လိက်မဒကောၚ်ပိုန်

<mediawiki xmlns="http://www.mediawiki.org/xml/export-0.11/" xmlns:xsi="http://www.w3.org/2001/XMLSchema-instance" xsi:schemaLocation="http://www.mediawiki.org/xml/export-0.11/ http://www.mediawiki.org/xml/export-0.11.xsd" version="0.11" xml:lang="mnw">
  <siteinfo>
    <sitename>ဝဳကဳပဳဒဳယာ</sitename>
    <dbname>mnwwiki</dbname>
    <base>https://mnw.wikipedia.org/wiki/%E1%80%99%E1%80%AF%E1%80%80%E1%80%BA%E1%80%9C%E1%80%AD%E1%80%80%E1%80%BA%E1%80%90%E1%80%99%E1%80%BA</base>
    <generator>MediaWiki 1.47.0-wmf.21</generator>
    <case>first-letter</case>
    <namespaces>
      <namespace key="-2" case="first-letter">မဳဒဳယာ</namespace>
      <namespace key="-1" case="first-letter">တၟေင်</namespace>
      <namespace key="0" case="first-letter" />
      <namespace key="1" case="first-letter">ဓရီုကျာ</namespace>
      <namespace key="2" case="first-letter">ညးလွပ်</namespace>
      <namespace key="3" case="first-letter">ညးလွပ် ဓရီုကျာ</namespace>
      <namespace key="4" case="first-letter">ဝဳကဳပဳဒဳယာ</namespace>
      <namespace key="5" case="first-letter">ဝဳကဳပဳဒဳယာ ဓရီုကျာ</namespace>
      <namespace key="6" case="first-letter">ဝှာင်</namespace>
      <namespace key="7" case="first-letter">ဝှာင် ဓရီုကျာ</namespace>
      <namespace key="8" case="first-letter">မဳဒဳယာဝဳကဳ</namespace>
      <namespace key="9" case="first-letter">မဳဒဳယာဝဳကဳ ဓရီုကျာ</namespace>
      <namespace key="10" case="first-letter">ထာမ်ပလိက်</namespace>
      <namespace key="11" case="first-letter">ထာမ်ပလိက် ဓရီုကျာ</namespace>
      <namespace key="12" case="first-letter">ရီု</namespace>
      <namespace key="13" case="first-letter">ရီု ဓရီုကျာ</namespace>
      <namespace key="14" case="first-letter">ကဏ္ဍ</namespace>
      <namespace key="15" case="first-letter">ကဏ္ဍ ဓရီုကျာ</namespace>
      <namespace key="100" case="first-letter">ပါင်မုက်</namespace>
      <namespace key="101" case="first-letter">ပါင်မုက် ဓရီုကျာ</namespace>
      <namespace key="710" case="first-letter">TimedText</namespace>
      <namespace key="711" case="first-letter">TimedText talk</namespace>
      <namespace key="828" case="first-letter">မဝ်ဂျူ</namespace>
      <namespace key="829" case="first-letter">မဝ်ဂျူ ဓရီုကျာ</namespace>
      <namespace key="1728" case="first-letter">Event</namespace>
      <namespace key="1729" case="first-letter">Event talk</namespace>
    </namespaces>
  </siteinfo>
  <page>
    <title>လိက်မဒကောၚ်ပိုန်</title>
    <ns>0</ns>
    <id>6869</id>
    <revision>
      <id>57523</id>
      <parentid>44660</parentid>
      <timestamp>2026-09-27T12:18:47Z</timestamp>
      <contributor>
        <username>Ranger-Mon</username>
        <id>120</id>
      </contributor>
      <origin>57523</origin>
      <model>wikitext</model>
      <format>text/x-wiki</format>
      <text bytes="197038" sha1="e5b4iseca8iyn0scc4nbxjaomv2140c" xml:space="preserve">==လိက်မဒကောင်ပိုန်==
သွက်ကောန်ဂကူဘာသာမန်ဂမၠိုင်တံ သ္ဂောံတီကေတ်ပရူသၟိင်သာဲလေဲ, မပ္တိုန်ကဵုကွိုန်စရာဲဍုင်ဟံသာဝတဳ မပိုင်ပြဳလဝ်ဂြိုပ်, က္ၜဳ မဂွံအလဵုအသဳ − ပ္ဍဲအလုံတွဵုရးရာမညညးဂမၠိုင်မ္ဒးရှ်ေသှ်ေရဴဂဴလိက်ဗွဟ်မွဲ − မၞုံယၟု
မဒကောင်ပိုန်ပြာကတ်လလောင်တမ်ညဝ်အလုံရးဍုင်ရောင်။
 
ကျာ်ဇၞော် ကုသလ
ဘာကျာ်သြဳမည်−ပါဠိတက္ကသိုလ် (ဍုင်လ္ဂုင်)

==နိဒါန်==
     	လိက်ဝွံအဲဆန် ဟီုပၠန်မွဲတောင်။ လင်္ကာကဝိ ညိဟွံကဵုယောင်။ ဍိုက်ပေင်ကဵုရှ် ဗှ်စိုရောဍောင်။ ဆမိပ်ဒးဂြဴ မှောဝ်ဇဴစိုတ်သၠောင်။ ချူကှ်ေဇွိတ်ၜိုတ် ပိုတ်ဖျုန်ရောင်ယောင်။ ပိုဲမည်ဘာသာ ကၠာတေံမွဲတောင်။ ဂွံဒုင်စသိုင် ဂၠိုင်ကဵုအခေါင်။ မုက်မတ်ရာင်ဆာဲ စရာဲဂေါဝ်ရောင်။ ဆဂးဟီုဂှ် ဗှ်ကံမွဲတောင်။ လောန်ကၠုင်လံလ ဘဝပိုဲရောင်။ ဂၠိုင်ကဵုဒြပ်ရတ်ပြာကတ်လလောင်။ ပိုန်ဨကရာဇ် ဟွံဝါတ်ဆောတ်ယောင်။ ဂကူမည်အဵု နွံဝဵုဂွံအခေါင်။ ပိုင်တိဍာ်ရောင် မွဲ
တောင်ဂးလဝ်။ 	။

ဂၠိုင်ကဵုပယျာံ သၞာံသံဝစ္ဆဝ်။ အုပ်ဓုပ်ပိုင်ပြဳ လဵုသဳတမ်ညဝ်။ ဂကူမည ဝံသသၟိင်ဓဝ်။ မင်မွဲဘာသာ ပညာတိုင်ထဝ်။ သာသနာအဵု စံင်ဗဂဵုလဝ်။ ဖေက်တိမဇကၠေံ သၠေံဟေန်သပဝ်။ ဖေက်တၞုက်ပိုတ် အိုတ်ပ္ကဴဇဝ်။ ဖေက်တၞံဒေါမ်ဗြောံလီုကာဲကဝ်။ မင်မွဲကၠုင်ရ တၠသၟိင်ဓဝ်။ ပိုင်ပြဳအုပ်လဒံယၟုတမ်ညဝ်။ ဖါသီမုဟ်တၟံ သဓီုတၟံထဝ်။ ဟံသာဝတဳ ကျာ်သြဳအံသဝ်။ မင်မွဲပိုင်လဝ် အသဝ်လောန်ကာဲ။	။

     	ဗှ်ကံအတိက် သိက်ပရေနာဲ။ ကၠာတေံပိုဲမန် ပိုင်နန်ဂဵုဍာဲ။ ဂွံအဝဵုခြိုင် ဂၠိုင်ကဵုအာဲကၟာဲ။ ပိုင်ရးဍုင်ကွာန် ထာန်တၠနာဲ။ မိပ်သိပ်လဟိင် ဇူသၞိင်သြိုဟ်ယာဲ။ မုတ်မတ်ရာင်မံင် ညံင်ထဝ်ဂဵုဍာဲ။ နူဂှ်အဆက် ကြက်ဒးပြးဆာဲ။ လီုလာ်ဇဳဂၠံင် ရံင်အာဂၠိုင်ဒၞာဲ။ သၟိင်ပြးနူနန် လန်ထောံအာဲကၟာဲ။ ဒးကၠင်တဟး ကောန်ပြးနူယာဲ။ သမ္ဘာကဵုတၠ ဝံသကဵုနာဲ။ ကွးကဵုအ္စာ ဒးကာဗက်ဂၠာဲ။ ပြးနူဒမံင် ညံင်ဂြုန်ဟိုင်သာဲ။ လီုလာ်ပြးဆာဲ သာဲချိုတ်ဂယိုင်။ 	။

ပိုန်လောကဳရ ဆညိရောပိုင်။ ကၠာတေံမန်တံ ဗိုန်ညံင်တၟံတိုင်။ နွံကဵုဨကရာဇ် ပြသာတ်နန်ထ္ၜိုင်။ လ္တူပၞင်ထဝ်ဗွဲသၟဝ်က္ဍိုင်။ သံက်စရှ်လဝ် နွံအသဝ်ဂၠိုင်။ ဍိုင်ပေင်ကဵုမ္ၚဵု နွံအဝဵုပိုင်ပိုင်။ လၟုဟ်ဟွံမွဲသွံ ထောံလဝ်ပွိုင်။ ဒဴကၠေံဝံသ ဟွံပသဇိုင်။ သာ်လဵုဂွံပ တော်ဆကဵုဂၠိုင်။ ဍုင်မည်ဂးရ ဂွံဆမိင်ပရိုင်။  ဗွဲစၟတ်သွံ ပိုဲရောဟွံပိုင်။ နွံဒၟံင်ကွေံရ သှ်ေဆပွိုင်။ ဗှ်ကံအတိက် ဒှ်ဍိက်ပိုင်ပိုင်။ ချပ်အာအိုတ်ဇိုင် ဂၠိုင်သၞာံကာလ။ 	။

     	ယွံကလောပိုဲ ဟိုဲဗော်မည။ ဂၠိုင်ကဵုအခါ ကၠာတေံဒှ်တၠ။ လၟုဟ်ဒှ်ဍိက်ဂၠုဲ ဒုဲအိုတ်ဝံသ။ ဟွံမွဲသၞေဟ်သင် ကၠင်ဟဳဒၟံင်ရ။ ဗှ်ချပ်စံင်တူ မူဝိပါက။ အရေဝ်လိခ်ပတ် ဒ္ဂေတ်ဝတ်လောက။ ဂကူဘာသာ သာသနာပၠ။ ဍုင်နန်ပြာသာတ် ဓါတ်အတုလ။ ပိုန်ဂၠိုင်ကဵုသာ် လီုလာ်မှာဲမှ။ထုဲကြာန်လီုတ္ၜန် ကၠေံဗ္ဒန်အိုတ်ရ။ ဟိုတ်မာဲဝိဝိင် တၠိင်ကၠေံဝံသ။ ဟွံမင်မွဲလဝ် ဓရ်ကျာ်သာကျ။ ကတညူဂုန် ဟွံဖ္ဍုန်သဳသ။ လီုလာ်ပြးဆာဲ ဂကူမှာဲမှ။ မူဝဳပါက ဝံသတၞောဝ်မည်။ 	။

အတိဒုက္ခံ ချပ်ရံင်ဂိလောန်။ ဗီုပိုဲဒှ်ကၠုင် ဒုင်ဘဲရောအောန်။ နူဘဝနာဲ စရာဲစိစောန်။ ဟုတ်ဗ္ဒန်စှ်ေ သှ်ေဆယၟုမည်။ ဘဝဍိက်ပၠက် ဆက်ကၠုင်လံလောန်။ ဒးဒုင်ပျဲပျာံစၞာံညံင်စးကြောန်။ ဒဒိုခ်သာ်ဏံ လံလသ္ၚောဲလောန်။ ဗှ်ရံင်စိုတ်က္ဍန် ချပ်ပၠန်သိင်သာ။ 	။

         တၠအလဵုသဳ ပိုင်ပြဳပိုဲကၠာ။ သီဒက်ကောပ်ကာဲ ပြယျာဲဘာသာ။ ဇြောတ်ကေတ်ဆီစိ ညိညိအိုတ်အာ။ ပိုဲမည်တံကီု ဗီုမကၠေံအာ။ ညးကလိင်အဲ အဲကလိင်ညးကၠာ။ ဂကူပိုဲဗျိုင် ပိုဲဒးကလိင်အာ။ ဟိုတ်မကလိင်ဟေင် ဂကူသေင်ဟာ။ သ္ပမၞိဟ်မွဲစွံ ဟွံတုပ်လအာ။ ဟိုတ်ကုသဵုအောန် ဒးကၠောန်ထွက်ကာ။ ဂကူပိုဲဝွံ ဍိုန်လ္ၚုစှ်ေအာ။ ဟိုတ်မကလိင်ကၠာ ဘာသာဇြဟာန်။ 	။

ယွံကလောပိုဲ ဟိုဲသၞောဝ်ဒါန်။ မိင်ဟာဍောင်ဓဝ် အသဝ်ပိုန်ဟာန်။ နွံကဵုဨကရာဇ် ပြာသာတ်နန်ယာန်။ ဍုင်ပိုဲတိပိုဲ ဟိုယ်ဗော်သၞောဝ်ဒါန်။ ပိုင်ပြဳလဝ်ရ လံလအဓာန်။ မင်မွဲဂကူ လတူနန်ယာန်။ ကိုပ်ကၠာတေံဂး ဇၟာပ်ဍုင်ရးကွာန်။မန်တံဇၞော်မောဝ် ဂေါဝ်ဆာဲလောန်လောန်။ လၟုဟ်သုန်ဂြာံ ညံင်နာံဒဴပ္ကာန်။ နာံထောံဒဴရုပ် ရုပ်စိုတ်သုသာန်။ ညံင်ဗီုသာ်ဂှ် တုပ်သၟဟ်မွဲဟာန်။ မုက်ဍောတ်မတ်သဝ် လဝ်ပ္ဍဲဝိညာန်။ သာ်လဵုမဂး ညးမွဲရောသၟာန်။ ဗှ်ကံအတိက် ဒှ်ဍိက်ညးကွာန်။ ဂွကွေံရဏး ဟးဂိကတာန်။ ပိုန်ဨကရာဇ် ပြာသာတ်နန်ယာန်။ သှ်ေဆယၟု လ္ၚုနူပိုန်ဟာန်။ ၜိုန်ဒးပြးဆာဲသာဲသဏ္ဌာန်။ ၜိုန်မံင်တဴသ္ၚောဲ ညးမွဲမွဲကွာန်။ ညံင်ကောဒေံပၠန် ကောန်မွဲမိပ္ကာန်။ ပိုဲမန်ကဵုမန် ကဵုနွံဇြဟာန်။ သာ်ဂှ်ဟွံသေင် တၟေင်မွဲဂလာန်။ ညံင်ဝုတ်ကဵုဗၠာဲ ဂၠာဲဆက်မိတ်ဒါန်။ကာလကောံသၟဟ် ဒှ်ဓဝ်ဇြဟာန်။ မေတ္တာဗျဳဗျာပ် ဇၟာပ်အရာဒါန်။ တုပ်သၟဟ်သာ်ဂှ် ကဵုဒှ်ကွေံကြာန်။ ဍုင်မိတိမ လံလအဓာန်။ မိပ်စိုတ်မွဲဟာန် နိဒါန်မန်ရောင်။ 	။
==လိက်ဗွဟ်မဒကောင်ပိုန်==
နမောတဿ ဘဂတော အရဟတော သမ္မာ သမ္ဗုဒ္ဓဿ
နမတှုဟေင် ပြေင်သူစရိုတ်။ ဒွါပိတၠုင် လယုင်ဏာစိုတ်။ ဂုန်ကျာ်ဂမျိုင် ပၞာင်တိုင်ၝောံကိုတ်။ အဲလ္ၚောဝ်ကၠာဟွံခြာတသိုက်။ ဂုန်ဓဝ်စှ်သွံ ပလဝ်ၝောံကိုတ်။ တူကၞေင်စွံပ္ဍုန် တိုင်ဂုန်ပြဲသတိုင်။ အဲဍိက်လ္ၚောဝ် လျုင်လဝ်စိုတ်။ အရဳယျသင် ညံင်တၠင်ဗိုတ်။ စ္ဍးနူရာဂ ကိလေသအိုတ်။ အဲဍိက်လ္ၚောဝ် ပြေင်လဝ်စရိုတ်။ ဖဵုအဲလ္ၚောဝ် ရတ်ပိပြဲသ္တိုတ်။အန္တရာဲဆက် စှ်လက်လ္ၚီကိုတ်။ ကဵုလာဲလေင်အိုတ်  ကဵုပၠိုတ်ဟောံညိ။ 	။

ပြဲလောန်အဆတ် တိုင်ဂုန်ရတ်ပိ။ လ္ၚောဝ်တုဲအဴ ဗွဲကြဴဒမၠိ။ အဲပြေင်လဝ်ညိ သိရိဝါကျ။ တိုင်လင်္ကာပၠန် လၟေင်ဆန္ဒ။ ဟီုလဝ်လိခ်မွဲ ပ္ဍဲရးမည။ ပ္ဍဲရးဟံသာ ကဵုမြာဂတ။လိက်သၟိင်ဓဝ်ကၠာ သာဲလေဲနာမ။ လိခ်ဝွံကၠာတဲ ဆန်မွဲဝါရ။ညးဆန်တမၠာ လံလောန်ကာလ။ ဟိုတ်လံအာရ ဆန္ဒလီုအာ။ ပိုတ်ဗျုန်ယုတ္တိ ယတိယောင်ယာ။ ဒကုတ်ဖလုတ် ဇမောဝ်သ္ဂုတ်အာ။ သၟိက်လဟဵုညိ တၟိမွဲဝါ။ အဲဆန်ပ္ညဳကၠာ မွဲဝါပၠန်ရောင်။ 	။
ပ္တန်သူစရိုတ် စိုတ်ပကဵုယောင်။ မင်မွဲစိုတ်ရောင် ပကဵုယောင်ချဳ။ နွံဍုင်ဇၞော်မွဲ ပြဲသန်ကျာ်သြဳ။ ယၟုဍုင်ကၠာ ဟံသာဝတဳ။ ကရိုဏ်တဏာဲ ဗတင်လာဲဇဳ။ နန်ဂ္ညိရတ် သ္ၚိကၠတ်ကျာ်သြဳ။ ဂိုဟ်သုံမထိုက် သလိုက်ဗစဳ။ ဆာန်ဆံင်ဒၟံင်ဂျာန်ထဝ်အာန်ဇနဳ။ ရုင်စိင်ဒၟံင်ထပ် ဗိုင်သရပ်ပ္ညဳ။ ချေံပြဟ်ဇိုင်သာ ဒၟံင်ဗ္ဂာတဝဳ။ ညးဒေါန်ညးဇြင် ဒၟံင်ထဏင်ဗဳ။ ဝုတ်ဒိုဟ်ဇိုင်မြု ထဥတဝဳ။ ဂၠိုင်ကဵုဝေါဟာ ဇၟာပ်ဘာသာဇဳ။ သေံဗၟာပၠန် ကၠေဝ်မည်ပသီ။ ကမၠိုင်ဍာ်ကၟာ ဇၟာပ်ခန်လွာဇဳ။ ပ္ဍဲဒေါဝ်ဍုင်ဂှ် ဗဒှ်လဝ်စေတဳ။ ကျာ်မံင်တဴရ နာမဂးပ္ညဳ။ ထဝ်ဗိုင်တဝဳကျာ်သဳလောန်ကာဲ။ 	။

ပရူဒဒှ် လဖဟ်ဟီုဂၠာဲ။ ရးဟံသာပ္ကာန် ဂးကွာန်ဒမာဲ။ မူဒၞာဲကွာန်ကီု တူရူဟီုဂၠာဲ။ တဴပလလိုတ်ကၠာ ရးဟံသာဆာဲ။သၟိင်ဓဝသၟိင်ဓဝ်အကာဲ သာဲလေဲညးဟီု။ ပသာ်ဒဒှ် တိုင်တဝှ်ဗီု။ ပင်မှိင်ပိုဲဟီု ကြီုပထမ။ ကွာန်ဒင်မာဲဂှ် ဒှ်ကွာန်ဝါဗ္ၚ။ ဗြဴမွဲဂှ်ရ တ္ၚဲဗုဒ္ဓဝါ။ ယၟုခုတ်ပ္တန် မိသုကညာ။ တြုံမွဲဆတ္တဝ် တ္ၚဲသ္ၚိသဝ်မာ။ ယၟုခုတ်လဝ် နာဲဍိက်ထဝ်ကၠာ။ ဒၟံင်ပ္ဍြကွာန်ဆာဲ ဒင်မာဲသီုၜါ။ ညးၜါဂှ်ပၠန် ဆန်မွဲသၞာ။ ဂွံကောန်တြုံမွဲ နဲလိုက်စမ္ၚာ။နာဲဒကောင်ပိုန် ဖျိုန်ယၟုကၠာ။ မိကဵုမၜါ လွဳပရာတဴ။ 	။

နာဲဒကောင်ပိုန် ဖျိုန်ယၟုတုဲအဴ။ ဇၞော်အာဖေါင်ဖေါင်ညံင်ဗီုဍောင်ပ္ကဴ။ စရာဲရုပ်သၟတ် ဂပ်ဝ်တ္ၜတ်သြဴ။ မိမသ္ဍိုက်လောန် ကောန်လၟာဂၞဴ။ ကြဴဝွံတုန်မာ မချိုတ်အာတဴ။ မိဂှ်ဗြဴကၟာဲ နာဲကညာဗြဴ။ နာဲဒကောင်ပိုန် ဒတိုန်ကြဴလှဴ။ ဒေါဝ်ဗနဳရောင် ကောန်နာဲဍောင်ပ္ကဴ။ ဂၠိုင်ကဵုကၠင်ဗော် သဳနော်လဗဴ။ ညာန်ဘာန်ကြဴလှဴ ကြဴဝွံဇၞော်အာ။ အာဒှ်ဗၠာဲဟေင် သမုဲလေင်ကၠာ။ ကျိုင်ကျဝ်ဂ္ညိဂ္ညိာတ် ဒးကၞာတ်ဗဳသ္တာ။ ညံင်ထဝ်ဒကောင် ညံင်ဍောင်စမ္ပာ။  ဂပ်ဝ်လောန်ထာန် ဗီုစန္ဒိမာ။ ဗြဴသုကညာ ညာတ်ကောန်ခါဂှ်။ ဒၚောဝ်ဗဵုရုပ်ကောန် ညံင်ညးသောန်ဗဒှ်။ ညာတ်ရုပ်ကောန်အဴ ချပ်တဴလၚဟ်။ ကောန်အဲဝွံဂှ် ရုပ်တၟေင်တၟဟ်တဴ။ 	။

     	ကသပ်စိုတ်စိ မိကညာဗြဴ။ ကောန်တြုံအဲဝွံ အနုထာင်ပ္ကဴ။ စရာဲကျာ်သဳ ညဳသာက္ၜတ်သြဴ။ တောံပၞာဲဇိက်ဗ္ၚ ဟွံကြိုက်သဘဴ။ ကဵုမံင်ဘာအဴ ဒှ်တဴစရာဲ။ ချူကှ်ေဂၞန်ကတ် ပုတ်ဂၠတ်ဇၟာပ်ဒၞာဲ။ ပါန်မုက်ပါန်ခဳ ဗဳသ္ကဝ်မဆာဲ။ ပုံကၞာတ်အိုဿီု အဂီုစလာဲ။ လိခ်ဂွက်မင်ဇေန် ဗှ်ဒးပ္ဍေန်ချာဲ။ ကွတ်ပါင်ဇၟာပ်ဒၞာဲ ကွတ်တဲဂၠာဲဇဳ။ အာယုက်ပေင်သၟဟ် ကဵုဒှ်ခမဳ။သာ်ဝွံရောင်ဒး ဂွံစဳကၠးဇဳ။ ကဵုဂွံလေပ်သၟတ် ကွတ်ဇဳခရဳ။သာ်ဝွံပလွဳ ခမဳပြဲရောင်။ 	။

မိဗြဴကၟာဲအဴ ချပ်တဴမွဲတောင်။ ချပ်ဂွံအခေါင် မွဲတောင်တုဲမာ။ ကောန်သ္ဍိုက်လ္အိတ် ကေတ်ပ္တိတ်ဏာဘာ။ စိုပ်ဘာတုဲအဵု ဇိုန်ကဵုအစာ။ ကၞိပ်ဇံသဝ် ယဵုလဝ်တဲၜါ။ ယွံတဳလအဲမပြဲပညာ။ ကောန်အဲဍိက်မွဲ ဟွံမွဲပြတ်ညာ။ ဍေံဟွံလေပ်သၟတ် ပြတ်ညာသေင်ဟာ။ ညံင်ဂွံလေပ်ကွတ် ပြတ်ညာသကာ။ ကဵုကတ်ဗ္တောန်ဟေင် ဇရေင်အ္စာ။ ဟိုတ်ဂှ်တုန်ကၠာစိုပ်ကၠာဘာရ။ ကောန်အဲဍိက်မွဲ နဲကောန်တဳလ။ သွက်ဂွံလေပ်သၟတ် ဇၟာပ်ကွတ်သဗ္ဗ။ အပ်ဇိုန်နှင်ရ ကဵုတဳလရောင်။မိသကညာ ညိဟွံခြာယောင်။ သာ်ဝွံမွဲတောင် ဂွံအခေါင်ပြဟ်။ သုကညာပၠန် ဖျိုန်ကောန်ဒှ်။ ဖကန်ဖျန်ကၠာ ကဵုကောန်ခါဂှ်။ ယွံခဍောင်မတ် ကၞတ်ကြဳဇှ်။ ပ္ဍဲကဵုမိဂှ် နာဲပဗှ်သၞာ။ ဆဂွံဆစ ဇၟာပ်စၞကၠာ။ နာဲကၠေံစိုတ်ကတ် ဇၟာပ်ကွတ်မွဲမွဲ။ ပ္ဍဲဇရေင်အ္စာ နာဲပအာသ္ၚောဲ။ အ္စာမၠာ်မွဲ ယိုက်တဲလ္ၚောဝ်။လစောတ်လမောဝ် သၞောဝ်ဂၠံင်ကဵုတီ။ ဒၟံင်ကဵုသီရဳ လ္ပအီဂြိုင်။ ပကၠိုင်ကၟိုင် ပဂြိုင်စမြေဟ်။ ဗဒှ်လုဲလက် ဗမက်ပလှ်ေ။ ဂရိုင်ပဝေင် ဍေံနင်လေင်ကွေံ။ ဗမက်ပလှ်ေ ဍေံကဵုဒ
ဒဒိုခ်။ သၟတ်ကတ်ဗ္တောန် ကောန်ဗၠာဲဂွံသိုက်။ မိမသ္ဍိုက်ယိုက်ပ္တိတ်လဝ်ဘာ။ ဖကန်ဖျန်တုဲအဴ မိက္တဵုစဴအာ။ 	။

နာဲဒကောင်ပိုန် ဒတိုန်ရုပ္ပါ။ သီုမကြဴလှဴ ဒၟံင်ဖဴအ္စာ။ဟိုတ်ကုသဵုကံ နူတၞံတမၠာ။ ခဍံက်ညာန်လှဲ ဗွဲပြဟ်လေပ်အာ။ ချူဒှ်ကှ်ေဒှ် ဗှ်ဒးမြက်စာ။ ဍောတ်ဗၠာဲတုန်ဟေင် ပ္တီမိသေင်ဟာ။ သၟိက်က္ၜဂတဵု ဟီုကဵုမိကၠာ။ မိဂွံမိင်အိုတ် မိပ်စိုတ်မှောဝ်ဇဴ။ အတိုင်လၟေတ်ကွေတ်နူတမၠာ။ က္ၜဂတဵုဟေင်ရဴဝွံသေင်ဟာ။ ဓုပ်ပၞာင်ပ္ကဴပၠ ဇဗၠုသၠကၠာ။ ကွာင်တောဝ်တၞးပၠန် ကောန်ကသေင်ဟာ။ ကွာင်မပၞဟ် ကၠောန်ဗဒှ်ဏာ။ကွာင်ၚုဲဂတာံ လကံက်နာံဒွါ။ ဗြာတ်သီုသတ်ဗြဴ နှဴရဴကဝ်ၜါ။ ကွာင်ၜဲယိုဟ်က္ၜန် ဂၠိုင်သန်မွဲသာ။ ပြုပြေင်လဝ်ကၠာ တုဲအာဇၟာပ်တင်။ 	။

ကော်ကယိုင်ကောန် ယာတ်ယန်ယာတ်က္ၜင်။ လစိန်စရံင် ဒြင်ဗံက်ပယင်။ ဗြေဝ်ဂတေဝ်ပး တၟးဂဵုခၠင်။ မာဲလိတ်လာင်ဇင် ဖေင်ကသူကၠာ။ စုတ်ကၠေင်ဂြးသော် ဗော်တင်ကတောဝ်ၜါ။ ကျိုင်ကောန်တုဲကၠာ တော်ဆယာယဳ။ ကၠောဂမၠိုင် ရိုင်ရိုင်သ္အဳသ္အဳ။ ဒၚဳဇက်တိတ်အာ စိုပ်အာတွဳ၊ အာနိမန်နင် သၟိင်သင်အရဳ။ ဖါပ်ကဵုဒါန်ကၠာ ဆန်အာဒၚဳဒၚဳ။ ကောန်ကွးဘာတံ ကဵုဂဇံသဳကၠဳ။ ဂတဵုကျာ်သြဳ ဒၚဳကေတ်နင်ကၠာ။တူဂတဵုအ္အးသၠဗြာတ်လးသာ။ တူသၠဗြာတ်သ္ကဲ စုတ်ကွာင်ၜဲကၠာ။ ဗၞတ်ပန်စွံဟေင် စုတ်ပြေင်လဝ်ကၠာ။ တုဲနိမန်ရ ကော်ဗ္စသေင်ဟာ။ 	။

ပပြတ္တိက မဟာဗြဟ္မာ။ နိဒ္ဓိကာစ ဂးစန္ဒိမာ။ အင်္ဂုလိမာ မဟာဗဳသၞု။ အက္ခရဉ္စ ပြမေသွာရာ။ နိမန်ဒေဝတဴ ရဴဝွံဂါထာ။ အဓိပါဲသၟတ် ဂါထာဂှ်မာ။ ယဝ်သၟိင်တီကီု ပိုဲပျးဟီုကၠာ။ ပြပြတ္တိက မဟာဗြဟ္မာ။ ဒေဝတဴကီု မှာဗြီုဂးမာ။မဂွံအဝဵု ပိုင်ဂတဵုကၠာ။ နိဒ္ဓိကာဟေင် ဂတဵုသေင်ဟာ။ ပိုင်ဗကောဟ်ဂ္ညိ ဂးစန္ဒိမာ။ အင်္ဂုလိမာ မဟာဗဳသၞု။ ပိုင်လပှ်တဲဟီုသ္ကဲယၟု။ ဂးမှာဗဳသၞု ခုတ်ယၟုကၠာ။ အက္ခရဥ္စ ပြမေသွာရာ။ပိုင်အက္ခဝ်ကၠာ မှာပြမေသွဝ်။ ဒေဝတဴပန် နူဒတန်ကဝ်။ပိုင်ပန်စွံဓဝ် နူကဝ်မူလ။ 	။
ဒေဝတဴပန် တန်ဖါပ်ဗ္စ။ သာ်ဝွံတုန်ရ က္ၜရာဒနာ။ယွံမၞးဗြီု သီုစန္ဒိမာ။ မှာပြမောဝ် ပြမေသွဝ်ကၠာ။ ဒေဝတဴပန်ပိုင်ပန်ပြကာ။ မင်ဂတဵုမြဟ် ပိုင်ဗကောဟ်ကၠာ။ လပုဟ်တဲဓဝ် ပိုင်အခဝ်ကၠာ။ သီုညးပန်ကၠာ ပိုင်ပန်ဋ္ဌာန။ ပိုဲသ္ပပူဇဴဗြာတ်က္ၜဴပုင်သွ။ အမာဲယိုဟ်ပြဲ ကွာင်ၜဲစၞး။ သ္ပပူဇဴဂ္ညိ ဒမၠိကာလ။ ဂးတုဲဍာ်သၠိုင် ဂိုင်စရိုဟ်ပၠ။ ယွံမၞးမပ တၠနုဘဴ။ ဖဵုအဲဍိက်က္ၜ ဂွံပပူဇဴ။ ကောန်အဲဍိက်အဴ ပ္ဍေန်တဴညာန်လှာဲ။ ပြကိုဟ်ပုံကၞက် လိက်ဂွက်နဲကဲ။ ကဵုတိုန်ပါင်စိုတ် အိုတ်စမဟ်တ္ၚဲ။ ပညာညာဏ်လှဲ နဲကာသဂင်။ လောကဳဗဟဳ ဇဳဇာပ်ကလင်။ ကဵုတိုင်ပါင်စိုတ် အိုတ်တၟံတင်။ မၞးတံထံက်ပင် ရီုဗင်ညိအဴ။ 	။

သာ်ဝွံတုန်ရ ရာဒနာတဴ။ က္ၜဂတဵုအဴ တုဲဒှ်တဴကၠာ။ ဒရီုသကအ် ဂပ်လံကာဖါ။ တုဲကလံဂ္ညဳ သင်အရဳမာ။ ဒၚဳက္တဵုစဴဒၟံင်ထာဏ။ ဍောတ်ဗၠာဲဂေါဝ်ဇြုင် ဂိုင်ဒေပ်ပုင်သွ။ တုဲဂၠာဲကတ်အာ ဇရေင်အ္စာပၠ။ ဟိုတ်ဝါသၞာ တမၠာမူလ။ ကတ်တိုန်ပါင်တဲ ပ္ဍေန်မွဲခဏ။ လိက်ဂွက်မင်ဇေန် ပဍေန်တိုန်ပါင်ဂျ။ ပုံကၞက်အဂီု ဒၞာဲဟီုစဳခၠ။ ရမျာင်ညံင်က္ၜိင် မိင်ဒးသ္အဳရ။ ကွတ်ပါင်ကွတ်တဲ လေပ်မွဲခဏ။ စံင်ဂြဝ်သြေဲကျာံ ရာဂါံသဗ္ဗ။ လေပ်ပြဟ်လ္အိတ် ခၠင်ပ္ဍဲစိတ္တ။ ချူကှ်ေဂၞန်ရ အိုတ်သဗ္ဗကာ။ ပုံကၞက်ဇၟာပ်တင် ဆန္ဒလင်္ကာ။ တိုန်စိုတ်ညာန်လှဲ ပ္ဍဲလင်္ကာတာ။ တၟံကွတ်ကၠာ ကတ်အာဇၟာပ်တင်။ 	။

စှ်ေစိုတ်နာံဗျာပ် ဇၟာပ်ကွတ်ကၠိုဟ်ခၠ။ ဇၟာပ်ကွိင်ကွိုက်အခိုက်ပြဲက္ဍင်။ တိုန်စိုတ်ပြာထာ နဲကာသဂင်။ အယုက်လ္အိတ် စှ်ဒ္စိတ်ပြင်။ တံဇိုင်သၟိင်သင် မက္ဍင်အိန်ရဳ။ နာဲဒကောင်ပိုန် ဒတိုန်ကျာ်သြဳ။ ဒုင်ပယျင်ရ ပကၠေံခမဳ။ ဝိနဲသဒ္ဒါ ကတ်အာဒၚဳဒၚဳ။ ပဍေန်ပဍဟ်ညာန်ထတ် တၟံကွတ်ဇဳဗီုဇုက်လလဳ ညာန်ဘာန်စဳခၠ။ ဂွံပိဝသ်ပၠန် ဟွံတန်ထာဏ။စိုတ်ဂၠုက်သလံင် တူလှောံညံင်လ္ၚ။ ပိဝါခပ်သီ ပ္တီအ္စာရ။အ္စာကဵုရောင် အခေါင်တုဲပၠ။ ၜးသ္ၚာရ မဂေါဝ်ဆာဲ။ ဗိုင်ယာတ်သၠိုင်ဖေင် ဝတ်အကေင်ဗၠာဲ။ တုက်ဍာ်ဇိုင်တဲ မွဲတ္ၚဲဟွံသာဲ။ တွံၚးလွဳလွတ် ဂိုင်ကၟတ်ၚာဲ။ စှ်ၜါတ္ၚဲဆာဲ ဟွံသာဲနူဘာကၠောန်လွဳဟွံပိုတ် ကေတ်စိုတ်အ္စာ။ အ္စာသ္ဍိုက်အိုတ် တီစိုတ်တုဲမာ။ သၟိက်ဂွံစဴသ္ၚိ ကဵုမိသေင်ဟာ။ ပ္တီအ္စာသၟတ် ပဝတ်ပိဝါ။ ကလံအ္စာတုဲအဴ စဴအာသ္ၚိတုန်။ 	။

