပဵၼ်ၽႂ်လႄႈ ဢမ်ႇပဵၼ်ယိုဝ်း ။ ဝၢႆးမႃး ၸဝ်ႈရႃႇမ ၸင်ႇဢဝ် ၼမ်ႉပူႉ လႅင်ထူမ်ႇသႂ်ႇ ၵူၼ်ႈသုၵျဵၵ်ႉ သေ မၢႆဝႆႉယဝ်ႉ ၸင်ႇဢဝ်လၢပ်ႇ ၸၢၵ်ႈ ယိုဝ်းသႂ်ႇ ႄလႈ ၶုၼ်လိင်းပႃႇလီႇ လႆႈတၢႆၵႂႃႇယဝ်ႉ။ ( ၵူၼ်ႈလိင်း ၵေႃႈၸင်ႇလႅင်ဝႆႉထိုင် ယၢမ်းၼႆႉဝႃႈၼႆ )

ပေႃးဝႃႈ သုၵျဵၵ်ႉ လႆႈၽွင်းငမ်း မိူင်းၵိင်ႇတႃႇ ယဝ်ႉ ၼင်ႇၶုၼ်ၿႃႇလီ သင်ႇ ဝႆႉ မိူဝ်ႈမၼ်းတေတၢႆၼၼ်ႉ ၸင်ႇဢဝ် လုၵ်ႈမၼ်းဢွင်ႇၵွတ်ႉ ပဵၼ် ၵႅမ် မိူင်း ယဝ်ႉ။ ပေႃးယဝ်ႉ တႃႇၵႂႃႇတိုၵ်း မိူင်းသီႇႁူဝ်ႇ သိင်းၶူဝ်ႇၼၼ်ႉ သိုၵ်း လိင်းၶဝ် ၵေႃႇတႅၼ်ႈၾၢႆ ၼိူင်ၼမ်ႉပၢင်ႇလၢႆႇ ယဝ်ႉ။ မိူဝ်ႈၽွင်းၼၼ်ႉ ၸဝ်ႈ ရႃႇမ ၶႂ်ႈႁူႉဝႃႈ ၼၢင်းသီႇတႃႇ ၸင်ႇမီးတီႈ မိူင်းသိင်းၶူဝ်ႇ တေႉ တေႉႁိုဝ်ၼႆ ၸင်ႇပၼ်မင်းၵူၺ်းလင်ၸွပ်ႇယဝ်ႉ ႁႂ်ႈ လိင်းႁႃၼုမမ်ႇ ဝႅၼ် ၶၢမ်ႈပွၵ်ႈလဵဝ် ႁႂ်ႈထိုင် မိူင်း လင်ႇၵႃႇ ယဝ်ႉ။ မိူဝ်ႈႁႃၼုမမ်ႇ ထိုင်ပွတ်း တၢင်း ၼၼ်ႉ ၼၢင်းၽီမေႇၶလႃႇၽၢၼ်ႇႁဵတ်းၵုၼ်ဢွၼ်ႇ ပၼ် တႃႇႁႃၼု မမ်ႇလိုဝ်ႈ လႄႈ ႁႃၼုမမ်ၵေႃႈ လိုဝ်ႈၵမ်ႉသေ လႆႈႁဵတ်းၵေႃႉမိုတ်ႈၵိုဝ်း ၸမ်ၸႂ် တင်း ပႃမႄႈ မိၵ်ႉသႃႇ ယဝ်ႉ ၸင်ႇမီးမႃး လုၵ်ႈၵေႃႉၼိူင်ႈ တၢင်း ႁၢင်ပဵၼ်ပႃ တၢင်းႁူဝ်ပဵၼ်လိင်း ၼၼ်ႉ ။ 
ပေႃးယဝ်ႉ ႁႃၼုမမ်ႇ သိုပ်ႇၶၢဝ်း တၢင်း ၽႅဝ်မိူင်းသိင်းၶူဝ်ႇ ။ 

ႁႃၼုမမ် ႁႃ ၼၢင်းသီႇတႃႇ ၼႂ်းႁၢင်ႈၼႂ်းႁေႃ ၼႂ်းၶူး ၼႂ်းဝဵင်း တီႈလႂ်ၵေႃႈ ဢမ်ႇႁၼ်လႄႈ ဝၢႆးလိုၼ်း ၸင်ႇၽၢၼ်ႇႁဵတ်းမႅဝ်းသေ မိူဝ်းႁႃ ၼႂ်းသူၼ် မွၵ်ႇ တေႃႇၵ ၼၼ်ႉ ၸင်ႇႁၼ်ၼၢင်း ။ ႁႃၼုမမ်ႇ ႁၼ်ၼၢင်းယဝ်ႉ ၸင်ႇ ဢဝ်လင်ၸွပ်ႇ ၼႄယဝ်ႉ လၢတ်ႈဝႃႈ ၸဝ်ႈရႃႇမႁႂ်ႈမၼ်းမႃးတူၺ်း ၼၢင်း ပေႃးပဵၼ်လႆႈ ႁႂ်ႈမိူဝ်းၸွမ်းမႃးၵမ်းလဵဝ် ။ ၼၢင်းၵေႃႈ လၢတ်ႈဝႃႈ လိူဝ် သေ ၸဝ်ႈရႃႇမ မၼ်းဢမ်ႇတိူဝ်ႉလႆႈ ၽူႈၸၢႆး ၵေႃႉလႂ်ၼႆသေ ဢမ်ႇၸွမ်း ။ ၸင်ႇၸၼ်ဢဝ် ၶူၼ်ႁူဝ်မၼ်းၸဵတ်းသဵၼ်ႈ ပၼ်ႁႃၼုမမ်ႇယဝ်ႉ သင်ႇ ၵႂၢမ်းတီႈ ၸဝ်ႈရႃႇမဝႃႈ ႁႂ်ႈမႃးတိုၵ်းမိူင်းသိင်းၶူဝ်ႇ သေ ၽူတ်ႇဢဝ်မၼ်း ၼၢင်း ၶၼ်ၶၼ်ၽႂ်းၽႂ်း ၼႆယဝ်ႉ။ 
ႁႃၼုမမ်ႇၵေႃႈ လွင်ႈဢၼ်မၼ်းၽႅဝ်ဝႆႉၼၼ်ႉ ႁႂ်ႈၸဝ်ႈလင်ႇၵႃႇ ပေႃးႁူႉ ၼႆလႄႈ ၸင်ႇမိူဝ်းယႃႉမိူင်းယဝ်ႉ။ ၽီၽၢႆးၶဝ် ၸွမ်းၺွပ်းတိ ၸိူင်ႉႁိုဝ် ၵေႃႈ ဢမ်ႇလႆႈလႄႈ ႁႃၼုမမ်ႇၸင်ႇဝႃႈ သင်ၶႂ်ႈႁႂ်ႈမၼ်းတၢႆ ၸိုင် ႁႂ်ႈ ၸုတ်ႇ ႁၢင်မၼ်းၼႆလႄႈ ပေႃးဝႃႈ ၽၢႆးၶဝ် ၸုတ်ႇႁၢင်မၼ်းၵေႃႈ မၼ်း လၢၵ်ႈႁၢင်မၼ်း ၸွမ်းမၢႆးၸွမ်းၽဝ်ပႅတ်ႈတင်းမိူင်းယဝ်ႉ ။ ပေႃးဝႃႈ မိူင်း သိင်းၶူဝ်ႇ ၾႆးမႆႈယဝ်ႉ ၼႆၵေႃႈ ႁႃၼုမမ်ႇ ၶိုၼ်းဝၢႆႇပွၵ်ႈဝႅၼ် မိူဝ်း ယဝ်ႉ။ 

တႃႇၵႂႃႇတိုၵ်း မိူင်းလင်ႇၵႃႇၼၼ်ႉ ၸဝ်ႈရႃႇမၶဝ် ၵေႃႇတႅၼ်ႈၾၢႆ ယူႇတင်း ႁိုင်ၵေႃႈ ဢမ်ႇယဝ်ႉလႆႈ ၵုမ်ႇၵူၼ်ႇယူႇတိၵ်းတိၵ်းလႄႈ ႁႃလွင်ႈတၢင်း မၼ်း ဝၢႆးမႃး ၸင်ႇလႆႈႁူႉဝႃႈ တီႈတႂ်ႈၼမ်ႉ ၼၼ်ႉမီးပူလူင်ၼိူင်ႈတူဝ် ၸွမ်းယႃႉဝႆႉ ၼႆလႄ ႈ ၸင်ႇႁႂ်ႈႁႃၼုမမ်ႇ မိူဝ်းတိ ဢဝ်ယဝ်ႉ တႅပ်းဢဝ် ၵိမ်းပူမၼ်း မိူဝ်းႁဵတ်း ၵွင်ႊပႅင်ႊမိူင်း သေ ဝႆႉႁူဝ်ၼႃႈသိုၵ်း သွင်ၽၢၵ်ႇ ၶင်ႈ ၼိူင်ႈၽၢႆႇ ၼိူင်ႈလုၵ်ႈ ယဝ်ႉ ။ 

ပေႃးဝႃႈၵေႃႇတႅၼ်ႈၾၢႆယဝ်ႉၵေႃႈ ၸဝ်ႈရႃႇမ လၵ်ႉၶၼႃ ၸဝ်ႈသုၵျဵၵ်ႉ ၶဝ် ဢွၼ်ဢဝ် သိုၵ်းလိင်းတင်းလၢႆႇသေ တႆႇၸွမ်းတႅၼ်ႈၾၢႆ ယဝ်ႉ ၶီႇ သိုၵ်း တေႃႇမိူင်းသိင်းၶူဝ်ႇ ယဝ်ႉ ။ ပေႃးဝႃႈ လင်ႇၵႃႇသိပ်းႁူဝ် လႆႈႁူႉ ၸဝ်ႈရႃႇမ ၶဝ် ႁႅၼ်းသိုၵ်းမႃးတိုၵ်းတေႃး ၼႆ ၸင်ႇႁႂ်ႈ ၼွင်ႉၸၢႆးမၼ်း ၵုင်ႇၽၵၼ်ႇၼႃႇ ၵေႃႉလိုဝ်ႉဝိုဝ်ႉၶိုၵ်ႉၶၵ်ႉ ၶူႈလင်ၵီႈ သူပ်းယႂ်ႇ တႃလူင် ၶူၼ်လမ်ႁူၺ်းႁၢႆး ပဵၼ်ၽၢႆးၾၢင်ပီး မီးႁၢင်ႊယႂ်ႇ တႃသူတ်ႇ ၼူတ်ႇမွင်ႉ ငႃးၸွႆႇသွႆႇမၢင်ႈ ယၢင်ႈၸီႇလႅင်ၽီႇ ၼႂ်းႁိူၵ်ႇၶဵဝ် ၽိူၵ်ႇဝႆႉ ၵူႊသိၵ်ႈ သၢၵ်ႇ လၢၵ်ႇၵၢင်းယုၺ်း ၼွၼ်းၶုၺ်း ယေႈတိုၼ်ႇ ႁိုင်ပဵၼ်သိပ်းသွင်လိူၼ် ဢွၼ်ႁူဝ်ၶီႇသိုၵ်း တိုၵ်းတေႃး ၸဝ်ႈရႃႇမ ။ ၸဝ်ႈရႃႇမ ဢဝ်လၢပ်ႈၸၢၵ်ႈ တိုၵ်းသေၵေႃႈ ၵုင်ႇၽ ၵၼ်ၼႃႇ ႄလႈ လုၵ်ႈမၼ်းသွင်ၵေႃႉ ၵုင်ႇၽီႇ ၵုင်ႇၿႃႇ လႆႈတၢႆၵႂႃႇ ။ 

ပေႃးဝႃႈ ပီႈၸၢႆး မၼ်းလႆႈတၢႆ ၵႂႃႇၸိုင် ၸဝ်ႈၼွင်ႉ ၵွၺ် ပီၸိရၼႃႇ ၵေႃႉမီးၸႂ်လီၸႂ်ဝၢၼ် မီးသိၼ်မီးထမ်း ၸင်ႇတိုၵ်းသူၼ်း ၸဝ်ႈလင်ႇၵႃႇ တႃႇ ယႃႇႁႂ်ႈလႆႈပဵၼ်သိုၵ်းသေ ၵူၼ်းမိူင်းတေဢမ်ႇလႆႈတၢႆၼၼ်ႉ ႁႂ်ႈပွၺ်ႇပၼ် ၶိုၼ်းၼၢင်းသီႇတႃႇ ၼႆၸဝ်ႈလင်ႇ ၵႃႇဢမ်ႇၽွမ်ႉသေ လိုပ်းမၼ်း ဢွၵ်ႇမိူင်းယဝ်ႉ။ ၸဝ်ႈပီၸိရၼႃႇ ၵေႃႈ ဢမ်ႇၸၢင်ႊႁဵတ်းႁိုဝ် ၶိုင်လႄႈ မိူဝ်းႁွမ်းၸဝ်ႈရႃႇမသေ ယဝ်ႉ။ 

မိူဝ်ႈၸိူဝ်ႉၼၼ် ၸဝ်ႈလင်ႇၵႃႇသိပ်းႁူဝ် ပွၺ်ႇႁႂ်ႈ လုၵ်ႈၸၢႆးမၼ်း ၸၼ်ႇ တႃႇသူႇရႃႇ ၵႂႃႇတိုၵ်း ၸဝ်ႈရႃႇမၶဝ်ယဝ်ႉ ။ ပေႃးဝႃႈ ႁၼ် ၽၢႆးတူဝ်ၼိူင်ႈ ၶီႇၽွင်ႇၸၵ်ႇၵျႃႇမႃးၼႆၵေႃႈ ၸဝ်ႈရႃႇမ ၶီႇလိင်းႁႃၼုမမ်ႇသေ လေႃႇ တိုၵ်း ။ ၸၼ်ႇတႃႇသူႇရႃႇ မေႃႁၢႆတူဝ် လႄႈ ၸဝ်ႈ ရႃႇမ ဢမ်ႇႁၼ်လႆႈ မၼ်း ။ ဝၢႆးမႃး ၸဝ်ႈရႃႇမ လႆႈထုၵ်ႇ ၺႃးတူင်ႇၸိူၵ်ႈၼၵႃး ၸၼ်ႇတႃႇသူႇရႃႇ လႄႈ မဝ်းလူမ်ႉၵႂႃႇ ။ ၸမ်ႉပူမမ်ႇ ၸဝ်ႈမေႃယႃ ၸင်ႇဝႃႈ ပေႃးလႆႈ တူၼ်ႈယႃႈယႃ တီႈလွၺ်ဝူၺ်ႇပုင်ႇလ ၼၼ်ႉ သေ မႃးၶိုၼ်းၵမ်းလဵဝ် ၼႃႈမိူင်းပႆႇလႅင်းၸိုင် တၵ်းယႃၶႅၼ်းလႆႈ ၼႆ ယဝ်ႉ။ ႁႃၼုမမ်ႇ ၵေႃႉ ၵႂႃႇႁႃ ယႃႈယႃ ။ ယွၼ်ႉဝၼ်းၶမ်ႈ ဢမ်ႇၸၢင်ႊၸႅၵ်ႇလႆႈတူၼ်ႈမၼ်းလႄႈ ၸင်ႇယွင်ႈဢဝ်မႃး တင်းလွၺ် ။ ၽိူဝ်ႇၽႅဝ်ယဝ်ႉၵေႃႈ ၸမ်ႇပုမမ်ႇ ၸင်ႇ လိူၵ်ႈဢဝ်တူၼ်ႈယႃႈယႃ သေ ယူတ်းယႃပၼ်သေၵေႃႈ ၸဝ်ႈရႃႇမ ၶႅၼ်းၶိုၼ်း ။  

ၸဝ်ႈရႃႇမ ထၢမ် ၸဝ်ႈပီၸိရၼႃႇ ႁဵတ်းႁိုဝ် ၸင်ႇတေႁၼ်လႆႈ ၸၼ်ႇ တႃႇသူႇရႃႇ ။ ၸဝ်ႈပီၸိရၼႃႇ လၢတ်ႈဝႃႈ သင်မီးၽူႈၸၢႆး ၵေႃႉဢမ်ႇ ႁွၼ်ႇတူၺ်းႁၼ် ၼႃႈၽူႈယိင်း ၼႂ်းၶၢဝ်းတၢင်းသိပ်းသွင်ပီႊ ၸိုင် တၵ်း ႁၼ်လႆႈ ၼႆလႄႈ ၸဝ်ႈလၵ်ႇၶၼႃႇ ၼွင်ႉၸဝ်ႈ ၸဝ်ႈရႃႇမ ၸင်ႇဝႃႈ ၼႂ်းၶၢဝ်းတၢင်း သိပ်းသွင်ပီႊ ၼႆႉ ပႃးၸဵမ်ပီႈလူဝ်းမၼ်း ၼၢင်းသီႇတႃ မၼ်းဢမ်ႇႁွၼ်ႇတူၺ်းႁၼ်ၼႃႈၽူႈယိင်း ၵေႃႉလႂ်ၼႆလႄႈ ၸင်ႇႁႂ်ႈ ၸဝ်ႈလၵ်ႇ ၶၼႃႇ ၼႄ သေၵေႃႈ ၸဝ်ႈရႃႇမ ဢဝ် လၢပ်ႇၸၢၵ်ႈ ယိုဝ်းသႂ်ႇလႄႈ ၸၼ်ႇတႃသူႇရႃႇ လုၵ်ႈၸဝ်ႈလင်ႇၵႃႇ လႆႈတၢႆၵႂႃႇယဝ်ႉ။ 