     	မဒေကာင်ပိုန် နာဲဒတိုန်ဂုန်။ စဴသ္ၚိတုဲတုန် သၟိက်ခၠေဝ်ဂုန်ယာဲ။ ကေင်ကာပ္ဍဲသ္ၚိ ဒမၠိကၠောန်ကွာဲ။ ကာလသၟိက်ဒှ်တဝဟ်စလာဲ။ အဒိသၞာံဗလာဲ ကျာပင်လာဲချဳ။ ကျာပိုက်ဗလဲ မတ်ဗြဲယာယဳ။ တေံမတ်ဗြဲချဳ လလဳတန်တန်။ ညးဂမၠိုင်သ္ကဲ ညာတ်မတ်ဗြဲပၠန်။ ညးကွာန်ဒင်မာဲ ဂၠာဲချပ်ဂၞန်။ ကၠာဗြဲဟွံဂၠိုင် သိုင်သ္ၚိခိုဟ်သန်။ ပိုဲသိုင်သ္ၚိကၞာတ် ဆုဒုန်ဝါတ်လောန်။ ပိုဲအာဂြိုပ်ပၠန် သန္ထာန်သာလေဲ။ ဆုဒုန်တီုကၠီု တုပ်ဗီုညံင်သြေဲ။ ဟွံဂွံဍုတ်ဍေဲ ညံင်သြေဲသၟဟ်န်။ ပိုဲအာဗာ်နင် ခိုဟ်ဂးက္ဍင်သန်။ ယာံစိုတ်သၟန်န် ကြိုက်စိုတ်သန်ရ။ လဣနင်ဒဴ ထဴမွဲစဳခၠ။ ဟီုဇီုတော်ဆ ပဇမၞော်ကၠာ။ ညးဂမၠိုင်ပ္ညဳ စိုတ်သၟဟ်ညဳသာ။ လိင်ဂၠုင်မွဲကၠာ ချပ်ယာယဳပၠန်။
ဂွံဂၠုင်ဖါမွဲ သာက္ဍာယဲသ။ ကောန်ဂၠိုင်ထတ်မြက် ဖန်ဖက်ဇွောံမ။ ညာတ်ညးစဳရေင် အာဂြိုပ်ဟေင်ရ။ မဒကောင်ပိုန်ဒတိုန်ရုပ္ပ။ ဟိုတ်ဒါန်တမၠာ မပ္ညုင်ဏာမ။ ဂကောံညးရသၟိက်ပယာယဳ။ ပတန်စိုတ်ဟွံတန် ပၠန်ဂတးချဳ။ တိုန်ပ္တီမိပ္ညဳဒၚဳဟီုတိုန်ရ။ ယွံမိကျာ်ဂန် ပြဲသန်ရုပ္ပ။ ညးဂမၠိုင်ရ ပတဴယာယဳ။ ဗာ်ဆုဒုန်ကိုပ် လုပ်ဂြိုပ်အနဳ။ အဲသၟိက်အာကောံကရောံညးပ္ညဳ။ ဟီုပ္တီမိရ တၠကျာ်သဳ။ မိင်ပါင်ကောန်ပ္ညဳ ကၞပ်သ္ၚဳဒၟံင်တဴ။ 	။

မိဗြဴကၟာဲသ္တိုတ် လကိုတ်ဆဴဆဴ။ ကတောဝ်က္ဍိုင်မတ်ဂၠု ဇကုဒမြဴ။ အဵုဣတယာဲ နာဲလၟာဂၞဴ။ နာဲဍိုန်ၜတ်
လောန် ယွံကောန်သာ်ပ္ကဴ။ ဗာ်ဆုဒုန်အဴ ဟွံထေက်တဴကၠာ။နူနာဲသွတ်ပၠန် မိချပ်စောန်စာ။ တောံပၞာဲဇိက်ဗ္ၚ ယာဲဟွံစကာ။ ကဵုမမံင်ဘာ ဂၠာဲအာကတ်ဗ္တောန်။ ကလောန်ပ္ဍဲသ္ၚိ မိဟွံကဵုကၠောန်။ တြဴဂြိုပ်ဂၞိန် ဓဝိင်ယာဲလောန်။ ပအာညိကောန် ဂၠုထဝ်သောန်ယာဲ။ ကောန်မိင်ပါင်မိ ဒမၠိအီကွာဲ။သီုကဵုစရာ ဟီုပ္တီယာဲပၠန်။ 	။

ဂုန်ပြဲဂၠိုင်သာ် ယွံမိကျာ်ဂန်။ တၟံသတ်တံပၠန် တန်ပ္ဍဲသံသာ။ ဗၞတ်ကံကုသဵု အကုသဵုကၠာ။ ဒှ်ဗၞတ်သေင်ဟာ မိပိုင်ခြာညိ။ အဲဍိက်တုန်ကီု အာသီုသတိ။ အာစိုပ်ဂြိုပ်စိ ဒမၠိဇၟာပ်ဒၞာဲ။ ဒးဗာ်ဆုန်ဟေင် ဟွံသေင်ရယာဲ။ အဲအာဂြိုပ်မာအာမင်စတာဲ မိပတ္ၜူမာဲ ယာဲပလ္ၚာပ်လ္ၚာ။ နူအဲဒှ်တြုံ ဇၟာပ်ကွတ်လုပ်စာ။ ပါန်မုက်ပါန်ခဳ ဗဳသ္ကဝ်ဇၟာပ်ကာ။ ပုတ်ဂၞတ်သောန်ဒါတ် ဒၞာဲညာတ်ကၠောန်အာ။ ကွိင်ကွိုက်ဂးကၠာ ကျာံခရာဂြဝ်။ ဇၟာပ်ကွတ်ဟွံဖိုတ် လေပ်အိုတ်ကာဲကဝ်။ စရာဲစတ္တဝ် ယာဲလွဳလဝ်အဲ။ ကဵုယာဲဒးဒိုက် ဟွံကြိုက်မွဲတဲ။ ပဂွိင်ကဵုအဲ မွဲတဲညိအဴ။ 	။

မိမိင်ပါင်ကောန် ဟီုဝေါန်စဝ်တဴ။ မံင်ဍိုန်စိုတ်ကၠာအာရကောန်ဂၞဴ။ မိစဳရေင်အဴ ဇွောံမတံကၠာ။ ပလံင်ဖျေံပ္ညုင်စဵုစိုပ်ဂၠုင်ကၠာ။ ယွံနာဲဂၠုင်အဲ မပြဲသာ်လွာ။ ကောန်အဲမအာနာဲဍံင်သွာညိ။ ကြုင်ဇြိုဟ်ကျာံဂြဟ် ဂြိုပ်ဒှ်ဂြိုပ်ဂျိ။ အာကဵုခိုဟ်ညိ ဂၠုမိသာ်ပ္ကဴ။ အဵုဣတမိ မဂ္ညိနုဘဴ။ ပဝိုတ်ပါင်ယာဲနာဲလၟာဂၞဴ။ မိဖကန်တဴ ကဵုကောန်ဂၞဴကၠာ။ နာဲဂၠုင်ကောန်ဂၠုင် ကၠုင်အိုတ်တုဲမာ။ တိုန်ဍိုက်ဂၠုင်ပၠန် သၟဟ်န်ညဳသာ။တုဲလ္ၚောဝ်ရတ်ပိ မိမအ္စာ။ ဒေဝတဴကီု အိန်ဗြီုယီုယာ။ ဘုမ္မဇဵုရ ရုက္ခဇဵုကၠာ။ အကာသဇဳု ဒေဝဒေဝါ။ ဒေဝတဴက္ၜဳ မနဳခလာ။ မၞးတံဍံင်သွာ ပိုဲမအာရ။ 	။

ဟီုဇီုတုဲဒှ် သၟဟ်န်စိတ္တ။ ဒကက္ဍိုပ်ဂၠုင် ဒေါဝ်ကြုင်တိတ်ဂျ။ ဂၠုင်ဖါသာသန် ပါင်ပန်မွဲက္ဍ။ ၜါစှော်တ္ၚိုက်။ တိုက်အာလျလျ။ နူဂှ်အာစိုပ် ဗဒိုပ်ဖျာက။ အာနူဂှ်ရ ဒဵုမကဴကၠာ။တိုန်လ္ၚောဝ်ရ ဗုဒ္ဓကေသာ။ မွဲဗတံပၠ ဒီုမကဴကၠာ။ တ္ၚဲယးဖလာင် စာင်ဂြဴညှာညှာ။ ဖဝ်ရဂုတ်ဗြု လဒုကြဵုဇာ။ အရှိုန်တၟးတ္ၚဲယးခၠင်အာ၊ တဲရပ်တ္ၚိုက် တိုက်အာညှာညှာ။ အာစိုပ်မုဟ်သၞာ် ဍာ်ညံင်ဗဒါ။ နူကဵုမုဟ်သၞာ် စာင်စ္ဍးတိတ်အာ။ စိုပ်အာဗၠာဲကျာံ။ ပယျာံသန်ၛာ။ နူဗၠာဲကျာံကၠာ တိုက်အာလၟေင်လၟေင်။ တ္ၚဲသဝ်ဗလဗလ စိုပ်ဒေသသြေင်။  စိုပ်ဗ္ဒိုပ်ကၞာတ်ၜးယာတ်သၠိုက်ဖေင်။ အိုတ်ညးဂမၠိုင် ကျိုင်ကျဝ်သေင်လေင်။ ကျိုင်ဗြံက်ဗြဟေင် ဂဇံရေင်တဴ။ စက်တ္ၚဲဗဒန်သၟန်ပၠေဲပၠဴ။ ဂစေံဒျာန်သၞေင် ပဝ်ကလေင်စဴ။ ခဍိမြာကွဴ ပဝ်စဴဒနဳ။ ဘုတ်ပြိုက်စာဂြိုဟ် လကိုဟ်ဂဟီ။ လိုက်ထောဝ်ဂတေဝ် ဍေဝ်စလာင်ခြီ။ သွိုဟ်ဂြိုပ်က္ဍိုပ်ဒဵု တံဝဵုဓနီ။ သတ်ကၠံလ္ၚီ ဓနဳစဴအိုတ်။ မာတ်တ္ၚဲသဝ်ပၠိုတ် ညန်အိုတ်ကာလ။  ။

နာဲဂၠုင်တော်ဆ သ္ၚိဇြချပ်မံင်။ ကောန်ဂၠုင်တံကွေံ၊ ဍေံဒယှ်ေကၠံင်၊ ရမျာင်ဍိုန်ဍိုန်၊ တိင်တတိုန်စံင်။ ဒြဝ်ကျာံလဒု၊ တိင်ဗရုဆံင်။ တ္ၚဲယးအာရံင်၊ အထံင်သၞေဟ်သြေင်။ ဍာ်တိုန်ပေင်ဂျ၊ ဒးကာလဟေင်။ ဟာပ်ပုင်သွတုဲ၊ သုဲအာဗွဲလၟေင်။ ဒျာန်တ္ၚိုက်ပ္ညုင်၊ ထောံလဝ်ဍုင်သြေင်။ တိုက်အာဗွဲလၟေင်၊ နူသြေင်ဟွံသ္ၚောဲ။ ဍာံတိုန်ကျာတိုန်၊ အလိုန်တိုန်သဲ။ ဍာ်စှ်ေကျာစှ်ေ၊ သွးစှ်ေဗလဲ။ ဇမောဝ်ဇွောဝ်ဍိုက်၊ တ္ၚိုက်ဇၟာပ်တဲ။ ဍာ်စှ်ေသိုက်သိုက်၊ ဆိုက်ပါင်အလဲ။ ညာတ်ကျာ်လဂုင်၊ ယဵုတၠုင်တဲ။ ပင်ပ္တိုန်က္ဍိုပ်-ဗစိုပ်ကၞေင်ပြဲ။ ယဵုသမိပ်တဲ-အဲပရဲကၠာ။ ညံင်အာစိုပ်ဟေင်- ဍုင်သွဝ်သေင်ဟာ။ ရပ်တၚိုက်ပၠန် တိုတ်ဗ္ဂန်ညှာညှာ။ ကျာမှာသမိတ် ဍိတ်တ်ပိုတ်အာ။ ဂၠိုင်ကဵုအလိုန် ဇွိုန်ဇၟးဖက်ဖါ။ လပှ်လမဴ ညံင်ဗီုပ္ကဴသွာ။ မွဲဒှ်မွဲပၠိုတ် မွဲကၠေံအိုတ်အာ။ လပှ်သဲသဲ အနုဗလဲဒွါ။ ဆုၜါလပါ် ဂၠိုင်သာ်နာနာ။ လမုလမေဝ် တေင်ကၞာင်မံင်ဗ္ဂါ။ နူဂှ်စှ်ေနာင် ဂွံပါင်ဂင်္ဂါ။ စမဳညာတ်အာ ခလွာသာဲလေဲ။ ဂြိုပ်သ္တဵုသလံင် ဆုဒုန်ညံင်သဲ။ ကဵုပါင်စမြေဲ သေဲသေဲဟောကၠံင်။ ပလှ်တၚိုက် တိုက်လုပ်နာံထံင်။ ကဵုပါင်ဟောကၠံင် ဗလးခဏံင်ဟေင်။   ။

ပလှ်တၚိုက် တိုက်လုပ်ဗွဲလၟေင်။ စိုပ်ဗဒိုပ်ဟေင် ဗဒိုအ်ဂၠုင်ဟော။ ဗ္ဒိုအ်ဂၠုတုဲပၠန်-ချပ်တိုန်စန်စာ။ ဂြိုပ်ဝွံတုန်ဂှ်- ပဒှ်သာ်လဝါ။ နာဲဂၠုင်တိုန်ရံင် ဒမံင်အရာ။ ဆုဒုန်အိုဿီု သိင်သာတီုညဳသာ။ ညာတ်ဆုဒုန်ပၠန် တ္ၜန်တ္ၜောန်သ္အဳဗ္ဂါ။ တပ်တးတရေင် တပ်သတေင်ညဳသာ။ လ္ၚဵုဂှ်သၠုင်ဗြိုင် ရိုင်ရိုင်ဒၟံင်ကၠာ။ ဝိကဝ်ဝိကာ သဂါပြဴပြာန်။ ဗြီုပြာ်ကှ်ေကြုင် ဂမုင်ဓိတာန်။ ရီုဓနဳကာန် ဍေံတၞာန်မံင်ပၠ။ လစောတ်လမောဝ် လယောဝ်ကၞာင်သၠ။ ဂမောဝ်ဂစွံ ဂကောံဗင်ယ။ ဟွံတီနန္တ သတ်ဂျိတလာဲ။ ဒၞာဲသတ်သတ်တဴ ဒၞာဲကဴကဴၚာဲ။ လ္ၚဵုကြံင်သၟတ် လ္ၚဵုၜတ်ဆာဲ။ ဒၞာဲပြဟ်ပြဟ်မှုဲ ဒၞာဲအုဲသ္အုဲလာဲ။ လ္ၚဵုကြံင်သာဲ ဒၞာဲယောင်လာဲအာ။ ဍေံမဂၠိုင်တဴ ပ္ကဴသြဴနာနာ။ ညာတ်ဆုဒုန်အိုတ် မိပ်စိုတ်မှောဝ်ဇာ။ လဣနင်ဒဴ ထဴကြီုကြဵုဇာ။ လတုန်ဝွံသွံ ဂှ်ပိုဲဂွံမြာ။ ဆုဒုန်ဝွံပၠန် ခိုဟ်သန်မြိုတ်ဖါ။ မိပ်စိုတ်မှောဝ်ဇဴ နာဲသာလထဴ။

ကော်ကောန်ဂၠုင်ပၠန် ဝေတ်ဗတောန်ဟီုတဴ။ ယွံလေဝ်မၞးတံ စိုပ်ဂြိုပ်ဏံအဴ။ ဂြိုပ်ဝွံဂြိုပ်ဂျိ ဆုဒုန်ဂ္ညိဂၠဴ။ ဇြုံသေင်ကၠဗြန် ကုမ္ဘန်ဓနဴ။ လကိုဟ်ဘုတ်ဇၞော် ကလော်တြုံဗြဴ။ နွံကီုဟွံတီ ခပ်သီသဘဴ။ မၞးတံတုန်စိ သ္တိသှ်ပတဴ။ လုပ်ဂြိုပ်စှ်ေဍာ် ဂၠိုင်သာ်ပဒြာ။ ပဟိုတ်မာဲညိ သတိကြက်လှဴ။ ပိုဲမၞးတံအဴ မကၠုင်တဴလၟုဟ်။ စိုတ်ပကဵုထစေင် ဗွဲလၟေင်ဒုဟ်။ မၞးတံကၠေံစိုတ် ကၠောန်ၜိုတ်ပလုတ်။ ပလွဳကၠောန်ၜိုတ် စိုတ်ပကဵုလၞုဟ်။ ဂလာန်ဣၚုဟ် ထဴကဵုကဵုပ္ၚုဟ်ဆာဲ။ ဟီုဝေတ်ဗ္တောန်တုဲ ရုဲဒၟံင်ဒၞာဲတာ။ ဗာ်ဆုဒုန်ဗဝ် စွံလဝ်ဟွံသာဲ။ ညးလ္ၚဵုဂှ်ယိုက် လ္ၚဵုဂှ်တိုက်တာဲ။ ကၠောန်တာဲညံင်သိပ် မိပ်ဇြိပ်လောန်ကာဲ။ မဒကောန်ပိုန် ဒတိုန်စရာဲ။ ဗတာင်လာဲဆေဝ် ကျေဝ်ဂေါဝ်လောန်ကာဲ။ ကၠောန်လဝ်ဇပ်ကၠိပ် သေပ်သိပ်ဇၟာပ်ဒၞာဲ။ ဇိပ်ကၠိပ်ကျေဝ်လာဲ ကၠောန်တာဲတုဲဒှ်။ ကပေါတ်ဒယိုန် ပ္တိုန်စွံလဝ်သၟဟ်။ တောံပုင်တောံသွ စဟာပ်တုဲဒှ်။ ကပေါတ်တံဂှ် ဂိုင်လပှ်အိုတ်။   ။

နာဲဂၠုင်ကောန်ဂၠုင် ကောန်ကၠုင်ဖအိုတ်။ ဂဇံသၟဟ်န် ပ္တန်သူစရိုတ်။ သၟိင်တ္ၚဲတုန်ပၠ တၠက္ဍိုပ်ဗိုတ်။ ဗ္ဂန်သိန္ဓဴလ္ၚီ မြီမြီဟွံပိုတ်။ လိုန်ယုဂန္ဓဝ် စဝ်ဒိုဟ်ပလိုတ်။ ဂမဝ်တၟံသိန် ဂၠိန်စဴတၟံဗိုတ်။ မှတ်တကံအမ္ဗါ ယာယဳစရိုတ်။ တူဍာန်အမှဲ မာတ်တ္ၚဲသဝ်ပၠိုတ်။ လျးညံင်လလဳ ဗစဳလက်ကိုတ်။ လျးညံင်အမြိုတ် ခၠင်ဂိုတ်သလုဲ။ လ္ၚဵုသ္ၚဳမၠာ ညံင်သာ်ကၠေင်ၚုဲ။ လျးညံင်မတ်မၞိက် ထမှိက်သာ်လှုဲ။ ကၠေင်ကကၠေင်ၚုဲ ဒေါံသၠုဲခၠင်။ ညံင်ဍီုညံင်ဗြေဝ် ညံင်ပစ္စေပ်က္ၜင်။ လ္ၚဵုသာ်ပ္ဍီု ညံင်ဗီုကယင်။ လ္ၚဵုသာ်လွာ ညံင်နဳလာက္ၜင်။ လ္ၚဵုသာ်မြ လျးခၞဗ္ၜင်။ ညံင်သာ်မဒါ ဂၠံမိကာသဂင်။ ဆုဇဝ်တဝ်သၠ လျးခဏခၠင်။ မာတ်တ္ၚဲကၠောံပျး အမ္ဗာဒဳပင်။ မာတ်သၟိင်ဒမၠု သံက်မြုဝင်။ သတ်ဇၟာပ်ကလင် ဖန်ဆင်ဒၞာဲဝါဲ။   ။

သတ်ဂြိုပ်ကၠံလ္ၚီ စဴဓနဳဒၞာဲ။ ဆဒ္ဒန်ဗၠန်ရိုင် ဇြဲသုံဗၠိုင်ဆာဲ။ သ္ပဝ်စဴသတိက် ဂြိုပ်ကြိက်ထဝ်ဗၠာဲ။ ဟဝ်ကၠိုင်ဒျာန်သၞေင် ပဝ်ကလေင်ဒၞာဲ။ သဳဟာဗၠန်ဒၚာ် ဂိုဟ်ထဝ်စရာဲ။ ကြဝိတ်ကြဵုသာင် မှတ်ပနာင်ဒၞာဲ။ က္ၜိုင်ကၠိင်ကွေံ ပှ်ပှ်ေမင်ဂြာဲ။ မှတ်ဓနဳဆာဲ ဂၠာဲတၞံမူလ။ လဟေဝ်အယုက် မှတ်တၞံရုက္ခ။ မြာ်မှတ်တၞံဆု ဗြုကြဵုသဒ္ဒ။ စိင်ဗ္တာင်ဂျ လဇထာင်သွာ။ ဗလန်ဒၟံင်ရော ဇြဲနိဂြောဓ။ သတ်ဂြိုပ်ကၠံလ္ၚီ တီဒၞာဲအရာ။ ဗလန်စဴခမ်သီ ဓနီခန်လွာ။ သၟိင်တ္ၚဲပၠိုတ်ကၠာ မဗ္ဒန်အာတုန်။   ။

ခနေင်ဇီုဗြု လဒုသောန်န်။ ဂစေံဝုတ်အဵု ဗြုကြဵုဒက်ဒေါန်။ အကြာဂြိုပ်ဇၞော် ဗၜဵုကော်ကောန်။ ကၞုဲဒြေပ်လဆောန် ကော်ကောန်ဂမြံ။ ပြေပ်ဂမာသောန် ယောန်အာဗတံ။ ပှ်ဗြုစလာင် ကဵုပါင်သ္ၚံသ္ၚံ။ ကၠကဵုအသံ ကၞုဲစှ်ေစံတိ။ က္ၜိုင်ပှ်စိင်သိတ် တိတ်တွဳဖိ။ သတ်ဂြိုပ်လုပ်တိ လဗိလမန်။ အသံဂြိုပ်ဇၞော် ဗော်ဟေမဝန်။ ညံင်ဗီုအမြိုတ် လှိင်စိုတ်လောန်သန်။ တ္ၚဲသဝ်ပၠိုတ်ဂၠု ပ္ဍဲစိုတ်လ္ၚုလ္ၚန်။ မဒကောန်ပိုန် သာင်တိုန်စံင်ပၠန်။ တိင်ကြဵုလဒု ဗြုကြဵုသဂြန်။ ညးလ္ၚဵုဂှ်ပၠန် သောန်န်သဒ္ဒ။ လ္ၚဵုဇက်ဒြဝ် ဒယှ်ေအင်ဇ။ တလောတ်ကျာံကီု တိင်ပြီုစိုတ်ရ။ ဝေင်ဂြိုပ်အဵုဇိုတ် မိပ်စိုတ်ယဲသ။ ဂၠုလောန်တုဲရ ကာလသန်ၛာ။ ကွိင်သ္ၚိတ်ဇြကၠာ ဒၚဳလှိင်အာတုန်။   ။

သၟိင်တ္ၚဲတုန်ပၠ ပြမနွံဂုန်။ ဂပဝ်တၟံတန် ဇက်ကလုန်ရ။ ပ္ၚောံတကံလ္အိတ် ဇမ္ဗုဒိပ္ပ။ ဇမ္ဗုဒိပ်ကၠံင် အရံင်သာ်မြ။ ညံင်သာ်သၠုဲကၠာ ဗီုပမာဏ။ ညံင်သာ်ဍာ်တှ် ခၠင်မြဟ်ကာသ။ ဗဂန်သိန္ဓဴလ္ၚီ မြီလျလျ။ လဝိင်ဇုက်ဗလဲ လီဒတဲရ။ ရပ်ကလးထဝ် ဗ္ဒဝ်က္ဍိုပ်သေတ။ ဂိုင်စမြိုင်လျး သလးဗျူဟ။ ဗပေက်ကၠေံကၠာ ပၞာန်အန္ဓာတ။ ဒမၠုပၠိုတ်သ္အး တၟးတိုန်ဗလဗလ။ ညာတ်ဇိုင်အရှိုန် ကွိုန်သူရိယျ။ ဍေင်ဂြဴလဒု ဗရုသဒ္ဒ။ ဖဝ်ရဂုတ်တြး ကော်ဂးတိုန်ရ။ ကမာတ်အိုင်ဇၞော် ဂၠာဲကော်မသ။ ကွဴဂြဴပြာထော် မြာ်ကော်ကောန်ပၠန်။ ဒိုင်ဗျုုဒိုင်ဗြောန် ယောန်ဂၠာဲစဏ။ ကၠိုဟ်ဗလိုပ်ဍာ်တုန် အဘဴဍုန်ရ။ ထိုင်သာဲပဝ်သၠောင် ဇာပ်ဍောင်ပုပ္ဖ။ ဒြဝ်သၞေင်လဒု ဗြုတိုန်သဒ္ဒ။ ညံင်ဗရုပၠန် ကွိင်ပန်စင်္ဂ။ တ္ၚဲတိုန်တၟး လျးခၠင်ခဏ။ လဣနင်ဒဴ ထဴချင်တော်ဆ။ ဗယိဗရာန် ထာန်ဝွံမူလ။ ပိုဲသကဵုစၞ ပိုဲသ္ပရဴဂဴ။   ။

နာဲဂၠုင်ဇၞော်စိ လဣနင်ဒဴ။ သာ်ဝွံရောင်ဒး ဟီုတြးကမြဴ။ ဟီုဇီုတုဲဟေင် စဳရေင်ဆဴဆဴ။ ပြုပြေင်ပုင်သွ ဖျုန်ကဗြာတ်က္ၜဴ။ နာဍူယိုဟ်သကဝ် ပြေင်လဝ်ပ္ကဴသြဴ။ သီုမဗိုန်ဇၟံ ဂဇံရေင်တဴ။ ယဵုသၟိပ်တဲ အဲပရဲအဴ။ တုဲကော်ဗစအဴ ဒေဝတဴဂြိုပ်။   ။

ယွံဒေဝဴ မၞးတဴပ္ဍဲဂြိုပ်။ မပိုင်ဂြိုပ်ယာန် ထာန်ဝွံနူကိုပ်။ ပိုဲမကၠုင်စိုပ် ဗဒိုပ်ဝွံအဴ။ ပုင်သွအမာဲ ပိုဲဂၠာဲကွာဲတဴ။ ယိုဟ်က္ၜန်ကွာင်ရ ပိုဲပပူဇဴ။ ယွံဒေဝတဴ နုဘဴဇၞော်ပြဲ။ ပိုဲဗလိဗဇဴ ပူဇဴအဲပရဲ။ ကွာင်ၜဲယိုဟ်က္ၜန် စပၠန်ကဵုဘဲ။ ဖဵုပိုဲယိုက်ဒိုက် ပရိုက်ကဵုသ္ၚောဲ။ က္ဍိုပ်ဂိသေင်ဇှ် လ္ပကဵုဒှ်ညိ။ သတြုနာနာ ပကဵုပါမြိ။ မင်မွဲပိုဲညိ ဒမြိဍံင်သွာ။   ။

သာ်ဝွံတုန်အဴ ထဴရာဒနာ။ တုဲစရိုတ်ဟေင် ဍာ်သၠိုင်သေင်ဟာ။ ဗလိဂပဝ် တုဲဒှ်မှောဝ်ဇာ။ ညးဂမၠိုင်ကၠာ စဴအာတာဲရ။ စိုပ်တာဲတုဲပ္ညုင် စုတ်ဟာပ်ပုင်သွ။ စဟာပ်တုဲအဴ ရပ်တဴၜုန်မြ။ ကေတ်မုဲကွာန်ရ ဟဂွံဟိုတ်မာဲ။ မဒကောင်ပိုန် ဇိုန်ကဵုမင်တာဲ။ ညးလ္ၚဵုသၟပ် ရပ်မြတရာဲ။ လဣနင်ဒဴ ထဴတတ်ညံင်ဗၠာဲ။ ထောံဒမံင်တာဲ ကွာ်သာဲလုပ်ဂြိုပ်။ ကလောန်နူကိုပ် ဗာ်ဆုဂြိုပ်ဂၞိင်။ ကၞံင်ဒမင်ပၠ ခဏဝိုန်စိင်။ မုဟ်ဇံင်ဇမၠိင် မုက်ကျာသွိင်ရ။ ကောန်ပဠောပ္ညဳ ဒရေပ်ကၞဳပၠ။ ဆဒယိုင်ကီု လဝ်သီုကဓ။ ဖန်ဖက်တုဲအိုတ် ကၠေံစိုတ်ဗာ်ရ။ တုင်တုင်တိင်င် ဗာ်ဂမြိင်ပၠ။ ဂမြိင်ဂမြံင် အာကွာန်မြ။ ဂြိင်င်ဂြံဂြံ စှ်ေဂမြံင်သ္ဒး။ တုင်င်ဗာ်ဆံင် စှ်ေညံင်ဗတ်သၟ။ ဂမြိင်ထဥ ဗရုသဒ္ဒ။ လလောင်တမ်ညဝ် လုမ်ဂြိုပ်အဝ်ဇ။ သီုညးဖအိုတ် သၟဟ်တဴစိုတ်ရ။ ကၠောန်ၜိုတ်ထဒၟ ဟဂွံဟိုတ်မာဲ။   ။

မဒကောင်ပိုန် လမိုန်မင်တာဲ။ ဇကုမွဲဒၟံင် ညံင်ညးဖရာဲ။ ဗှ်ဇကုမွဲ လ္ၚုလောန်ကာဲ။ စံင်ခရာကီု တိင်ဓဂီုတာဲ။ တိင်ကြဵုလဒု စံင်ကျာံဗြုၚာဲ။ ဒွက်ဂိုန်ဂၠိုင်ဒၞာဲ ဂၠာဲနာဲအခိုက်။ ရမျာင်ကြဵုတိုန် တလိုန်သိုက်က်။ မိင်ရမျာင်ကၠာ ဒၞာဲအာဒးသ္ဍိုက်။ ညိဟွံဟိုတ်မာဲ ဇၟာပ်ဒၞာဲအခိုက်။ ညံင်ရှ်အမြိုတ် မိပ်စိုတ်ဒးသ္ဍိုက်။ တိင်သီုအခိုက် သော်ဂရိုက်ဆာဲ။ ရမျာင်ကဵုကွိင် မိင်ဂြိုဟ်ညံင်လာဲ။ စိုတ်သၠောင်ပူမဟ် ညံင်ကြံတ္ၜူမာဲ။ ကာလသၟိက်ဒှ် တဝှ်စလာဲ။ ဒါန်အတိက်အဵု ပ္ညုင်နင်ကဵုနာဲ။ သၟိက်ဒှ်စလာဲ နာဲဒကောင်ပိုန်။

မၞးတံကလင် ပင်မှိင်ကဵုဗိုန်။ တၞမ်ဆုအသဝ် ဂြိုပ်ဗဝဝ်ပိုန်။ ပ္ဍဲဂြိုပ်ဂှ်သွိုန် ဒှ်ကွိုန်ရုက္ခ။ နွံဇြဲသုံမွဲ သဂီုကၠီုယဲဆ။ ဘုံသဓုံဗျာင် မဂၠိုင်ကၞာင်သၠ။ ဒှ်လွဳမာန်အဴ ဒေဝတဴပၠ။ ဒေံဝတဴဂှ် ကြဳဇှ်က္ဍင်ပြ။ ဒှ်သၟိင်ကလော် မဇၞော်တေဇ။ ပိုင်ကလော်ဂၞိင် ဒှ်သၟိင်ယက္ခ။ တြုံကဵုဗြဴရ သၟိင်ဒေဝၜါ။ ဂွံကောန်ဗြဴပန် ရုပ်သာ်ကညာ။ ညံင်ထဝ်ဒကောင် ညံင်ဍောင်စမ္ၚာ။ အရံင်ဇကု အနုထာင်သွာ။ ကောန်ဗြဴပန်မာ နာမခုတ်လဝ်။   ။

မွဲဂှ်မြိုတ်တင် မွဲတယျင်ထဝ်။ ကောန်ၜါဆတ္တဝ် ညံင်သွဝ်ကေလာ။ မွဲထဝ်ဒကောင် မွဲဍောင်စမ္ပာ။ ယၟုခုတ်ကၠာ နာမဗြဴပန်။ သီုညးပန်ဂှ် ရုပ်ဂေါဝ်သၟဟ်သၟန်။ ကျိုင်ဒၟံင်ပၠန် သၟဟ်န်ညဳသာ။ မွဲလွဳမာန်ဘုံ ဇြဲသုံသေင်ဟာ။ ဇြဲဂှ်ဟွံသာဲ နူတာဲဂှ်ကၠာ။ ကောန်ဒေဝတဴ ဗြဴပန်ဂှ်မာ။ ဟိုတ်ဒါန်တမၠာ ဝါသၞာပ္ညုင်။ ညန်ကဵုတာဲပ္ညဳ ဒ္ၚဳဂါံကွာ်ကၠုင်။ သီုဗြဴပန်ပ္ညုင် ကွာ်ကၠုင်ညဳသာ။ ဒကောင်ပိုန်သွံ ထောံမတ်ညာတ်အာ။ ကျာံစံင်ခရာ ခါဂှ်ဂိုင်တိင်။ ဇိုင်ၜါသက်လက် တက်ခဍေဝ်သွိင်။ ပါင်ကြီုလဒု သီုဗရုကွိင်။ နာဲဒကောင်ပိုန် ဍိုန်န်ဂိုင်တိင်။ ဒေဝတဴပန် ရုပ်ကညာဂၞိင်။ ယာံမဂွံမိင် ကွိင်ပါင်ကွိင်တဲ။ စိုတ်ချဳလရု ညံင်ဆုရေရဲ။ ပၟတ်ရာဂ စံင်ပၠန်စိုတ်ပ္ဍဲ။ ပလိုတ်ဟွံမာန် တူသၠာန်ဟွံဟဲ။ ဂုဏ်ကိလေသ ကာမစိုတ်ပ္ဍဲ။ ညာတ်ရုပ်ဒးဂၞပ် ပ္ဍဲမတ်စပ်လဲ။ ဗရုပ်မိပ်ကၠာ ကတောဝ်ၜါမိင်သ္ကဲ။ သ္ဍိုက်သန်လောန်တဲ ပ္ဍဲဂှ်ညးပန်။ ဒါန်တမၠာသွံ သၟိက်ဂွံဆိုက်ညန်။ မွဲသၞာသတိက် သၟိက်ဂွံလီတ္ၜန်။ စဴအာပ္ညဳပၠန် ကျာ်ဂန်မဟာ။   ။