ထႅင်ႈသမ်ႉ ၸဝ်ႈလင်ႇၵႃႇ ၸင်ႇပွၺ်ႇ ၼွင်ႉၶူၺ်မၼ်း သူႇရႃႇၵုင်ႇမႃႇ ဢၼ်မေႃဢဵတ်ႇသဵတ်ႇ လွင်ႈဝူၺ်ႇႁင်ႈ ၼၼ်ႉ ၶိုၼ်ႈတိုၵ်းယဝ်ႉ။ မိူဝ်ႈၽွင်း သူႇရႃႇၵုင်ႇမႃႇ တိုၵ်ႉလပ်ႉ လၢပ်ႇသၢမ်လႅမ် မၼ်းယူႇၼၼ်ႉ ႁႃၼုမမ်ႇၸင်ႇ ၽၢၼ်ႇႁဵတ်း မႃတၢႆတူႇ သေ လွင်ႈၵႂႃႇႁိမ်းမၼ်းလႄႈ လပ်ႉၽႃႉ ဢမ်ႇတၼ်းယဝ်ႉ မၼ်းၶုၼ်ႇပၢႆႊ။ ၸဝ်ႈလၵ်ႇၶၼႃႇၵေႃႈ ၸင်ႇဢဝ် လၢပ်ႇၸၢၵ်ႈ ယိုဝ်းသႂ်ႇသေ ၵေႃႈ သူႇရႃႇၵုင်ႇမႃႇ လႆႈတၢႆၵႂႃႇ ယဝ်ႉ။ 

ပေႃးယဝ်ႉ ၸဝ်ႈလင်ႇၵႃႇ ၸင်ႇမိူဝ်းႁွင်ႉ ၽီလူးထွင်ႇမၢၼ်ႇ ၶိုၼ်ႈတိုၵ်း ။ ၸဝ်ႈရႃႇမ ထၢမ် ၸဝ်ႈပီၸိရၼႃ ၼႆႉပဵၼ်ၽႂ် တေလႆႈႁဵတ်းႁိုဝ်တိုၵ်း ။ ၸဝ်ႈပီၸိရၼႃႇ လၢတ်ႈဝႃႈ ၽီလူးထွင်ႇမၢၼ်ႇၼႆႉ မၼ်းၵိူဝ်ႉတႃ တူၺ်း ၵူၺ်းၵေႃႈ ပဵၼ်ၽိုၼ်းပဵၼ်ၾႆးၵႂႃႇယဝ်ႉ ။ ဢၼ်ပေႉလႆႈမၼ်းတႄႉ ပဵၼ် မၢၼ်ႇ ၸမ်ႈ ယဝ်ႉ ။ သင်မၼ်းႁၼ်ၶိုၼ်း ငဝ်းမၼ်း ၼႂ်းမၢၼ်ႇၸမ်ႈ ၼၼ်ႉၸိုင် တၵ်းမႆႈၶိုၼ်းတူဝ်မၼ်း ဝႃႈၼႆလႄႈ ႁႃၼုမမ်ႇ ၸင်ႇဢဝ် မၢၼ်ႇ ႁၢင်ႈထွင်ႇသေၵေႃႈ ၽီလူး ၼၼ်ႉ လႆႈတၢႆၵႂႃႇယဝ်ႉ။ 

ၸဝ်ႈလင်ႇၵႃႇ ဢမ်ႇႁူႉတေလႆႈပွၺ်ႇၽႂ်တိုၵ်းလႄႈ မီးၼၢင်းၽၢႆးတူဝ်ၼိူင်ႈ ပၼ်ၶေႃႈၺၢၼ်ႇ လၢတ်ႈဝႃႈ မၼ်းတေ ပွမ်တူဝ် ႁဵတ်းႁၢင်ႊ ၼၢင်းသီႇတႃႇတၢႆသေ လွင်ႈၼမ်ႉၵႂႃႇၸူး ၸဝ်ႈရႃႇမ ၶဝ် ။ သင်ၸဝ်ႈရႃႇမ ၶဝ် ႁၼ် တူဝ်တၢႆၼၢင်းသီႇတႃႇၼႆ ၶဝ်တေ ယွမ်းသေ ႁူၼ်လင်ပွၵ်ႈမိူဝ်း ၵႂႃႇ ၼႆလႄႈ ၸင်ႇၶိုင်သၢင်ႈယဝ်ႉ။ 

ပေႃးဝႃႈ ႁၼ်တူဝ်တၢႆၼၢင်းၽၢႆး ဢၼ်ပွမ်ႁဵတ်း ၼၢင်းသီႇတႃႇၼၼ်ႉ ၵေႃႈ ၸဝ်ႈပီၸိရၼႃႇ ႁူႉၵမ်းလဵဝ် လွင်ႈဝႃႈ ပဵၼ်ႁၢင်ႊပွမ် ၼႆသေ ၸင်ႇႁႂ်ႈ ဢဝ်တူဝ်တၢႆ ၼၼ်ႉၸုတ်ႇၾႆးယဝ်ႉ။ မိူဝ်ႈၸိူင်ႇၼၼ် ၼၢင်းၾၢႆး ၵေႃႈ ၽၢၼ်ႇႁဵတ်းၵၢပ်ႇမိူဝ်ႈသေပႆၢႊ ။ႁႃၼုမမ်ႇ ၸွမ်းတိသေ တႅပ်းပႅတ်ႈ ႁူမၼ်းသွင်ၽၢႆႇလႄႈ ၶူႈၼင် မၼ်းသေ ၸင်ႇ ပွၺ်ႇၶိုၼ်းယဝ်ႉ။ 

ၵမ်းၼႆႉ ၸဝ်ႈလင်ႇၵႃႇ ၸင်ႇပွၺ်ႇ ၵုင်ႇမႃႇၻီၿ ဢၼ်ပဵၼ်ၽီလူး မေႃ ၽၢၼ်ႇႁဵတ်း ဝၼ်းၶမ်ႈဝၼ်းလႅင်း ၼၼ်ႉၶိုၼ်ႈတိုၵ်းၸဝ်ႈရႃႇမၶဝ် ယဝ်ႉ။ မိူဝ်ႈလႆႈႁူႉဝႃႈ လုၵ်ႈမၼ်းတေၵႂႃႇတိုၵ်း ၸဝ်ႈရႃႇမ ၼႆ ၼၼ်ႉ မႄႈမၼ်း လၢတ်ႈဝႃႈ ယွၼ်ႉမိူဝ်ႈၵိူတ်ႇလုၵ်ႈၼၼ်ႉ ၶုၼ်သၢင်ပၼ်ၵႂၢမ်းဝႆႉဝႃႈ တေ လႆႈတၢႆယွၼ်ႉလၢပ်ႇၸၢၵ်ႈ ၸဝ်ႈရႃႇမ ၼႆလႄႈ ႁၢမ်ႈလုၵ်ႈဝႃႈ ယႃႇပေၵႂႃႇ ၼႆယဝ်။ ၸဝ်ႈၵုင်ႇမႃႇၻီၿ ၵေႃႈ ဢမ်ႇဢဝ်ၵႂၢမ်းမႄႈသေ ဢွၵ်ႇသိုၵ်းၵႂႃႇ တေဢၢၼ်းၺွပ်းတူဝ်လိပ်း ၸဝ်ႈရႃႇမ သေ တေဢၢၼ်းမႃးၼႄမႄႈၶဝ် လွင်ႈဝႃႈ မၼ်းဢမ်ႇတၢႆယွၼ်ႉၸဝ်ႈရႃႇမ ၼႆၼၼ်ႉယဝ်ႉ။ 
ပေႃးဝႃႈ ၽႅဝ်ၵႂႃႇ ၵေႃႈ မၼ်းၽၢၼ်ႇႁဵတ်းဝၼ်းၶမ်ႈ ယဝ်ႉ။ ၸဝ်ႈပီႇၸိ ရၼႃႇ ၵေႃႈ ႁူႉဝႃႈ ပဵၼ်ပရိယႄႇ ၽီလူး ၼႆလႄႈ ၸႂ်ႉႁႂ်ႈၽၢင်ႉသတိၵၼ် ပႂ်ႉယၢမ်းလီလီ တေႃႇမိူင်းပေႃးလႅင်း ၼႆယဝ်ႉ ။ ႁႃၼုမမ်ႇဢဝ် ၸဝ်ႈရႃႇမ သိူင်ႇဝႆႉၼႂ်းၵူင်သူပ်းယဝ်ႉ။ ႁူႉဝႃႈတေဢမ်ႇပဵၼ်ၵၢၼ်လႄႈ ၽီလူးၵုင်ႇမႃႇ ၻီၿ ၸင်ႇၽၢၼ်ႇႁဵတ်းမိူင်းလႅင်းထႅင်ႈယဝ်ႉ။ လိင်းဢၼ်ပႂ်ႉယၢမ်း ၸိူဝ်း ၼၼ်ႉ ၵေႃႈ ထၢင်ႇဝႃႈမိူင်းလႅင်းယဝ်ႉၼႆသေ ၸင်ႇမိူဝ်းၼွၼ်းယဝ်ႉ ။ ႁႃၼုမမ်ႇၵေႃႈ ဢဝ်ၸဝ်ႈရႃမ ဢွၵ်ႇသူပ်းသေ မၼ်းၵေႃႈမိူဝ်းၼွၼ်း ယဝ်ႉ။ 

မိူဝ်ႈယၢမ်းၼၼ် ၸဝ်ႈၵုင်ႇမႃႇၻီၿ ဢၼ်တိုၵ်ႉ လွမ်ပႂ်ႉဝႆႉၼၼ်ႉ ၺွပ်းဢဝ်ၸဝ်ႈရႃႇမ မိူဝ်းတီႈယူႇမၼ်း တႃႇမိူဝ်းၼႄ မႄႈမၼ်းယဝ်ႉ။ ႁႃၼုမမ်ႇ ၵေႃႈ ပေႃးဝႃႈလႆႈႁူႉ ၸဝ်ႈရႃႇမ ႁၢႆလၢႆၵႂႃႇၼႆၵေႃႈ ၸင်ႇၸွမ်း ၶႆႊႁႃ တင်းမိူင်းသိင်းၶူဝ်တင်းမိူင်းၵေႃႈ ဢမ်ႇႁၼ် ။ ပေႃးယဝ်ႉ ဢၢၼ်း လူင်းႁႃ မိူင်းၼၵႃးလႄႈ ၽွင်းတိုၵ်ႉမီးယူႇတႂ်ႈၼမ်ႉ ၼၼ်ႉလႆႈႁၼ် ၼမ်ႉ ၽင်ႇၽၢၵ်ႈသေ ၸင်ႇၶိုၼ်ႈမႃးတူၺ်း ။ ႁၼ် လိင်းတူဝ်ၼိူင်ႈ ႁူဝ် မၼ်း ပဵၼ်လိင်း ႁၢင်မၼ်းပဵၼ်ပႃ ၼႆလႄႈ ထၢမ်လွင်ႈထွမ်တၢင်း ယဝ်ႉ ၸင်ႇ လႆႈ ႁူႉဝႃႈ ပဵၼ်လုၵ်ႈမၼ်း ဢၼ်တင်း ၼၢင်းပႃ မိၵ်ႉသႃႇ ၵိူတ်ႇဝႆႉ ၼႆ ။ယွၼ်ႉၸဝ်ႈၵုင်ႇမႃႇၻီၿ ၸႂ်ႉၼၢင်း မႃးတဵၵ်းၼမ်ႉ တႃႇ သုၵ်ႈ ႁေႃ သေ တႃႇဢဝ်ၸဝ်ႈရႃႇမ မူးၸႃးၽီ ၼၼ်ႉၼႆယဝ်ႉ။ မိူဝ်ႈၸိူင်ႉ ၼၼ် ႁႃၼုမမ်ႇၵေႃႈ ဢဝ်တၢင်းၸွၺ်ႈထႅမ် လုၵ်ႈမၼ်းသေ ၽၢၼ်ႇႁဵတ်းၸၢင်ႉႁိူၼ်း ၶဝ်ႈ ၵႂႃႇၸူး ၸဝ်ႈရႃႇမ ယဝ်ႉ လၢတ်ႈဝႃႈ မိူဝ်ႈမူးၸႃး ၽီၼၼ်ႉ ႁႂ်ႈၸဝ်ႈရႃႇမၸႂ်ႉၸဝ်ႈ ၵုင်ႇမႃႇၻီၿ ၼႄ လၢႆးၵူမ်ႈႁူဝ်မူးၸႃး ၼႆလႄႈ ၽွင်း ၸဝ်ႈၵုင်ႇမႃႇၻီၿ တိုၵ်ႉၵူမ်ႈႁူဝ်ယူႇၼၼ်ႉ ႁႃၼုမမ်ႇ ထႅပ်းဢဝ် ႁူဝ်မၼ်း မိူဝ်းၼႄ ၸဝ်ႈ လင်ႇၵႃႇယဝ်ႉ။ 

ပေႃးဝႃႈ ၽီလူးလူင် ၵုင်ႇမႃႊၻီၿ တၢႆယဝ်ႉၼႆၵေႃႈ လုၵ်ႈမၼ်း ဢၼ် ၸင်ႇ ႁႃၵိူတ်ႇ ဢၼ်တိုၵ်ႉမိုၼ်ႈလၢတ်ႉလၢတ်ႉၼၼ် ႉတေၸွမ်းတွပ်ႇ တႅၼ်း တႃႇပေႃႈမၼ်းၼႆ သေ ၸွမ်းတိုၵ်းႁႃၼုမမ်ႇယဝ်ႉ။ ယွၼ်ႉမိုၼ်ႈ ၼႃႇလႄႈ ႁႃၼုမမ်ႇတီႉၺွပ်း ၸိူင်ႉႁိုဝ်ၵေႃႈ ဢမ်ႇလႆႈ ။ ဝၢႆးမႃး ၸင်ႇ ယွၼ်း တၢင်းၸွၺ်ႈထႅမ် တီႈၸဝ်ႈပေႃႈၶုၼ်လူမ်း ႁႂ်ႈဢဝ်လူမ်း လႅင်ႉပဝ်ႇ ဢဝ်မုၼ်ႈၽွင်မႃးၸပ်းသႂ်ႇသေ ၺွပ်းႄလႈ ၸင်ႇပေႉလႆႈၽီ လူးလႅင်ဢွၼ်ႇ ဢၼ်ၸင်ႇႁႃၵိူတ်ႇၼၼ်ႉယဝ်ႉ ။ 

ၸဝ်ႈလင်ႇၵႃႇ ၵေႃႈ တႃႇတေတိုၵ်းပေႉလႆႈ ၸဝ်ႈရႃႇမ ၶဝ်ၼၼ်ႉ ၸင်ႇ ႁႅၼ်း ပၢင်သွင်ႈတမ်းမူးၸႃး ၽီႁုင်း ယဝ်ႉ။ ပေႃးဝႃႈလႆႈႁူႉ ယဝ်ႉ ၵေႃႈ ၸဝ်ႈပီၸိရၼႃႇ ဢၼ်ပဵၼ်ၼွင်ႉၸဝ်ႈ လင်ႇၵႃႇသိပ်းႁူဝ် ၼၼ်ႉ ၼႂ်းၶၢဝ်း တၢင်း သၢမ်ဝၼ်းၼႆႉ ႁႂ်ႈယႃႉလႆႈ ပၢင်သွင်ႈတၢင်ႇတမ်း ၼၼ်ႉ ယဝ်ႉ။ သင်ဢမ်ႇၼၼ် ၸဝ်ႈလင်ႇၵႃႇတေၽုင်းယႂ်ႇ သေ တေဢမ်ႇတေႃႇသူႈလႆႈ ငၢႆႈ ၼႆလႄႈ ႁႃၼုမမ်ႇ ၸင်ႇၵႂႃႇဢဝ် ယဵဝ်ႈသိတ်းသေ ယႃႉလႅဝ်ပႅတ်ႈ သဵင်ႈယဝ်ႉ။ 