ယွံမိကဵု တၠဂုဏ်ၜါ။ ပ္ဍဲဂြိုပ်တေံဂှ် ကြဳဇှ်ပြာထာ။ မင်ဗၠာဲမွဲပၠန် နွံကဵုပညာ။ မၞုံလက်သန် ပြဲသန်သာ်လွာ။ နွံကဵုကျာ်သြဳ အိန်ရဳတပ္ပါ။ ရုပ်သာ်အဝဲ နဲညးကေလာ။ က္ၜိင်ပါင်ကွိင်တဲ ညးဟွံမွဲၜါ။ ပိုဲညာတ်မံင်ကၠာ စိတ္တာဟွံတန်။ ထုဲကြာန်ဓမာန် အာန်တၞာန်စိုတ်ပၠန်။ သၟိက်ဂွံဟုဲဟဟ် မွဲဟာန်သၟဟ်န်။ ဂကောံမင်ဗၠာဲ သၟိက်ဒိပ်ဒါယ်သန်။ ပိုဲဍိက်ညးပန် ပ္တီပၠန်မာတာ။ မိမၜါမိင် ချပ်တိုန်သိင်သာ။ ဟွံဒးပွ ဂွကဵုညးကၠာ။ မိကဵုမၜါ ဟီုဆေဝ်တာပၠန်။ ယွံလေဝ်ကောန်တံ မၞးတံညးပန်။ တေံကောန်ညးဟေင် ဇာတိတၟေင်သန်။ ညးဒှ်သက်သၟိင် ဇာတိမၞိဟ်ပၠန်။ ပိုဲဒှ်ကလော် လုပ်ဗော်ဓဇန်။ ကောန်ညးဇာတ်ညး ညးဂိုဟ်လောန်သန်။ လ္ပပြာပ်ညန် ပ္တန်လဝ်စိုတ်ညိ။ မိမၜါပၠန် ဝေတ်ဗ္တောန်စိ။ ဂၠိုင်ကဵုဝါရ ပ္တီမကဵုမိ။ ယွံမိကဵုမ တၠဣဒ္ဓိ။ ယာံဟွံဂွံညန် ပိုဲသ္ကန်ကလိ။ တ္ၚဲဏံဟာယး ပိုဲဒးစုတိ။ ကဵုအခေါင်ညိ ယွံမိကျာ်ဂန်။ မိကဵုမပၠန် သ္ဍိုက်ပ္ဍဲကောန်ဂၞဴ။ သီုညးပန်ကၠာ ချပ်ပိုင်ခြာတဴ။ ယာံဟွံဂွံရောင် အခေါင်ဆဴဆဴ။ စံင်တူလျးပၠိုတ် ဒးချိုတ်အာတဴ။ ပိုဲဒးဒှ်ကောံ သ္ၚောံဗွဲကြဴ။ ဟိုတ်ဒါန်ဍေံကၠာ တမၠာတေံအဴ။ ဇြဟာန်ဖ္အောဝ်လဴ ဒးဒှ်တဴရောင်။   ။

မိမၜါသ္ကဲ ချပ်တိုန်မွဲတောင်။ ဒးကဵုအခေါင် ခိုဟ်ရောင်သဘဴ။ ကောန်ဒေဝတဴပန် ရုပ်ကညာဗြဴ။ ဂွံအခေါင်အဴ ရဴဝွံစောန်စာ။ သီုပိုဲညးပန် သၟဟ်န်တဴကၠာ။ တြုံဝွံဂေါဝ်လောန် ညံင်ကောန်ကလေလာ။ ညံင်ကောန်သၟိင်အိန် ကၟိန်သွဝ်ၜါ။ ရမျာင်ညံင်ကွိင် ဟွံမိင်မွဲဝါ။ အခိုက်လေပ်သန် သန္ဒလင်္ကာ။ ကွတ်ပါင်ကွတ်တဲ ညးဟွံမွဲၜါ။ စံင်ဒြဝ်ကျာံရ ထဏခရာ။ ကွိင်သီုက်အခိုက် ရိုက်တိုန်ညှာညှာ။ ဂးရုပ်ဂေါဝ်သန် စဳကၠးပညာ။ ညံင်ပိုဲဂွံညန် ဂွံတန်မွဲသၞာ။ ပိုဲညးပန်ရ သ္ပလွဳပရာ။ ဟီုဇီုသၟဟ်န် တုဲချပ်စောန်စာ။ ပၠေင်ကၠေံရုပ်ကၠာ အခါဂှ်ပၠန်။   ။

ပၠေင်ကၠေံရုပ်ဗော် ကလော်ဓဇန်။ ပတုပ်မၞိဟ်ကီု ညဳသာသီုပန်။ ဒက်သော်ကျိုင်ကျဝ် မြမောဝ်တန်န်။ ဂစေံစလန် ဟုံဗော်ဂန္ဓာ။ မြမောဝ်ထီုဗး ပ္ဍးတၟာဲအာ။ ဂၞိန်ပုံဂၞိန်စက် ဖက်ခါန်ခါသာ။ လစိန်စရံက် သီုလကံက်ဂွါ။ ကျိုင်ကျဝ်တုဲပ္ညဳ ကျာ်သြဳဂေါဝ်ဂါ။ အရံင်ဇကု အနုထဝ်နှာ။ ဍောင်ပ္ကဴဇမ္ပာ ခါဂိုင်စရှ်။ ညံင်ညးချူပြေင် ဂေါပ်ဝ်တၟေင်တၟဟ်။ သီုညးပန်ဓဝ် ကျိုင်ကျဝ်တုဲဒှ်။ ပ္ဍဲကာလဂှ် ပြဟ်စဳရေင်ဖျာ။   ။

ယိုဟ်က္ၜန်ကွာင်ၜဲ စၞဖါပ်ပြဲဖါ။ စုတ်ဗပေင်ဟေင် မွဲနသေင်ဟာ။ ဇဗၠုသတ်ဆက် လက်ဖက်ပ္ကဴကၠာ။ ဂပဵုသၠဇေဝ် မွဲနတေဝ်ဏာ။ မြေက်လသိုန်ကၠေင် ကမၠေင်ကဝ်တာ။ ဂှ်မွဲနဟေင် စုတ်စဳရေင်ဗ္ဂါ။ ဖျုန်ဂမၠိုင်ကီု အိုဿီုနာနာ။ ပအၚောဝ်ပၠေဝ် ဖံက်သေဝ်ညးဖျာ။ ယဵုကေတ်နပၠန် သီုညးပန်ကၠာ။ သီုကဵုအိန်ရဳ ဒ္ၚဳဒ္ၚဳကွာ်အာ။ ညန်ကြပ်ကဵုတာဲ ကော်ကွာ်တိုန်ကၠာ။ ယွံညးမတိင် ကွိင်စံင်ခရာ။ ပိုဲကၠုင်သွံဖျာ ရာန်ဟာဂွံတိုန်။   ။

မမဂေါဝ်ဆာဲ နာဲဒကောင်ပိုန်။ ဟိုတ်ဒှ်ဒါန်ကၠာ တမၠာတေံဗိုန်။ မိင်ပါင်ဗြဴရတ် ရုပ်ကၞောတ်ကွိုန်။ ညံင်ကြဝိတ်ထဝ် အဝ်ဇဂြဴတိုန်။ ဒြာဲမဝိုတ်ရ ဘဲကၠလၟိုန်။ ညံင်က္ၜိင်အိန်ရ ထဏဥဒိုန်။ ဗရုတိုန်ကၠာ စိင်ဨကဝိုန်။ ညံင်ရမျာင်အဴ ဗြဴခၞောဝ်ကွိုန်။ လလောင်ပြာထော် ရမျာင်ကော်တိုန်။ မမဂေါဝ်ဆာဲ နာဲဒကောင်ပိုန်။ မိတ်တမၠာဆက် ဗက်ကၠုင်လၟိုန်။ ဆညိဟွံဇြိုန် လၟိုန်န်အဆက်။ သီုကဵုဗြဴပန် သၟဟ်န်သက်လက်။ ယာံဂွံမိင်ပါင် ရမျာင်ဗြဴဗက်။ ညံင်တင်လာဲကဝ် ပ္ဍဲကတောဝ်သက်လက်။ ရုပ်လှေံလှန်မတ် စိုတ်လယတ်ဗက်။ ထပိုတ်ဟွံမာန် အာန်ထနာန်ဆက်။ နူညာတ်ရုပ်ဗက် သက်စိုတ်စပ်အာ။   ။

နာဲဒကောင်ပိုန် ဒ္ၚဳဟီုတိုန်ကၠာ။ ယွံမိဗြဴပန် ဂေါဝ်သန်သာ်လွာ။ တိုန်ဒၟံင်ပ္ဍဲတာဲ နာဲတံပအာ။ ယာံဒးစိုတ်ရ အဲရာန်စမာ။ မိင်ပါင်ညးပၠန် သီုညးပန်ကၠာ။ ဒ္ၚဳတိုန်ကၠုင်ဟေင် တာဲနာဲသေင်ဟာ။ တုဲနာဲသၟာန်တိုန် ဟွံဂွံဇြိုင်ညှာ။ မူထာန်မကၠုင် ဍုင်ကွာန်အရာ။ ဒၟံင်ဍုင်ကွာန် မူထာန်နာဲသ္အာ။ တဝှ်မေခု ယၟုယမာ။ ဟီုညိခပ်သီ ပိုဲဂွံတီကၠာ။ မိင်လဟီုဗျာံ နာမ်ဗျာပ်လွောင်ဟာ။ ညးပန်တုန်ကၠာ သီုမယာဗြဴ။   ။

ယွံညးဇမ္ၚောဲ ညာန်ပြဲညက်လှဴ။ ညာတ်မုက်ဍိုန်ညံင် ညံင်ဗီုဍောင်ပ္ကဴ။ လဟီုကောဂၞဴ ဂၠာဲသၟာန်တဴကွာန်။ ယၟုယမာ နာနာဂၠာဲသၟာန်။ လဟီုကောဂှ် ဒှ်တဴဂလာန်။ လၟေင်ဒးသၟာန် သွံရာန်စကၠာ။ သာ်ဂှ်ဒးသၟာန် နိဒါန်ညးဖျာ။ သၟိက်ရာန်ရာန်ရ လပပၠံကာ။ ဟီုဂတဟေင် ဋ္ဌာန်တၟေင်ဂွံအာ။ ဒမံင်ပိုဲကၠာ ခန်လွာပိုဲဟေင်။ ပိုဲသ္ဂောံစဴအာ အရာထာန်တၟေင်။ ကောပဂၠာဲသၟာန် ဂလာန်ဟွံသေင်။ ညးမိင်ဂလာန် ကောသၟာန်ရိုဟ်ရေင်။ ညးပအရိုင် ဂြိုင်ဝေင်ကောဟေင်။ ပသၟာန်ရိုဟ်ရေင် တၟေင်ဂၠိုင်ကဵုဒၞာဲ။ မၞိဟ်တမြံအဵု ဓလဵုလောန်ကာဲ။ သာ်ဝွံတုန်ကီု ဟီုစရီုနာဲ။ ကောပဂၠိုင်ဂၠာဲ ဒၞာဲဝါဲဒေသ။ အိုတ်တၟံညး ဇၟာပ်ဍုင်ရးဗ္ၚ။ ဗာ်ဆုဒုန်ရ ဒေသဝွံသၟတ်။ အာကၠုင်တဝဵု ဟွံတီကဵုဗၞတ်။ ကေင်သွံကေင်ရာန် ထာန်ဝွံပယတ်။ ဟိုတ်ဂှ်အဆတ် မှတ်ကၠုင်သေင်ဟာ။   ။

ဗြဴပန်ဂှ်ကီု သီုကဵုမာယာ။ နာဲမိင်ပါင်ကၠာ သိုက္ခမာဗြဴ။ ဒ္ၚဳဟီုတိုန်ပၠန် ကဵုဗြဴပန်အဴ။ ယွံမိဗြဴပန် လက်သန်တ္ၜတ်သဴ။ အဲဟွံပ္တေံကီု လဟီုမိအဴ။ ကလော်တံကီု နဲကဲသတီုတဴ။ ပၠေင်ရုပ်ကလော် ဗော်ဒေဝတဴ။ ပရုပ်မၞိဟ်ဟေင် အတိုင်လၟေင်ဗြဴ။ ယဵုသွံဗြာတ်က္ၜဴ ပရဴညးဖျာ။ သကဲတာဲပ္ညုင် ကွာ်ကၠုင်ကွာ်အာ။ လေပ်ဒှ်ကီုဟေင် သာ်ဂှ်သေင်ဟာ။ ဟိုတ်ဂှ်ဒးသၟာန် ဂလာန်မေတ္တာ။ နူကောညာတ်ပၠန် မိညးပန်ကၠာ။ ဟိုတ်ဂှ်ကွေံကြာန် ဒါန်တၞံတမၠာ။ ညာတ်ဒးစိုတ်ဆာန် ဇြဟာန်စပ်အာ။ သၟိက်ဂွံရေင်ကာန် မွဲဟာန်မွဲသၞာ။ သၟိင်ဂွံပူဗန် သၟဟ်န်သာဓာ။ စိုတ်အဲဒှ်ဟေင် ဗွဲသၟတ်သေင်ဟာ။ ဟိုတ်ဂှ်အဲကၠာ အင်္ကာယုတ္တိ။ ဗွဲမသၟဟ်ကီု မိဟီုကဵုညိ။ ဗွဲစၟတ်ယုတ္တိ မိညးပန်ကၠာ။ ဟွံသေင်ကောန်နာ် ပ္ဍဲဍာ်ဂင်္ဂါ။ ပရုပ်ဖံက်သေဝ် ပၠေဝ်သွံစဖျာ။ အဲသင်္ကာအဴ သၠေဟ်တဴစၟာ။ မူဟိုတ်မ္ဂး အဲဒးသင်္ကာ။ ထာန်ဝွံဂြိုပ်ဂျိ ဇာတိတမၠာ။ ဋ္ဌာန်ကၠာထာန်ဗြန် ဇြုံကၠန်နာနာ။ ကၟီသြိုတ်လကိုဟ် ကလော်ဂြိုဟ်စာ။ ဟွံမွဲဒမံင် သၞေဟ်အံင်သၞေဟ်ဖျာ။ ဟွံမွဲဍုင်ကွာန် ဋ္ဌာန်ရညးဝါ။ ဇြဴဖံက်သေဝ်ကွေံ နွံမွဲလှ်ေဟာ။ ဟိုတ်ဂှ်အဲဂး အဒးသင်္ကာ။ သၟာန်အဲဝွံကၠာ သီုမေတ္တာရောင်။   ။

ယွံတြုံအသဝ် ရုပ်ထဝ်ဒကောင်။ နာဲစဳကၠးရောင်မွဲတောင်ဂးမာ။ နာဲတီညာတ်သၟတ် လိက်ပတ်ဝေါဟာ။ နာဲနွံတဴကၠာ ပညာဂှ်သၟတ် လဟီုအဵု ဟွံဒးကဵုဝတ်။ မသၠေဟ်ပၟာ နာဲပပြာကတ်။ နာဲဂၠာဲစဳစတ် သၟာန်စံၜတ်ကၠာ။ ဟွံသေင်ယောဂဳ ကောန်မှာဗဳသြဴ။ နာဲဂၠာဲဟီုဂှ် ဟွံဒှ်သဘဴ။ ဗတ်ပိုဲဒှ်ကၠာ ကောန်မှာဓနဴ။ ပၠေင်ကၠေံရုပ်အဴ တရဴကၠေံအာ။ ခဍေင်ရပ်ညး ကွေံဒဴဗၠးဟာ။ ဗတ်ဒှ်လကိုဟ် သ္ကာတ်ဂြိုဟ်စာ။ တာဲဟွံကဵုမံင် တံင်ဓဇက်ဏာ။ ဗတ်ပိုဲဒှ်ပၠန် ဗြဴကုံဘန်ကၠာ။ မတ်ဓလန်ဒ ညာတ်ဒညညှာ။ ဗတ်ဒှ်ကလော် သော်ညံင်ရိုဟ်တာ။ ဇကုကောအဲ ဓဇက်ဂြဲဏာ။ စဖျုန်သဂုတ် ဇုတ်ထောံလသာ။ ဗတ်ဒှ်ဗြဴနာ် ပ္ဍဲဍာ်ဂင်္ဂါ။ ဇကုကောအဲ ၜံက်ဂြဲလသာ။ ဟိုတ်ဒှ်မၞိဟ်သၟတ် ဗွဲအဆတ်ကၠာ။ လၟေင်သွံရာန် ပိုဲသၟာန်သၟုက်အာ။ ကောဟွံပိုင်ခြာ ဂတကၠာကြဴ။ ရာန်ပိုဲဂွံသွံ ဟွံရာန်ဂွံစဴ။ ထာန်တၟေင်သ္အာင်သွံ ပိုဲဂွံအာတဴ။ သီုဗြဴပန်အဴ ဟီုတဴမာယာ။   ။

နာဲဒကောင်ပိုန် သီုကွိုန်ပညာ။ မိင်ပါင်ဗြဴပန် ပ္ဍဲစိုတ်စန်စာ။ ထာန်ဝွံထာန်ဂျိ ဇာတိတမၠာ။ မၞိဟ်ဂးဟီုကွေံ နွံမွဲလှ်ေဟာ။ မၞိဟ်ဟွံဒှ်အဴ ဒေဝတဴမာ။ မတန်ဒှ်ရ ချပ်နပညာ။ နာဲတီကေတ်သၟတ် ဗွဲအဆတ်ကၠာ။ ဒဒှ်ကလောင် ဗြဴဗော်ယက္ခာ။ ၜိုန်တီကွေံကြာန် ဟိုတ်ဒါန်တမၠာ။ ဒှ်မၞိဟ်တၞံဂျ ဂၠိုင်ဘဝကၠာ။ ဟိုတ်ဒှ်မိတ်ဒါန် ညာတ်တုဲဆာန်အာ။ သ္ဍိုက်မၠိုက်ဖဳဒွါ သာဓာသၟိက်ညန်။ မိက်ဂွံသ္ဍိုက်ဆာန် ရေင်ကာန်သၟဟ်န်။ တံင်စိုတ်ဟွံမာန် မွဲဟာန်သၟိက်ညန်။ မဟီုတိုန်ပၠန် ကဵုဗြဴပန်ကၠာ။ ယွံမိညးပန် ရုပ်ညံင်ကညာ။ မိတံမဂး မၞိဟ်ကွေံရဟာ။ ပိုဲမိတံကၠာ သာဓာဒးရး။ ဇရေင်မိတံ ဆံလံလေင်လး။ ကောသမိက်ဇူကောံ ကရောံမိသ္အး။ ပသာ်သၟး စိုတ်ထဝ်ဂၠးရော။   ။

ယွံတြုံမပ တၠအယော။ ရာန်ပါင်စရော ကောဟွံဂးကၠာ။ ပိုဲတိုန်ကၠုင်ဟေင် တာဲကောသေင်ဟာ။ ရာန်လေဝ်ဟွံရာန် တၟေင်ဟီုကြာန်အာ။ သၟိက်ဂွံသၟဟ်န် မိက်ညန်သာဓာ။ သၟိက်ဂွံလီၜန် မိတ်တန်မွဲသၞာ။ ဟီုပကျာဗာ လီုအာဂလာန်။ ကောတံမတဴ တြဴသ္ၚောဲထာန်။ ပိုဲပ္တောဟ်ဂလာန် ဆာန်တုဲဗွဲကြဴ။ ထာန်တၞဟ်ဟေင် ညးကလေင်စဴ။ ပိုဲဒးဒှ်ကောံ သ္ၚောံဗွဲကြဴ။ ပါင်တြုံတံအဴ ပ္တေဟ်တဴဂွံဟာ။   ။

ယွံမိဗြဴပန် ရုပ်ပကညာ။ နူကောညာတ်ကၠာ ရုပ်သာ်လွာနာဲ။ ဂကောံမိတံ မဇၟံစရာဲ။ မိက်ဂွံမံင်ရ သၟိက်ပဒိပ်ဒါယ်။ ထာန်မိကဵုမ ဟွံစဴရနာဲ။ ကောံဟွံမိက်သာဲ နူနာဲတံဟေင်။ ကောဟီုဗိုန်ဇၟံ ဟွံသ္ပံတၟေင်။ ညံင်ဗီုဂြင်စိင် ဂၠိင်တိတ်ဗွဲလွေင်။ ဟွံဂၠံကလေင် လုပ်ပၠန်သေင်ဟာ။ ညံင်ဗီုသာ်ဂှ် တန်ဒှ်ဟွံခြာ။ ပ္တိတ်ပါင်တုဲမာ ဟွံမုသာကွေံ။ ဒှ်ဗိုန်စၟတ်ရ မိပသလှ်ေ။ လဟီုကောကွေံ မိဟွံပ္တေဟ်ဟာ။   ။

ယွံကောမပ တလပညာ။ ကောကလင်ကၠာ ပုံတမၠာအဴ။ ညးဟီုသေင်ဟာ က္ၜဴၜါတြုံဗြဴ။ သီုၜါသၟဟ်န် သ္ဍိုက်မၠိုက်တန်တဴ။ ဂစေံကွဴဗြဴ ကြဴတန်ဂဗ္ဘ။ အၚပ်လအိတ် သတ်ကွိတ်သၟိက်စ။ ကွဴဗြဴတုန်ရ စကာတြုံအဴ။ တြုံအာတုဲဟေင် ဟွံကလေင်စဴ။ ဟွံဆာန်ဗြဴပၠန် တြုံဓဇန်တဴ။ မာတ်တြုံဟွံစိုပ် ဗဒိုပ်ကွဴဗြဴ။ အလုမ်ဂြိုပ်ဇၞော် ကွဴဗြဴကော်တဴ။ ကောပိုဲကောပိုဲ ဟိုဲကောညံင်စဴ။ စဵုလၟုဟ်အဴ ဗြုကော်တဴကၠာ။ ညံင်ဗိုကွဴဂှ် ဒှ်တဴပၟာ။ ပါင်တြုံတံရ ပတံသာဓာ။ စိုတ်တြုံတံကွေံ ပ္တေဟ်စဂွံဟာ။ ကောဒကောင်ဗိုတ် ဒေပ်လဝ်စိုတ်ၜါ။ သၟိက်ပကျာဗာ ပအာတံစၞာဲ။ ပါင်ဂစေံနေံ သၟိက်လှေံဒိပ်ဒါယ်။ ဇိုန်ဖျိုန်လမျီု ဟိုဇီုဂၠိုက်ဂၠာဲ။ ပိုဲတီဥပါဲ စိုတ်ကောဗၠာဲဟာ။   ။

ယွံမိဗြဴပန် ရုပ္ပကညာ။ မိဇက်နင်ကၠာ ပုံပၟာကွဴ။ ကွဴကၟက်ဓဇန် ဟွံတန်ဒှ်တဴ။ ကွဴကၟက်ဟွံစဴ ဒေံဗြဴတီဟာ။ ကွဴကၟက်သဘဴ ဟိုတ်ဆာန်ဗြဴကၠာ။ ဗြဴစကာဗက် ကွဴကၟက်ဒးအာ။ ဂၠာဲသတ်ကွိတ်ကိုပ် အလုမ်ဂြိုပ်ဝါ။ သတ်ကွိတ်ဂှ်ဟေင် ဟွံဂွံသေင်ဟာ။ ကွဴကၟက်ပဝ်အာ ကြာဥဒျာန်သၟိင်။ သတ်ကွိတ်မွဲတၞံ ဍုဟ်ဗြံသဝိင်။ ဥဒျာန်ဗျိင် သၟိင်ကဵုမင်တဴ။ သၟာပၞောဟ်ရ သၟာတ္ၚတံအဴ။ ပၟင်ဥဒျာန် ဟီုပါန်ကမြဴ။ မင်မွဲဗိုန်တဴ ကွဴကၟက်အာညာတ်။ သၟိက်သ္ဂောံသတ်ကွိတ် လအိတ်သေသာတ်။ သ္ၚဳရံင်ကွိတ်ကၞောတ် ညာတ်သၟာတ္ၚ။ လုပ်ကေတ်ကွိတ်ပၠန် ဖေက်အိုတ်ခန္ဓ။ စဴသၟးသွံ ဗြဴဟွံဂွံစ။ ဗှ်သမ္ဘာဆာန် ဇြဟာန်မူလ။ ဟွံရိုဟ်စကီု ကဵုလမျီုရ။ ကွဴကၟက်ဂှ်သွံ ဟွံရောံဒည။ ပဝ်လုပ်လအိတ် စိုပ်တၞံကွိတ်ရ။ သၟာတ္ၚပၠန် ပန်စုတ်ချိုတ်ဒး။ ကွဴကၟက်ဆာန်ဗြဴ ချိုတ်တဴဘဲလၟ။ ဟွံဂွံကလေင် ကဵုဗြဴဟေင်ရ။ ဗြဴဟွံတီကီု တြုံလီုခန္ဓ တြုံအောန်သစ္စ ဟီုဗျံက်ဗျတဴ။   ။
မာတ်တြုံဟွံစိုပ် ဗဒိုပ်ကွဴဗြဴ။ အလုမ်ဂြိုပ်ဇၞော် ဗြုံကော်ဓဝဴ။ ကောပိုဲကောပိုဲ ဟိုဲကောစဴပြဟ်။ စဵုကဵုလၟုဟ်ဝွံ ဗြုကော်တဴကၠာ။ စလာဲပုံကွဴ နွံတဴသေင်ဟာ။ ဒေံဗြဴတုပ်ကၠာ ပၟာကွဴဗြဴ။ ကောတုပ်သက်လက် ကွဴကၟက်သဘဴ။ ကွဴကၟက်ဒးချိုတ် ဟိုတ်နူဆာန်ဗြဴ။ ကောမတုပ်တဴ ကွဴကၟက်သေင်ဟာ။ ညာတ်ညးတံဂှ် သၟဟ်န်ညဳသာ။ သၟိက်ဂွံရေင်ကာန် ဆာန်ကၟိန်သာဓါ။ သၟိက်ဂွံလီၜန် တန်မွဲသၞာ။ လမျီုကောကၠာ ၜိုန်ဂိုဟ်ခါဂှ်။ ကောဇိုန်ကွာဲဟေင် စိုတ်ဟွံတၟေင်တၟဟ်။ ဗွဲကွဴဂှ်ရော စိုတ်ကောမဒှ်။ ကောဟွံလဖှ် ဒဒှ်စရာဲ။ ဂကောံနာဲရော ကောသၟိက်ဒိပ်ဒါယ်။ ပသာ်စိုတ်နာဲ ဂွိုင်စရာဲရော။   ။

ယွံညးမပ တၠအဃော။ ပါင်တြုံတံရော ယောသောတၟေင်အာ။ ပါင်ဟီုတၞဟ် စိုတ်တဏဟ်ခြာ။ ဗီုဥပ္ပမာ သာ်လွာ်ထိုင်အဴ။ သၟိင်ထိုင်ပဝ်လှောင် ဂၠာဲဇာပ်ဍောင်ပ္ကဴ။ ဂွံရှ်ပ္ကဴဟေင် ပဝ်ကလေင်စဴ။ ရှ်ပ္ကဴအိုတ်သွံ ဟွံမိက်ဇာပ်တဴ။ ဟွံဗၠန်သ္ၚဳအဴ ဍောင်ပ္ကဴဂှ်ကၠာ။ ဍောင်ပ္ကဴသ္အာင်ဟေင် ဂၠာဲဇာပ်သေင်ဟာ။ နဲသၟိင်ထိုင်ကီု တုပ်ဗီုပၟာ။ တြုံတံတုန်ကၠာ ဝါစာဂလာန်။ လဟီုဍာတ်ကြောံ သၟိက်သ္ဂောံရေင်ကာန်။ ကၠုင်ဖျိုန်ဂလာန် နိဒါန်ဟုဲဟဟ်။ ရေင်ကာန်ဖဲအဴ ကြဴပမတ်ၛဟ်။ ထာန်တၟေင်တၞဟ် ဂၠာဲလဖှ်အာ။ ပါင်တြုံတံကွေံ ပ္တောံစဂွံဟာ။ ကောဒကောင်ဗိုတ် ဒေပ်လဝ်စိုတ်ၜါ။ သၟိက်ပကျာဗာ ပအာစိုတ်စၞာ။ ဟီုဇီုစေံနေဴ လှေံပဒိပ်ဒါယ်။ သၟိက်ဖျိုန်လမျီု ဟီုဇီုဂၠိုက်ဂၠာဲ။ မိတီဥပါဲ စိုတ်ကောဗၠာဲဟာ။   ။

ယွံမိဗြဴရတ် ကၞောတ်ရုပ္ပါ။ မိဇက်နင်ကၠာ ဗိုပမာဏ။ မိဖျောပ်ပိုဲတြုံ နင်ဒုဟ်သဗ္ဗ။ မိကလင်ကၠာ ပၟာထာဏ။ စရိုတ်ကောဂၞဴ ရစၟခြ။ စၟခြဂှ် ပဒှ်ဒေသ။ ဍေံညာတ်ကေတ်သၟတ် လျးပၟတ်ရ။ သာ်လျးဝွံပၠန် ဂေါဝ်သန်ယဲသ။ အာကေတ်ဗိုန်ဇၟံ လျးဝွံမးလ။ လျးဝွံကဵုအြ ကဵုဒှ်မွဲရ။ ဍေံဂးတုဲကွေံ ဆင်စှ်ေဒေါဝ်လ္ၚ။ လမျီုခန္ဓ ဟွံရိုဟ်စကၠာ။ စၟခြဟေင် သာ်ဂှ်ဟေင်ဟာ။ အဲနဲဂှ်ကီု တုပ်ဗီုပၟာ။ ညာတ်ရုပ်မိတံ သိပ်ဇၟံပြာထာ။ သၟိက်ဂွံရေင်ကာန် ဆာန်ကၟိန်သာဓာ။ သၟိက်ဂွံသၟဟ်န် ညန်မွဲသၞာ။ လမျီုကောကၠာ ၜိုန်ဂိုဟ်ခါဂှ်။ ကောဇိုန်ကွာဲဟေင် စိုတ်ဟွံတၟေဟ်တၟဟ်။ ဗီုစၟခြ စိုတ်ကောမဒှ်။ ကောဟီုလဖှ် တိုင်လွဟ်စလာဲ။ ပသာ်စိုတ်နာဲ ဂွိုင်စရာဲရော။   ။

နာဲဒကောင်ပိုန် ဒတိုန်အဃော။ ကဵုဗြဴပန်ရော ဟီုထောပဏာ။ သၟတ်ဗြဴပန် ရုပ္ပကညာ။ ၜိုန်သ္ဍိုက်နာဲလောန် သၟိက်ညန်သာဓာ။ ဟီုပ္တိုန်ဖအာ ဟွံဂွံခြာဒင်။ ဗြဴပန်ဂှ်မာ ညာဏ်ညံင်မှာဂင်။ နာဲနွံပညာ ညံင်သာ်လွာသြင်။ ပုံကၞက်အဂီု ဗီုမိဂၠာဲနင်။ နာဲဟီုခၠေဝ်ဇိုတ် အိုတ်အာလင်င်။ ညံင်လပှ်ကၠာ အိုတ်အာပ္ဍဲသြင်။ ဗြဴပန်သွဳသွပ် မိင်ဒးကၞပ်သၠင်။ သွက်ဂွံခၠေဝ်ဒင် ဗီုပြင်ကဵုမ။ ပုံကၞက်တုန်ရ ညိညအိုတ်အာ။ နာဲဒကောင်ပိုန် ဒဵုဟီုတိုန်ကၠာ။ ယွံမိဗြဴရတ် ကၞောတ်ရုပ္ပါ။ နာဲဖျေံမေတ္တာ ညံင်ဟွံခြာသာဲ။ လမျီုခန္ဓ ကောပတၟာဲ။ ကဵုဂွံဇူကောံ ကရောံဒဴနာဲ။ ကဵုဂွံဒိပ်ဒါယ် ကရောံနာဲညိ။   ။
ဗြဴပန်ဂွံမိင် ကွိင်ပါင်ကောမိ။ စံင်တူစိတ ဒမၠိတ္ၜူမှာဲ။ ပါင်တြုံအသဝ် ဗီုဂတဝ်သာဲ။ ရမျာင်အမြိုတ် မိပ်စိုတ်ဒးလာဲ။ ကြုတ်ဏာဗဇဴ ဂမ္ဘဴတ္ၜူမှာဲ။ ညာတ်ဗ္ၜူမတ် သြိုဟ်လယတ်ချာဲ။ ဝေင်ဗီုတ်ဟွံမာန် ဇြဟာန်လောန်ကာဲ။ ဗြဴပန်ဟွံဇြိုန် အီတိုန်ဖျာဲဖျာဲ။ ဗီုဇုက်လလဳ ကၞိင်ဗစဳချာဲ။ သီုဗြဴပန်ဂှ် သၟဟ်န်စရာဲ။ ဂလာန်စံက်ထေံ စေံနေံဂၠိုင်ဂၠာဲ။ မပဂေါဝ်ဆာဲ သီုနာဲဗြဴပန်။ သ္ဍိုက်မၠိုက်သာဓာ ညဳသာသၟဟ်န်။ ဆာန်ကၟိန်ပူဗန် လီၜန်တဴမံင်။   ။
မူညံင်မတုပ် ဥပ္ပမာဆံင်။ ပၟာတုပ်သၟဟ် ဒကှ်တမြံင်။ ဒေါဝ်လစဂွိုင် ကြာလိုင်လစံင်။ ယာံညာတ်အရံင် အံသဝ်တ္ၚဲဗၠာဲ။ ပၠိုဟ်ထာင်လပၠာင် ပံက်ထာင်ရာင်ဆာဲ။ ထိုက်ဍောင်အသဝ် မြမောဝ်တၟာဲ။ ရဴမရာဲကွာဲ သၟိင်တ္ၚဲဗၠာဲကီု။ မိတုပ်ဒကှ် တိုင်ထဝှ်ဗီု။ နာဲမတုပ်ကီု ဗီုသၟိင်တ္ၚဲဗၠာဲ။ မိတ်ဂွိုင်စရာဲ ကောန်ဗၠာဲလးလေင်။ မိင်ပါင်တြုံတုဲ စိုတ်သုဲကလေင်။ စိုတ်ဟွံဂွံဗၠေင် ဟွံဒစေင်အာ။ ပၠိုဟ်ထာင်ရာင်ဆာဲ ကွာဲစန္ဒိမာ။ ဗၠိုပ်လစသာင် ရမျာင်မေတ္တာ။ ပၠိုဟ်ထာင်ကြုတ်ဏာ ကွာဲထာင်ဃာန။   ။

ဒေဝပန်ပ္ညဳ ပဳတိက္ဍင်ပြ။ ညံင်ဇုက်လလဳ ကၞိင်ၜါစဳခၠ။ မဒကောင်ပိုန် ဒတိုန်ရုပ္ပ။ ဂကောံဗြဴပန် ပူဗန်လံလ။ တိက်မွဲဖုန်ဒၞဳ သ္ၚဳလဝ်ကာယျ။ တဲသွိင်လဗာင် ထာင်ဍောင်ပဒၟ။ မူညံင်မတုပ် ဥပ္ပပၟာဏ။ ညံင်ဇၞးဇၞူစှ်ေအာ ပ္ဍဲကြာလစ။ ဍောင်ဒကှ်ဗျိင် ဂိုင်ၜှ်သွိင်ပၠ။ ဇၟူဗၠာဲဂေင်က္ဍင် ဍာဲသြင်လစ။ ဇၟူလှိင်တဴစိုတ် ညံင်အမြိုတ္တ။ နာဲမတုပ်ဇၟူ တ္ၜူမာဲရုပ္ပ။ ဒကှ်တုပ်ရောင် သြိုဟ်ဍောင်ပဒၟ။ လပုဟ်တဲသၟိင် ကွိင်လုမ်ကာယျ။ ဂိုင်ၜှ်ပလှ် ဒကှ်မဒၟ။ နာဲမဟုဲဟဟ် သၟဟ်အမြိုတ္တ။ ဗြဴပန်ကျာ်သြဳ ဒ္ၚဳဇိုန်ကဵုမ။ နာဲဒကောင်ပိုန် ဒေါဝ်ကွိုန်ဘောဂ။ ဂကောံဗြဴပန် သၟဟ်န်စိတ္တ။ သ္ဍိုက်မၠိုက်လံလ ခယျသာဓာ။   ။
ဒကောင်ပိုန်အဵု ကဵုဗြဴပန်ကၠာ။ ဝေင်ဂြိုင်စံက်ထေံ။ စေံနေံစန်စာ။ သ္ဍိုက်မၠိုက်သၟဟ်န် တန်မွဲသၞာ။ ညံင်ဒကှ်ဗျိင် ကဵုသၟိင်တ္ၚဲကၠာ။ ညံင်ဂိတုဗျာင် ညံင်ဍောင်ထာင်သွာ။ ညံင်အိန်နာဲဗြီု ကဵုသုဇာတာ။ ဝတ်ပရေင်လိုက် သ္ဍိုက်မၠိုက်ညဳသာ။ ဟီုပ္တိုန်ဖအာ သာဓာလဗိင်။ စလောံကံဖဵု မုက်ကၞိင်ကဵုကၞိင်။ ပ္ဍဲတာဲဇမၠိင် ဒ္ၚဳလှိင်အာရောင်။   ။
ညးမသုန်ဂှ် သၟဟ်န်မွဲတောင်။ သီုဗြဴပန်ရောင် ဂွံအခေါင်တုဲ။ မိပ်စိုတ်လောန်သန် သီုပန်အီပြုဲ။ လွဳစိုပ်ဒတုဲ ဟိုတ်ဒါန်ပတုဲလဝ်။ မိနာံသာအိုတ် စိုတ်တြုံအသဝ်။ ဍေံလှေံလှန်စိုတ် ပၠာံစိုတ်ဆတ္တဝ်။ ဂမုင်စမ္ပါ စမ္ၚာမြမောဝ်။ ဂဇေင်ဇြင်ထောဲ လပေါဲဒၞာဲဂေါဝ်။ စလန်အဂၠဴ ရဴဍောင်ပ္ကဴထဝ်။ စုတ်ပ္ဍဲက္တောဝ်ၜါ နာဲသာဇံသဝ်။ စလန်မောဝ်ဟုံ ဖုံလဗိုဟ်လဝ်။ ကၠေင်သီုမြမောဝ် ပၠာံလဝ်သော်နာဲ။ ကွာင်ၜဲယိုဟ်က္ၜန် ဆန်ၜန်စုတ်ကွာဲ။ ဇၟၠုလက်ဖက် သွက်ကောဗၠာဲ။ သာ်ဝွံဇိုန်ကွာဲ ကဵုနာဲရောင်အဴ။   ။
နာဲဒကောင်ပိုန် ဒတိုန်ကြက်လှဴ။ ဒ္ၚဳဒ္ၚဳဍိုန်န် ဒယှ်ေတိုန်အဴ။ ရမျာင်ညံင်ကွိင် မိင်စိုတ်ဒမြဴ။ စံင်ဒြဝ်လဒု တိင်ဗရုတဴ။ ကွိင်ကဵုရမျာင် စလာင်နှဴရဴ။ ဗြဴဂွံမိင်အိုတ် မိပ်စိုတ်ထိုက်လဴ။ ဒေဝတဴဗြဴ ရဴစိုတ်ဟွံတန်။ သ္ဍိုက်မၠိုက်လောန်ကာဲ သီုနာဲဗြဴပန်။ ဝေင်ဂြိုင်အဵုဇိုတ် မိပ်စိုတ်လောန်သန်။ သ္ဍိုက်မၠိုက်ပူဗန် ညန်တ္ၚဲမသဝ်။ သွက်ညးအာဂြိုပ် ကၠုင်စိုတ်ဆတ္တဝ်။ ဍာ်အောဟ်ပုင်ကောံ ဒးတုက်ကောံလဝ်။ နာဲဂးတုဲကၠာ က္တဵုအာဆတ္တဝ်။ လာင်မုက်နာဲပၠန် ဗြဴပန်အသဝ်။ သာ်ဝွံဆတ္တဝ် ဟီုလ္ၚောဝ်ကွာဲ။   ။