ၸဝ်ႈလင်ႇၵႃႇၵေႃႈ ပဵၼ်ဢၼ်ၸႂ်လမ်သေ တူဝ်မၼ်းၸဝ်ႈ ၶီႇၽွင်ႇ ၸၵ်ၵျႃႇ သေ ၶိုၼ်ႈၼႃႈသိုၵ်းယဝ်ႉ။ ၸဝ်ႈရႃႇမ ၵေႃႈ ၶီႇႁႃၼုမမ်ႇသေ ဢဝ်လၢပ်ႇ ၸၢၵ်ႈတေႃႇသူႈတိုၵ်းတေႃးလႄႈ လင်ႇၵႃႇသိပ်းႁူဝ် ဢမ်ႇၶၢမ်ႇ လႆႈသေ ႁူဝ်မၼ်း ၵဝ်ႈလုၵ်ႈ ယၢတ်ႇတူၵ်းၵႂႃႇပႅတ်ႈယဝ်ႉ ။ ပေႃးယဝ်ႉ လင်ႇၵႃႇသိပ်းႁူဝ် ၶိုၼ်းဢဝ် ၶိူင်ႈသမေႃးႁၼီႇ ၼၼ်ႉထိုမ်ႈသႂ်ႇလႄႈ ၸဝ်ႈရႃႇမ မဝ်းလိုမ်းၵႂႃႇယဝ်ႉ။ မိူဝ်ႈၸိူင်ႉၼၼ် ႁႃၼုမမ်ႇ ဢဝ်မိုဝ်းမၼ်း ပေႃႉသႂ်ႇၵူၼ်ႈ ၸဝ်ႈလင်ႇၵႃႇ သေ ၸဝ်ႈလင်ႇၵႃႇ ၸဵပ်းႁႅင်းသေ ပၢႆႊမိူဝ်း ၵႂႃႇယူႇယဝ်ႉ။ 

ၸမ်ႇပူႉမမ် မေႃယႃလူင် လုမ်းလႃးတူၺ်းထိုင်လႄႈ ၸဝ်ႈရႃႇမ ၶိုၼ်း ၶႅၼ်း မႃးသေၵေႃႈ ၸင်ႇထၢမ်ၸဝ်ႈပီၸိရၼႃႇ တေလႆႈႁဵတ်းႁိုဝ် တႃႇ ဢဝ်ပေႉလႆႈ ၻသၵီရိ လင်ႇၵႃႇသိပ်းႁူဝ် ။ ၸဝ်ႈပီၸိရၼႃႇ ၸင်ႇလၢတ်ႈ ဝႃႈ သၢႆၸႂ်ၸဝ်ႈလင်ႇၵႃႇၼႆႉ သိူင်ႇဝႆႉၼႂ်းၵၢင်ႇၶႃသႅင်မၼ်းၼႆလႄႈ မိူဝ်ႈ ၶိုၼ်း တိုၵ်း ထႅင်ႈပွၵ်ႈၼိူင်ႈၼၼ်ႉ ၸဝ်ႈရႃႇမ ၸင်ႇဢဝ်လၢပ်ႇၸၢၵ်ႈမၼ်း ပိုဝ်သႂ်ႇ ၵၢင်ႇၶႃသႅင်မၼ်း လူႉတႅၵ်ႇၽူင်ႉယၢႆႈသေၵေႃႈ လင်ႇၵႃႇသိပ်းႁူဝ် လႆႈတၢႆၵႂႃႇယူႇယဝ်ႉ။ 

ပေႃးဝႃႈ လင်ႇၵႃႇသိပ်းႁူဝ် ၻသၵီရိ လႆႈတၢႆၵႂႃႇၵေႃႈ ၸဝ်ႈရႃႇမ ၸင်ႇ ဢဝ် မိူင်းသိင်းၶူဝ်ႇသီႇႁူဝ် ဢၢပ်ႈပၼ်ၼႂ်းမိုဝ်း ၸဝ်ႈပီၸိရၼႃႇ သေ ၵေႃႈ ႁွင်ႉဢဝ်ၼၢင်းသီႇတႃႇ ယဝ်ႉ ဝၢႆႇပွၵ်ႈၶိုၼ်းမိူင်းလင်ယဝ်ႉ။ မိူဝ်ႈၽွင်း ၼၼ်ႉ ၸဝ်ႈရႃႇမ ၸင်ႇဝႃႈႁင်း ၼၢင်းသီႇတႃႇယွၼ်ႉလႆႈၵႂႃႇယူႇၼႂ်းမိုဝ်း ၽီလူးယၵ်ႉၶႃႉ ပဵၼ်လၢႆလၢႆဝၼ်းလႄႈ ၼင်ႇႁိုဝ် ၵူၼ်းတင်းလၢႆ ပေႃးတေ လွတ်ႈတၢင်းသႄႉၼႄး ၼၼ်ႉ ႁႂ်ႈၼႄသၢၵ်ႈသေႇလွင်ႈၸိုၼ်ႈသႂ် ၼၼ်ႉၼႆ သေ ၸင်ႇႁႂ်ႈၼၢင်း ဝႅၼ်ၶဝ်ႈၾႆး ယဝ်ႉ။ ၼၢင်းၵေႃႈ ဝႅၼ်ၶဝ်ႈၾႆး ၾႆး ဢမ်ႇ မႆႈလႄႈ ၸဝ်ႈရႃႇမ ၵေႃႈ ၸင်ႇယုမ်ႇၸႂ်ၵႂႃႇသေ ယွၼ်ႉဢွၵ်ႇ မိူင်း မႃး ၵေႃႈ တဵမ်သိပ်းသွင်ပီႊယဝ်ႉလႄႈ ၸင်ႇႁွင်ႉဢဝ် ၼၢင်းမိူဝ်း ဝၢၼ်ႈ ၵဝ်ႇမိူင်းလင်ယဝ်ႉ။ 

ပေႃးဝႃႈ ၽႅဝ်ၵႂႃႇၼႂ်းမိူင်း ဢယုၵ်ႉတရ မိူင်းၵိင်ႇၼလႃႇ ၵေႃႈ ၼွင်ႉၸဝ်ႈ ၿၿတႃႇ လႄႈ ဢရတႃႇ ၶဝ် ၸင်ႇပၢင်းဢဝ် ၸဝ်ႈရႃႇမ လႄႈ ၼၢင်းသီႇတႃႇ ႁဵတ်းၸဝ်ႈႁဵတ်းၸွမ်ယဝ်ႉႉ ။ ယူႇမႃးၸိူင်ႉၼႆသေ ယွၼ်ႉၸိူင်ႉၼၢင်း ၶဝ်ၶႂ်ႈႁၼ် တူဝ်ၽီလူး လႄႈ ၸင်ႇႁႂ်ႈ ၼၢင်းသီႇတႃႇ တႅမ်ႈၼႄႁၢင်ႊ ၽီလူး ယဝ်ႉ ။ မိူဝ်ႈၸိူင်ႉၼၼ် ၸဝ်ႈရႃႇမ မႃးႁၼ်သေ ထၢင်ႇထိူမ်ဝႃႈ ၼၢင်းသီႇတႃႇဢမ်ႇလိုမ်းလႆႈၽီယၵ်ႉၼၼ်ႉ ယူဝ်းၼႆ သေ ယူဝ်းယဵင်း ဝႆႉၼႂ်း ၸႂ်ယူႇယဝ်ႉ။ 

မီးထႅင်ႈပွၵ်ႈၼိူင်ႈ ၽွင်းၸဝ်ႈရႃႇမ ၵႂႃႇလဵပ်ႈၸွမ်းၶွပ်ႇလႅၼ်ႇပႅၼ်ႇမိူင်း ၼၼ်ႉ ငိၼ်းၵူၼ်းဝၢၼ်ႈသွင်ၽူဝ်မႄးၽိတ်းၵၼ် ။ မိူဝ်ႈ မႄးမၼ်းဝႃႈ တေမိူဝ်း ႁိူၼ်း ပေႃႈမႄႈ မၼ်းပႅတ်ႈ ၼႆၼၼ်ႉ ၽူဝ်မၼ်းတွပ်ႇဝႃႈ ၵႂႃႇႄလႈ ၼင်ႇၽူႈယိင်း ဢၼ်ၵႂႃႇယူႇၸွမ်းပိူၼ်ႈ ယဝ်ႉၼၼ်ႉ ယႃႇထၢင်ႇ ဝႃႈ ၵဝ်တေၸွမ်းႁွင်ႉၶိုၼ်းၼင်ႇ ၸဝ်ႈရႃႇမ ၼႆ ။ 