ယွံကောန်သၟိင်ဓဝ် စက္ကဝဝ်ဗၠာဲ။ ပိုဲဍိက်ညးပန် ကၠောန်ပၠန်သၞးနာဲ။ ကောဂဇံရ လပဒွိင်ဒွာဲ။ ဂးတုဲဗြဴပန် သၟဟ်န်စရာဲ။ ဂၠာဲအောဟ်တုက်ဍာ် တောံပုင်ကွာ်ၚာဲ။ ပုင်စိန်တောံသွ ကပေင်ထၟာဲ။ စာင်အဒါအောဝ် မောဝ်ပ္ဍးဆာဲ။ ကွာင်သီုအမာဲ စဳရေင်ကွာဲလဝ်။ ဒးစဝ်ပၠန် ညန်တ္ၚဲမသဝ်။ ဂကန်ဖျုန်သၟတ် ကဵုတြုံဆတ္တဝ်။ ယွံကောသၟိင်ဓဝ် တြုံအသဝ်နန်။ ပိုဲစဴကၠာရ ကောပဝေါန်စန်။ ကောမစံင်တူ ပူဆာလ္ၚုလ္ၚန်။ စိုတ်ကောကဵုတန် ပချပ်တ္ၜန်တ္ၜုဲ။ နူပိုဲဍိက်ဗြဴ ဆာန်ကောဂၞဴတၟုဲ။ စိုတ်ဟွံတၟေင်တၞံ တံဇိုင်တြုံလွုဲ။ ဖျိုန်လမျီုတုဲ ဟီုဇီုဟုဲဟဟ်။ ပ္ဍဲကောနာဲသ္ၚိ စိုတ်ဟွံတၟေင်တၟဟ်။ ယးဂတပ္ညုင် ပိုဲစိုပ်ကၠုင်ပြဟ်။ သတ်ဗြဴဗြာတ်က္ၜဴ သိဠဴပဏဟ်။ မြာင်မ္ၚောဝ် ကြုက်ထဝ်နွံရှ်။ ဒရေဲဂၠံက်က္တဵု ဍုဟ်ဂဵုလတှ်။ သစ္ဆုမၞုံရှ် ပိုဲဂၠာဲၜှ်တဴ။ ပိုဲၜှ်နင်ရော သွက်နာဲကောဂၞဴ။ လ္ပဒွိင်ဒွာဲ နာဲဍောင်ပ္ကဴ။ ဗကန်တုဲအဴ ဒ္ၚဳက္တဵုစဴတုန်။   ။

လဣနင်ဒဴ လထဴနွံဂုဏ်။ သၟတ်ဗာ်ဆုဒုန် တမ်ညဝ်တုန်သ္အး။ တုင်င်တိင်င် ဂြိင်င်ဒေါံနး။ ဂြံဂြံဒေါံနး နူယးဒဵုသဝ်။ လ္ၚဵုဗာက်ဖ္ဍိုက် လ္ၚဵုဂှ်ယိုက်ဗဝ်။ လ္ၚဵုဂှ်ကုတ်ဒုန် ဖန်ဖက်ၜတ်လဝ်။ လထဴၜတ်လဝ် စွံဗွဝ်တရေင်။ သဏကဵုစိင် ဂၠိင်ဂၠေံဗွဲလၟေင်။ ဒယိုင်တဝ ၜတ်ပၠလဝ်ဟေင်။ ဒမင်ကၞံင်ရေင် လၟေင်ရတ်မူလ။ လဣနင်ဒဴ ထဴပြေင်စွံပၠ။ မာတ်တ္ၚဲသဝ်အာ ညန်ကၠုင်ကာလ။ မြာ်ဂြဴလဓဵု ဍေင်ကြဵုအဝ်ဇ။ တ္ၚေက်ပဝ်စဴရ ဒေသပနာင်။ စာင်ဍာ်ဗြုကြဵု ကွက်ကွက်ကဵုပါင်။ လိုက်ထောဝ်စလာင် ကဵုပါင်ရုရု။ ကွဴဂြဴဂဍုတ် ဖဝ်ရဂုတ်ဗြု။ ခနှေင်စက်စာန် ထာန်ကံလဒု။ ဗၜဵုကော်ကောန် ယောန်သၟဝ်တၞံဆု။ စိုပ်ဂွာံဥတု စနူသန်ၛာ။   ။

သၟိင်တ္ၚဲဆတ္တဝ် မညန်သဝ်အာ။ လဣနင်ဒဴ လထဴနာဲသာ။ ကော်ကောန်ရဲတုဲ ဒ္ၚဳသုဲစဴအာ။ စိုပ်တာဲတုဲဒှ် ဟုံဍာ်အောဟ်ကၠာ။ ဟုံဍာ်တုဲကိုပ် စိုပ်တာဲဒၟံင်ဗ္ဂါ။ ကောန်ရဲကောန်သာ လုပ်အာဖဴပ္ညုင်။ ပံက်ကၠာင်ညာတ်က ပံက်နညာတ်ပုင်။ ညာတ်အမာဲပၠန် လပန်ဓလုင်။ နာဲစဳရေင်အဵု ကဵုညးဟာပ်ပုင်။ စာင်အဒါအောဝ် မောဝ်ပ္ဍးတလုင်။ သွက်နာဲရဲကၠာ စုတ်ဏာသွပုင်။ ထဴဂဇံၚုင် ညာတ်ပုင်အမာဲ။ သၠေဟ်တဴပၟာ ဗ္စါရဏာဂၠာဲ။ ဗၠာဲဂမြိုဟ်ကံ ဂဇံစၚာဲ။ ထိုင်သးနာဲကၠံင် ထေက်ကဵုမင်တာဲ။ ပုင်ကွာင်စၞ ဖျုန်ကဇၟာပ်ဒၞာဲ။ စဳရေင်ခိုဟ်က္ဍင် ကြိုက်ကဵုမင်တာဲ။ ခိုဟ်ဂးလောန်ကာဲ ထေက်မင်တာဲရောင်။ ညးဂမၠိုင်ဂး ထိုင်သးဂၠိုင်တောင်။ မူဒၞာဲမဂွံ ဇၟာပ်စၞဟွံယောင်။ ဂွံစဳရေင်လဝ် ဂွိုင်ထဝ်ဏှာသောင်။ သၟာန်အာစအာ ထိုင်သးဂြိုင်သၠောင်။ စဖဲတုဲရောင် ဍောင်ၜိုတ်သၠိင်အာ။   ။

တ္ၚဲဂှ်ယးကၠာ တၟာအာဒိုဟ်ပန်။ စဟာပ်တုဲကၠာ လုပ်အာဂြိုပ်ပၠန်။ ကောန်ဒေဝတဴ သီုကဵုဗြဴပန်။ ကျိုင်ကျဝ်တုဲဓဝ် ရုပ်ဂေါဝ်ဂါသန်။ ဒေဝတဴအဴ ပ္ကဴကြက်စလန်။ ကၠုင်ကယျိုင်ကၠာ တြုံသာရဲဇန်။ ၚဳစဲဂြးသော် ဟုံဗော်စလန်။ ဇဗၠုစုတ်လဝ် သၠိုင်ထဝ်သၠိုင်သြန်။ လီၜန်စံက်ထေံ စေံနေံသၟဟ်န်။ ရိုဟ်ဟ်တ္ၚဲဟေင် လၟေင်အလန်။ စဳရေင်ပုင်သွ အမာဲကဗျန်။ တ္ၚဲသဝ်သၟိက်စဴ နဲကြဴဂကန်။ နာဲနွံပညာ ခါဂှ်သၟာန်ပၠန်။ ရုပ်ညံင်ဍောင်ပ္ကဴ ယွံမိဗြဴပန်။ ကၠုင်တုဲစဴအာ ပသာ်လွာပၠန်။ နူကဵုဍုင်ကွာန် ထာန်မသ္ၚောဲညန်။ မိတံဟီုဂှ် ဒှ်ဟွံဒှ်ပၠန်။ အဲသၟိက်ညာတ်ညိ ယွံမိဗြဴပန်။ ဗြဴပန်တုန်ကီု မိလဟီုပၠန်။ ညးပန်ဟွံဇြိုန် ဟီုတိုန်ဟွံခၠန်။ ယဝ်သၟိက်ညာတ်ကၠာ ဖျာလွာဂၠိုင်တန်။ ပိုဲအာထ္ၜး ဍုင်ရးဂၠိုင်သန်။ လပဝေါန်စန် နာဲနွံပညာ။ ဒ္ၚဳဗက်အာပၠန် ဗြဴဒေဝပန် ဒ္ၚဳဗၠန်စဴအာ။   ။

ဍေံက္တဵုဗဒှ်ဟေင် လၟေင်သ္ၚိဖျာ။ ဖျာကွာင်ၜဲရ ဇဗၠုသၠကၠာ။ သ္ၚိဖျာဗြာတ်က္ၜဴ သတ်ဗြဴသတ်တာ။ မြာင်သတ်ကြုက် မုက်ဗဳလင်္ကာ။ ဂၠံင်တဵုပၞဟ် ဖျာဂှ်မွဲသာ။ ဖျာဂၠိက်ယာတ်ပၠန် ဂၠိုင်သန်နာနာ။ မဝါင်မအဳ မဇဳပေင်ဖျာ။ မုဲကွာန်ၜုန်မြ ဂတေက်ပၞုတ်ကၠာ။ ခဍောင်ကဝေဝ် တေဝ်လဝ်ပေင်ဖျာ။ ခပဳထဝ်ကီု သီုဝုန်ဂလာ။ ပညန်ဟအဳ ခပဳသွံကၠာ။ လမေင်လမေဝ် တရေင်ဏာဖျာ။ သ္ၚိထာန်အရာ ဘုတ်ဘာပေင်က္ဍတ်။ ဍေံက္တဵုဗဒှ်ဆာဲ နာဲဂွံညာတ်သၟတ်။ ဗဵုဒ္ၚောဝ်တုဲအိုတ် မိပ်စိုတ်လောန်ဗၞတ်။ နူဂှ်တုဲသၟတ် ပယျဝ်ရိုဟ်တ္ၚဲ။ ကွာ်ကၠုင်ဂၠောဲဂၠောဲ တ္ၚဲသဝ်စဴအာ။   ။

ဒေဝတဴဗြဴ စဴအာတုဲကၠာ။ ညးမအာဂြိုပ် စဴကၠုင်စိုပ်မာ။ နာဲစဳရေင်ရ ဗစညးကၠာ။ ပုင်သွအမာဲ ကွာင်သာဲသဂြာ။ ဖျုန်ဒြာဲဖျုန်ကၠိက် ခရိက်သီုခၞာ။ စာင်အဒါအောဝ် မောဝ်တၟာဲအာ။ စဳရေင်ကဵုကၠာ နာနာသာ်ပၠန်။ ဗဒုင်ကဵုသၟုတ် စုတ်နင်ပုင်သွ။ ညးပိညးပန် ဖန်ဖက်ကဵုရ။ ဇၟာပ်သွအမာဲ ဂၠာဲဆန်ကဵုစ။ စဟာပ်တုဲဂှ် ဒှ်သံဝေဂ။ လဣနင်ဒဴ ထဴဟီုတိုန်ပၠ။ ယွံလေဝ်မၞးတံ လၟုဟ်ဏံရ။ ပိုဲမကၠုင်စိုပ် ပ္ဍဲဂြိုပ်ဟေမ။ လၟုဟ်ဝွံသွံ ဟွံသ္ဍာံကံတ္ၚ။ ဟွံဒှ်ဒတောဝ် တၞောဝ်ဖျာက။ က္ၜိုင်,ပှ်,ဒြာဲအဵု စဳရေင်ကဵုစ။ ဖျုန်စာင်ဖျုန်ကၠိက် ခရိက်ဖျုန်က။ မောဝ်ပ္ဍးတၟာဲ အမာဲသဗ္ဗ။ ဖျာလွာသကဲ ဟွံမွဲညိည။ နိဂီုဍုင်ကွာန် သန္ထာန်ဒေသ။ အံသာဲကွာင်ကၠေင် ဂွံပေင်သီုန။ တၟေင်သန်ပြဝ ထဴတော်ဆကၠာ။   ။

ယွံမၞးတံအိုတ် ဟိုတ်နူဝွံမာ။ ညံင်သ္ဂောံတီကၠာ သာ်လွာဂွံပ။ ညးဂမၠိုင်ဂှ် ချပ်တုဲဒှ်ရ။ ယးကလဳလုပ်ဂြိုပ် ကိုင်အဒိရ။ အာတုဲကၠုင်ပၠန် အောပ်ဗ္ဒန်မံင်ပၠ။ ညန်တာဲအောပ်ဒၟဴင် ညံင်သ္ဂောံတီရ။ မမဂေါဝ်ဆာဲ ဒၟံင်ပ္ဍဲတာဲဂျ။ တိင်စံင်လဒု ဗရုထဏ။ ဒယှ်ေစလာင် ကဵုထာင်ဝါကျ။ ရမျာင်ကဵုကွိင် ယာံဂွံမိင်ပၠ။ ညံင်ဂတဝ်သာဲ တင်လာဲဒးကျ။ ညံင်အၚောဝ်သၟိင် ကွိင်ဥဒိုန်ရ။ ဂြေန်လဝ်စိုတ်ဇၟူ ဗၜူစိတ္တ။ ဗီုသာ်ဂှ်ကၠာ ဥပမာဏာ။ ဒေဝတဴပန် ဝုတ်ကညာဏ။ မိင်ဗရုကၠာ ကွိင်ဥဒါဟ။ စိုတ်ချဳဂတဝ် ကျိုင်ကျဝ်ဗြံက်ဗြ။ ကၠုင်စိုပ်တာဲကၠာ ဗြဴမှာဒေဝ။ လီၜန်ပူဗန် ဗၠန်ဝေင်ကာယျ။ လဗိင်သဍံက် ၜံက်ထေံလမ်လ။ ညးဂမၠိုင်ရ ခဏဂှ်အဴ။ ညာတ်ဗြဴပန်ပၠေ ကောန်ဒေဝတဴ။ ညံင်အဆေဝ်သွဝ် ဂပ်ဝ်က္ၜတ်သဴ။ လထဴညာတ်အဴ ရဴဝွံဂးကၠာ။   ။

ယွံကောန်ရြတံ မၞးတံညာတ်ဟာ။ မမဂေါဝ်က္ဍင် မင်တာဲဂှ်ကၠာ။ ကောန်ဗြဴကလော် လုပ်ဗော်ယက္ခာ။ ဟိုတ်ဂှ်ဖျုန်က ပေင်နသ္အဳဗ္ဂါ။ ဇၟာပ်အမာဲဟေင် ရိုဟ်တ္ၚဲသေင်ဟာ။ ပိုဲဝါတ်တုဲရ သိက်သ္ပရောမာ။ ကောန်ရဲတံမိင် ဇွိတ်သြိုဟ်သိင်သာ။ ဖံက်က်သ္ၚာတ်တ် ဂွံညာတ်တုဲမာ။ ကလော်ဗြဴပန် တ္ၚဲသဝ်ဗၠန်စဴ။
ညးဂမၠိုင်အဴ ညာတ်ဍေံစဴအာ။ ညးဂမၠိုင်ဟေင် စဴတာဲသေင်ဟာ။ စဴစိုပ်တာဲပၠန် ဒ္ၚဳချပ်စေါန်စာ။ ပိုဲဒၟံင်လံမ္ဂး ဟွံဒးသေင်ဟာ။ စဴပြဟ်ရောင်ဒး ဂးတုဲပိဒွါ။ ဆဗာ်ဂွံတုန် ဆုဒုန်ဇြိုင်သာ။ ဂိုင်ဖ္ဍိုက်ဂၠုင်ရ ခဏဂှ်ကၠာ။ ညးလ္ၚဵုဂှ်ယိုက် ညးလ္ၚဵုဖ္ဍိုက်အာ။ ဒုတ်တ်ဒီုဒီု ဟီုဇီုစောန်စာ။ ဖ္ဍိုက်တုဲဒှ်ပၠန် ကၟန်တိတ်အာ။  ။

ယာံဂၠုင်ဂကး ကၠေံသၞေဟ်ဂးကၠာ။ ဒေဝတဴပန် ရုပ္ပကညာ။ ဟိုတ်သ္ဍိုက်နာဲအဵု ဟွံမိက်ကဵုအာ။ ဍေံက္တဵုဗဒှ်ဟိုတ် ဗြဲလဗိုတ်ကျာ။ အလုမ်ဒိုဟ်ပန် ဂၠုဗဒန်အာ။ ဗြဲလဗိုတ်ကျာ ပိုက်အာသဴသဴ။ ကျာဗြုသဓီု လလောင်ကြဵုတဴ။ စံက်စေက်က္တဵုဒှ် လပှ်ကမြဴ။ လပှ်ဇီုဖျာ် ဍာ်လုပ်သဴသဴ။ ညံင်ဍောင်ပ္ကဴသွာ ဗြုကြဵုဇာတဴ။ ကျာရိုက်ထၟဴ ပိုင်ဖျဴဖက်ဖါ။ လပှ်ဇၞော်ကၠုင် ဇီုဂၠုင်ဖြာဖြာ။ ဂြိင်င်ဂြံဂြံ ကၠံထပ်လ္ၚီဝါ။ ပၠဳဒတုံသ္ကာတ် ဒြာတ်စှ်ေညံင်ဂွါ။ ဗြဴကျာလဒု ဒိုဟ်စှ်ဂၠုအာ။ ဂၠုင်ဟွံဂွံချဳ ဒှ်တဴဖဳဒွါ။ ဖံက်က်သ္ၚာတ်တ် ညာတ်လပှ်ကျာ။ ဒဝိင်လောန်ဗၞတ် ကင်ဇတ်ဇြဟာ။ ကောန်ဂၠုင်နာဲသာ ချပ်ဗစာရ။ လဣနင်ဒဴ ထဴမစဳခၠ။ ဟီုကဵုနာဲရ ခဏဂှ်အဴ။   ။

ယွံမဒယှ်တဴ စဴဒကောင်ပိုန်။ နာဲဟွံချပ်ဂိုတ် ပိုဲဒးချိုတ်ဗိုန်။ ဒးချိုတ်မွဲတဲ လၟုဟ်မွဲချိုန်။ ဂုဏ်နာဲပိုဲချိုတ် လမျီုအိုတ်ဗိုန်။ စဴလပဇြိုန် ဟီုတိုန်ညိကၠာ။ ပ္ဍဲဂှ်နာဲကီု ဟီုတိုန်ဟွံခြာ။ ယွံလဇုအဲ မပြဲပညာ။ ဟိုတ်နူအဲဟေင် ဒှ်ကွေံသေင်ဟာ။ အဲမွဲဟွံအာ တုဲအာမာန်ရ။ ဗွဲယုတ္တိပြဲ အဲတိတ်ဟီုပၠ။ လဣနင်ဒဴ ထဴညာဏ်စဳခၠ။ ဟီုတိုန်ကဵုစဴ ထဴနော်တြ။ နာဲမံင်ကၠာရ ပအာရစဴ။ ပြာ်လမျီုတုန် ပိုဲခၠေဝ်ဂုဏ်ကြဴ။ နာဲဟွံပြာ်အိုတ် ပိုဲချိုတ်ဆဴဆဴ။ ဒၟံင်ကၠာရစဴ ထဴဟီုတိုန်ရ။   ။

နာဲဒကောင်ပိုန် သီုကွိုန်တေဇ။ ကလေင်လုပ်ဒၞာဲ စိုပ်တာဲပၠန်ရ။ ကလော်ဗြဴပန်  ရုပ်ကညာဏ။ ကေတ်နင်ပုင်သွ သဗ္ဗအမာဲ။ ဖျုန်က္ၜိုန်ပှ်ကီု သီုကဵုဖျုန်ဒြာဲ။ စာင်အဒါအောဝ် မောဝ်ပ္ဍးတၟာဲ။ ကွာင်ၜဲယိုဟ်သာဲ အမာဲသဗ္ဗ။ က္ၜဴသတ်ဗြဴကဝ် ဗဒဝ်ပေင်န။ နာဲဒကောင်ပိုန် ဒတိုန်ရုပ္ပ။ စဳရေင်ဗျဳဗျာပ် ဆန်ဖါပ်ဗစ။ စဟာပ်တုဲပ္ညဳ ချပ်ယာယဳရ။ ဂကန်ကဵုစဴ ထဴဂှ်မူလ။ ယွံစဴတက ဒၟံင်ရစဴဂၞဴ။ နာဲပလ္ၚာပ်လ္ၚာ ပိုဲအာရစဴ။ လပစံင်တူ ပူဆာမှောဝ်မှဴ။ ပိုဲအာရစဴ နာဲဒၟံင်တဴရ။ နာဲဒကောင်ပိုန် ဒတိုန်ရုပ္ပ။ ဒ္ၚဳဟီုတိုန်ရ ခဏဂှ်ကၠာ။   ။

ယွံလဇုအဲ မပြဲပညာ။ လဇုစိုပ်အာ ခန်လွာမိဂၞဴ။ တဝှ်ခပ်သီ လဇုပ္တီတဴ။ အ္စာအဲပ္ညဳ သဳနော်လဗဴ။ လဇုပ္တီပၠန် ကျာ်ဂန်မိဂၞဴ။ ဒဒှ်ကောန်အဴ ဟွံဂွံစဴပၠန်။ ဒဒှ်ဟွံချိုတ် ကောန်ဟွံအိုတ်သ္ကန်။ ဒဒှ်ဒၟံင်တဴ ဂကောံဗြဴပန်။ ဟွံဒှ်ပရိုက် ဟွံယဲဒိုက်ပၠန်။ ဟီုမိကျာ်ဂန် အဲဂကန်ပြင်။ မိလပဒှ်ပၠန် လ္ၚုလ္ၚန်ဇွောဝ်လင်။ မိပစံင်တူ ပူဆာယာံကြင်။ မိပဇွောဝ်လင် ပဒွိင်ဘင်တဴ။ ဒဒှ်ဂကန် ပရိုင်ကောန်ဂၞဴ။ လဇုစဴစိုပ် ဗဒိုပ်မိဂၞဴ။ ဟီုလဴညိအဴ ကဵုမိဂၞဴအဲ။ ဂကန်ဖျန်တုဲ တြုံလွုဲမပြဲ။ ဒ္ၚဳပင်ပ္တိုန်တဲ အဲပရဲတဴ။ လ္ၚောဝ်ကၠုင်ဖိဖျ ဒၟံင်ဒၞာဲမိဂၞဴ။ ဖျေံက္ဍိုပ်ပိဝါ သီုဖဳဒွါတဴ။ ဟိုဇီုထုဲအဴ ထဴက္တဵုအာရ။   ။

ထဴကော်ဂကန် ဗၠန်ဂတးပၠ။ ယွံမသ္ဍိုက်လ ဒၟံင်ရစဴဂၞဴ။ မသ္ပလ္ၚာပ်လ္ၚာ ပိုဲအာရစဴ။ ညးဂမၠိုင်ပၠန် ကော်ဂကန်တဴ။ လ္ၚဵုဂှ်ဟီု၇ော ဒၟံင်ရကောဂၞဴ။ လ္ပဘိင်ဘင် လ္ၚာပ်လ္ၚာသၠင်တဴ။ လ္ၚဵုဂှ်ကော်လှေံ ယွံဒေံဍောင်ပ္ကဴ။ ပစံင်တူအဴ ကောဂၞဴအာရ။ လ္ၚဵုဂှ်ကော်ဂၠိန် ယွံကၟိန်တလ။ ဒၟံင်ကဵုခိုဟ်ကၠာ ပိုဲစဴအာရ။ သေဲသေဲဂၠိုင်သန် ကောန်ဂကန်ပၠ။ ဂကန်ကဵုဗျာံ နာဲသာစိတ္တ။ စှ်ေက္ဍိုပ်ဂၠုင်ပြဟ် ခဏဂှ်ရ။ ဗ္ဂန်တ္ၚိုက်တုဲဂျ တိုက်ဂမြံအာ။   ။

နာဲဒကောင်ပိုန် ဒတိုန်ရုပ္ပ။ ညာတ်ညးမစဴ တြဴခန်လွာ။ ဗှ်ကလောပၠန် ဗှ်သန္ထာန်ကၠာ။ ဗှ်သဳမူအဴ ဗဴလမွဲၜါ။ ဗှ်မိကျာ်ဂန် မဒးခၠန်ခြာ။ မုက်ချိုတ်စရိုတ် သြိုဟ်ညံင်သွာ်အာ။ ရမတ်ဇွောဝ်ဍုက် ပေင်မုက္ခဝါ။ ဂိုင်ကေတ်ယာတ်ပၠန် တြုံနွံပညာ။ ဇိုတ်ဍာ်ရမတ် ပ္ဍဲဂၠံမတ်ၜါ။ ဗှ်သၟာဟေင် မိဂၞဴသေင်ဟာ။ ဒဒှ်မိဆာန် ဇြဟာန်မေတ္တာ။ ဒဒှ်လွဳလဝ် ကောန်ဂၠုထဝ်နှာ။ ဒဒှ်ဖုံပၠဳ မိလွဳပရာ။ ဖရာဲမိသ္ဍိုက် ယိုက်ဒိုက်ဖဳဒွါ။ မိဖုံပၠဳဟေင် ရိုဟ်တ္ၚဲသေင်ဟာ။ မိအုဲအိက်သၟတ် ပတ်သမောဝ်ကၠာ။ တူထဝါဲတုန် ဒှ်ဖုန်သၞာ။ သော်မိသလဲ ဂေက်ဂြဲဟွံညှာ။ ကျာ်ဂန်လွဳလဝ် စဵုဇၞော်မောဝ်အာ။ ဟးဂန္ဓအဲ ဂုဏ်ဇၞော်ပြဲဖါ။ ဟွံဂွံရော်တုန် ဂုဏ်မိသေင်ဟာ။ ဗှ်မဒးကၠင် ခြာဒင်စာ်မြာ။ ဗှ်ဇကုမွဲ ပ္ဍဲရညဝါ။ ဗှ်တိုန်မိဂၞဴ သြိုဟ်ရဴသ္ပာ်အာ။ ဇွောဝ်လင်ကၠင်ဟဳ လၞီဖဳဒွါ။ ဇၟောဝ်ဍာ်ရမတ် ဇွောဝ်ပေင်မတ်ၜါ။ ယာံလင်ဇွောဝ်ဟေင် ဒၞာဲဂှ်သေင်ဟာ။ ဗြဴသိုက္ခမာ ဂွံညာတ်အာပၠန်။
ညာတ်တြုံမုက်ချိုတ် ပ္ဍဲစိုတ်လ္ၚုလ္ၚန်။ ညာတ်တြုံယာံတဴ ကညာဗြဴပန်။ ပခိုင်စိုတ်ဟွံမာန် ဟိုတ်ဆာန်တြုံလောန်။ ဗန်ကံတြုံအဴ ယာံတဴသောန်န်။ ဟးတၠသ္ၚိ ကောမိကျာ်ဂန်။ ကောပယာံရ ကောပဝေါန်စန်။ ကောပလ္ၚုလ္ၚန် ကောပ္တန်စိုတ်ညိ။ လ္ပဒွိင်ဒွာဲ နာဲသ္ၚိကောမိ။ ကောပလ္ၚုလ္ၚန် ပူဗန်ဖိဖိ။ ကောလပဒှ် ယဲပူမှ်ညိ။ ပတ္ၜူမာဲစိ ဒမၠိပူမှဟ်။ ပိုဲညးပန်ကၠာ နွံတဴခါဂှ်။ ဒၞာဲနွံပၟိက်ရော စိုတ်ကောမဒှ်။ စိင်ဂၠုင်ဍုင်ခွာ ရာစိုတ်ကောသၟဟ်။ စိင်ချေံဇၟာပ်စွံ သၟိက်ဂွံလ္ၚဟ်။ ကောပဒိုက်စိုတ် ဂွံအိုတ်ဗွဲပြဟ်။ ထဝ်သြန်မတ်ဗၠဲ ယာတ်ပြဲတံဂှ်။ ကဵုကျိုင်အဵုဇိုတ် ဆစိုတ်ကောဒှ်။ ပိုဲဇိုန်ကဵုအိုတ် ပၟိက်စိုတ်ကောသၟဟ်။ ကောပပူမှဟ် ကောပဒှ်ဒဝိင်။   ။

ကောပစံင်တူ ပူဆာဘင်ဘိင်။ မိမပိုဲဂှ် ညးမဒှ်သၟိင်။ ပိုင်ကလော်ကိုပ် အလုမ်ဂြိုပ်ဂၞိင်။ ကောဂွံပသၟိင် ဂွံဒှ်သၟိင်ရ။ ကော်ဗြဴပန် ယာံပူဗန်ထ။ လှေံလှန်စရိုတ် ဟီုပၠောင်စိုတ်မ။ မိင်ပါင်ဗြဴရတ် ကၞောတ်ရုပ္ပ။ ညံင်ဇၟူဂွံမိင် က္ၜိင်ဥဒိုန်ရ။ ဇၟူသၠိင်စိုတ် သၟဟ်အမြိုတ္တ။ ကလေင်ဟွံမာန် ဋ္ဌာန်တၞံမူလ။ ဒးဇၟူပင်မှိင် ရှ်ကွိင်သဒ္ဒ။ နဲဗိုဂှ်ကၠာ ဥပ္ပမာဏ။ ဂကောံဇၟူဗြဴ တ္ၜူမာဲတဴရ။ ရမျာင်ဒေံဗြဴ တုပ်ရဴထဏ။ ဟီုပၠာံဗဇးပၠန် လှေံလှန်စိုတ်မ။ ရှ်ရမျာင်ကွိင် နာဲဂွံမိင်ပၠ။ သ္ဍိုက်မၠိုက်ဗြဴပန် စိုတ်တန်အာရ။ တုဲကလော်ဗြဴ လှေံလှန်စိုတ်မ။ နာဲဒကောင်ပိုန် ဒတိုန်ရုပ္ပ။ ဂကောံဗြဴပန် သၟဟ်န်စိတ္တ။ ဒ္ၚဳစဴအာရ ခဏဂှ်ကၠာ။   ။

အာစိုပ်လွဳမာန် ထာန်ကလော်ဗြဴကၠာ။ ကလော်ဂမၠိုင် ကၠုင်ဗိုင်သ္အဳဗ္ဂါ။ ဝေင်ဒုင်စေံဏေံ လှေံလှန်နာဲသာ။ သၟိင်ကလော်ပ္ညဳ ခါံသဳနာဲၜါ။ ခါံသဳတြုံဗြဴ ညာတ်တဴနာဲကၠာ။ ညံင်ကောန်အိိန်ဗၠာဲ စရာဲရုပ္ပါ။ သ္ဍိုက်မၠိုက်လောန်ထောန် ညံင်ကောန်ဂၞဴကၠာ။ သၞေံသၞဴ ကော်တဴဖဳဒွါ။ ပၠာံဗဇးအိုတ် စိုတ်နာဲတုဲမာ။ တုဲသၟိင်ကလော် မဇၞော်အညာ။ ကော်ဍိက်သ္ကံကၠာ သီုတွဳဝါရ။ ဗလိုပ်ဖုံနာဲ နာဲစဳရေင်ပၠ။ ကလော်ဗြဴဂှ် ဝုတ်ထပှ်ဂျ။ လေင်နုင်ဂၠဟ်ထဝ် ကျိုင်ကျဝ်ဗြံက်ဗြ။ ကဵုတုက်ဍာ်သၟတ် အနုတတ်တ။ အာတုက်ဍာ်တုဲ သၟုဲစဴလျလျ။ ကော်လ္ၚီပ္ညုင် ကၠုင်သဳကၠဳဂျ။ ဗလပ်ဖုံရ ခဏဂှ်ကၠာ။   ။

ကဵုနာဲကျိုင်စိ ဂ္ညိဂ္ညာတ်ကြိယျာ။ ကဵုနာဲကျိုင်ကျဝ် ဂ္ညိဂ္ညာတ်မှောဝ်ဇာ။ ယာတ်ဒိပ်လၟေင် ဖေင်ဒိပ်နာနာ။ လစိန်စရံက် ဂြင်ဗြံက်တဲၜါ။ ၝောံကိုတ်ကီုဟေင် သီုဗြကၞေင်ကၠာ။ ကၞေဟ်လက်ကြာပ် နာံဗျာပ်ညဳသာ။ နာဲဝက်သၞေက်ဆာဲ စလာဲက္တောဝ်ၜါ။ စလန်အဂၠဴ ဟုံဗော်တဴကၠာ။ ပ္ကဴဒၞာဲမဂေါဝ် ဂညိက္တောဝ်ၜါ။ ကျိုင်ကျဝ်တုဲအိုတ် ဟွံတသိုဟ်ခြာ။ လျးရုပ်ကဵုရတ် က္ၜတ်သြဴညဳသာ။ ညံင်ကောန်အိန်ဗၠာဲ စရာဲရုပ္ပါ။ ကောန်ဗြဴသၟိင်ပန် ရုပ္ပကညာ။ ဗၠိုင်ဖုံကျိုင်ကျဝ် ထဝ်သြန်နာနာ။ လစိန်စရံက် သီုလကံက်ဂွါ။ သၞေက်ထဝ်ဖေင်ထဝ် ယာတ်ထဝ်သခါ။ စလန်အဂၠဴ ဟုံဗော်တဴကၠာ။ ရုပ်သာ်ဗြဴပန် သၟဟ်န်သာဓာ။ ညံင်ကောန်ခၞောဝ် ညးသွဝ်ကေလာ။ ဂေါပ်ဂဝ်လောန်သန် ကောန်ဗြဴယက္ခာ။ သၟိင်ကလော်ရ ယက္ခရာဇာ။ ထပ်တဲကောန်ဟေင် ကဵုနာဲသေင်ဟာ။   ။