ႁဵတ်းၼႆသေ ယူႇမႃးထႅင်ႈတင်းႁိုင် ၽွင်းၼၢင်းသီႇတႃႇၸပ်းတွင်ႉဝႆႉ ၼၼ်ႉ ယွၼ်ႉပဵၼ်ၸႂ်ၽႂ်ႇ ၶႂ်ႈၵိၼ် ၶဝ်ႈယႃႇၵု ၵျွင်းၸဝ်ႈယသေႉ ၼႆလႄႈ ၸဝ်ႈရႃႇမ ၵေႃႈ လၢတ်ႈဝႃႈ သင်ပဵၼ်ပေႃးတၢၼ်ႇၼႆႉၵေႃႈ ၵႂႃႇသေ လႄႈ ၼႆၸင်ႇလိုပ်ႈၼၢင်းသီႇတႃႇ ၶဝ်ႈထိူၼ်ႇယဝ်ႉ။ ၼၢင်းၵေႃႈ လႆႈၵႂႃႇ ယူႇၸွမ်း ၸဝ်ႈရသေး သေ ၵိူတ်ႇၽၢၵ်ႈဢွၵ်ႇမႃး လုၵ်းသွင်ၵေႃႉ ။ လေႃးၼ လႄႈ ၵုသျ ယဝ်ႉ ။ သွင်ပီႈၼွင်ႉ လႆႈသွၼ်တၢင်းႁူႉမေႃ တမ်ႈ တီႈၸဝ်ႈရသေး လႄႈ ၵတ်ႉၶႅၼ်ႇလႅၼ်ႇၽၢႆ ဝႆႉ ၵူႊလွင်ႈလွင်ႈယဝ်ႉ။ 

မိူဝ်ႈၽွင်းၼၼ်ႉ တႃႇႁႂ်ႈလႆႈႁူႉ သၢႆငၢႆမိူင်းၶႃႈမိူင်းႁၢႆးၶဝ် ၼၼ်ႉ ၸဝ်ႈရႃႇမ ၸင်ႇႁႂ်ႈပွၺ်ႇ မႃႉ သိင်းထေႃး သေ လူလွမ်ပွင်ၶၢဝ်ႇ ယဝ်ႉ။ သင်ဢမ်ႇ မႃးၵူမ်ႈၵွမ်း သေ တီႉဢဝ်ဝႆႉမႃႉၸိုင် တၵ်းၶီသိုၵ်းတိုၵ်း ၼႆယဝ်ႉ ။ မိူဝ်ႈ ၽွင်း မႃႉသိင်းထေႃး ၽႅဝ်ၵႂႃႇတီႈ ၼႂ်းသူၼ်ဢူးယဵၼ်ႇ တီႈဢၼ်သွင်ပီႈ ၼွင်ႉယူႇၼၼ်ႉ ယွၼ်ႉမႃႉ မႃးယဵပ်ႇၽၵ်းယိူဝ်ႈလၢင်းၶဵဝ်လႄႈ ၸင်ႇတီႉ ဢဝ် ဝႆႉမႃႉယဝ်ႉ။ ပေႃးဝႃႈလႆႈႁူႉမႃႉထုၵ်ႇပိူၼ်ႈတီႉယဝ်ႉ ၼႆၵေႃႈ ၸဝ်ႈ လၵ်ႉၶၼႃႇ ၸင်ႇၸွမ်း ၶႆႊသေ တီႉဢဝ် လေႃးၼ ႁွင်ႉၵႂႃႇၸႅတ်ႉထၢမ်ယဝ်ႉ။

 မိူဝ်ႈလႆႈႁူႉဝႃႈ ပိူၼ်ႈၺွပ်းၵႂႃႇ ပီႈဢၢႆႈမၼ်းၼၼ်ႉ ၵုသျ ၸွမ်းႁႃ ၶႆႊသေ ဢဝ်ၵၢင်ႇၸၢၵ်ႈ ဝတ်ႉသႂ်ႇလႄႈ လၵ်ႇၶၼႃႇမဝ်းလူမ်ႉၵႂႃႇယဝ်ႉ။ 
ၶုၼ်သိုၵ်းတင်းလၢႆၵေႃႈ မိူဝ်းပွင်ႇၶၢဝ်ႇ ၸဝ်ႈရႃႇမ ယဝ်ႉ။ ၸဝ်ႈရႃႇမ ၵေႃႈ ၸွမ်းမႃးသေ မိူဝ်ႈလႆႈႁၼ်သွင်ပီႈၼွင်ႉ ၼၼ်ႉတူၺ်းၼႃႈတႃ ပေႉမႃး မိူၼ်ၼၢင်းသီႇတႃႇၼႆသေ ထၢမ်လွင်ႈပေႃႈမႄႈၶဝ်ယဝ်ႉ။ သွင်ပီႈၼွင်ႉၵေႃႈ ဢမ်ႇတွပ်ႇသေ ဢဝ်ၵၢင်ႇၸၢၵ်ႈဝတ်ႉသႂ်ႇလႄႈ ၸဝ်ႈရႃႇမၵေႃႈ မဝ်းလူမ်ႉ ၵႂႃႇ ပႅတ်ႈယဝ်ႉ။ ပေႃးယဝ်ႉ သွင်ပီႈၼွင်ႉ ၸင်ႇဢဝ်တင်း ပၢၼ်းၵုမ်းၸဝ်ႈ ရႃႇမသေ ၺွပ်းဢဝ် ႁႃၼုမမ်ႇယဝ်ႉ မိူဝ်း ၸူးၸဝ်ႈမႄႈ ၼၢင်းသီႇတႃႇ ယဝ်ႉ။ 

ပေႃးဝႃႈ လႆႈႁၼ်ပၢၼ်းၵုမ်းလႄႈ ႁႃၼုမမ်ႇယဝ်ႉ ၵေႃႈ ၼၢင်းသီႇတႃႇ ႁူႉၵမ်းလဵဝ် လွင်ႈဝႃႈပဵၼ်ၸဝ်ႈရႃႇမ လႄႈ ၸင်ႇလၢတ်ႈၼႄ သွင် ပီႈၼွင်ႉ လွင်ႈဝႃႈၸဝ်ႈရႃႇမ ပဵၼ်ပေႃႈၸဝ်ႈ ယဝ်ႉ ။ ပေႃးယဝ်ႉ ၸဝ်ႈ ရသေး ဢဝ် ၼမ်ႉၸိုမ်းသႅင် မႃးယူတ်းယႃပၼ်သေၵေႃႈ ၸဝ်ႈ ရႃႇမ လႄႈ လၵ်ႉၶၼႃႇ ၶိုၼ်းႁူႉတူဝ်မႃးၶိုၼ်းသေၵေႃႈ ၸင်ႇႁွင်ႉဢဝ် ၼၢင်း သီႇတႃႇ ၶဝ်မႄႈလုၵ်ႈ ပွၵ်ႈသၢႆႇဝၢႆႇၶိုၼ်း မိူင်းဢယုၵ်ႉတရယဝ်ႉ။ ဝၢႆး ၼၼ်ႉ ၸင်ႇႁႂ်ႈ လုၵ်ႈၸၢႆးလူင် လေႃးၼ ပဵၼ်ၵႅမ်မိူင်း သေ ၽွင်းငမ်း ဝၢၼ်ႈမိူင်းၵႂႃႇၵတ်းၵတ်းယဵၼ်ယဵၼ်ယဝ်ႉ။ 

မိူင်းဢယုၵ်ႉတယ ၼႆႉ တႄႇမႃး မိူဝ်ႈပၢၼ် ၸဝ်ႈဢင်ႇၵုရႃႇၸႃႇ သေ လၢမ်းမႃး ၸဝ်ႈရႃႇမ ၸဝ်ႈလေႃးၼ ၼႆသေ မီးၵႂႃႇထႅင်ႈ ၸဵတ်းသိုပ်ႇ ၸဝ်ႈၶုၼ်ယဝ်ႉ။ ဝၢႆးၼၼ်ႉ မႃး မိူင်းၼႆႉ လႆႈလူႉ သေ ပဵၼ်ၵႂႃႇလၢၼ်းႁိၼ် လၢၼ်းၽႃ ပႅတ်ႈၼႆယဝ်ႉ ။ 