နာဲဒကောင်ပိုန် ဒတိုန်ရုပ္ပါ။ ဇိုန်ကဵုပသၟိင် သၞိင်ခန်လွာ။ ကောန်ကဵုဓမာန် ရေင်ကာန်သာဓာ။ တူဒေန်ထဝ်ဒြင် သၟဝ်ဗတင်ဇာ။ ကောံဂၞကျာ်ပန် သၟဟ်န်ညဳသာ။ ကမၠောန်သ္အဳဂၠက် မသက္ကုခြာ။ သ္ဍိုက်ဗြဴပန်သၟတ် သ္အဳဂၠက်တဴကၠာ။ ညံင်အိန်နာဲမြု ကဵုသုဇာတာ။ ညံင်သၟိင်ရာံဖျာ် ဂၞကျာ်သဳဒါ။ ညံင်ကုသကၠာ ပြဘာဝတဳ။ ရေင်ကာန်သၟဟ်န် ဂွံတန်မွဲဒၞဳ။ ဒေါဝ်ဂၠံင်ကျာ်သြဳ ဃောဗနဳက္ၜိုန်။ ကောန်ညးဒင်မာဲ နာဲဒကောင်ပိုန်။ ဒါန်တၞံဆတ္တဝ် ဟိုတ်ပ္တုဲလဝ်ဗိုန်။ ဗြဴပန်ညံင်ထဝ် ဂွံဒ္ၚောဝ်လၟိုန်။ ဂွံဒှ်သၟိင်ဓဝ် ဒေါဝ်ကသဝ်ပိုန်။ ကုသဵုတၞံဗိုန် မဇိုန်ကဵုကၠာ။ ဂွံဒှ်သၟိင်ဟေင် ရောင်ဟွံသေင်ဟာ။ ဂြိုပ်သာဲလေဲဂှ် ဟိုတ်ဒှ်ခန်လွာ။ သၟိင်ဓဝ်သာဲလေဲ သေဲသေဲဟီုအာ။ ဒယှ်လအိတ် ဇမ္ဗုဒိပ္ပါ။ စဵုကဵုလၟုဟ်ဂှ် ဒယှ်ပြာထာ။ ဟိုတ်ဒါန်တမၠာ ဂွံမြာလွာရောင်။   ။

သၟိင်ဓဝ်ဗြဴပန် ဂွံညန်မွဲတောင်။ မၞိဟ်ဂမၠိုင်ရောင် အခေါင်စဴအာ။ လဣနင်ဒဴ ထဴသီုရဲသာ။ ကၠေံလဝ်တာဲတုဲ ဍိုက်ဂၠုင်သၞုဲအာ။ ဂတးက္ဍိုပ်ဂၠုင် သရုင်ဂင်္ဂါ။ ကာလကၠုင်သၟတ် ဗၞတ်စှ်တ္ၚဲကၠာ။ ကာလမစဴ နုဘဴယက္ခာ။ ဂၠုင်ဂြိုပ်ဂမြိင် ဟွံသဍိင်ခြာ။ ညံင်ပဝန်ကံ ဒြိပ်ဂမြံအာ။ စိုပ်သၞေဟ်ကွာန်ကၠာ ခန်လွာဒင်မာဲ။ ညးဂမၠိုင်စိုပ် ဗဒိုပ်ဒၞာဲဝါဲ။ အိုဟ်တၟိုဟ်ဆာဲ နာဲဂၠုင်ကောန်ဂၠုင်။ ကောန်သမ္ဘာညး စှ်ေဒစးဒုင်။ မိပ်စိုတ်မှောဝ်ဇာ စှ်ေအာဒဵုဂၠုင်။ ညာတ်ညးစှ်ေဂၠုင် ဝေင်ဒုင်လၟိုန်။ မိနာဲဂေါဝ်ဇြုင် စှ်ေကၠုင်ဟွံဇြိုန်။ ရံင်ကောန်ဟွံညာတ် သမ္ၚာတ်သုံသိုန်။ ပရိုင်ကောန်ဗၠာဲ ယာဲဇုသၟာန်တိုန်။ ညိဟွံဂွံသွိုန် ကောန်သၟာန်တိုန်ကၠာ။   ။

ယွံနာဲဂၠုင်အဲ မပြဲပညာ။ ကောန်သ္ဍိုက်ယာဲ မူဒၞာဲမအာ။ မူဟိုတ်မွဲကၠာ ဒှ်အာရောမ။ ဟွံသေင်ဗြံဂၠုင် ဒေါဝ်ကြုင်စာ်ခၠ။ ဟွံသေင်အိုတ်ဒဲ ဒးဘဲကျာံက။ ဟွံသေင်လုပ်ဒွီု ဒီုပ္ဍဲဟေမ။ ဒးဘဲသ္ဂးဟာ ဇာဒိသိုင်ကၠ။ ဟွံသေင်တိုန်ဆု ဒတုံဒုဒ။ ယဝ်ချိုတ်အာကီု နာဲဟီုညိရ။ ညးမအာဂြိုပ်ဂျိ စိုပ်သ္ၚိအိုတ်ပၠ။ ကောန်အဲမွဲဂှ် သာ်ဒှ်ရောမ။ ဥပ္ပတိကီု ဟီုပြဟ်ညိရ။ သီုမနရာတ် သွါတ်ဟဒယ။ ထဴမိင်ပါင်ရ ပ္ဍဲခၞဂှ်ကၠာ။ ပရိုင်ဂှ်သွံ ဟီုတိုန်ဟွံညှာ။   ။

ယွံမိနာမ ပယျာံပိုဲသ္အာ။ ကောန်တၠအဲ မပြဲသာ်လွာ။ ဗာ်ဆုဒုန်ကိုင် လုပ်ဂြိုပ်တိတ်ဝါ။ ဟွံဒှ်ကာဆာဲ ကဵုမင်တာဲကၞာ။ လံပိုဲစဴစိုပ် နူဂြိုပ်ဂှ်မှာ။ ဗရုလလံင် စံင်ဒြဝ်ဓရာ။ ဇုက်စံင်ဇက်တိုန် တလိုန်ညှာညှာ။ ဒယှ်ေရဴဂါံ တိင်ကျာံသာယျာ။ နဇိုင်တက်ခဍေဝ် ရမျာင်တေဝ်ဏာ။ မိပ်ဇြိပ်လောန်အဴ နွံတဴရှ်သာ။ ဒေဝတဴကိုပ် ထာန်ဂြိုပ်ဇီုဖြာ။ မိင်ရမျာင်နာဲ အကာဲကြုတ်ဏာ။ ဟီုဇိုန်ရိုဟ်ထာန် ဆာန်ကၟိန်သာဓာ။ ပုင်သွအမာဲ ဍာ်သာဲသဂြာ။ ပေင်ထးပေင်သၠိုင် ဂၠိုင်သန်နာနာ။ ဂကောံဗြဴပန် သၟဟ်န်သာဓာ။ ဆာန်ကၟိန်ဗိုန်က္ညန် တန်မွဲသၞာ။ ပိုဲစဴနူဂြိုပ် ညန်ပိုဲစိုပ်ကၠာ။ ဒေဝတဴဗြဴပန် ဍေံကၠေံဗ္ဒန်အာ။ ပိုဲစိုပ်တာဲရော စဟာပ်ဟောဒြာ။ ညာတ်အမာဲဂှ် က္တဵုဒှ်သင်္ကာ။ ပ္ဍဲဂှ်ပိုဲပၠန် ချပ်တိုန်စောန်စာ။ ယးလုပ်ဂြိုပ်အဵု ညံင်ကဵုမအာ။ ပိုဲကလေင်ကၠုင်ကၠာ အောပ်မာဗ္ဒမံင်။   ။

ပိုဲဂွံညာတ်ကၠာ သိင်သာတိုန်ကၠံင်။ ပိုဲဟွံဂံင်မံင် ဖေက်ဒမံင်တဴ။ ဒၟံင်ဟွံဒးပ္ညုင် ဍိုက်ဂၠုင်ဒဴစဴ။ စိုပ်ဒေါဝ်က္ၜဳအဴ ဒှ်တဴဗြဲကျာ။ လဗိုတ်လဒု ဒိုဟ်ပန်ဂၠုအာ။ လပှ်ဖက်ဖါ ညံင်သာ်လွာပ္ကဴ။ ဂၠုင်ချဳသမြုပ် ဍာ်လုပ်သဴသဴ။ ဂၠုင်ဟွံအာဟေင် ကာလကလေင်စဴ။ ဇကုနာဲဆာဲ ကွာဲဒေဝတဴ။ တုဲပိုဲဂွံစဴ စိုပ်ကောန်ဗြဴရောင်။   ။

တဝှ်အိုတ်သီု ထဴဟီုညံင်စောင်။ ယာဲမမိင်ရောင် အခေါင်ကောန်ဗၠာဲ။ တိင်င်တက်သြိုဟ် ဟးဖျုန်ဂြိုဟ်ယာဲ။ အဵုဒကောင်ပိုန် ဒတိုန်စရာဲ။ အဵုထဝ်ကမု မဂၠုကောန်ဗၠာဲ။ အဵုထဝ်ပၞာဲ မဂေါဝ်ဆာဲလောန်။ အဵုဂၠုလစောန် နာဲကောန်ကမၠင်။ အဵုထိုက်သမ္ၚာ ဂၠုရာဇာဝင်။ အဵုကောန်ကမၠင် မိဒးကင်ဇတ်။ အဵုကောန်အသဝ် ရုပ်ထတ်ထမၞတ်။ အဵုဂဍောင်မတ် ကၞောတ်ဇြဟာန်။ အဵုထဝ်ပဏာဲ နာဲတလဒါန်။ မိအာန်တၞာန် လောန်လာန်သန်ကောန်။ တက်သြိုဟ်တိင်င် ဒဝိင်လောန်ထောန်။ ဣဝီုဖ္အောန်န် တမောဝ်လောန်ဗၞတ်။ တမ်ကံဗတိုဟ် ဖျုန်ဂြိုဟ်တတ်တတ်။ တိင်လောတ်စှ်ေဂွိုင် ဇိုင်က္ၜဳဂှ်သၟတ်။ ယဝီုတတ်တ် ဖတ်တ်ဝိုတ်သ္တင်။   ။

မိဇြဟာန်လောန် ဟိုတ်ဆာန်ကောန်က္ဍင်။ သီုမဇွောဝ်လင် ဝိုတ်သ္ၚဳသတင်အာ။ ညးဂမၠိုင်ပ္ညုင် ဒြေပ်ကၠုင်ဟောဒြာ။ ညးလ္ၚဵုဂှ်ပင် ကေတ်နင်ဍာ်ကၠာ။ ပၠဳစုတ်မုက်ဂှ် သမ္ၚုဟ်တိုန်အာ။ ဂွံတိုန်သတိကၠာ ဗၞုဟ်ဗှ်သၞာကောန်။ အဵုဣတယာဲ မဂေါဝ်ဆာဲလောန်။ ဂြိုဟ်ယာဲသောန်န် ယွံကောန်ကမၠင်။ အဵုထဝ်ကမု ဂၠုကွးသၟိင်သင်။ အဵုကောန်ကမၠင် ရုပ်ခၠင်စရိုတ်။ အဵုဂဍောင်မတ် ရုပ်ကၞောတ်စိုတ်။ အဵုထဝ်ပဏာဲ နာဲက္ဍိုင်ၝောံကိုတ်။ အဵုဒကောင်ဗိုတ် ရုပ်ၝောံကိုတ်ယာဲ။ မိဂၠိုင်လောမ်လာဲ ဂုဏ်နာဲရောင်ကောန်။   ။

အဵုဒကောင်ရတ် ရုပ်ဗတ်ညးသောန်။ မိမွဲစောန်လောန် ကောန်ုးစာ်ခၠ။ ဂလာန်ထဴကွေံ မိဟွံပ္တေဟ်စ။ မိဟွံညာတ်မ ယာဲချိုတ်ရကောန်။   ။

အဵုထဝ်ကမု ဂၠုမဂေါဝ်လောန်။ ဟွံစိုပ်ယာဲပၠန် ကောန်မှာရုပ္ပ။ မၞိဟ်ဂွံဒၟံင်ကောံ ကရောံဒေဝ။ ဂလာန်ထဴရ ညးပ္တေဟ်စဟာ။   ။

လဣနင်ဒဴ ယွံထဴနာသာ။ ဗတ်ဒှ်ကၠစ ဗက်ဇွဟောဒြာ။ ညးတီညာတ်သၟတ် ဒုဟ်ပြာကတ်အာ။ သာ်ဂှ်ဒးဟေင် ဗၠးဒုဟ်သေင်ဟာ။ ယဝ်ရညးမွဲ ယဲဒိုက်ချိုတ်အာ။ ဂွံယိုက်ဇွပၠန် စံင်ဒန်ဟောဒြာ။ ဂွံတီညာတ်ဟေင် ဗၠးဒုဟ်သေင်ဟာ။ ဗက်ဒးဒှ်ရ ဒမၠမတာ။ ညးၜုင်တက်ချိုတ် ဟိုတ်ကံတမၠာ။ ယိုက်ဇွစံင်ဒန် တီဇၟာပ်ခန်လွာ။ ဒှ်သာ်ဂှ်ဟေင် ဗၠးဒုဟ်သေင်ဟာ။ ကောန်အဲတုန်မာ အာဂကောံထဴ။ ညးဂမၠိုင်သ္အဳ သီုဖ္အိုတ်ဗၠးစ။ ကောန်အဲမွဲအဴ ဟွံစဴစိုပ်အဲ။ ပွထဴဂှ်ကီု ဟီုကဵုနဲကဲ။ ကၠုင်ဟီုကဵုအဲ အဲပ္တေဟ်ကီုဟာ။   ။

လဣနင်ဒဴ ယွံထဴနာဲသာ။ ကလော်ဂွံဏာ သာဓါလုမ်လ။ ဟွံချိုတ်သဘဴ ဂျိုင်နွံတဴရ။ နာဲပိုဲဟီုဂှ် ဟွံဒှ်စၟတ်ပၠ။ ညာတ်နမတ်ကွေံ အဲပ္တေဟ်ကီုရ။ ဂလာန်ဂှ်ကီု မိနာဲဟီုပၠ။ မိင်ဂလာန်ရ လဣနင်ဒဴ။ သာ်ဝွံတုန်ကီု ဟီုတိုန်ဆဴဆဴ။   ။

ယွံလေဝ်နာဲဗြဴ ဒှ်တဴသင်္ကာ။ အဲအာထ္ၜး ယးလဳပိုဲအာ။ ယာဲနာဲမိင်အဴ ဂလာန်ထဴကၠာ။ စဳရေင်ဇွောံမ သီုကသပါ။ နာဲဂၠုင်ကောန်ဂၠုင် ပ္ညုင်ကဵုဟွံခြာ။ ယးစှ်ေက္ဍိုက်ဂၠုင် တုင်င်တိတ်အာ။ ဒျာန်တ္ၚိုက်ကၠာ ဂိုင်အာဂြုုဂြု။ တ္ၚဲဗတံ ဂမြံထဥ။ တ္ၚိုက်စလဝင် ကဵုပါင်လဒု။ ပၚောံစနု အနုဂင်္ဂါ။ ထောံနူဂှ်ကၠာ အာဒၟံင်သေဲသေဲ။ တုဲဂွံအာစိုပ် ထာန်ဂြိုပ်သာဲလေဲ။ ဆုဒုန်သ္တပ်သ္တေင် ဟွံဗၠေင်ဍုတ်ဍေဲ။ ဆုဒုန်သာဲလေဲ နဲဗီုသေဲပၠ။ စိုပ်သၞေဟ်တုဲကၠာ တိုန်အာတာဲရ။ လဣနင်ဒဴ ထဴညာဏ်စဳခၠ။ ဟီုထ္ၜးရ ဒေသအရာ။   ။

ယွံမိနာဲမွဲ မပြဲသာ်လွာ။ မမဂေါဝ်ဆာဲ ကောန်နာဲဂှ်မာ။ ကဵုမင်တာဲဟေင် ဒၞာဲဝွံသေင်ဟာ။ ကာလပိုဲအဴ မစဴဂှ်မာ။ ဒၞာဲဏံမံင်တဴ တုဲပိုဲစဴအာ။ နာဲဗြဴကော်စံ သ္ၚံသ္ၚံညိကၠာ။ မိင်ရမျာင်မိ ကလုက်ညိဟာ။ မိနာဲတုန်မာ ခါညာတ်ဒၞာဲကောန်။ လ္ၚုလ္ၚန်လောန်ကာဲ ပ္ဍဲစိုတ်ယာဲလောန်။ မိဒးအိုတ်ဒဲ တ္ၚဲဝွံရကောန်။ လၞီယာဲလောန် သွံမကောန်ဗၠဲ။ တိင်တင်တက်သြိုဟ် သြဖျုန်ဂြိုဟ်ယာဲ။ အဵုထဝ်ပဏာဲ နာဲမဂေါဝ်လောန်။ အဵုဂၠုလစောန် ဟးကောန်ကမၠင်။ အဵုထိုက်စမ္ၚာ ဂၠုရာဇဝင်။ အဵုကောန်ကမၠင် မိဒးကင်ဇတ်။ အဵုကောန်အသဝ် ရုပ်ထဝ်ထမၞတ်။ အဵုဂဍောင်မတ် ကၞောတ်ရုပ္ပ။ မိကၠုင်စိုတ်တာဲ ဒမံင်နာဲရ။ ယာဲသၟိက်ညာတ်မ ကၠုင်ညိရကောန်။   ။
အဵုဣတယာဲ ရုပ်နာဲထဝ်သောန်။ ကေင်ဂွံမိင်ပၠန် ရမျာင်ကောန်ဗၠာဲ။ ဗှ်ယာဲမိင်ကၠာ ကျာ်ခရာနာဲ။ ဒွက်ဂိုန်ဂၠိုင်ဒၞာဲ ယာဲမိင်ဒမၠိ။ လၟုဟ်ယာဲကၠုင်စိုပ် သန္ထာန်ဂြိုပ်ဂျိ။ တိင်ကွာဲကဵုမိ ယာဲမိင်ညိကောန်။   ။

အဵုဣတဇု ဂၠုမဂေါဝ်လောန်။ ကွိင်ကွိုက်လစောန် ကောန်ဂၠုတိင်တ္ၜာဲ။ မိင်ကွိင်နာဲပၠန် စိုတ်ၜိုဟ်လောန်လာဲ။ လၟုဟ်ယာဲပၠန် ဂၠိုင်သန်လောံလာဲ။ ကၠုင်တိင်ကွာဲမိ ညိရကောန်ဗၠာဲ။   ။

အဵုဣတဇု မဂၠုထဝ်ပနာဲ။ ဟွံဂွံညာတ်နာဲ ယာဲဒးဟောံဇြ။ ဒဒိုက်ယာဲလောန် ကၠင်ကၠောန်ယဲသ။ မူမတုပ်ကၠာ ဥပ္ပမာဏ။ ညံင်သွးဒေါဝ်က္ၜဳ ဟဳဒၟံင်လျလျ။ ဟွံမွဲသၞေဟ်သြင် တံပြင်ညိည။ ဗီုက္ၜင်ထဝ်ရ ဟွံမွဲသၠယာ။ မဒးဟဳကြင် ပ္ဍဲဒေါဝ်ဂင်္ဂါ။ မိနဲဂှ်ကီု တုပ်ဗီုပမာ။ ညံင်ဂစေံမွဲ ဟွံမွဲသၞေင်ၜါ။ ဒးသ္ကုတ်အဟာ ညန်မာရဏ။ နာဲခြာနူမိ မိအိုတ်ခန္ဓ။ နဲဂစေံရ ဂိုင်ပပမာ။   ။

အဵုဣတယာဲ နာဲဍောင်စမ္ပာ။ ဒဒိုက်ယာဲလောန် သွံကောန်ထဝ်နှာ။ ညံင်လၟမွဲ လွပ်တဲအိုတ်အာ။ ဒေင်သၠင်လ္ၚာပ်လ္ၚာ ပူဆာလောံလာဲ။ ညံင်သၟိင်နာဲမွဲ လုပ်တဲလၟာဲ။ စံင်တူဇြေဟ်ဇြာဲ လၟာဲဂွံဏာမိနဲဂှ်ကီု တုပ်ဗီုပမာ။ ညံင်သရာဲကၠာ လွဟ်ဟွံဏာရ။ ညာတ်သတြုကွေံ ဒးဖျေံက္ဍိုပ်ဂျ။ ညံင်ဒိုက်ဂတ်သၟတ် ဒမၠုမတ်ၜါ။ အာကၠုင်ဟွံဒး ယာံကြးဖဳဒွါ။ ညံင်ရဲညးက္ၜင် ဗြံဒေါဝ်ဂင်္ဂါ။ ညံင်ဗီုတၞံတာ မပိုတ်အာတၞုင်။ ညံင်ဗီုကျာံကျာ အိုတ်အာဝင်ကြုင်။ ဆုအိုတ်တၞုင် ကြုင်အိုတ်ကၞောတ်။ ညံင်နဲဂှ်ကီု တုပ်ဗီုအဆတ်။ ဝေင်အာနူနာဲ ကောန်တြုံယာဲသၟတ်။ ညိဟွံပဗၞတ် ကောန်ပၞတ်ကဵုယာဲ။   ။

အဵုကောန်ဗၠာဲဗၠာဲဗိုတ် ဂၠု​ၝောံကိုတ်ယာဲ။ ဓဇန်လောန်ကာဲ ထောံယာဲရောကောန်။ အဵုဒကောင်ထဝ် ရုပ်အၚောဝ်လောန်။ အဵုဒကောင်ဗၠဲ နာဲမွဲလောန်စောန်။ အဵုဂၠုလစောန် ကောန်သ္ဍိုက်ယာဲ။ အဵုထဝ်ပနာဲ နာဲလမာဂၞဴ။ မိဖံင်ဖနံင် ကော်မံင်ကဴကဴ။ ပနာဲကၞပ်တဴ ရောကောန်ဂၞဴယာဲ။ ၜိုန်မိကော်ဂၠာဲ နာဲဟွံမိင်ပါင်။ ပသာ်နာဲဒှ် တဝှ်တြုံသာင်။ ဟွံမိင်ရမျာင် ပါင်ဣတယာဲ။ မိကၠုင်ကော်ဂၠာဲ ပနာဲကၞပ်စု။ ဟွံသေင်တိက်သၠိင် သမၞိင်တၞံဆု။ ဒွံဘဲသတြု သ္ဂးဟာဂၠုယာဲ။   ။

အဵုကြက်စလန် မဂၠုကောန်ဗၠာြ။ မပၞက်ကဵုယာဲ ဗ္ဒာဲကဵုတၞံဆု။ အာအောပ်တဴရ ဟွံပၠဇကု။ ဝေင်ကၠေံနူနာဲ ယာဲသုန်ဂြာံလ္ၚု။ ကလောဟွံမွဲ ယာဲမွဲဇကု။ ထေဲကဵုယာဲဇု သ္ဂးဟာဂၠုယာဲ။   ။

အဵုထိုက်စမ္ၚာ လၟဴဂၞဴယာဲ။ တ္ၚဲသဝ်လောန်ကာဲ မိဂၠာဲကော်တဴ။ ဂစေံကၠံမွဲ ပဝ်ဂၠောဲကမြဴ။ ပမကောန်ဂၞဴ ဟွံစဴကဵုယာဲ။ အဵုပၞာင်တိုင်ထဝ် လၟောဝ်ဂြိုဟ်ယာဲ။ စၞဇၟာပ်ဒၞာဲ ပယျတ်ဂၠာဲနင်။ နာဲဟွံမွဲရ စၞဇၟာပ်တင်။ ညးဂှ်ဂၠာဲနင် ရောကမၠံင်ယာဲ။ ကောန်ခြာနူယာဲ ယာဲဒးကၠင်ပြဵု။ စဴကၠုင်ကဵုယာဲ ရနာဲဍောင်မ္ၚဵု။ လၞီကၠင်ပြဵု ဟွံဟဲကဵုယာဲ။ အဵုစမ္ပာထဝ် ရုပ်မဂေါဝ်ဆာဲ။ ချိုတ်အာကဵုယာဲ ဟာကောန်ဗၠာဲမိ။ မိကော်စလာင် ဟွံမိင်ပါင်ညိ။ ချိုတ်အာကဵုမိ ဟာပဳတိယာဲ။   ။

အဵုထဝ်ကမု မဂၠုကောန်ဗၠာဲ။ ဂျိုင်ကဵုကဵုယာဲ ပနာဲဟွံစဴ။ မဂၠုဒၟံင်တဴ ဟွံစဴကဵုယာဲ။ စှ်ဂိတုဓဝ် မိတန်ဂဝ်နာဲ။ ဖေက်ကောန်လီုပ္ဍြ မိမင်မွဲဂၠာဲ။ မရိင်ကတင်ဆာဲ မိနာဲဟွံစ။ ဍာ်ၜိုဟ်လောန်အဴ ဍာ်ဂမ္တဴပၠ။ ဖနုင်ဗစး ပါဲၜးစဗ္ဗ။ ဗတံတ္ၚဲ မင်မွဲတဴရ။ မိဟွံဂံင်သ္ပ ဂၠဣတယာဲ။  ။ 

အဵုဍောင်ကသဝ် ပၞာင်တိုင်ထဝ်ယာဲ။ မိသၠးဂဝ်နာဲ ယာဲဒးသ္ဍိုက်ဂွ။ ဒေါဝ်ကလောဂမၠိုင် နာံရိုင်မသ။ မိဒုင်သ္ဍိုက်ဂွ ဂုဏ်မသေင်ဟာ။ စဲကဵုဒဂိတ် ဟွံကဵုကိတ်ကၠာ။ ဟုံဍာ်ဟုံမိတ် လအိတ်ဟွံခြာ။ မိဖျီုဖအအ် လဴလကာဖါ။ ဂုဏ်ဟွံဗှ်သၞာ တီဟာကောန်ဗၠာဲ။ တှ်အမြိုတ်သာဲ ယာဲဖျုင်ဗမဴ။ ဂိုင်သ္ၚိဍာ်သၟတ် ကၞေံပဿဴ။ ဖုံပၠဳလွဳနာဲ ယာဲကၠောန်ၜိုတ်တဴ။ တူဒဳမိတုန် ဒှ်ဖုန်ခေါဇါ တီဟာကောန်ဂၞဴ။ ဟွံစဴကဵုယာဲ အဵုဒကောင်ပိုန် ဒတိုန်စရာဲ။ တိသတီလောန်ကာဲ ဗ္ဒာဲကဵုဂုဏ်မိ။ တိဒးကြဳအာ ဟွံဂံင်ပါမြိ။ ဟွံစဴရော်ညိ ဂုဏ်မိရောနာဲ။   ။

မှာသမိတ်ဂင် ဇြိုဟ်က္ဍင်လောန်ဗၞတ်။ ဗ္ဒာဲကဵုဂုဏ်သၟတ် ပ္တောံၜတ်ဂုဏ်မိ။ မှာသၟိတ်ကၠာ ကျအာဒမၠိ။ ဗှ်ခၠေဝ်ဂုဏ်မိ စဴကၠုင်ညိနာဲ။ သိန္နရာတ်ပ္ညုင် ဇၞော်သၠုင်လောန်ကာဲ။ ပ္တောံၜတ်ဇၟာပ်ဒၞာဲ ဗ္ဒာဲကဵုဂုဏ်မိ။ သိန္နရာတ်ကၠာ ကျအာဒမၠိ။ ပဟွံခၠေဝ်ညိ ဂုဏ်မိရောနာဲ။ အဵုဂၠုဂေါဝ်လောန် ကောန်သ္ဍိုက်ယာဲ။ ဗတဳဂင်ဆာဲ ဗ္ဒာဲကဵုဂုဏ်မိ။ ဗတဳဂင်္ဂါ ကျာအာဒမၠိ။ ဟွံစဴခၠေဝ်ညိ ဂုဏ်မိရောနာဲ။   ။

အဵုဒကောင်ပိုန် ထဝ်ဖ္ဍိုက်ယာဲ။ ဂစေံဇၟာပ်နာဲ ဟွံသာဲနူကောန်။ မိကဵုကောန်ဗၠာဲ ဒးသာဲလောန်စောန်။ မူဘဝကောန် ရောထဝ်သောန်ယာဲ။ အဵုဒကောင်ပိုန် ဒတိုန်စရာဲ။ ဆဵုဂၠုဂေါဝ်ဆာဲ နာဲထိုက်စမ္ၚာ။ ဂစေံပြဝါ ညိဟွံခြာသာဲ။ မူဘဝတၞံ ကံမိဂၠိုင်ဒၞာဲ။ ကောန်ဒးခြာယာဲ ကံယာဲသ္ဂးဟာ။   ။

ကြဝိတ်ဟွံဂြဴ ကွဴသာရိကာ။ ရိုဟ်တ္ၚဲဂြဴကၠာ သန်ၛာသဝ်တ္ၚဲ။ တ္ၚဲဂွံသ္ၚိတ်သ္ၚဲ မွဲဟွံဂြဴကၠာ။ မူကံတူယဲ ညံင်အဲကီုဟာ။ ဟးတ္ၚေက်ထဝ်ဗၠာဲ နာဲယာန်သၞေင်ၜါ။ စိုပ်ဃောသန်ၛာ ဟွံဂွံခြာဒွီု။ သဝ်တ္ၚဲဒှ်ဝွံ မွဲဟွံဗြုရ။ မၞးတံစိုတ်လီု ဗီုအဲကီုဟာ။   ။

ဟးစာင်ဍေဝ်ဂြိုပ် စိုပ်ဃောသန်ၛာ။ လရိုက်သၞေင်ၜါ ကြာထောက်စလာင်။ ထောံကၠေံပဏာင် အာဂြိုပ်သ္အာင်ဟာ။   ။

ဟးမြာ်ထဝ်ဗၠာဲ နာဲသတ်ဇိုင်ၜါ။ စိုပ်ဃောသန်ၛာ ပြာထော်စလာင်။ တ္ၚဲဝွံကၞပ်သၠိင် မွဲဟွံမိင်ပါင်။ ထောံကၠေံပဏာင် အာဂြိုသ္အာင်ဟ။   ။

ဂစေံလိုက်ထောဝ် ဗြုကြဵုမှောဝ်ဇာ၊ မာတ်အဲဗြဴကၠာ ကောန်ဒးခြာဒွီ၊ နာဲတံနွံရော ကလောစိုန်သ္ကီု၊ မိပ်စိုတ်ဂြီုဂြီု ကော်ကြီုသ္ဂးဟာ။   ။

တြုံဂေါဝ်ဗြဴဂံက် နာဲဗြုချံက်ချာ၊ မာတ်အဲဗြဴကၠာ ကောန်ခြာအာတွဵု၊ အဲကၠုင်ယာဲဂၠာဲ စိုပ်နာဲတံအဵု၊ နာဲပစရဵု ဗြုကြဵုဂြိုင်ဟာ။   ။

ခနေင်စံက်စာင် ထာက်ကံကြဵုဇာ၊ မာတ်အဲဗြဴကၠာ ကောန်ခြာတၟံ၊ အဲကၠုင်ယာံကော် ထာန်ဗော်နာဲတံ၊ မိပ်စိုတ်ဆံလံ တုဲတာန်ကံဟာ။   ။

အဵုထိုင်စမ္ၚာ မိဖဳဒွါကောန်၊ ယာဲတြုံဂုဏ်ကောန် ကၠင်ကၠောန်ဖိဖိ၊ ဍာ်ရမတ်ယာဲ ဇွောဝ်ဆာဲဒမၠိ၊ စဴကၠုင်ကဵုမိ ညိရလေဝ်ကောန်၊ ဟသေင်တမၠာ မိဂြိုဟ်စာလောန်၊ မတူဖျာ်ပၠန် ကောန်တ္ၚေက်သ္ဂးဟာ၊ ဗွဲတၟေင်သာ် ဖျာ်သာရိကာ၊ ဘဝတမ္ၚာ ဒးယာဲဟာကောန်။   ။

မိကြင်ကၠုင်စိုပ် ဒေါဝ်ဂြိုပ်စောန်လောန်၊ သၟိက်ဂွံညာတ်ကောန် ယာံဒက်ဒေါန်ကွာဲ၊ နာဲဟွံပၠမုက် ပနုက်ဟီုယာဲ၊ မိဟွံညာတ်နာဲ ယာဲချိုတ်ရောင်ကောန်။   ။

အဵုဂၠုသာ်ပ္ကဴ ညံင်စဴရကောန်၊ မိမွဲစောန်လောန် ကောန်ဒးခြာသာဲ၊ မိကၠုင်ဂၠာဲသွံ ဟွံဂွံညာတ်နာဲ၊ ဂၠုထဝ်ပဏာဲ ယာဲချိုတ်ရောင်ကောန်။   ။

ဒေါဝ်ဂြိုပ်ဒမျိ မိကၠုင်ဂၠာဲကောန်၊ မိယာဲဒက်ဒေါန် ကဵုကောန်တြုံမွဲ၊ မိဒးခြာဒင် ကြင်ဒၟံင်တူယဲ၊ ယာဲချိုတ်မွဲတဲ တ္ၚဲဝွံရကောန်။   ။

အဵုဂၠုဂေါဝ်ဇြုင် စဴကၠုင်ရကောန်၊ ဒေဝတဴပန် လှေံလှန်လဝ်နာဲ၊ ဂွံမိတ်မဆာန် ဇြဟာန်တ္ၜူမာဲ၊ မဂၠုကောန်ဗၠာဲ ဝိုတ်ယာဲဟာကောန်။   ။

အဵုဒကောင်ဗၠဲ မိမွဲစောန်လောန်၊ သ္ဍိုက်ယာဲလောန် ဗှ်ကောန်ဂၠုမွဲ၊ မဂၠုဟွံတီ ညံင်လၞီအဲ၊ မိချိုတ်အိုတ်ဒဲ ပြဲသန်ရကောန်။   ။

အဵုဒကောင်ဗိုတ် ရုပ်ၝောံကိုတ်လောန်၊ လေပ်ကွတ်စိစောန် လောန်ဋ္ဌာန်ယဲသ၊ ဗှ်ကောန်ဒးသာဲ မူယာဲမံင်ပ၊ ယာဲအိုတ်ဂန္ဓ ပြဲသန်ရောင်ကောန်။   ။

ပၟတ်လင်ကဝ် ဇၞော်မောဝ်လောန်ကာဲ၊ ဗြဲဇၞော်ဂူဆာဲ လင်ကဝ်ဆာဲပၠိုတ်၊ ဗှ်ကောန်ဒးသာဲ စိုတ်ယာဲဟွံဝိုတ်၊ လေင်ကဝ်စရိုတ် တီပၠိုတ်ရောကောန်။   ။

အဵုက္ၜင်ထဝ်ယာဲ ရုပ်ဂေါဝ်ဆာဲလောန်၊ က္ၜင်လီုမွဲတန် သာံပါန်ပၠန်စိုပ်၊ နာဲဒကောင်ဗၠာဲ သာဲနူဗဒိုပ်၊ က္ၜင်ထတ်ယာဲကိုပ် ဟွံစိုပ်ရကောန်။   ။

ဂိမှန်ဗဒိုပ် ဂြိုပ်တူလောန်ထောန်၊ ဇွဂၞိင်အိုတ်ပၠန် ပၟတ်ခၠန်ပၠိုတ်။ ဗှ်ကောန်အသဝ် ရုပ်ထဝ်လကိုတ်၊ လ္ၚပၟတ်စိုတ် တီပၠိုတ်ရောကောန်။   ။

အဵုဒကောင်ပိုန် ရုပ်ကွိုန်လစောန်၊ လၞီယာဲလောန် ဗှ်ကောန်သော်က္ဍိုပ်၊ ဗှ်ကောန်ခြာသာဲ လၞီယာဲကြိုင်၊ မူကာလကိုပ် စိုပ်ယာဲရောကောန်။   ။

သုကညာဗြဴ ကော်တဴသောန်န်၊ လစောန်လၞောန် အဵုဂၠုကောန်ဗၠာဲ၊ မိကော်စလာင် ဟွံမိင်ပါင်နာဲ၊ ဓဇန်ကဵုယာဲ လောန်ကာဲသွံကောန်။   ။

အဵုလၟာဂၞဴ ညံင်စဴရကောန်၊ ဒိုဟ်ဒးကၠဗြန် ဗြုပၠန်ကဵုယာဲ၊ မိကော်စလာင် ဟွံမိင်ပါင်နာဲ၊ ဓဇန်လောန်ကာဲ ကဵုယာဲသွံကောန်။   ။

အဵုဂၠုဍောင်ပ္ကဴ ညံင်စဴရကောန်၊ မိမွဲစောန်လောန် ကၠင်ကၠောန်ယဲသ၊ နာဲလသာလဝ် လင်ဇွောဝ်ဟောံဇြ၊ မိအိုတ်ဂန္ဓ ဂုဏ်နာဲရကောန်။   ။