ပေႃးဢဝ် ၼင် ၼမ်ႉၵႂၢမ်းလူပ်းလင် ဢၼ်ၸရေးပၢင်ႇ ပၢင်မူ တႅမ်ႈဝႃႈတႄႉ ** ဝတ္ထု ၼီးၼႃႇ ၸႃႇတၵၸၢတ်ႈၸဝ်ႈယႃႇမ ၻသၵီရိ လင်ႇၵႃႇသိပ်း ႁူဝ် ဢၼ်ဝႃႈၼႆႉ တီႈထုၵ်ႇ တီႈၽေႃႇ ၸၢတ်ႈတေႃႇ ပွင်းပၢၼ် ဢၼ်ဝႃႈ ၸဝ်ႈၼၼ်ႉမႃးပဵၼ်ၸဝ်ႈၼႆႉ ၸဝ်ႈၼႆႉမႃးပဵၼ် ၸဝ်ႈပုၼ်ႉ သမ်ႉၸိုင် ဢမ်ႇ ၽႂင်ႉ ဢမ်ႇႁေႃး သၽေႃး တီႈၼႆႈ လႆႈပြႃႉႁဵတ်း ၸွမ်း ရှေးရှေး သြႃႇ ၸဝ်ႈ ပိင်ႇၺႃႇရှိ မိူဝ်ႈၵွၼ်ႇ သွၼ်ႇလူႁဵတ်း ၸွမ်း ၸရေးပၢင်ႇ ပၢင်မူ ႁဝ်းမႃး မႄးဢူၶျူဝ်း ၸွမ်း ၵႂၢမ်း ႁွမ်းသၢမ်ၵိဝ် လိဝ်ၵဵၼ်ၶဵၼ်းမႄး ႁိုဝ် တၵ်းႁတ်းလိူဝ်ၸွမ်းၼႄး သၢႆႇသေးသီ တူၵ်ႇဢွၵ်ႇမွၵ်ႇၼႄ ပီႈၼွင်ႉဢ မျႃးလႆႈၵျႃးသႂ်ႇၸႂ်မၢတ်ႈ မူႇလ ႁွင်းၵဝ်ႇ မဝ်ႇၶႆႊ မဝ်ႇႁေႃးၵေႃႈ ႁဝ်းၶႃႈ ယင်းဢမ်ႇၸၢင်ႊ ၽေႃႇၼႄတီႈႁေႃးလၢတ်ႈ မီးဢၵျွင်းၼင်ႇၼႆလႄႈ ထိုင်ဢသုတ်းသၢတ်ႈတေႉယဝ်ႉ ** ၼႆ ။ 

ဢၼ်ၼႆႉ ပဵၼ်ဢၼ်လၢၵ်ႇလၢႆးဝႆႉ ။ ပဵၼ်သင်ၼႆမိူဝ်ႈတႄႇႁူဝ်မၼ်း ၸိုင် သမ်ႉဝႃႈ ပဵၼ်ၸႃႇတၵ ၽြႃးႁေႃး ၸၢတ်ႈဢလွင်းရႃႇမ ၼႆသေတႃႉ ၼႂ်း ၽိုၼ်လိၵ်ႈတႆး ၼင်ႇလဵပ်ႈႁဵၼ်း မႃးၼႆႉ တွၼ်ႊလူပ်းလင် ၼၼ်ႉ ဢမ်ႇ ႁၼ် ၸရေး ၵေႃႉလႂ် တႅမ်ႈ ၸၢတ်ႈပွင်းၶၢၼ်း (ႁူမ်ႈႁုပ်ႈ)။ ၵူၺ်းၵႃႊ ၼႂ်းၽိုၼ်လိၵ်ႈ မၢၼ်ႊ ၼၼ်ႉတႄႉ လႆႈႁၼ်တႅမ်ႈဝႃႈ ၸဝ်ႈရႃႇမ မႃးပဵၼ်ၵေႃးတမ ။လင်ႇၵႃႇသိပ်းႁူဝ် မႃးပဵၼ်တေႇဝတၢတ်ႈ ။လၵ်ႉၶၼ မႃးပဵၼ် ဢႃႇၼၼ်ႇ တႃႇ ၼႆၵေႃႈ မီးယူႇ ။ ပႅၵ်ႉသမ်ႉဝႃႈ ၸိူင်းရႃႇမ ၼႆႉ ဢမ်ႇၸိုဝ်ႈ ၸႃႇတၵ ၽြႃးပဵၼ်ၸဝ်ႈသေ တႃႉ တွၼ်ႊ ၵၼ်ႊ ဢၼ်မိူၼ်ဝႆႉ ၸႃႇတၵ ၵေႃႈမီးဝႆႉ တွၼ်ႊလႂ်တွၼ်ႊ ၼၼ်ႉယူႇ လႄႈ ယင်းတေဢမ်ႇလွတ်ႈ ဢူဢၢႆႊ ၸႃႇ တၵ ၼႆၵေႃႈ ဢွၼ်လၢမ်းၶၢတ်ႈ ဝႆႉယူႇယဝ်ႉ ။ 

တီႈတေႉ ၾူးၸိူင်းရႃႇမ ၼႆႉ ပဵၼ်ဢႃႇၻီၷဝိ ၸဝ်ႈၶူးမေႃလူင် ဝႃႇလမီၵိ တႅမ်ႈသေ ၵွၼ်ႇမၼ်းၸဝ်ႈပႆႇတႅမ်ႈၼၼ်ႉ ၸိူင်းရႃႇမ ၼႆႉ ပေႃးမီးဝႆႉ ယူႇ ၼႆယဝ်ႉ။ ၸိူင်းရႃႇမ ၼႆႉ တႅမ်ႈဢွၵ်ႇပဵၼ်ဝွၵ်းမႃး ၸဵမ်မိူဝ်းပူၼ်ႉမႃး သွင် ႁဵင်ပီႊသေတႃႉ လွင်ႈႁူမ်ႉလွမ်ႉ လွင်ႈသူၼ်ၸႂ်ၵူၼ်းႁဝ်း တေႃႇ ပၢၼ်ၼႆႉ ၵေႃႈ ယင်းပႆႇယူပ်ႈယွမ်းၵႂႃႇ ။ ၼႆႉ တေပဵၼ်ၵွပ်ႈ လွင်ႈတၢင်း ဢၼ်ပႃး ၼႂ်းမၼ်း ဢၼ်ဝႃႈ လွင်ႈၶဵင်ႈၶႅင် တိုၵ်းတေႃး လွင်ႈတြႃး ထမ်ႇမ လႄႈ ဢမ်ႇတြႃး ဢႃႉထမ်ႇမ ၼၼ်ႉသေ လိုၼ်းလၢႆးဝၢႆးမႃး ထမ်ႇမ ၼၼ်ႉလႆႈ တၢင်းဢွင်ႇပေႉၵႂႃ ႇ ၼၼ်ႉၼႆယဝ်ႉ။ သမ်ႉထႅင်ႈ လွင်ႈပိူင်ပဵၼ် ဢၼ်ၶဝ်ႈ ပႃး ဝႆႉၼႂ်းၸိူင်းၼၼ်ႉ မိူၼ်ၸိူင်ႉ လွင်ႈႁၵ်ႉပႅင်းပီႈ ဢွၵ်ႇၼွင်ႉပဵၼ်ၵၼ် ၼၼ်ႉလႄႈသင် လွင်ႈႁၵ်ႉပႅင်း ၽူႈၸၢႆးတင်းၽူႈယိင်းၼၼ်ႉလႄႈသင် လွင်ႈတိုဝ်းၵမ်သိၼ်ထမ်း လွင်ႈႁတ်းႁၢၼ် လွင်ႈဝၢင်းၽႅၼ်ၵၢၼ်သိုၵ်း လွင်ႈတိုၵ်းတေႃး ၸိူဝ်းၼႆႉ ပၢၼ်းပၢႆး သၢင်ႈႁၢင်ႈ ဝႆႉႁႂ်ႈပဵၼ် ပၢႆးမွၼ်း ၸၼ်ႉသုင် ဝႆႉၼၼ်ႉၼႆယဝ်ႉ ။

လိၵ်ႈလူင်လင်ႇၵႃႇ ၸိူင်းလင်ႇၵႃႇသိပ်းႁူဝ် ဢၼ် တႅမ်ႈဝႆႉၽၢႆႇတႆး ၼႆႉ ၸိုဝ်ႈၵူၼ်းလႄႈသင် ၸိုဝ်ႈမိူင်းလႄႈသင် တင်း တၢင်ႇၽိုၼ်တေမီး တီႈ ပိူင်ႈပႅၵ်ႇ ၵၼ်ဢိတ်းဢီႈယူႇ။ ပႅၵ်ႉသမ်ႉဝႃႈ ၸိူင်းလင်ႇၵႃႇသိပ်းႁူဝ်ၼႆႉ ဢၼ်ပဵၼ် ၽၢႆႇမၢၼ်ႊ ႄလႈသင် ၽၢႆႇလၢဝ်းႄလႈ သင် ငဝ်ႈတိုၼ်း မၼ်းမႃးတီႈလဵဝ် ၼႆသေ တႃႉ ႁႂ်ႈမၼ်းမိူၼ်ၵၼ် ၵူႊတွၼ်ႊတႄႉၵေႃႈ ဢမ်ႇမိူၼ်ၼင်ႇၵဝ်ႇ ။ ၸွမ်းလူၺ်ႈ လၢမ်းတၢမ်း သိုပ်ႇယိုၼ်ႈမိုဝ်း ၵၼ်မႃးသေၵေႃႈ တီႈပႅၵ်ႇတီႈပိူင်ႈမၼ်းၵေႃႈ လႆႈႁၼ်မီးမႃး ယူႇယဝ်ႉ။ 