အဵုဒကောင်ထဝ် ရုပ်အၚောဝ်သောန်၊ သိက်နာဲဓဇန် ဟွံပၠန်ကဵုမိ၊ မိကော်စလာင် ရမျာင်ဖိဖိ၊ ဟွံကလုက်ညိ ကဵုမိရောကောန်။   ။

သုကညာဗြဴ ယာံတဴသောန်န်၊ ယာံကြင်အာပၠန် ဗက်ကော်ကောန်ဗၠာဲ၊ ကွာ်အာသ္ၚံက်က် ဒိုဟ်ဗၟံက်တာဲ၊ ကြင်အာကော်ဂၠာဲ ယာံဂၠာဲကောန်ဂၞဴ၊ ဇၞတ်မကြင်အာ ကော်အာကဴကဴ၊ ဒဵုဆိုက်တၞံဇြဲ သကဲဂှ်အဴ၊ လစောန်လၞောန် ယာံဒက်ဒေါန်တဴ၊ သၟိင်ဓဝ်နာဲမည် တၠနန်ပ္ကဴ၊ မိင်ပါင်မိဂၞဴ ရဴဂတဝ်သာဲ၊ မိင်ပါင်မိသွံ ဟွံဂွံဟိုတ်မာဲ၊ ဒၚဳကလုက်ကွာဲ အဴအဴယာဲဇု၊ အဲဍိက်နွံသ္ကဲ ပ္ဍဲလွဳမာန်ဆု၊ ဒုင်ပါင်လဒု ဇကုဟွံညာတ်၊ မိမိင်ပါင်ကောန် လၞီသောန်ကၞာတ်၊ မိဟွံဂွံညာတ် သမ္ၚာတ်စိုတ်ယာဲ၊ အဵုထဝ်ပဏာဲ ကောန်ဗၠာဲဇြဟာန်၊ မိကၠုင်စိုပ်မ ဒုက္ခဂိက္တာန်၊ ဒေါဝ်က္ၜဳကထံင် ဂင်ခဏံင်ဟာန်၊ ဒေါဝ်ဂြိုပ်ဂမျိ ဒေါဝ်ဗယိဗြာန်။ ဒဒိုက်ဂိကတာန် ဟိုတ်မိဆာန်နာဲ။   ။

မိကၠုင်စိုပ်ရ ယွံဣတယာဲ၊ စှ်ေမိကၠုင်မိ ညိရကောန်ဗၠာဲ၊ မိဝွံညာတ်နာဲ လၞီယာဲမဟဲ၊ လၟုဟ်ဝွံသၟတ် ဝါကၞောတ်တဲ၊ ယာဲဗဵုနာဲမွဲ ဒဵုဖဲညိကေါန်။   ။

အဵုဣတဇု ဂၠုမဂေါဝ်လောန်၊ ညံင်စဴညိကောန် ဖဴမိပၠန်ရ၊ ဒေါဝ်ဂြိုပ်လ္ၚု စဏုကၟီကၠ၊ မူနာဲမံင်ပ စဴကၠုင်ရကောန်။   ။

သၟိင်ဗၠာဲမိင်ကီု ဟီုကဵုမိပၠန်၊ ယွံမိဇြဟာန် ကောန်ဆာဲယာဲလောန်၊ သၟိက်စဴလောန်ထောန် ကောန်ဗၠာဲဇြဟာန်၊ ဂွံသ္ဍိုက်ရေင်ကာန် ဆာန်ကၟိန်လေင်လ၊ ဒေါဝ်ကသဝ်နန် ဂွံညန်ဒးရး၊ ဆဂှ်ဟွံသေင် တၟေင်မူရဴဂး၊ သၟိင်ဣန်နာဲညး ဇၞော်ကၠးအညာ၊ ပ္တုဲလဝ်ဒါန်အဵု ကဵုသုဇာတာ၊ ဒ္စါံလက်ဗၠန် ကဵုပန်ကိုတ်ကၠာ၊ ဇမ္ၚောဲဂှ်ရော ဗၞတ်ယောဇနာ၊ ၜိုန်တဴသ္ၚောဲထာန် ဂွံဆာန်သာဓာ၊ ဂွံသ္ဍိုက်ရေင်ကာန် မွဲဟာန်မွဲသၞာ၊ ညံင်သုဓနု နာဲမြုပန်စာ၊ ကောန်ခၞောဝ်ကၠာ မိဏံင်ခရဳ၊ မသုန်ကၠံမှာ ယောဇနာပ္ညဳ၊ ဟိုတ်နူဒါန်ပၠန် ဂွံညန်မွဲဒၞဳ၊ စန္ဒဝတဳ ပ္ညဳကလော်ဗြဴ၊ သတ္တဓနု နာဲမြုဍောင်ပ္ကဴ၊ ကောံကလော်ဗြဴ နှဴရဴရေင်ကာန်၊ ညးမဟီုဂၠာဲ စလာဲနိဒါန်၊ ဟိုတ်ပ္တုဲလဝ်ဒါန် ဒါန်ဂှ်စဳရေင်၊ ပိုဲဍိက်တုန်ကီု တုပ်ဗီုဂှ်ဟေင်၊ ဒါန်တမၠာပြေင် စဳရေင်ပိုဲအဴ။   ။

ဒါန်ဒှ်ယုတ္တိ စၟတ်ရောင်မိဂၞဴ၊ ပ္ဍဲမိဂှ်ဗျိင် မိင်ပါင်ကောန်အဴ၊ ညံင်ရမျာင်ကွဴ ရဴရှ်အမြိုတ်၊ စိုတ်ဍိုန်အာဟေင် ဟွံဗၠေင်တသိုက်၊ ရမျာင်ကေါန်လွုဲ မိင်တုဲလုပ်စိုတ်၊ ညံင်ရှ်အမြိုတ် မိင်စိုတ်ဍိုန်အာ၊ မိမဂေါဝ်ဆာဲ နာဲသုကညာ၊ ဒၚဳဟီုတိုန်ဟေင် ကဵုနာဲသေင်ဟာ။   ။

ယွံဣတယာဲ ကောန်ဗၠာဲထင်ဏှာ၊ ရမျာင်နာဲကၠာ ခါမိင်ပါင်က္ညန်၊ ဒဒှ်ဟွံချိုတ် နာဲဟွံအိုတ်သ္ကန်၊ ယာဲဂွံပ္တေဟ်ပၠန် ဗိုန်က္ညန်တုဲရ၊ ဇကုနာဲမ ပၠညိကောန်ဗၠာဲ၊ မိသၟိက်ဗဵုဒၚောဝ် ရုပ်ထဝ်ပဏာဲ၊ စိုတ်မိဟဲရ လေဣတယာဲ။   ။

မိင်ရမျာင်မိ မဂ္ညိစရာဲ၊ တုဲသၟိင်ဓဝ်ဗၠာဲ ဟီုကဵုယာဲပၠန်၊ ဂုဏ်ဇၞော်ပြဲဂၠိ ယွံမိကျာ်ဂန်၊ ဇကုအဲပၠန် ဇြိုင်သန်ဂွံညာတ်၊ ညးဟွံကဵုညာတ် ဂွံညာတ်ဇြိုင်လောန်။   ။

မိင်ရမျာင်ကောန် ဟီုပၠန်မွဲတန်၊ ယွံမကောန်ဂၠု ဣတဇုအဲ၊ ဇကုနာဲကၞာတ် ဟွံညာတ်မွဲတဲ၊ တၞးဇိုင်ကီု သီုတၞးတဲ၊ မိဂွံညာတ်ညိ ရောင်စိုတ်မိဟဲ။   ။

မိင်ရမျာင်ယာဲ နာဲဒကောင်ဗၠဲ၊ တၞးဇိုင်တၞးတဲ ညံင်နဲဂၠးထဝ်၊ ထ္ၜးကဵုယာဲ နာဲဍောင်အသဝ်၊ ဇိုင်တဲသၟိင်ဓဝ် မိညာတ်လဝ်ရ၊ ယွံဣတယာဲ နာဲကောန်တၠ၊ ဂအဟ်အဲကီု သီုကဵုဗြဴပန်၊ ယာဲသ္ဂောံညာတ်ညိ ရောင်မိစိုတ်တန်၊ ဂအဟ်ဗြဴပန် ဟီုပၠန်မွဲတဲ။   ။

ယွံခါံသဳဗြဴ မိဂၞဴမပြဲ၊ ဇကုဇိုင်တဲ မိအဲဟွံညာတ်၊ ဆသော်ပိုဲသ္အး ပိုဲထ္ၜးကၞာတ်၊ ပိုဲကဵုမိညာတ် ခပ်ပြာတ်ဒဒှ်၊ ဒေဝဗြဴပန် သီုပန်ဟီုတွံ၊ သော်ဗီုကၠေင်သွဟ် ဗစဳမြဟ်ဆာဲ၊ တၠာဲဖျေံသၟတ် ဗၞတ်ပန်ဟတ်ဆာဲ၊ ဗြဴပန်မ္ဂး သှ်ထ္ၜးပၠာဲ၊ မောဝ်ပ္ဍးတၟာဲ အမြာဲဂန္ဓာ၊ မုဟ်သော်ဗစဳ သၟဟ်န်ညဳသာ၊ ခါံသဳဗြဴကၠာ ဂွံညာတ်ခါဂှ်၊ အိုဟ်တၟိုဟ်စိုတ် စရိုတ်ဟဲပြဟ်၊ မိကဵုကောန်ဂှ် ဟီုဇီုသှ်ၛာဲ၊ ဂအဟ်ပန်ကီု သၟဟ်န်ဟီုဂၠာဲ၊ အရေဝ်ဝတ်လိုက် သၟာန်သၟုက်ဂၠိုက်ဂၠာဲ၊ ဟီုဇီုသှ်ၛာဲ သၟိင်ဗၠာဲကျာ်သြဳ။   ။

ဂအဟ်ဗြဴပန် သၟဟ်န်အိန်ရဳ၊ စဳရေင်ဗိုန်ဇၟံ ကလံခါံသဳ၊ ကလံသာဲရ ဇၟာပ်သဗ္ဗဇဳ၊ သၠိုင်ထဝ်သၠိုင်သြန် တ္ၜန်တ္ၜောဲတဝဳ၊ ဖေဝ်ထဝ်ယာတ်ထဝ် ကေတ်နင်ဗဝ်သ္အဳ၊ ပ္ကဴဇဗၠုရ ပၞာင်ဗကဇဳ၊ ကလံခါံသဳ ဒ္ၚဳဒ္ၚဳဟီုတဴ။   ။
ယွံညးပြဲညိ မိခါံသဳဗြဴ၊ ဒုဟ်အတိက်အဴ တဴအနာဂတ်၊ ပစ္စုပန်ကၠာ ဒုဟ်နွံပြာကတ်၊ ပိုဲဍိက်ညးပန် သီုပန်အဆတ်၊ ဒုဟ်ဇၞော်ဒုဟ်သွတ် အဆတ်သဘဴ၊ ပိုဲဍိက်မံင်ဂြံ ကလံရအဴ၊ ဝွံဂအဟ်ဗြဴ ဒေဝတဴပန်၊ ကလံခါံသဳ ဖဳဒွါတဴပၠန်၊ မမဂေါဝ်ဆာဲ သၟိင်ဓဝ်နာဲမညိ၊ ကလံမိပၠန် သီုဂန္ဓနာ။   ။

ယွံမိကျာ်ဂန် ဒုဟ်ပၠန်ဇၟာပ်ရာ၊ အတိက်နာဂတ် ပစ္စုပန္နာ၊ ကာယဒွါကီု သီုဝါစဳဒွါ၊ မနောဒွါဂ္ညိ သီုပိပြကာ၊ ကေါန်ကလံကွာဲ ဒုဟ်ကဵုပါဲအာ၊ ဂုဏ်မိဂၠိုင်စွံ ကဵုကောန်ဂွံမြာ၊ သာ်ဝွံသၟိင်ဗၠာဲ ကလံယာဲကၠာ၊ ကလံတုဲမာ ခါဂှ်သၟိင်ဗၠာဲ၊ ဂၠိက်ယာတ်ဂၠိုင်သန် ထဝ်သြန်ဇၟာပ်ဒၞာဲ၊ ဗဝ်သ္အဝ်ကဵုယာဲ သ္ပတၟာဲဟေင်၊ ဇိုန်ကဵုယာဲရ သဗ္ဗတၟေင်င်၊ ကဵုတုဲဒှ်ဟေင် ပရေင်လိုက်ဗာ၊ ဂကန်ဖျန်ကီု ဟီုဇီုတုဲကၠာ၊ ကေါန်ဂကန်ပ္ညဳ ကဵုမိဖဳဒွါ၊ မိင်ဂကန်ကောန် ဂၠိုင်သန်အရာ၊ ဂကန်ဖျန်သၟဟ် တုဲဒှ်အိုတ်မာ၊ မိသၟိင်ဓဝ်ကၠာ က္တဵုစဴအာရ။   ။

ကွာ်ကလေင်ကၠုင် စှ်ေက္ဍိုက်ဂၠုင်ပၠ၊ ပ္ဍဲဂၠုင်တေံဂှ် မဒှ်ဒေသ၊ ကြဳဇှ်ကလော် မဇၞော်တေဇ၊ အမာဲပေင်ဂၠုင် ပုင်သွပေင်န၊ ကဖျုန်ဗြာတ်က္ၜဴ ပေင်တဴဗဝ်ရ၊ ဇဗၠုပေင်ဂၠက် လက်ဖက်ပေင်န၊ စလန်အဂၠဴ ပ္ကဴသဴသဗ္ဗ၊ တ္ၜန်တ္ၜောဲတဴရ ဇၟာပ်သဗ္ဗဇဳ။   ။

ကလော်ဂမၠိုင် ရိုင်င်သ္အဳသ္အဳ၊ ကၠုင်ကောံဒၟံင်ပၠန် တ္ၜန်တ္ၜောဲတဝဳ၊ ပလံင်ဖျေံရ ပေင်ဂျဇိုင်က္ၜဳ၊ မိင်သၟိင်ဓဝ်ရ တၠကျာ်သြဳ၊ နာဲဂၠုင်ကောန်ဂၠုင် က္ဍိုက်ဂၠုင်တဝဳ၊ လ္ၚောဝ်ရတ်ပိ မိမခါံသဳ၊ ဒေဝတဴဂြိုပ် က္ဍိုပ်တၟံကျာ်သြဳ၊ ကလံဗဇဴ ဒေဝတဴက္ၜဳ၊ ဂဇံတပ်သ္တေင် ဒၟံင်ရေင်တဝဳ၊ ချူသၞေဝ်ဟွံရပ် ဒၟံင်ကၞပ်သ္ၚဳ၊ ကြဳဇှ်ကလော် မဇၞော်ကျာ်သြဳ၊ ဂၠုင်ဂြိုပ်သဲဟာန် ထာန်အဒေါဝ်က္ၜဳ၊ ညးဂမၠိုင်ကၞောတ် ညာတ်ဂၠုင်ဒြိပ်ပ္ညဳ၊ မိပ်စိုတ်စရိုတ် အဵုဇိုတ်ကၠင်ဟဳ၊ လ္ၚဵုဂှ်လှ်ေ ဒယှ်ေသဳသဳ၊ လ္ၚဵုတက်တဲ ဂြီုဂြီုပ္ဍဲက္ၜဳ၊ သၟိင်ဓဝ်နာဲမည် ကော်ဂကန်ပ္ညဳ၊ အာရမိအဲ မပြဲကျာ်သြဳ၊ မိသၟိင်ဓဝ်ပ္ညဳ ဒ္ၚဳကော်ဂကန်၊ မံင်ရကောန်ဗၠာဲ အဵုနာဲဂေါဝ်လောန်၊ အဵုရုပ်လစောန် ကောန်သ္ဍိုက်ယာဲ၊ အဵုဣတဇု ဂၠုထဝ်ပဏာဲ၊ ဒးခြာနူနာဲ ယာဲအာရကောန်။   ။

မိင်ရမျာင်ယာဲ သၟိင်ဓဝ်နာဲမည်၊ စၟဳတဴပၠန် သၟန်သြန်က္ၜဳ၊ မိသၟိင်ဓဝ်ဗၠာဲ သာဲအာဒ္ၚဳဒ္ၚဳ၊ ညာတ်မိသ္ၚောဲက္ဍင် စိုတ်မကၠင်ဟဳ၊ လၞီလောန်ဗၞတ် ဍာ်ရမတ်နှဳ၊ နူဂၠံမတ်ၜါ ပြဟ်အာပြဳပြဳ၊ လံအာသ္ၚောဲအာ အကြာဇၟောပ်က္ၜဳ၊ သၟိင်ဓဝ်အဏံ ဂဇံစမဳ၊ ထာန်ဂှ်မေခုံ ဒုင်ယၟုက္ၜဳ၊ ပါင်ဂၠံစမဳ ခုတ်ပ္ညဳလဝ်။   ။

လၟုဟ်ဟီုမံင် ပါင်လံင်ဆတ္တဝ်၊ ဒဵုကဵုလၟုဟ်အဴ ဒှ်တဴအသဝ်၊ မာတ်သၟိင်ဓဝ်ဗၠာဲ ဆာန်မိကာကဝိ၊ သၟိင်စၟဳတဴ မိဂၞဴဆတ္တဝ်၊ စၟဳဟွံညာတ် သြိုဟ်သဗာတ်သ္အဝ်၊ လၞီကာဲကဝ် လင်ဇွောဝ်ဟောံဇြ၊ သမ်အိက်သမ်အဝ် ရမတ်ဇွောဝ်ပၠ၊ ဗှ်တိုန်မိရ သီုထသပါ၊ ဒဒှ်မိဆာန် ဇြဟာန်မေတ္တာ၊ ဒဒှ်လွဳလဝ် ကောန်ဂၠုထဝ်နှာ၊ဒဒှ်ဖုံပၠဳ မိလွဳပရာ၊ ဖရာဲမိသ္ဍိုက် ယိုက်ဒိုက်ဖဳဒွါ၊ ထွာဲမိတုန် ဒှ်ဖုန်သၞာ၊ သေင်မိဗလဲ ဂေက်ဂြဲဟွံညာ၊ ကျာ်ဂန်လွဳလဝ် စဵုဇၞော်မောဝ်အာ၊ မိကျာ်ဂန်အဲ ဂုဏ်ဇၞော်ပြဲဖါ၊ ဟွံဂွံရော်တုန် ဂုဏ်မိသေင်ဟာ၊ ဗှ်မဒးကၠင် ခြာဒင်စာ်ခြာ၊ ဗှ်ဇကုမွဲ ပ္ဍဲရညဝါ၊ ဗှ်တိုန်မိဂၞဴ သြိုဟ်ရဴပါ်အာ၊  ဇွောဝ်လင်ကၠင်ဟဳ လၞီဖဳဒွါ၊ ရမတ်ဇွောဝ်ဍေင် ပေင်သြိုဟ်သပါ၊ ယာံဇွောဝ်တဴဟေင် ဒၞာဲဂှ်သေင်ဟာ။   ။

ဗြဴသိုက္ခမာ ဝုတ်ကညာပန်၊ ညာတ်မုက်တြုံချိုတ် ပ္ဍဲစိုတ်လ္ၚုလ္ၚန်၊ ညာတ်တြုံယာံတဴ ကညာဗြဴပန်၊ ပခိုင်ဟွံမာန် ဟိုတ်ဆာန်တြုံလောန်၊ ဗန်ကံတြုံအဴ ယာံတဴသောန်န်၊ ဟးတၠသ္ၚိ ကောမိကျာ်ဂန်၊ ကောပယာံရ ကောပဝေါန်စန်၊ ကောန်ပလ္ၚုလ္ၚန် ပ္တန်စိုတ်ညိကၠာ၊ ယွံကောသၟိင်ဓဝ် ဒကောင်ထဝ်နှာ၊ ယွံတၠသ္ၚိ မဂ္ညိပညာ၊ ကောပစံင်တူ ကောပပူဆာ၊ ညံင်ပိုဲစဴအာ လွဳမာန်ကၠာရ၊ ဗြဴပန်ကော်ဖျဴ တြုံသ္ဍဴတေဇ၊ ကလော်ဂမၠိုင် ရိုင်င်လျလျ၊ ဗက်စဴအာရ တြုံတၠလွဳ၊ စဴစိုပ်ဒေန်ဟာန် လွဳမာန်ကျာ်သြဳ၊ ဂကောံဗြဴပန် သၟဟ်န်မွဲဒၞဳ၊ ပ္ဍဲဒေန်ကျာ်သြဳ သၟဟ်န်ညဳသာ၊ ခဍံက်လဗိင် သၠိင်မွဲသၞာ၊ စဵုလၟုဟ်ကၠာ ပြာကတ်ကၠုင်ကၠေဲ၊ ဟီုတဴဆတ္တဝ် သၟိင်ဓဝ်သာဲလေဲ၊ ဒယှ်ေသေဲသေဲ သၟိင်သာဲလေဲတုန်။   ။

သၟိင်ဓဝ်စဴကၞာတ် ပြာသာတ်နွံဂုဏ်၊ မိသၟိင်ဓဝ်တုန် ဂုဏ်ဒေဝတဴ၊ ဂၠုင်ဒြိပ်သွိင် ဟွံထဍိင်တဴ၊ ညံင်ပဝန်ကံ ဒြိပ်ဂမြံစဴ၊ ဇြဳဇှ်ဒေဝတဴ ရဴပရှ်ကျာ၊ တုဲစိုပ်သၞေဟ်ဟေင် ဗဒိုပ်သေင်ဟာ၊ စိုပ်ကွာန်ဒင်မာဲ ယာဲသၟိင်ဓဝ်မှာ၊ တိုန်စိုပ်သ္ၚိရ ခဏဂှ်ကၠာ၊ ကလောန်ဂမၠိုင် ကၠုင်ဗိုင်သ္အဳဗ္ဂါ၊ ဟီုဇီုရိုဟ်ထာန် သၟာန်သၟုက်ဖဳဒွါ၊ ပရိုင်ကောန်ဂှ် ဗီုဒဒှ်ကၠာ၊ ညံင်နာဲရဲဟီု ဒှ်ကွေံကီုဟာ။   ။

ယွံကလောတံ မဇၟံပညာ၊ ဒှ်ကွေံသေင်ဟာ လအာပါင်ထဴ၊ ညံင်ထဴဟီုဂှ် ဒှ်စၟတ်ကွေံအဴ၊ ကေါန်ဂၠုသာ်ပ္ကဴ ဒှ်တဴသၟိင်ဓဝ်၊ ဒှ်သၟိင်ကလော် မဇၞော်အသဝ်၊ ဂကောံဗြဴပန် သၟဟ်န်ဆတ္တဝ်၊ သမၞိင်လွဳမာန် ယာန်ဒိပ်အသဝ်၊ သ္ဍိုက်မၠိုက်တင်ဂၠဝ် ဂွံဒၚောဝ်တဴဟေင်၊ အဲစိုပ်ဇရေင် ထာန်ဂှ်ဟေင်ဟာ၊ မိင်ပါင်အဲတၟေင် ဟွံဗၠေင်တရဴ၊ ညံင်မိကျာ်ဂန် ကောန်စၟဳတဴ၊ ညံင်အဴညံင်အဴ မိဂၞဴကၠုင်စိုပ်၊ ဒၟံင်လွဳမာန်အဴ မိဂၞဴသော်က္ဍိုပ်၊ ယာဲပိုဲကၠုင်စိုပ် ဗဒိုပ်ပိုဲအဴ။   ။

 ဂအဟ်အဲအဴ ဗြဴပန်ဆတ္တဝ်၊ ဝေင်ဒုင်ကော်ခဴ ပတဴအသဝ်၊ သီုညးပန်ဓဝ် ကော်ဇံသဝ်အဲ၊ ယွံခါံသဳဗြဴ မိဂၞဴမပြဲ၊ ဒၟံင်လွဳမာန်သ္တဲ ပ္ဍဲရုက္ခဇဵု၊ ညံင်အဴညံင်အဴ မိသ္ဍဴဍောင်မ္ၚဵု၊ မိကၠုင်စိုပ်အဵု တွဵုပိုဲကၠာ၊ ခိုဟ်သန်ခိုဟ်သန် ပူဗန်ဖဳဒွါ၊ ရမျာင်ညံင်ကွိင် မိင်ဖဲလဲအာ၊ ကလံအဲပၠန် ဂၠိုင်သန်ပြကာ၊ သၠိုင်ထဝ်သၠိုင်သြန် တ္ၜန်တ္ၜောဲနာနာ၊ ယာတ်မပြဲကၠာ ခါသာဖုံက်၊ ယာတ်ဒိပ်အသဝ် ၚုဟ်ထဝ်မွဲလက်၊ တယောဝ်လၜက် ဒုင်ကဵုသွက်အဲ၊ ထဝ်သြန်မတ်ဗၠဲ ကဵုအဲဂၠိုင်သန်၊ ပုင်သွကွာင်ဆာဲ အမာဲယိုဟ်က္ၜန်၊ ကဖျုန်ဗြာတ်က္ၜဴ သတ်ဗြဴပညောန်၊ ဇၟာပ်စၞပၠန် တ္ၜန်တ္ၜောဲဗစ၊ မွဲတ္ၚဲပိဝါ ဟွံခၠန်ကာလ၊ ရိုဟ်ဟ်တ္ၚဲရ စဟာပ်ဟွံမာန်။   ။

ဂလာန်လဖှ် ဂၠာဲပှ်ဂၠဟ်သၟာန်၊ ဟီုဇီုရိုဟ်ထာန် သၟာန်သၟုက်ဝေင်ဂြိုင်၊ မံင်ဂပ်လံကီု သီုညးဂမၠိုင်၊ မိပ်စိုတ်ဝေင်ဂြိုင် ကျိုင်ကျဝ်စတဴ၊ ကလေင်စဴပ္ညုင် စှ်ေက္ဍိုက်ဂၠုင်အဲ၊ ကြဳဇှ်ကလော် မဇၞော်နုဘဴ၊ ဂၠုင်ဒိုပ်သွိင် ဟွံသဍိင်တဴ၊ ညံင်ပဝန်ကံ ဒြိပ်ဂမြံစဴ၊ ကြဳဇှ်ဒေဝတဴ ရဴပရှ်ကျာ၊ တုဲဂွံကၠုင်ဟေင် စိုပ်သ္ၚိသေင်ဟာ၊ မိသၟိင်ဓဝ်ကၠာ ဗြဴမှာအသဝ်၊ ဟီုထ္ၜးကဵုရော ကလောဆတ္တဝ်၊ ကလောသၟိင်ဓဝ် မိင်အံသဝ်တဴ၊ မိပ်စိုတ်မပူမှ် လ္ၚတ်က္တဵုစဴ၊ ကလော်ဂမၠိုင် ဟီုထိုင်သးတဴ၊ နာဲဒကောင်ပိုန် ဒတိုန်ကြက်လှဴ၊ ကလောပိုဲဂှ် ဒှ်ဝေဝတဴ။   ။

ယွံနာဲသၟိင်ဓဝ် အသဝ်နုဘဴ၊ ပါရမဳသ္တိုတ် ဟိုတ်ကြံင်ဍုဟ်တဴ၊ ဂွံဒှ်သၟိင်ဆာဲ နာဲဒေဝတဴ၊ ဒေါဝ်ဗွဝ်ပိုန် ဒတိုန်ကြက်လှဴ၊ ဂွံစသိုင်တဴ နုဘဴပြာကတ်၊ ကလောဂမၠိုင် ထိုင်သးဂမ်အတ်၊ နာဲဒကောင်ပိုန် ရုပ်က္ၜိုန်ကၞတ်၊ ဂွံဒှ်သၟိင်ဓဝ် အံသဝ်ပြာကတ်၊ ဒေါဝ်ဗွဝ်ရတ် ကၞောတ်ဘောဂါ၊ ဂွံစသိုင်ဟေင် တသိုက်သေင်ဟာ။   ။

သမ္တီမၞးတံ တၟံညးလိုက်ဗာ၊ ဟိုတ်ဒါန်တၞံဟေင် ဟီုလဝ်သေင်ဟာ၊ ဂွံဒှ်သၟိင်ဓဝ် အံသဝ်ပြာထာ၊ ကမၠောန်သ္အဳဂၠက် မသက္ကုခြာ၊ ဍိက်တြုံဍိက်ဗြဴ တ္ၜန်တ္ၜောဲတဴကၠာ၊ ဂကောံဗြဴပန် ရုပ္ပကညာ၊ သၟဟ်န်မွဲဟာန် ရေင်ကာန်ညဳသာ၊ ညံင်အိန်နာဲမြု ကဵုသုဇာတာ၊ သုဓမ္မာကီု သီုသုန္ဒာ၊ သုစိတ္တပၠန် သီုပန်ပြကာ၊ ရေင်ကာန်သာဓာ ညဳသာသၟဟ်န်၊ သီုဂၞကျာ်ပန် ဂွံညန်မွဲဒၞဳ၊ ညံင်သာ်ဂှ်ကၠာ ဥပ္ပမာပ္ညဳ၊ ဒေါဝ်ဂၠံကျာ်သြဳ ဒေါဝ်ဗနဳကွိုန်၊ ကောန်ညးဒင်မာဲ နာဲဒကောင်ပိုန်၊ ဒါန်တၞံဆတ္တဝ် ဟိုတ်ပ္တုဲလဝ်ဗိုန်၊ ဗြဴပန်ညံင်ထဝ် ဂွံဒ္ၚောဝ်လၟိုန်၊ ဂွံဒှ်သၟိင်ဓဝ် ဒေါဝ်ကသဝ်ပိုန်၊ ကုသဵုတၞံဗိုန် ဇိုန်ကဵုသေင်ဟာ။   ။

တီတုဲမၞးတံ လ္ပသ္ပံသာ၊ ဂကောံမိတ်ဆာန် ဒါန်တၞံတမၠာ၊ ဟွံဒးသာဲအာ ဟွံဒးခြာသ္ၚောဲ၊ ကုသဵုဒါန်ရ ဂွံပနိဿဲ၊ ဒါန်ဒှ်ဒစုန် ဂွံဒုန်သလဲ၊ ဒါန်ဂှ်တုပ်နဲ ကောၝဲဂးမာ၊ ဒါန်ဂှ်သ္ၚဳရံင် ဒါန်ဂှ်ဍံင်သွာ၊ ဒဒိုခ်မွဲဂှ် ယာံက္တဵုဒှ်ကၠာ၊ ဒါန်ဂွံဆေတာ ဒၞါကဵုပယတ်၊ ဒါန်ဂွံဇိုန်ကဵု အိန်သွဵုဒြပ်ရတ်၊ နူပြိုတ်နရက် ဗၠးသက္ကုသၟတ်၊ ဒါန်ဂွံဗလး ဒါန်ပျးမုက်မတ်၊ ဒါန်တရံင်ပ္ညဳ ပါရမဳသၟတ်၊ ပိုန်ရုပ်ပညာ ကြဳဇှ်ပြာကတ်၊ ဂကောံမိဆာန် ပိုန်ဟာန်ဒြပ်ရတ်၊ ဒါန်ဇိုန်ကဵုဇၟံ အိုတ်တၟံသတ်၊ ကြဳဇှ်ဒါန်သၟတ် ပယတ်သိုက်လှိင်။   ။ 

သေဋ္ဌဳသမ္ၚေဟ် သ္ဂေဟ်သွဟ်ဒှ်သၟိင်၊ ဒါန်ပင်ပ္တိုန်အဵု ဇိုန်ကဵုအနိင်၊ ဒါန်ဇိုန်ကဵုကၠာ သွဝ်တာဝတိံ၊ ပြာသတ်ထဝ်တတ် ဒေန်ရတ်ဇမၠိင်၊ ဒေန်ထဝ်ဒၟံင်ဗ္ဂါ သၞာထဝ်ဗျိင်၊ ကဝ်လဗပြိုက် သတ်သဘိုက်တွိင်၊ ၜှ်ကေတ်ဟွံအိုတ် ဟွံတသိုက်သြိင်၊ ပုင်ဒိပ်ဍာ်ဒိပ် မိပ်ဟွံဒးဂွိင်၊ ယာတ်ဒိပ်ဖေင်ထဝ် ကျိုင်ကျဝ်လဗိင်၊ ဂကောဴမိတ်ဆာန် မဂွံဒျာန်က္ၜိင်၊ ဟိုတ်ဒါန်ပ္တုဲလဝ် သွဝ်တာဝတိင်၊ ချိုတ်ဟွံဒးဂွိင် သိုက်လှိင်တဴတုန်။   ။

==ဂလာန်နိဂိုမ်==
သတ်ပ္ဍဲလိုက်ဂှ် တိုင်ထဝှ်ဂုဏ်၊ ပသာ်ဒဒှ် ပိုဲဟီုတွံပ္ဍုန်၊ ဒးဂေတ်ဂၚေင်တုန် တိုင်ဂုဏ်သံသာ၊ လံစိုပ်နိဗ္ဗာန် ထာန်ကျာ်တမၠာ၊ ဟိုတ်နူအာရီု စိုန်သ္ကီုတဏှာ၊ ၜိုန်စဳကၠးသန် နွံကဵုပညာ၊ သ္ဍိုဟ်သ္ကေတ်ထတ်မြက် စဳကၠးမြက်စာ၊ ဟိုတ်မဒးလုပ် အကုပ်တဏှာ၊ ရုန်ဒဴဟွံဗၠး နူပးသံသာ၊ ဂရှ်တံဂှ် လဝ်ကဵုဒှ်ကၠာ၊ သၠောံသ္ၚာပ္ညဳ ခမဳပ္ဍဲဘာ၊ ပကင်ရင်သမတ် ပိဋကတ်မြာ၊ လအေင်ခန္တဳ သဳလပြဲဖါ၊ ဒေပ်စိုတ်ဗိုန်ကၠာ ပညာၜိုန်ချပ်၊ ရုပ်ဂေါဝ်ဒးဂၞင် ပ္ဍဲမတ်စပ်အာ။   ။

ယာံညာတ်ရုပ်ဗက် ဒွက်ပးသံသာ၊ အာရီုလိုက်လဴ စိုတ်စပ်တဴကၠာ၊ ရုပ်လှေံလှန်မတ် စိုတ်လယတ်အာ၊ ပညာၜိုန်ထတ် ဆေကြတ်ဓနာ၊ ဆေတာကွေံကြာန် ဟွံမာန်တုဲမာ၊ ဒးလသာလဝ် ဓဝ်သာသၞာ၊ ဒဒှ်ဟိန်ဗိန် သ္ၚိကၟိန်သေင်ဟာ၊ အိုတ်ဇၟာပ်ဘူဝတ် သတ်ပ္ဍဲသံသာ၊ ၜိုန်တိရစ္ဆာန် ဒဴဗၠးမာန်ဟာ၊ ဆဂှ်ဟွံသေင် တၟေင်ဥပ္ပမာ၊ သိက္ခာမုနိ ဣသိတမၠာ၊ ဒၟံင်ဂြိုပ်ပၠ ဟေမဝန်ဏာ၊ ရပ်ခန္တဳဗိုန် သွိုန်ဘာဝနာ၊ နစိုတ်ဗိုန်ဇၟံ ဟွံသပံသာ၊ ပ္ကင်ရင်လဝ်ကၠာ ဇၟာပ်သမာပတ်၊ ပ္ဍဲတိဟွံအာ ၛာန်ကာယျသၟတ်၊ လိုန်သၠဗာန်ကျာ ကလာင်ပြာကတ်၊ မိင်ရမျာင်ဗြဴ ရုပ်ထဝ်သ္ဍဴမတ်၊ အာရီုဗတိုက် စိုတ်ဂၠိုင်လျတ်၊ ၛာန်သရိုဟ်ကွေံ ဒတုံစှ်ေသၟတ်၊ ဣသိတံဂှ် ဒယှ်ပြာကတ်၊ ၜိုန်သဳလသ္ကီု ဒးလီုပယတ်၊ အိုတ်တၟံသတ် ပ္ဍဲသၟတ်သံသာ။   ။

ယာံရုပ်ဒွံဒး ပးစက္ခုဒွါ၊ အာရီုဓဇပ် သရပ်စိတ္တာ၊ ညံင်လွပ်ကလော် မဇၞော်အညာ၊ ထၞီမှဲတ္ၜိင် စိုတ်ဝိဝိင်အာ၊ ညံင်သၟိင်ဂိတ နာဲမြုထာင်သွာ၊ ကျိုင်ကျဝ်ဒးရး ကွာ်ဒးစးကျာ၊ ဒွံစုတ်မတ်ၜါ စိတ္တာစိုတ်နု၊ ညံင်ဍောင်ထာင်ကိုန် လျးဍိုန်လသု၊ မလုပ်သမၞိင် တဲသၟိင်ရာဟု၊ သၟိင်လျးကၟု ဇကုဓဇပ်၊ တေံသၟိင်တ္ၚဲကၠာ ရာဟုမရပ်၊ လေင်ဟွံလေပ်ဗၠး နူမဂးစပ်၊ ရာဟုစိုတ်ကီု ရုပ္ပရီုသၟပ်၊ ရုပ်သၞေဟ်ဒးဂၞပ် ယာံစပ်ဒးစိုတ်၊ သှ်ကွေံဟွံဗၠး ပးသုဘာသိုတ်၊ လောံလာဲတ္ၜးဘိုင် ဒဝိုင်လျးပၠိုတ်၊ ရုပ်ဒွံဒးမတ် မတ်ကသဳစိုတ်၊ ဂုဏ်မတ်ဒှ်ဟိုတ် စိုတ်တူသဏာန်၊ ပဳတိလဴဗ္ဂံင် စံင်ဗ္ဂဵုဝိညာန်၊ ညံင်ပၟတ်ကဝ် ဇၞော်မောဝ်လောန်လာန်၊ ဂၠံဟဒယ ဒုက္ခဝိညာဏ်၊ ပၟတ်ရာဂ စံပၠသန္ထာန်၊ ယက်ဗဂုဲသ္ဍိုက် တူဂၠိုက်သဏာ၊ နူဒွက်သံင်သာ ရုန်အာဟွံမာန်၊ ဒှ်သ္ဍိုက်ပၠန် တဏှာကွေံကြာန်၊ ဟွံဂွံစဴထာန် နိဗ္ဗာန်သေင်ဟာ။   ။

ဟိုတ်ဂှ်မၞးတံ တၟံလိုက်ဗာ၊ လံစိုပ်နိဗ္ဗာန် ထာန်ကျာ်တမၠာ၊ သမဇူဒၟံင် ပ္ဍဲခြိုင်သံသာ၊ ဒါန်ဂှ်ဒှ်ဗၞတ် မှတ်သလဲကၠာ၊ ရိုဟ်ဟ်တ္ၚဲသၟတ် ဒါန်မှတ်ပ္တုဲအာ၊ ရုပ်ကျာ်စေတဳ မှတ်လွဳပရာ၊ ဒဒန်ဇၞောဝ်က္ဍိုင် ကမၠိုင်ဍာ်ကၟာ၊ ရုင်ဒါန်ထၜုတ် ဇြပ်ကျာ်ဘုတ်ဘာ၊ ပုင်ဝတ်ရိုဟ်တ္ၚဲ ဒါန်ဍာ်ပြဲဖါ၊ ဂၞိင်-ကၞိင်ဟေင် ဗဗေင်သ္ၚာ၊ ဒါန်ကွာင်ယာဂု သတ်ဆုနာနာ၊ ဒါန်သတ္တာဖျာ် ဍာ်ယာမကၠာ၊ ဒါန်တောံသွဖျန် ဇဟန်သကာ၊ ဒါန်ဇဗၠုသတ် ဒါန်ဝတ်နာနာ၊ အိုတ်ဇၟာပ်ဒါန်ကၠာ ခါဂွံနိဿဲ။   ။

ဒါန်ဂှ်ဒစုန် ဒါန်ဒုန်သလဲ၊ ဒါန်ဂှ်ရောင်ပြဲ ညံင်တ္ၚဲမယး၊ ဒါန်ဂှ်သ္ၚဳရံင် ဒါန်ဂှ်ဍံင်ပျး၊ ဒဒိုက်ဇၞော်ကၠး ယာံဒးဒှ်ကၠာ၊ ဒါန်ဂွံဆေတာ ဒနာဂပဝ်၊ ဒါန်ရောင်ဇိုန်ကဵု အိန်သွဵုဍုင်သွဝ်၊ နူအပါဲကၠာ ဂွံဗၠးအာဓဝ်၊ ဒါန်မိန်ဂပဝ် ဆေဒဝ်အဆတ်၊ ဂုဏ်ဒါန်ဂွံဗၠး ဒါန်ပျးကဵုမတ်၊ ဒါန်တရံင်ပ္ညဳ ပါရမဳသၟတ်၊ ပိုန်ရုပ်ကညာ ကြဳဇှ်ပြာကတ်၊ ဒါန်ရောင်ဗိုန်ဇၟံ အိုတ်တၟံသတ်၊ ကြဳဇှ်ဒါန်ဒှ် ဒယှ်တှ်ကၞောတ်၊ ၜိုန်ကျာ်နာဲညး ကဵုဇၞးမာတ်သၟတ်၊ သက်သဳပဒး ဂွံဇၞးအဆတ်၊ ကြဳဇှ်ဒါန်ကၠာ မာဖေက်အာသၟတ်၊ ကျာ်ဇၞးမာသွံ ဂွံပပြာကတ်၊ ဒါန်ဇိုန်ကဵုပိုန် စိုန်သ္ကီုဒြပ်ရတ်၊ ကြဳဇှ်ဒါန်သၟတ် ပယတ်ဂွံလှိင်၊ သေဋ္ဌဳသမ္ၚေဟ် သ္ဂေဟ်သွဟ်ဒှ်သၟိင်၊ ဒါန်ဇိုန်ကဵုကၠာ သွဝ်တာဝတိင်၊ တူဖုန်ဝုန်ဏင် တူဒေန်ဂြင်စိင်၊ ဒါန်ရောင်ပင်ပ္တိုန် ဇိုန််ကဵုပသၟိင်၊ မိတ်မပြဲသွံ ဂွံဒ္ၚောဝ်သိုက်လှိင်။   ။

နာဲဒကောင်ပိုန် တြုံဒတိုန်သွိင်၊ ဂကောံဗြဴပန် ဝုတ်ကညာဂၞိင်၊ ရုပ်ညံင်ထဝ်ဂၠး ဇၟာပ်ညးတုပ်သြိင်၊ မဂွံသၟဟ်န် ဂွံညန်ဖလှိင်၊ ဒါန်ဏာဗစိုပ် ဒေါဝ်ဂြိုပ်ဇမၠိင်၊ ဒါန်သ္ဂန်ကံတဲ ဂြဲဏာအခိင်၊ ဂကောံမိသ္ဍိုက် ဂွံညန်သိုက်လှိင်၊ နာဲဒကောင်ပိုန် ဂွံတိုန်ဒှ်သၟိင်၊ ဒေါဝ်ဂြိုပ်ဇမၠိင် ဒှ်သၟိင်ဒေဝတဴ။   ။

သၟိင်ဓဝ်သာဲလေဲ သေဲသေဲဟီုတဴ၊ စဵုကဵုလၟုဟ်ဂှ် ဒယှ်ကမြဴ၊ ဇၟာပ်ဇန်တြုံဗြဴ မိပ်စိုတ်တဴကၠာ၊ ဒါန်ဇိုန်ကဵုဟေင် ရောင်ဟွံသေင်ဟာ၊ ဟိုတ်ဂှ်မၞးတံ တၟံလိုက်ဗာ၊ ဒါန်ရောင်ဒှ်ကြက် မသက္ကုခြာ၊ ဒါန်သၟတ်ပ္တုဲအာ ဂွံမြာသွာရောင်။   ။

(ကျာ်ဇၞော်ကုသလ-ဘာကျာ်သြဳမည်-ပါဠိတက္ကသိုလ် ဍုင်လ္ဂုင်)

==သွက်ဖါပ်ပူဇဴ သၟိင်မဒကောင်ပိုန်==
'''(၁)''' ပၞာင် ဍာ်မြမောဝ်- ပ္ကဴသဴ၊ ဇဗၠု-သတ်-ကလေင်၊ သဂြာ၊ သတ်ဗြာတ်၊ သတ်ဗြဴ၊ ကွာင်က္ၜဲ၊ လက်ဖက်၊ မပ္တံသတ်ဆု-သတ်ဒုန် ဗွဲမ္ဒးရးတံဂှ် ကြဴကြာတ်မသ္အးဇ္ၚးတုဲ၊ (ပိပ္ၚာန်) ဝါ- ပိပေါဲ၊ ပဳခဝ်၊ ပေင်သွက်သၟိင်မဒကောင်ပိုန်၊ ဒေသကၠောန်ကေင်ကာဂှ်- ပၟင်ဍုင်၊ ပၟင်ကွာန်၊ ပၟင်က္ၜဳ၊ မစပ်ကဵုဒေသပၟင်မွဲမွဲမၞုံမ္ဂး- မွဲမွဲ-(ပ္ၚာန်) ဒးကဵုရောင်။   ။

'''သွက်ဂွံစွံသတိ။''' 
'''(၂)''' ပ္ဍဲအခိင်မကၠောန်ကေင်ကာဂှ် မပ္တံအဟာရဟွံသ္အးဇၚး၊ မစပ်ကဵုအဟာရသတ်လမျီုတံဂှ်ကီု ၜဵုကီု သ္ပသတိတုဲ ဝေင်အိုတ်ညိ။   ။

'''အခိင်။'''
'''(၃)''' နူကဵုဂိတုဒ္ဂိုန်ပေင် စဵုကဵုစိုပ်ဝှ်ပေင်တေံ- ပွိုင် {၄} ဂိတုတံဂှ် အခိင် (ဝိကာလ) လောန်အာတုဲ သွက်သ္ဂောံဖါပ်ပူဇဴတံဂှ် ဝေင်အိုတ်ညိ။   ။
==နိဿဲ==
နူလိက်အုပ်မၞုံယၟု မဒကောင်ပိုန် (ကျာ်ဇၞော်ကုသလ-ဘာကျာ်သြဳမည်-ပါဠိတက္ကသိုလ် ဍုင်လ္ဂုင်)
[https://online.fliphtml5.com/yjjtg/kyty/ လိက်ဗွဟ် မဒကောင်ပိုန်]</text>
      <sha1>e5b4iseca8iyn0scc4nbxjaomv2140c</sha1>
    </revision>
    <revision>
      <id>57524</id>
      <parentid>57523</parentid>
      <timestamp>2026-09-28T08:44:54Z</timestamp>
      <contributor>
        <username>Ranger-Mon</username>
        <id>120</id>
      </contributor>
      <origin>57524</origin>
      <model>wikitext</model>
      <format>text/x-wiki</format>
      <text bytes="196992" sha1="5p6y0eszahy8e11gv6evryppwv0wthm" xml:space="preserve">==လိက်မဒကောင်ပိုန်==
သွက်ကောန်ဂကူဘာသာမန်ဂမၠိုင်တံ သ္ဂောံတီကေတ်ပရူသၟိင်သာဲလေဲ, မပ္တိုန်ကဵုကွိုန်စရာဲဍုင်ဟံသာဝတဳ မပိုင်ပြဳလဝ်ဂြိုပ်, က္ၜဳ မဂွံအလဵုအသဳ − ပ္ဍဲအလုံတွဵုရးရာမညညးဂမၠိုင်မ္ဒးရှ်ေသှ်ေရဴဂဴလိက်ဗွဟ်မွဲ − မၞုံယၟု
မဒကောင်ပိုန်ပြာကတ်လလောင်တမ်ညဝ်အလုံရးဍုင်ရောင်။

ကျာ်ဇၞော် ကုသလ
ဘာကျာ်သြဳမည်−ပါဠိတက္ကသိုလ် (ဍုင်လ္ဂုင်)

==နိဒါန်==
လိက်ဝွံအဲဆန် ဟီုပၠန်မွဲတောင်။ လင်္ကာကဝိ ညိဟွံကဵုယောင်။ ဍိုက်ပေင်ကဵုရှ် ဗှ်စိုရောဍောင်။ ဆမိပ်ဒးဂြဴ မှောဝ်ဇဴစိုတ်သၠောင်။ ချူကှ်ေဇွိတ်ၜိုတ် ပိုတ်ဖျုန်ရောင်ယောင်။ ပိုဲမည်ဘာသာ ကၠာတေံမွဲတောင်။ ဂွံဒုင်စသိုင် ဂၠိုင်ကဵုအခေါင်။ မုက်မတ်ရာင်ဆာဲ စရာဲဂေါဝ်ရောင်။ ဆဂးဟီုဂှ် ဗှ်ကံမွဲတောင်။ လောန်ကၠုင်လံလ ဘဝပိုဲရောင်။ ဂၠိုင်ကဵုဒြပ်ရတ်ပြာကတ်လလောင်။ ပိုန်ဨကရာဇ် ဟွံဝါတ်ဆောတ်ယောင်။ ဂကူမည်အဵု နွံဝဵုဂွံအခေါင်။ ပိုင်တိဍာ်ရောင် မွဲ
တောင်ဂးလဝ်။ 	။

ဂၠိုင်ကဵုပယျာံ သၞာံသံဝစ္ဆဝ်။ အုပ်ဓုပ်ပိုင်ပြဳ လဵုသဳတမ်ညဝ်။ ဂကူမည ဝံသသၟိင်ဓဝ်။ မင်မွဲဘာသာ ပညာတိုင်ထဝ်။ သာသနာအဵု စံင်ဗဂဵုလဝ်။ ဖေက်တိမဇကၠေံ သၠေံဟေန်သပဝ်။ ဖေက်တၞုက်ပိုတ် အိုတ်ပ္ကဴဇဝ်။ ဖေက်တၞံဒေါမ်ဗြောံလီုကာဲကဝ်။ မင်မွဲကၠုင်ရ တၠသၟိင်ဓဝ်။ ပိုင်ပြဳအုပ်လဒံယၟုတမ်ညဝ်။ ဖါသီမုဟ်တၟံ သဓီုတၟံထဝ်။ ဟံသာဝတဳ ကျာ်သြဳအံသဝ်။ မင်မွဲပိုင်လဝ် အသဝ်လောန်ကာဲ။	။

ဗှ်ကံအတိက် သိက်ပရေနာဲ။ ကၠာတေံပိုဲမန် ပိုင်နန်ဂဵုဍာဲ။ ဂွံအဝဵုခြိုင် ဂၠိုင်ကဵုအာဲကၟာဲ။ ပိုင်ရးဍုင်ကွာန် ထာန်တၠနာဲ။ မိပ်သိပ်လဟိင် ဇူသၞိင်သြိုဟ်ယာဲ။ မုတ်မတ်ရာင်မံင် ညံင်ထဝ်ဂဵုဍာဲ။ နူဂှ်အဆက် ကြက်ဒးပြးဆာဲ။ လီုလာ်ဇဳဂၠံင် ရံင်အာဂၠိုင်ဒၞာဲ။ သၟိင်ပြးနူနန် လန်ထောံအာဲကၟာဲ။ ဒးကၠင်တဟး ကောန်ပြးနူယာဲ။ သမ္ဘာကဵုတၠ ဝံသကဵုနာဲ။ ကွးကဵုအ္စာ ဒးကာဗက်ဂၠာဲ။ ပြးနူဒမံင် ညံင်ဂြုန်ဟိုင်သာဲ။ လီုလာ်ပြးဆာဲ သာဲချိုတ်ဂယိုင်။ 	။

ပိုန်လောကဳရ ဆညိရောပိုင်။ ကၠာတေံမန်တံ ဗိုန်ညံင်တၟံတိုင်။ နွံကဵုဨကရာဇ် ပြသာတ်နန်ထ္ၜိုင်။ လ္တူပၞင်ထဝ်ဗွဲသၟဝ်က္ဍိုင်။ သံက်စရှ်လဝ် နွံအသဝ်ဂၠိုင်။ ဍိုင်ပေင်ကဵုမ္ၚဵု နွံအဝဵုပိုင်ပိုင်။ လၟုဟ်ဟွံမွဲသွံ ထောံလဝ်ပွိုင်။ ဒဴကၠေံဝံသ ဟွံပသဇိုင်။ သာ်လဵုဂွံပ တော်ဆကဵုဂၠိုင်။ ဍုင်မည်ဂးရ ဂွံဆမိင်ပရိုင်။  ဗွဲစၟတ်သွံ ပိုဲရောဟွံပိုင်။ နွံဒၟံင်ကွေံရ သှ်ေဆပွိုင်။ ဗှ်ကံအတိက် ဒှ်ဍိက်ပိုင်ပိုင်။ ချပ်အာအိုတ်ဇိုင် ဂၠိုင်သၞာံကာလ။ 	။

ယွံကလောပိုဲ ဟိုဲဗော်မည။ ဂၠိုင်ကဵုအခါ ကၠာတေံဒှ်တၠ။ လၟုဟ်ဒှ်ဍိက်ဂၠုဲ ဒုဲအိုတ်ဝံသ။ ဟွံမွဲသၞေဟ်သင် ကၠင်ဟဳဒၟံင်ရ။ ဗှ်ချပ်စံင်တူ မူဝိပါက။ အရေဝ်လိခ်ပတ် ဒ္ဂေတ်ဝတ်လောက။ ဂကူဘာသာ သာသနာပၠ။ ဍုင်နန်ပြာသာတ် ဓါတ်အတုလ။ ပိုန်ဂၠိုင်ကဵုသာ် လီုလာ်မှာဲမှ။ထုဲကြာန်လီုတ္ၜန် ကၠေံဗ္ဒန်အိုတ်ရ။ ဟိုတ်မာဲဝိဝိင် တၠိင်ကၠေံဝံသ။ ဟွံမင်မွဲလဝ် ဓရ်ကျာ်သာကျ။ ကတညူဂုန် ဟွံဖ္ဍုန်သဳသ။ လီုလာ်ပြးဆာဲ ဂကူမှာဲမှ။ မူဝဳပါက ဝံသတၞောဝ်မည်။ 	။

အတိဒုက္ခံ ချပ်ရံင်ဂိလောန်။ ဗီုပိုဲဒှ်ကၠုင် ဒုင်ဘဲရောအောန်။ နူဘဝနာဲ စရာဲစိစောန်။ ဟုတ်ဗ္ဒန်စှ်ေ သှ်ေဆယၟုမည်။ ဘဝဍိက်ပၠက် ဆက်ကၠုင်လံလောန်။ ဒးဒုင်ပျဲပျာံစၞာံညံင်စးကြောန်။ ဒဒိုခ်သာ်ဏံ လံလသ္ၚောဲလောန်။ ဗှ်ရံင်စိုတ်က္ဍန် ချပ်ပၠန်သိင်သာ။ 	။

တၠအလဵုသဳ ပိုင်ပြဳပိုဲကၠာ။ သီဒက်ကောပ်ကာဲ ပြယျာဲဘာသာ။ ဇြောတ်ကေတ်ဆီစိ ညိညိအိုတ်အာ။ ပိုဲမည်တံကီု ဗီုမကၠေံအာ။ ညးကလိင်အဲ အဲကလိင်ညးကၠာ။ ဂကူပိုဲဗျိုင် ပိုဲဒးကလိင်အာ။ ဟိုတ်မကလိင်ဟေင် ဂကူသေင်ဟာ။ သ္ပမၞိဟ်မွဲစွံ ဟွံတုပ်လအာ။ ဟိုတ်ကုသဵုအောန် ဒးကၠောန်ထွက်ကာ။ ဂကူပိုဲဝွံ ဍိုန်လ္ၚုစှ်ေအာ။ ဟိုတ်မကလိင်ကၠာ ဘာသာဇြဟာန်။ 	။

ယွံကလောပိုဲ ဟိုဲသၞောဝ်ဒါန်။ မိင်ဟာဍောင်ဓဝ် အသဝ်ပိုန်ဟာန်။ နွံကဵုဨကရာဇ် ပြာသာတ်နန်ယာန်။ ဍုင်ပိုဲတိပိုဲ ဟိုယ်ဗော်သၞောဝ်ဒါန်။ ပိုင်ပြဳလဝ်ရ လံလအဓာန်။ မင်မွဲဂကူ လတူနန်ယာန်။ ကိုပ်ကၠာတေံဂး ဇၟာပ်ဍုင်ရးကွာန်။မန်တံဇၞော်မောဝ် ဂေါဝ်ဆာဲလောန်လောန်။ လၟုဟ်သုန်ဂြာံ ညံင်နာံဒဴပ္ကာန်။ နာံထောံဒဴရုပ် ရုပ်စိုတ်သုသာန်။ ညံင်ဗီုသာ်ဂှ် တုပ်သၟဟ်မွဲဟာန်။ မုက်ဍောတ်မတ်သဝ် လဝ်ပ္ဍဲဝိညာန်။ သာ်လဵုမဂး ညးမွဲရောသၟာန်။ ဗှ်ကံအတိက် ဒှ်ဍိက်ညးကွာန်။ ဂွကွေံရဏး ဟးဂိကတာန်။ ပိုန်ဨကရာဇ် ပြာသာတ်နန်ယာန်။ သှ်ေဆယၟု လ္ၚုနူပိုန်ဟာန်။ ၜိုန်ဒးပြးဆာဲသာဲသဏ္ဌာန်။ ၜိုန်မံင်တဴသ္ၚောဲ ညးမွဲမွဲကွာန်။ ညံင်ကောဒေံပၠန် ကောန်မွဲမိပ္ကာန်။ ပိုဲမန်ကဵုမန် ကဵုနွံဇြဟာန်။ သာ်ဂှ်ဟွံသေင် တၟေင်မွဲဂလာန်။ ညံင်ဝုတ်ကဵုဗၠာဲ ဂၠာဲဆက်မိတ်ဒါန်။ကာလကောံသၟဟ် ဒှ်ဓဝ်ဇြဟာန်။ မေတ္တာဗျဳဗျာပ် ဇၟာပ်အရာဒါန်။ တုပ်သၟဟ်သာ်ဂှ် ကဵုဒှ်ကွေံကြာန်။ ဍုင်မိတိမ လံလအဓာန်။ မိပ်စိုတ်မွဲဟာန် နိဒါန်မန်ရောင်။ 	။

==လိက်ဗွဟ်မဒကောင်ပိုန်==
နမောတဿ ဘဂတော အရဟတော သမ္မာ သမ္ဗုဒ္ဓဿ
နမတှုဟေင် ပြေင်သူစရိုတ်။ ဒွါပိတၠုင် လယုင်ဏာစိုတ်။ ဂုန်ကျာ်ဂမျိုင် ပၞာင်တိုင်ၝောံကိုတ်။ အဲလ္ၚောဝ်ကၠာဟွံခြာတသိုက်။ ဂုန်ဓဝ်စှ်သွံ ပလဝ်ၝောံကိုတ်။ တူကၞေင်စွံပ္ဍုန် တိုင်ဂုန်ပြဲသတိုင်။ အဲဍိက်လ္ၚောဝ် လျုင်လဝ်စိုတ်။ အရဳယျသင် ညံင်တၠင်ဗိုတ်။ စ္ဍးနူရာဂ ကိလေသအိုတ်။ အဲဍိက်လ္ၚောဝ် ပြေင်လဝ်စရိုတ်။ ဖဵုအဲလ္ၚောဝ် ရတ်ပိပြဲသ္တိုတ်။အန္တရာဲဆက် စှ်လက်လ္ၚီကိုတ်။ ကဵုလာဲလေင်အိုတ်  ကဵုပၠိုတ်ဟောံညိ။ ။

ပြဲလောန်အဆတ် တိုင်ဂုန်ရတ်ပိ။ လ္ၚောဝ်တုဲအဴ ဗွဲကြဴဒမၠိ။ အဲပြေင်လဝ်ညိ သိရိဝါကျ။ တိုင်လင်္ကာပၠန် လၟေင်ဆန္ဒ။ ဟီုလဝ်လိခ်မွဲ ပ္ဍဲရးမည။ ပ္ဍဲရးဟံသာ ကဵုမြာဂတ။လိက်သၟိင်ဓဝ်ကၠာ သာဲလေဲနာမ။ လိခ်ဝွံကၠာတဲ ဆန်မွဲဝါရ။ညးဆန်တမၠာ လံလောန်ကာလ။ ဟိုတ်လံအာရ ဆန္ဒလီုအာ။ ပိုတ်ဗျုန်ယုတ္တိ ယတိယောင်ယာ။ ဒကုတ်ဖလုတ် ဇမောဝ်သ္ဂုတ်အာ။ သၟိက်လဟဵုညိ တၟိမွဲဝါ။ အဲဆန်ပ္ညဳကၠာ မွဲဝါပၠန်ရောင်။။

ပ္တန်သူစရိုတ် စိုတ်ပကဵုယောင်။ မင်မွဲစိုတ်ရောင် ပကဵုယောင်ချဳ။ နွံဍုင်ဇၞော်မွဲ ပြဲသန်ကျာ်သြဳ။ ယၟုဍုင်ကၠာ ဟံသာဝတဳ။ ကရိုဏ်တဏာဲ ဗတင်လာဲဇဳ။ နန်ဂ္ညိရတ် သ္ၚိကၠတ်ကျာ်သြဳ။ ဂိုဟ်သုံမထိုက် သလိုက်ဗစဳ။ ဆာန်ဆံင်ဒၟံင်ဂျာန်ထဝ်အာန်ဇနဳ။ ရုင်စိင်ဒၟံင်ထပ် ဗိုင်သရပ်ပ္ညဳ။ ချေံပြဟ်ဇိုင်သာ ဒၟံင်ဗ္ဂာတဝဳ။ ညးဒေါန်ညးဇြင် ဒၟံင်ထဏင်ဗဳ။ ဝုတ်ဒိုဟ်ဇိုင်မြု ထဥတဝဳ။ ဂၠိုင်ကဵုဝေါဟာ ဇၟာပ်ဘာသာဇဳ။ သေံဗၟာပၠန် ကၠေဝ်မည်ပသီ။ ကမၠိုင်ဍာ်ကၟာ ဇၟာပ်ခန်လွာဇဳ။ ပ္ဍဲဒေါဝ်ဍုင်ဂှ် ဗဒှ်လဝ်စေတဳ။ ကျာ်မံင်တဴရ နာမဂးပ္ညဳ။ ထဝ်ဗိုင်တဝဳကျာ်သဳလောန်ကာဲ။ 	။

ပရူဒဒှ် လဖဟ်ဟီုဂၠာဲ။ ရးဟံသာပ္ကာန် ဂးကွာန်ဒမာဲ။ မူဒၞာဲကွာန်ကီု တူရူဟီုဂၠာဲ။ တဴပလလိုတ်ကၠာ ရးဟံသာဆာဲ။သၟိင်ဓဝသၟိင်ဓဝ်အကာဲ သာဲလေဲညးဟီု။ ပသာ်ဒဒှ် တိုင်တဝှ်ဗီု။ ပင်မှိင်ပိုဲဟီု ကြီုပထမ။ ကွာန်ဒင်မာဲဂှ် ဒှ်ကွာန်ဝါဗ္ၚ။ ဗြဴမွဲဂှ်ရ တ္ၚဲဗုဒ္ဓဝါ။ ယၟုခုတ်ပ္တန် မိသုကညာ။ တြုံမွဲဆတ္တဝ် တ္ၚဲသ္ၚိသဝ်မာ။ ယၟုခုတ်လဝ် နာဲဍိက်ထဝ်ကၠာ။ ဒၟံင်ပ္ဍြကွာန်ဆာဲ ဒင်မာဲသီုၜါ။ ညးၜါဂှ်ပၠန် ဆန်မွဲသၞာ။ ဂွံကောန်တြုံမွဲ နဲလိုက်စမ္ၚာ။နာဲဒကောင်ပိုန် ဖျိုန်ယၟုကၠာ။ မိကဵုမၜါ လွဳပရာတဴ။ 	။

နာဲဒကောင်ပိုန် ဖျိုန်ယၟုတုဲအဴ။ ဇၞော်အာဖေါင်ဖေါင်ညံင်ဗီုဍောင်ပ္ကဴ။ စရာဲရုပ်သၟတ် ဂပ်ဝ်တ္ၜတ်သြဴ။ မိမသ္ဍိုက်လောန် ကောန်လၟာဂၞဴ။ ကြဴဝွံတုန်မာ မချိုတ်အာတဴ။ မိဂှ်ဗြဴကၟာဲ နာဲကညာဗြဴ။ နာဲဒကောင်ပိုန် ဒတိုန်ကြဴလှဴ။ ဒေါဝ်ဗနဳရောင် ကောန်နာဲဍောင်ပ္ကဴ။ ဂၠိုင်ကဵုကၠင်ဗော် သဳနော်လဗဴ။ ညာန်ဘာန်ကြဴလှဴ ကြဴဝွံဇၞော်အာ။ အာဒှ်ဗၠာဲဟေင် သမုဲလေင်ကၠာ။ ကျိုင်ကျဝ်ဂ္ညိဂ္ညိာတ် ဒးကၞာတ်ဗဳသ္တာ။ ညံင်ထဝ်ဒကောင် ညံင်ဍောင်စမ္ပာ။  ဂပ်ဝ်လောန်ထာန် ဗီုစန္ဒိမာ။ ဗြဴသုကညာ ညာတ်ကောန်ခါဂှ်။ ဒၚောဝ်ဗဵုရုပ်ကောန် ညံင်ညးသောန်ဗဒှ်။ ညာတ်ရုပ်ကောန်အဴ ချပ်တဴလၚဟ်။ ကောန်အဲဝွံဂှ် ရုပ်တၟေင်တၟဟ်တဴ။ 	။

ကသပ်စိုတ်စိ မိကညာဗြဴ။ ကောန်တြုံအဲဝွံ အနုထာင်ပ္ကဴ။ စရာဲကျာ်သဳ ညဳသာက္ၜတ်သြဴ။ တောံပၞာဲဇိက်ဗ္ၚ ဟွံကြိုက်သဘဴ။ ကဵုမံင်ဘာအဴ ဒှ်တဴစရာဲ။ ချူကှ်ေဂၞန်ကတ် ပုတ်ဂၠတ်ဇၟာပ်ဒၞာဲ။ ပါန်မုက်ပါန်ခဳ ဗဳသ္ကဝ်မဆာဲ။ ပုံကၞာတ်အိုဿီု အဂီုစလာဲ။ လိခ်ဂွက်မင်ဇေန် ဗှ်ဒးပ္ဍေန်ချာဲ။ ကွတ်ပါင်ဇၟာပ်ဒၞာဲ ကွတ်တဲဂၠာဲဇဳ။ အာယုက်ပေင်သၟဟ် ကဵုဒှ်ခမဳ။သာ်ဝွံရောင်ဒး ဂွံစဳကၠးဇဳ။ ကဵုဂွံလေပ်သၟတ် ကွတ်ဇဳခရဳ။သာ်ဝွံပလွဳ ခမဳပြဲရောင်။ 	။

မိဗြဴကၟာဲအဴ ချပ်တဴမွဲတောင်။ ချပ်ဂွံအခေါင် မွဲတောင်တုဲမာ။ ကောန်သ္ဍိုက်လ္အိတ် ကေတ်ပ္တိတ်ဏာဘာ။ စိုပ်ဘာတုဲအဵု ဇိုန်ကဵုအစာ။ ကၞိပ်ဇံသဝ် ယဵုလဝ်တဲၜါ။ ယွံတဳလအဲမပြဲပညာ။ ကောန်အဲဍိက်မွဲ ဟွံမွဲပြတ်ညာ။ ဍေံဟွံလေပ်သၟတ် ပြတ်ညာသေင်ဟာ။ ညံင်ဂွံလေပ်ကွတ် ပြတ်ညာသကာ။ ကဵုကတ်ဗ္တောန်ဟေင် ဇရေင်အ္စာ။ ဟိုတ်ဂှ်တုန်ကၠာစိုပ်ကၠာဘာရ။ ကောန်အဲဍိက်မွဲ နဲကောန်တဳလ။ သွက်ဂွံလေပ်သၟတ် ဇၟာပ်ကွတ်သဗ္ဗ။ အပ်ဇိုန်နှင်ရ ကဵုတဳလရောင်။မိသကညာ ညိဟွံခြာယောင်။ သာ်ဝွံမွဲတောင် ဂွံအခေါင်ပြဟ်။ သုကညာပၠန် ဖျိုန်ကောန်ဒှ်။ ဖကန်ဖျန်ကၠာ ကဵုကောန်ခါဂှ်။ ယွံခဍောင်မတ် ကၞတ်ကြဳဇှ်။ ပ္ဍဲကဵုမိဂှ် နာဲပဗှ်သၞာ။ ဆဂွံဆစ ဇၟာပ်စၞကၠာ။ နာဲကၠေံစိုတ်ကတ် ဇၟာပ်ကွတ်မွဲမွဲ။ ပ္ဍဲဇရေင်အ္စာ နာဲပအာသ္ၚောဲ။ အ္စာမၠာ်မွဲ ယိုက်တဲလ္ၚောဝ်။လစောတ်လမောဝ် သၞောဝ်ဂၠံင်ကဵုတီ။ ဒၟံင်ကဵုသီရဳ လ္ပအီဂြိုင်။ ပကၠိုင်ကၟိုင် ပဂြိုင်စမြေဟ်။ ဗဒှ်လုဲလက် ဗမက်ပလှ်ေ။ ဂရိုင်ပဝေင် ဍေံနင်လေင်ကွေံ။ ဗမက်ပလှ်ေ ဍေံကဵုဒဒိုခ်။ သၟတ်ကတ်ဗ္တောန် ကောန်ဗၠာဲဂွံသိုက်။ မိမသ္ဍိုက်ယိုက်ပ္တိတ်လဝ်ဘာ။ ဖကန်ဖျန်တုဲအဴ မိက္တဵုစဴအာ။ 	။

နာဲဒကောင်ပိုန် ဒတိုန်ရုပ္ပါ။ သီုမကြဴလှဴ ဒၟံင်ဖဴအ္စာ။ဟိုတ်ကုသဵုကံ နူတၞံတမၠာ။ ခဍံက်ညာန်လှဲ ဗွဲပြဟ်လေပ်အာ။ ချူဒှ်ကှ်ေဒှ် ဗှ်ဒးမြက်စာ။ ဍောတ်ဗၠာဲတုန်ဟေင် ပ္တီမိသေင်ဟာ။ သၟိက်က္ၜဂတဵု ဟီုကဵုမိကၠာ။ မိဂွံမိင်အိုတ် မိပ်စိုတ်မှောဝ်ဇဴ။ အတိုင်လၟေတ်ကွေတ်နူတမၠာ။ က္ၜဂတဵုဟေင်ရဴဝွံသေင်ဟာ။ ဓုပ်ပၞာင်ပ္ကဴပၠ ဇဗၠုသၠကၠာ။ ကွာင်တောဝ်တၞးပၠန် ကောန်ကသေင်ဟာ။ ကွာင်မပၞဟ် ကၠောန်ဗဒှ်ဏာ။ကွာင်ၚုဲဂတာံ လကံက်နာံဒွါ။ ဗြာတ်သီုသတ်ဗြဴ နှဴရဴကဝ်ၜါ။ ကွာင်ၜဲယိုဟ်က္ၜန် ဂၠိုင်သန်မွဲသာ။ ပြုပြေင်လဝ်ကၠာ တုဲအာဇၟာပ်တင်။ 	။

ကော်ကယိုင်ကောန် ယာတ်ယန်ယာတ်က္ၜင်။ လစိန်စရံင် ဒြင်ဗံက်ပယင်။ ဗြေဝ်ဂတေဝ်ပး တၟးဂဵုခၠင်။ မာဲလိတ်လာင်ဇင် ဖေင်ကသူကၠာ။ စုတ်ကၠေင်ဂြးသော် ဗော်တင်ကတောဝ်ၜါ။ ကျိုင်ကောန်တုဲကၠာ တော်ဆယာယဳ။ ကၠောဂမၠိုင် ရိုင်ရိုင်သ္အဳသ္အဳ။ ဒၚဳဇက်တိတ်အာ စိုပ်အာတွဳ၊ အာနိမန်နင် သၟိင်သင်အရဳ။ ဖါပ်ကဵုဒါန်ကၠာ ဆန်အာဒၚဳဒၚဳ။ ကောန်ကွးဘာတံ ကဵုဂဇံသဳကၠဳ။ ဂတဵုကျာ်သြဳ ဒၚဳကေတ်နင်ကၠာ။တူဂတဵုအ္အးသၠဗြာတ်လးသာ။ တူသၠဗြာတ်သ္ကဲ စုတ်ကွာင်ၜဲကၠာ။ ဗၞတ်ပန်စွံဟေင် စုတ်ပြေင်လဝ်ကၠာ။ တုဲနိမန်ရ ကော်ဗ္စသေင်ဟာ။ 	။