ၸွမ်းလိူၺ်ႈ ၸိူင်းရႃႇမ ၼႆႉ မီးမႃးပီႊယၢဝ်းၶၢဝ်းႁိုင်လႄႈ မိူင်းၼိူင်ႈလႄႈ မိူင်းၼိူင်ႈ ၵူၼ်းၵေႃႉၼိူင်ႈႄလႈ ၵေႃႉၼိူင်ႈ ၵေႃႈ တၢင်းႁပ်ႉႁၼ် ပႅၵ်ႇပိူင်ႈ ၵၼ်ယူႇယဝ်ႉ။ ၸဝ်ႈႁူႉမေႃ မၢင်ႊၸိူဝ်းဝႃႈ ၸိူင်းရႃႇမ ၼႆႉ ပဵၼ်လွင်ႈပၢင် တိုၵ်းႁိမ်ၼႃႈလိၼ်ၵၼ် ဢၼ်ပဵၼ် ၸၢဝ်းၶိူဝ်းသွင်ၶိူဝ်း ဢႃႇရိယၢၼ်ႇ (ၸဝ်ႈရႃႇမ) လႄႈ တြႃႇဝီတီႇယၢၼ်ႇ (လင်ႇၵႃႇသိပ်းႁူဝ်) ၼၼ်ႉၼႆယဝ်ႉ ။ မၢင်ႊၸိူဝ်းလၢတ်ႈဝႃႈ ၸိူင်းရႃႇမၼႆႉ ဢမ်ႇၸႂ်ႈ ပဵၼ်ၸိူင်း ဢၼ်ၸႅင်ႈ ၼႄ ပၢင်တိုၵ်း ထမ်ႇမ လႄႈ ဢႃႉထမ်ႇမ ၼၼ်ႉၵူၺ်း မၼ်းၵႂၢင်ႈၶႂၢင် လိူဝ်ၼႆႉသေ လုၵ်ႉတီႈၸဵင်ႇမုင်ႈႁၼ် ၽႂ်မၼ်းယဝ်ႉ မႄႇၶႂၢၵ်ႈ ဝူၼ်ႉဢွၵ်ႇ ထွၵ်ႇၼႄ ပၢႆးဝူၼ်ႉၽႂ်မၼ်းၵေႃႈ မီးမႃးတင်းၼမ်ယူႇယဝ်ႉ။ 

ၼင်ႇၶိုတ်းတၢဝ်း လႆႈႄတႉ ဢိင်ဢဝ်ၸိူင်းရႃႇမ သေ တႅမ်ႈပဵၼ် ပပ်ႉ သၢင်း ဢၼ်လုၵ်ႉတီႈၸဵင်ႇ သင်္ကေတဝါဒ ယုတ္တိဗေဒ ၼၼ်ႉတူၺ်းႁၼ် သေ ပၢၼ်းပၢႆးတႅမ်ႈဢွၵ်ႇမႃး (ဝတ္ထု လင်္ကာဒီပချစ်သူ) သေ ၵေႃႉတႅမ်ႈ မၼ်း ပဵၼ် (ချစ်ဦးညို ) ။ ၼႂ်းၼၼ်ႉ မၼ်းတႅမ်ႈပဵၼ်ၼင်ႇ ၵူၼ်း( မိူင်း )ၼင်ႇၵၼ်တိုၵ်း ၵၼ် တေႉတေႉ သေ တႅမ်ႈၵႂႃႇၼႂ်း ၶွပ်ႇ ယုၵ်ႉတိ ၿေၻ ၼၼ်ႉလႄႈ မီးၵူၼ်း ဢွၼ်ထတ်းသၢင် မႃးတင်းၼမ် ယူႇ ယဝ်ႉ ။ ပပ်ႉၼႆႉ ၵေႃႈလီပိၼ်ႇပဵၼ်ၽၢႆႇတႆးယူႇ ။ 

ၼင်ႇဝႃႈမႃးၼၼ်ႉ ပပ်ႉလင်ႇၵႃႇသိပ်းႁူဝ်ၼႆႉ မၼ်း ၸၼ်ၸႂ် သုမ်ႇလွမ်ႉ ၼိူဝ် တႆးႁဝ်းမႃး ပီႊယၢဝ်းၶၢဝ်း ႁိုင် သေ ၵူၼ်းတႅမ်ႈမၼ်း ၸဝ်ႈၶူးမေႃ ၶဝ်ၵေႃႈ တေမီးလၢႆလၢႆၵေႃႉယူႇ ။ ပပ်ႉဢၼ်တႅမ်ႈဝႆႉၼင်ႇ ဢတ်ႉထူၵ်ႉပတိ ဝတ်ႉထု ၸႃႇၸၵ ၵူၺ်း ဢမ်ႇၵႃး ဢဝ်
တႅမ်ႈပဵၼ် ၸိူင်းၼႄႁၢင်ႊ သေ ပီႈၼွင်ႉမိူင်းၼိူဝ်ၶဝ် ဢဝ်ၵႃႊၸိူင်း မႃး ယဝ်ႉ ဢွၼ်သူင်တူၺ်း ၵၼ် ပေႃးပဵၼ်ဝႆႉ ၸိူင်းယ်ႂးႁိုၼ် ဢၼ်လၢမ်းတၢမ်းပုတ်ႈမိုဝ်း ၵၼ်မႃး ပၢၼ် သိုပ်ႇပၢၼ်ယူႇယဝ်ႉ။  

လွင်ႈၶူၼ်ႉၶႂႃႉ လမ်းတိုၼ်း လွင်ႈလင်ႇၵႃႇသိပ်းႁူဝ် ဢၼ်ဝႃႈ တေဢဝ်လိၵ်ႈလူင်လင်ႇၵႃႇတႆးသေ ဢဝ် ၸုမ်ႈၶူး Ph.D ၼၼ်ႉၵေႃႈ လႆႈႁၼ် မီးမႃး ယူႇယဝ်ႉ ။ ၼၼ်ႉတႄႉ ပဵၼ် ၸၢႆးမႅၵ်း Sittichai panchon တေဢဝ် လိၵ်ႈလူင်လင်ႇၵႃႇတႆး ရာမယဏ လင်ႇၵႃႇသိပ်းႁူဝ်တႅမ်ႈပဵၼ် Thesis သေ တေၶဝ်ႈတၢင်ႇ ၼႂ်းၸၼ်ႉ ၸွမ် Sipakorn University Bangok ၼၼ်ႉ ယဝ်ႉ။ လႆႈ ၸူမ်းသိူဝ်း ဢဝ်ၵုင်ႇ မုၼ်တေႉ တေႉယူႇၶႃႈ ။ 

မိူဝ်းၼႃႈထႃႈပၢႆမႃးၵေႃႈ မုင်ႈမွင်းႁႂ်ႈမီးမႃးထႅင်ႈ ၽူႈၶူၼ်ႉၶႂႃႉလမ်းတိုၼ်း လွင်ႈလင်ႇၵႃသိပ်းႁူဝ်  လိၵ်ႈလူင်လင်ႇၵႃႇ တႆး တင်းၼမ်တင်းလၢႆ ယူႇ ၼႆသေ ။ 

ၶႂၢၼ်သၢႆၾႃႉ ( မိူင်းငေႃႉ )
(5.9.2024)

==ၽိုၼ်ဢိင်==
{{Reflist|
&lt;ref&gt;လင်ႇၵႃႇသိပ်းႁူဝ် ပပ်ႉတူပ်ႉၸေႈသႃ ၼမ်ႉၵႂၢမ်းၸရေး ပၢင်ႇ ပၢင်မူ တပႄးၸဝ်ႈမိူင်းၼွင်&lt;/ref&gt;
&lt;ref&gt;လင်ႇၵႃႇသိပ်းႁူဝ် ၽိုၼ် pdf ၼမ်ႉၵႂၢမ်းၸရေးလၢႆးသႂ် ၵဵင်းလူမ်း&lt;/ref&gt;
}}</text>
      <sha1>k7h11dy8yw4xgml6ymgyhjx28zrfgj4</sha1>
    </revision>
  </page>
</mediawiki>