ပပြတ္တိက မဟာဗြဟ္မာ။ နိဒ္ဓိကာစ ဂးစန္ဒိမာ။ အင်္ဂုလိမာ မဟာဗဳသၞု။ အက္ခရဉ္စ ပြမေသွာရာ။ နိမန်ဒေဝတဴ ရဴဝွံဂါထာ။ အဓိပါဲသၟတ် ဂါထာဂှ်မာ။ ယဝ်သၟိင်တီကီု ပိုဲပျးဟီုကၠာ။ ပြပြတ္တိက မဟာဗြဟ္မာ။ ဒေဝတဴကီု မှာဗြီုဂးမာ။မဂွံအဝဵု ပိုင်ဂတဵုကၠာ။ နိဒ္ဓိကာဟေင် ဂတဵုသေင်ဟာ။ ပိုင်ဗကောဟ်ဂ္ညိ ဂးစန္ဒိမာ။ အင်္ဂုလိမာ မဟာဗဳသၞု။ ပိုင်လပှ်တဲဟီုသ္ကဲယၟု။ ဂးမှာဗဳသၞု ခုတ်ယၟုကၠာ။ အက္ခရဥ္စ ပြမေသွာရာ။ပိုင်အက္ခဝ်ကၠာ မှာပြမေသွဝ်။ ဒေဝတဴပန် နူဒတန်ကဝ်။ပိုင်ပန်စွံဓဝ် နူကဝ်မူလ။ 	။
ဒေဝတဴပန် တန်ဖါပ်ဗ္စ။ သာ်ဝွံတုန်ရ က္ၜရာဒနာ။ယွံမၞးဗြီု သီုစန္ဒိမာ။ မှာပြမောဝ် ပြမေသွဝ်ကၠာ။ ဒေဝတဴပန်ပိုင်ပန်ပြကာ။ မင်ဂတဵုမြဟ် ပိုင်ဗကောဟ်ကၠာ။ လပုဟ်တဲဓဝ် ပိုင်အခဝ်ကၠာ။ သီုညးပန်ကၠာ ပိုင်ပန်ဋ္ဌာန။ ပိုဲသ္ပပူဇဴဗြာတ်က္ၜဴပုင်သွ။ အမာဲယိုဟ်ပြဲ ကွာင်ၜဲစၞး။ သ္ပပူဇဴဂ္ညိ ဒမၠိကာလ။ ဂးတုဲဍာ်သၠိုင် ဂိုင်စရိုဟ်ပၠ။ ယွံမၞးမပ တၠနုဘဴ။ ဖဵုအဲဍိက်က္ၜ ဂွံပပူဇဴ။ ကောန်အဲဍိက်အဴ ပ္ဍေန်တဴညာန်လှာဲ။ ပြကိုဟ်ပုံကၞက် လိက်ဂွက်နဲကဲ။ ကဵုတိုန်ပါင်စိုတ် အိုတ်စမဟ်တ္ၚဲ။ ပညာညာဏ်လှဲ နဲကာသဂင်။ လောကဳဗဟဳ ဇဳဇာပ်ကလင်။ ကဵုတိုင်ပါင်စိုတ် အိုတ်တၟံတင်။ မၞးတံထံက်ပင် ရီုဗင်ညိအဴ။ 	။

သာ်ဝွံတုန်ရ ရာဒနာတဴ။ က္ၜဂတဵုအဴ တုဲဒှ်တဴကၠာ။ ဒရီုသကအ် ဂပ်လံကာဖါ။ တုဲကလံဂ္ညဳ သင်အရဳမာ။ ဒၚဳက္တဵုစဴဒၟံင်ထာဏ။ ဍောတ်ဗၠာဲဂေါဝ်ဇြုင် ဂိုင်ဒေပ်ပုင်သွ။ တုဲဂၠာဲကတ်အာ ဇရေင်အ္စာပၠ။ ဟိုတ်ဝါသၞာ တမၠာမူလ။ ကတ်တိုန်ပါင်တဲ ပ္ဍေန်မွဲခဏ။ လိက်ဂွက်မင်ဇေန် ပဍေန်တိုန်ပါင်ဂျ။ ပုံကၞက်အဂီု ဒၞာဲဟီုစဳခၠ။ ရမျာင်ညံင်က္ၜိင် မိင်ဒးသ္အဳရ။ ကွတ်ပါင်ကွတ်တဲ လေပ်မွဲခဏ။ စံင်ဂြဝ်သြေဲကျာံ ရာဂါံသဗ္ဗ။ လေပ်ပြဟ်လ္အိတ် ခၠင်ပ္ဍဲစိတ္တ။ ချူကှ်ေဂၞန်ရ အိုတ်သဗ္ဗကာ။ ပုံကၞက်ဇၟာပ်တင် ဆန္ဒလင်္ကာ။ တိုန်စိုတ်ညာန်လှဲ ပ္ဍဲလင်္ကာတာ။ တၟံကွတ်ကၠာ ကတ်အာဇၟာပ်တင်။ 	။

စှ်ေစိုတ်နာံဗျာပ် ဇၟာပ်ကွတ်ကၠိုဟ်ခၠ။ ဇၟာပ်ကွိင်ကွိုက်အခိုက်ပြဲက္ဍင်။ တိုန်စိုတ်ပြာထာ နဲကာသဂင်။ အယုက်လ္အိတ် စှ်ဒ္စိတ်ပြင်။ တံဇိုင်သၟိင်သင် မက္ဍင်အိန်ရဳ။ နာဲဒကောင်ပိုန် ဒတိုန်ကျာ်သြဳ။ ဒုင်ပယျင်ရ ပကၠေံခမဳ။ ဝိနဲသဒ္ဒါ ကတ်အာဒၚဳဒၚဳ။ ပဍေန်ပဍဟ်ညာန်ထတ် တၟံကွတ်ဇဳဗီုဇုက်လလဳ ညာန်ဘာန်စဳခၠ။ ဂွံပိဝသ်ပၠန် ဟွံတန်ထာဏ။စိုတ်ဂၠုက်သလံင် တူလှောံညံင်လ္ၚ။ ပိဝါခပ်သီ ပ္တီအ္စာရ။အ္စာကဵုရောင် အခေါင်တုဲပၠ။ ၜးသ္ၚာရ မဂေါဝ်ဆာဲ။ ဗိုင်ယာတ်သၠိုင်ဖေင် ဝတ်အကေင်ဗၠာဲ။ တုက်ဍာ်ဇိုင်တဲ မွဲတ္ၚဲဟွံသာဲ။ တွံၚးလွဳလွတ် ဂိုင်ကၟတ်ၚာဲ။ စှ်ၜါတ္ၚဲဆာဲ ဟွံသာဲနူဘာကၠောန်လွဳဟွံပိုတ် ကေတ်စိုတ်အ္စာ။ အ္စာသ္ဍိုက်အိုတ် တီစိုတ်တုဲမာ။ သၟိက်ဂွံစဴသ္ၚိ ကဵုမိသေင်ဟာ။ ပ္တီအ္စာသၟတ် ပဝတ်ပိဝါ။ ကလံအ္စာတုဲအဴ စဴအာသ္ၚိတုန်။ 	။

မဒေကာင်ပိုန် နာဲဒတိုန်ဂုန်။ စဴသ္ၚိတုဲတုန် သၟိက်ခၠေဝ်ဂုန်ယာဲ။ ကေင်ကာပ္ဍဲသ္ၚိ ဒမၠိကၠောန်ကွာဲ။ ကာလသၟိက်ဒှ်တဝဟ်စလာဲ။ အဒိသၞာံဗလာဲ ကျာပင်လာဲချဳ။ ကျာပိုက်ဗလဲ မတ်ဗြဲယာယဳ။ တေံမတ်ဗြဲချဳ လလဳတန်တန်။ ညးဂမၠိုင်သ္ကဲ ညာတ်မတ်ဗြဲပၠန်။ ညးကွာန်ဒင်မာဲ ဂၠာဲချပ်ဂၞန်။ ကၠာဗြဲဟွံဂၠိုင် သိုင်သ္ၚိခိုဟ်သန်။ ပိုဲသိုင်သ္ၚိကၞာတ် ဆုဒုန်ဝါတ်လောန်။ ပိုဲအာဂြိုပ်ပၠန် သန္ထာန်သာလေဲ။ ဆုဒုန်တီုကၠီု တုပ်ဗီုညံင်သြေဲ။ ဟွံဂွံဍုတ်ဍေဲ ညံင်သြေဲသၟဟ်န်။ ပိုဲအာဗာ်နင် ခိုဟ်ဂးက္ဍင်သန်။ ယာံစိုတ်သၟန်န် ကြိုက်စိုတ်သန်ရ။ လဣနင်ဒဴ ထဴမွဲစဳခၠ။ ဟီုဇီုတော်ဆ ပဇမၞော်ကၠာ။ ညးဂမၠိုင်ပ္ညဳ စိုတ်သၟဟ်ညဳသာ။ လိင်ဂၠုင်မွဲကၠာ ချပ်ယာယဳပၠန်။
ဂွံဂၠုင်ဖါမွဲ သာက္ဍာယဲသ။ ကောန်ဂၠိုင်ထတ်မြက် ဖန်ဖက်ဇွောံမ။ ညာတ်ညးစဳရေင် အာဂြိုပ်ဟေင်ရ။ မဒကောင်ပိုန်ဒတိုန်ရုပ္ပ။ ဟိုတ်ဒါန်တမၠာ မပ္ညုင်ဏာမ။ ဂကောံညးရသၟိက်ပယာယဳ။ ပတန်စိုတ်ဟွံတန် ပၠန်ဂတးချဳ။ တိုန်ပ္တီမိပ္ညဳဒၚဳဟီုတိုန်ရ။ ယွံမိကျာ်ဂန် ပြဲသန်ရုပ္ပ။ ညးဂမၠိုင်ရ ပတဴယာယဳ။ ဗာ်ဆုဒုန်ကိုပ် လုပ်ဂြိုပ်အနဳ။ အဲသၟိက်အာကောံကရောံညးပ္ညဳ။ ဟီုပ္တီမိရ တၠကျာ်သဳ။ မိင်ပါင်ကောန်ပ္ညဳ ကၞပ်သ္ၚဳဒၟံင်တဴ။ 	။

မိဗြဴကၟာဲသ္တိုတ် လကိုတ်ဆဴဆဴ။ ကတောဝ်က္ဍိုင်မတ်ဂၠု ဇကုဒမြဴ။ အဵုဣတယာဲ နာဲလၟာဂၞဴ။ နာဲဍိုန်ၜတ်
လောန် ယွံကောန်သာ်ပ္ကဴ။ ဗာ်ဆုဒုန်အဴ ဟွံထေက်တဴကၠာ။နူနာဲသွတ်ပၠန် မိချပ်စောန်စာ။ တောံပၞာဲဇိက်ဗ္ၚ ယာဲဟွံစကာ။ ကဵုမမံင်ဘာ ဂၠာဲအာကတ်ဗ္တောန်။ ကလောန်ပ္ဍဲသ္ၚိ မိဟွံကဵုကၠောန်။ တြဴဂြိုပ်ဂၞိန် ဓဝိင်ယာဲလောန်။ ပအာညိကောန် ဂၠုထဝ်သောန်ယာဲ။ ကောန်မိင်ပါင်မိ ဒမၠိအီကွာဲ။သီုကဵုစရာ ဟီုပ္တီယာဲပၠန်။ 	။

ဂုန်ပြဲဂၠိုင်သာ် ယွံမိကျာ်ဂန်။ တၟံသတ်တံပၠန် တန်ပ္ဍဲသံသာ။ ဗၞတ်ကံကုသဵု အကုသဵုကၠာ။ ဒှ်ဗၞတ်သေင်ဟာ မိပိုင်ခြာညိ။ အဲဍိက်တုန်ကီု အာသီုသတိ။ အာစိုပ်ဂြိုပ်စိ ဒမၠိဇၟာပ်ဒၞာဲ။ ဒးဗာ်ဆုန်ဟေင် ဟွံသေင်ရယာဲ။ အဲအာဂြိုပ်မာအာမင်စတာဲ မိပတ္ၜူမာဲ ယာဲပလ္ၚာပ်လ္ၚာ။ နူအဲဒှ်တြုံ ဇၟာပ်ကွတ်လုပ်စာ။ ပါန်မုက်ပါန်ခဳ ဗဳသ္ကဝ်ဇၟာပ်ကာ။ ပုတ်ဂၞတ်သောန်ဒါတ် ဒၞာဲညာတ်ကၠောန်အာ။ ကွိင်ကွိုက်ဂးကၠာ ကျာံခရာဂြဝ်။ ဇၟာပ်ကွတ်ဟွံဖိုတ် လေပ်အိုတ်ကာဲကဝ်။ စရာဲစတ္တဝ် ယာဲလွဳလဝ်အဲ။ ကဵုယာဲဒးဒိုက် ဟွံကြိုက်မွဲတဲ။ ပဂွိင်ကဵုအဲ မွဲတဲညိအဴ။ 	။

မိမိင်ပါင်ကောန် ဟီုဝေါန်စဝ်တဴ။ မံင်ဍိုန်စိုတ်ကၠာအာရကောန်ဂၞဴ။ မိစဳရေင်အဴ ဇွောံမတံကၠာ။ ပလံင်ဖျေံပ္ညုင်စဵုစိုပ်ဂၠုင်ကၠာ။ ယွံနာဲဂၠုင်အဲ မပြဲသာ်လွာ။ ကောန်အဲမအာနာဲဍံင်သွာညိ။ ကြုင်ဇြိုဟ်ကျာံဂြဟ် ဂြိုပ်ဒှ်ဂြိုပ်ဂျိ။ အာကဵုခိုဟ်ညိ ဂၠုမိသာ်ပ္ကဴ။ အဵုဣတမိ မဂ္ညိနုဘဴ။ ပဝိုတ်ပါင်ယာဲနာဲလၟာဂၞဴ။ မိဖကန်တဴ ကဵုကောန်ဂၞဴကၠာ။ နာဲဂၠုင်ကောန်ဂၠုင် ကၠုင်အိုတ်တုဲမာ။ တိုန်ဍိုက်ဂၠုင်ပၠန် သၟဟ်န်ညဳသာ။တုဲလ္ၚောဝ်ရတ်ပိ မိမအ္စာ။ ဒေဝတဴကီု အိန်ဗြီုယီုယာ။ ဘုမ္မဇဵုရ ရုက္ခဇဵုကၠာ။ အကာသဇဳု ဒေဝဒေဝါ။ ဒေဝတဴက္ၜဳ မနဳခလာ။ မၞးတံဍံင်သွာ ပိုဲမအာရ။ 	။

ဟီုဇီုတုဲဒှ် သၟဟ်န်စိတ္တ။ ဒကက္ဍိုပ်ဂၠုင် ဒေါဝ်ကြုင်တိတ်ဂျ။ ဂၠုင်ဖါသာသန် ပါင်ပန်မွဲက္ဍ။ ၜါစှော်တ္ၚိုက်။ တိုက်အာလျလျ။ နူဂှ်အာစိုပ် ဗဒိုပ်ဖျာက။ အာနူဂှ်ရ ဒဵုမကဴကၠာ။တိုန်လ္ၚောဝ်ရ ဗုဒ္ဓကေသာ။ မွဲဗတံပၠ ဒီုမကဴကၠာ။ တ္ၚဲယးဖလာင် စာင်ဂြဴညှာညှာ။ ဖဝ်ရဂုတ်ဗြု လဒုကြဵုဇာ။ အရှိုန်တၟးတ္ၚဲယးခၠင်အာ၊ တဲရပ်တ္ၚိုက် တိုက်အာညှာညှာ။ အာစိုပ်မုဟ်သၞာ် ဍာ်ညံင်ဗဒါ။ နူကဵုမုဟ်သၞာ် စာင်စ္ဍးတိတ်အာ။ စိုပ်အာဗၠာဲကျာံ။ ပယျာံသန်ၛာ။ နူဗၠာဲကျာံကၠာ တိုက်အာလၟေင်လၟေင်။ တ္ၚဲသဝ်ဗလဗလ စိုပ်ဒေသသြေင်။  စိုပ်ဗ္ဒိုပ်ကၞာတ်ၜးယာတ်သၠိုက်ဖေင်။ အိုတ်ညးဂမၠိုင် ကျိုင်ကျဝ်သေင်လေင်။ ကျိုင်ဗြံက်ဗြဟေင် ဂဇံရေင်တဴ။ စက်တ္ၚဲဗဒန်သၟန်ပၠေဲပၠဴ။ ဂစေံဒျာန်သၞေင် ပဝ်ကလေင်စဴ။ ခဍိမြာကွဴ ပဝ်စဴဒနဳ။ ဘုတ်ပြိုက်စာဂြိုဟ် လကိုဟ်ဂဟီ။ လိုက်ထောဝ်ဂတေဝ် ဍေဝ်စလာင်ခြီ။ သွိုဟ်ဂြိုပ်က္ဍိုပ်ဒဵု တံဝဵုဓနီ။ သတ်ကၠံလ္ၚီ ဓနဳစဴအိုတ်။ မာတ်တ္ၚဲသဝ်ပၠိုတ် ညန်အိုတ်ကာလ။  ။

နာဲဂၠုင်တော်ဆ သ္ၚိဇြချပ်မံင်။ ကောန်ဂၠုင်တံကွေံ၊ ဍေံဒယှ်ေကၠံင်၊ ရမျာင်ဍိုန်ဍိုန်၊ တိင်တတိုန်စံင်။ ဒြဝ်ကျာံလဒု၊ တိင်ဗရုဆံင်။ တ္ၚဲယးအာရံင်၊ အထံင်သၞေဟ်သြေင်။ ဍာ်တိုန်ပေင်ဂျ၊ ဒးကာလဟေင်။ ဟာပ်ပုင်သွတုဲ၊ သုဲအာဗွဲလၟေင်။ ဒျာန်တ္ၚိုက်ပ္ညုင်၊ ထောံလဝ်ဍုင်သြေင်။ တိုက်အာဗွဲလၟေင်၊ နူသြေင်ဟွံသ္ၚောဲ။ ဍာံတိုန်ကျာတိုန်၊ အလိုန်တိုန်သဲ။ ဍာ်စှ်ေကျာစှ်ေ၊ သွးစှ်ေဗလဲ။ ဇမောဝ်ဇွောဝ်ဍိုက်၊ တ္ၚိုက်ဇၟာပ်တဲ။ ဍာ်စှ်ေသိုက်သိုက်၊ ဆိုက်ပါင်အလဲ။ ညာတ်ကျာ်လဂုင်၊ ယဵုတၠုင်တဲ။ ပင်ပ္တိုန်က္ဍိုပ်-ဗစိုပ်ကၞေင်ပြဲ။ ယဵုသမိပ်တဲ-အဲပရဲကၠာ။ ညံင်အာစိုပ်ဟေင်- ဍုင်သွဝ်သေင်ဟာ။ ရပ်တၚိုက်ပၠန် တိုတ်ဗ္ဂန်ညှာညှာ။ ကျာမှာသမိတ် ဍိတ်တ်ပိုတ်အာ။ ဂၠိုင်ကဵုအလိုန် ဇွိုန်ဇၟးဖက်ဖါ။ လပှ်လမဴ ညံင်ဗီုပ္ကဴသွာ။ မွဲဒှ်မွဲပၠိုတ် မွဲကၠေံအိုတ်အာ။ လပှ်သဲသဲ အနုဗလဲဒွါ။ ဆုၜါလပါ် ဂၠိုင်သာ်နာနာ။ လမုလမေဝ် တေင်ကၞာင်မံင်ဗ္ဂါ။ နူဂှ်စှ်ေနာင် ဂွံပါင်ဂင်္ဂါ။ စမဳညာတ်အာ ခလွာသာဲလေဲ။ ဂြိုပ်သ္တဵုသလံင် ဆုဒုန်ညံင်သဲ။ ကဵုပါင်စမြေဲ သေဲသေဲဟောကၠံင်။ ပလှ်တၚိုက် တိုက်လုပ်နာံထံင်။ ကဵုပါင်ဟောကၠံင် ဗလးခဏံင်ဟေင်။   ။

ပလှ်တၚိုက် တိုက်လုပ်ဗွဲလၟေင်။ စိုပ်ဗဒိုပ်ဟေင် ဗဒိုအ်ဂၠုင်ဟော။ ဗ္ဒိုအ်ဂၠုတုဲပၠန်-ချပ်တိုန်စန်စာ။ ဂြိုပ်ဝွံတုန်ဂှ်- ပဒှ်သာ်လဝါ။ နာဲဂၠုင်တိုန်ရံင် ဒမံင်အရာ။ ဆုဒုန်အိုဿီု သိင်သာတီုညဳသာ။ ညာတ်ဆုဒုန်ပၠန် တ္ၜန်တ္ၜောန်သ္အဳဗ္ဂါ။ တပ်တးတရေင် တပ်သတေင်ညဳသာ။ လ္ၚဵုဂှ်သၠုင်ဗြိုင် ရိုင်ရိုင်ဒၟံင်ကၠာ။ ဝိကဝ်ဝိကာ သဂါပြဴပြာန်။ ဗြီုပြာ်ကှ်ေကြုင် ဂမုင်ဓိတာန်။ ရီုဓနဳကာန် ဍေံတၞာန်မံင်ပၠ။ လစောတ်လမောဝ် လယောဝ်ကၞာင်သၠ။ ဂမောဝ်ဂစွံ ဂကောံဗင်ယ။ ဟွံတီနန္တ သတ်ဂျိတလာဲ။ ဒၞာဲသတ်သတ်တဴ ဒၞာဲကဴကဴၚာဲ။ လ္ၚဵုကြံင်သၟတ် လ္ၚဵုၜတ်ဆာဲ။ ဒၞာဲပြဟ်ပြဟ်မှုဲ ဒၞာဲအုဲသ္အုဲလာဲ။ လ္ၚဵုကြံင်သာဲ ဒၞာဲယောင်လာဲအာ။ ဍေံမဂၠိုင်တဴ ပ္ကဴသြဴနာနာ။ ညာတ်ဆုဒုန်အိုတ် မိပ်စိုတ်မှောဝ်ဇာ။ လဣနင်ဒဴ ထဴကြီုကြဵုဇာ။ လတုန်ဝွံသွံ ဂှ်ပိုဲဂွံမြာ။ ဆုဒုန်ဝွံပၠန် ခိုဟ်သန်မြိုတ်ဖါ။ မိပ်စိုတ်မှောဝ်ဇဴ နာဲသာလထဴ။

ကော်ကောန်ဂၠုင်ပၠန် ဝေတ်ဗတောန်ဟီုတဴ။ ယွံလေဝ်မၞးတံ စိုပ်ဂြိုပ်ဏံအဴ။ ဂြိုပ်ဝွံဂြိုပ်ဂျိ ဆုဒုန်ဂ္ညိဂၠဴ။ ဇြုံသေင်ကၠဗြန် ကုမ္ဘန်ဓနဴ။ လကိုဟ်ဘုတ်ဇၞော် ကလော်တြုံဗြဴ။ နွံကီုဟွံတီ ခပ်သီသဘဴ။ မၞးတံတုန်စိ သ္တိသှ်ပတဴ။ လုပ်ဂြိုပ်စှ်ေဍာ် ဂၠိုင်သာ်ပဒြာ။ ပဟိုတ်မာဲညိ သတိကြက်လှဴ။ ပိုဲမၞးတံအဴ မကၠုင်တဴလၟုဟ်။ စိုတ်ပကဵုထစေင် ဗွဲလၟေင်ဒုဟ်။ မၞးတံကၠေံစိုတ် ကၠောန်ၜိုတ်ပလုတ်။ ပလွဳကၠောန်ၜိုတ် စိုတ်ပကဵုလၞုဟ်။ ဂလာန်ဣၚုဟ် ထဴကဵုကဵုပ္ၚုဟ်ဆာဲ။ ဟီုဝေတ်ဗ္တောန်တုဲ ရုဲဒၟံင်ဒၞာဲတာ။ ဗာ်ဆုဒုန်ဗဝ် စွံလဝ်ဟွံသာဲ။ ညးလ္ၚဵုဂှ်ယိုက် လ္ၚဵုဂှ်တိုက်တာဲ။ ကၠောန်တာဲညံင်သိပ် မိပ်ဇြိပ်လောန်ကာဲ။ မဒကောန်ပိုန် ဒတိုန်စရာဲ။ ဗတာင်လာဲဆေဝ် ကျေဝ်ဂေါဝ်လောန်ကာဲ။ ကၠောန်လဝ်ဇပ်ကၠိပ် သေပ်သိပ်ဇၟာပ်ဒၞာဲ။ ဇိပ်ကၠိပ်ကျေဝ်လာဲ ကၠောန်တာဲတုဲဒှ်။ ကပေါတ်ဒယိုန် ပ္တိုန်စွံလဝ်သၟဟ်။ တောံပုင်တောံသွ စဟာပ်တုဲဒှ်။ ကပေါတ်တံဂှ် ဂိုင်လပှ်အိုတ်။   ။

နာဲဂၠုင်ကောန်ဂၠုင် ကောန်ကၠုင်ဖအိုတ်။ ဂဇံသၟဟ်န် ပ္တန်သူစရိုတ်။ သၟိင်တ္ၚဲတုန်ပၠ တၠက္ဍိုပ်ဗိုတ်။ ဗ္ဂန်သိန္ဓဴလ္ၚီ မြီမြီဟွံပိုတ်။ လိုန်ယုဂန္ဓဝ် စဝ်ဒိုဟ်ပလိုတ်။ ဂမဝ်တၟံသိန် ဂၠိန်စဴတၟံဗိုတ်။ မှတ်တကံအမ္ဗါ ယာယဳစရိုတ်။ တူဍာန်အမှဲ မာတ်တ္ၚဲသဝ်ပၠိုတ်။ လျးညံင်လလဳ ဗစဳလက်ကိုတ်။ လျးညံင်အမြိုတ် ခၠင်ဂိုတ်သလုဲ။ လ္ၚဵုသ္ၚဳမၠာ ညံင်သာ်ကၠေင်ၚုဲ။ လျးညံင်မတ်မၞိက် ထမှိက်သာ်လှုဲ။ ကၠေင်ကကၠေင်ၚုဲ ဒေါံသၠုဲခၠင်။ ညံင်ဍီုညံင်ဗြေဝ် ညံင်ပစ္စေပ်က္ၜင်။ လ္ၚဵုသာ်ပ္ဍီု ညံင်ဗီုကယင်။ လ္ၚဵုသာ်လွာ ညံင်နဳလာက္ၜင်။ လ္ၚဵုသာ်မြ လျးခၞဗ္ၜင်။ ညံင်သာ်မဒါ ဂၠံမိကာသဂင်။ ဆုဇဝ်တဝ်သၠ လျးခဏခၠင်။ မာတ်တ္ၚဲကၠောံပျး အမ္ဗာဒဳပင်။ မာတ်သၟိင်ဒမၠု သံက်မြုဝင်။ သတ်ဇၟာပ်ကလင် ဖန်ဆင်ဒၞာဲဝါဲ။   ။

သတ်ဂြိုပ်ကၠံလ္ၚီ စဴဓနဳဒၞာဲ။ ဆဒ္ဒန်ဗၠန်ရိုင် ဇြဲသုံဗၠိုင်ဆာဲ။ သ္ပဝ်စဴသတိက် ဂြိုပ်ကြိက်ထဝ်ဗၠာဲ။ ဟဝ်ကၠိုင်ဒျာန်သၞေင် ပဝ်ကလေင်ဒၞာဲ။ သဳဟာဗၠန်ဒၚာ် ဂိုဟ်ထဝ်စရာဲ။ ကြဝိတ်ကြဵုသာင် မှတ်ပနာင်ဒၞာဲ။ က္ၜိုင်ကၠိင်ကွေံ ပှ်ပှ်ေမင်ဂြာဲ။ မှတ်ဓနဳဆာဲ ဂၠာဲတၞံမူလ။ လဟေဝ်အယုက် မှတ်တၞံရုက္ခ။ မြာ်မှတ်တၞံဆု ဗြုကြဵုသဒ္ဒ။ စိင်ဗ္တာင်ဂျ လဇထာင်သွာ။ ဗလန်ဒၟံင်ရော ဇြဲနိဂြောဓ။ သတ်ဂြိုပ်ကၠံလ္ၚီ တီဒၞာဲအရာ။ ဗလန်စဴခမ်သီ ဓနီခန်လွာ။ သၟိင်တ္ၚဲပၠိုတ်ကၠာ မဗ္ဒန်အာတုန်။   ။

ခနေင်ဇီုဗြု လဒုသောန်န်။ ဂစေံဝုတ်အဵု ဗြုကြဵုဒက်ဒေါန်။ အကြာဂြိုပ်ဇၞော် ဗၜဵုကော်ကောန်။ ကၞုဲဒြေပ်လဆောန် ကော်ကောန်ဂမြံ။ ပြေပ်ဂမာသောန် ယောန်အာဗတံ။ ပှ်ဗြုစလာင် ကဵုပါင်သ္ၚံသ္ၚံ။ ကၠကဵုအသံ ကၞုဲစှ်ေစံတိ။ က္ၜိုင်ပှ်စိင်သိတ် တိတ်တွဳဖိ။ သတ်ဂြိုပ်လုပ်တိ လဗိလမန်။ အသံဂြိုပ်ဇၞော် ဗော်ဟေမဝန်။ ညံင်ဗီုအမြိုတ် လှိင်စိုတ်လောန်သန်။ တ္ၚဲသဝ်ပၠိုတ်ဂၠု ပ္ဍဲစိုတ်လ္ၚုလ္ၚန်။ မဒကောန်ပိုန် သာင်တိုန်စံင်ပၠန်။ တိင်ကြဵုလဒု ဗြုကြဵုသဂြန်။ ညးလ္ၚဵုဂှ်ပၠန် သောန်န်သဒ္ဒ။ လ္ၚဵုဇက်ဒြဝ် ဒယှ်ေအင်ဇ။ တလောတ်ကျာံကီု တိင်ပြီုစိုတ်ရ။ ဝေင်ဂြိုပ်အဵုဇိုတ် မိပ်စိုတ်ယဲသ။ ဂၠုလောန်တုဲရ ကာလသန်ၛာ။ ကွိင်သ္ၚိတ်ဇြကၠာ ဒၚဳလှိင်အာတုန်။   ။

သၟိင်တ္ၚဲတုန်ပၠ ပြမနွံဂုန်။ ဂပဝ်တၟံတန် ဇက်ကလုန်ရ။ ပ္ၚောံတကံလ္အိတ် ဇမ္ဗုဒိပ္ပ။ ဇမ္ဗုဒိပ်ကၠံင် အရံင်သာ်မြ။ ညံင်သာ်သၠုဲကၠာ ဗီုပမာဏ။ ညံင်သာ်ဍာ်တှ် ခၠင်မြဟ်ကာသ။ ဗဂန်သိန္ဓဴလ္ၚီ မြီလျလျ။ လဝိင်ဇုက်ဗလဲ လီဒတဲရ။ ရပ်ကလးထဝ် ဗ္ဒဝ်က္ဍိုပ်သေတ။ ဂိုင်စမြိုင်လျး သလးဗျူဟ။ ဗပေက်ကၠေံကၠာ ပၞာန်အန္ဓာတ။ ဒမၠုပၠိုတ်သ္အး တၟးတိုန်ဗလဗလ။ ညာတ်ဇိုင်အရှိုန် ကွိုန်သူရိယျ။ ဍေင်ဂြဴလဒု ဗရုသဒ္ဒ။ ဖဝ်ရဂုတ်တြး ကော်ဂးတိုန်ရ။ ကမာတ်အိုင်ဇၞော် ဂၠာဲကော်မသ။ ကွဴဂြဴပြာထော် မြာ်ကော်ကောန်ပၠန်။ ဒိုင်ဗျုုဒိုင်ဗြောန် ယောန်ဂၠာဲစဏ။ ကၠိုဟ်ဗလိုပ်ဍာ်တုန် အဘဴဍုန်ရ။ ထိုင်သာဲပဝ်သၠောင် ဇာပ်ဍောင်ပုပ္ဖ။ ဒြဝ်သၞေင်လဒု ဗြုတိုန်သဒ္ဒ။ ညံင်ဗရုပၠန် ကွိင်ပန်စင်္ဂ။ တ္ၚဲတိုန်တၟး လျးခၠင်ခဏ။ လဣနင်ဒဴ ထဴချင်တော်ဆ။ ဗယိဗရာန် ထာန်ဝွံမူလ။ ပိုဲသကဵုစၞ ပိုဲသ္ပရဴဂဴ။   ။

နာဲဂၠုင်ဇၞော်စိ လဣနင်ဒဴ။ သာ်ဝွံရောင်ဒး ဟီုတြးကမြဴ။ ဟီုဇီုတုဲဟေင် စဳရေင်ဆဴဆဴ။ ပြုပြေင်ပုင်သွ ဖျုန်ကဗြာတ်က္ၜဴ။ နာဍူယိုဟ်သကဝ် ပြေင်လဝ်ပ္ကဴသြဴ။ သီုမဗိုန်ဇၟံ ဂဇံရေင်တဴ။ ယဵုသၟိပ်တဲ အဲပရဲအဴ။ တုဲကော်ဗစအဴ ဒေဝတဴဂြိုပ်။   ။

ယွံဒေဝဴ မၞးတဴပ္ဍဲဂြိုပ်။ မပိုင်ဂြိုပ်ယာန် ထာန်ဝွံနူကိုပ်။ ပိုဲမကၠုင်စိုပ် ဗဒိုပ်ဝွံအဴ။ ပုင်သွအမာဲ ပိုဲဂၠာဲကွာဲတဴ။ ယိုဟ်က္ၜန်ကွာင်ရ ပိုဲပပူဇဴ။ ယွံဒေဝတဴ နုဘဴဇၞော်ပြဲ။ ပိုဲဗလိဗဇဴ ပူဇဴအဲပရဲ။ ကွာင်ၜဲယိုဟ်က္ၜန် စပၠန်ကဵုဘဲ။ ဖဵုပိုဲယိုက်ဒိုက် ပရိုက်ကဵုသ္ၚောဲ။ က္ဍိုပ်ဂိသေင်ဇှ် လ္ပကဵုဒှ်ညိ။ သတြုနာနာ ပကဵုပါမြိ။ မင်မွဲပိုဲညိ ဒမြိဍံင်သွာ။   ။

သာ်ဝွံတုန်အဴ ထဴရာဒနာ။ တုဲစရိုတ်ဟေင် ဍာ်သၠိုင်သေင်ဟာ။ ဗလိဂပဝ် တုဲဒှ်မှောဝ်ဇာ။ ညးဂမၠိုင်ကၠာ စဴအာတာဲရ။ စိုပ်တာဲတုဲပ္ညုင် စုတ်ဟာပ်ပုင်သွ။ စဟာပ်တုဲအဴ ရပ်တဴၜုန်မြ။ ကေတ်မုဲကွာန်ရ ဟဂွံဟိုတ်မာဲ။ မဒကောင်ပိုန် ဇိုန်ကဵုမင်တာဲ။ ညးလ္ၚဵုသၟပ် ရပ်မြတရာဲ။ လဣနင်ဒဴ ထဴတတ်ညံင်ဗၠာဲ။ ထောံဒမံင်တာဲ ကွာ်သာဲလုပ်ဂြိုပ်။ ကလောန်နူကိုပ် ဗာ်ဆုဂြိုပ်ဂၞိင်။ ကၞံင်ဒမင်ပၠ ခဏဝိုန်စိင်။ မုဟ်ဇံင်ဇမၠိင် မုက်ကျာသွိင်ရ။ ကောန်ပဠောပ္ညဳ ဒရေပ်ကၞဳပၠ။ ဆဒယိုင်ကီု လဝ်သီုကဓ။ ဖန်ဖက်တုဲအိုတ် ကၠေံစိုတ်ဗာ်ရ။ တုင်တုင်တိင်င် ဗာ်ဂမြိင်ပၠ။ ဂမြိင်ဂမြံင် အာကွာန်မြ။ ဂြိင်င်ဂြံဂြံ စှ်ေဂမြံင်သ္ဒး။ တုင်င်ဗာ်ဆံင် စှ်ေညံင်ဗတ်သၟ။ ဂမြိင်ထဥ ဗရုသဒ္ဒ။ လလောင်တမ်ညဝ် လုမ်ဂြိုပ်အဝ်ဇ။ သီုညးဖအိုတ် သၟဟ်တဴစိုတ်ရ။ ကၠောန်ၜိုတ်ထဒၟ ဟဂွံဟိုတ်မာဲ။   ။

မဒကောင်ပိုန် လမိုန်မင်တာဲ။ ဇကုမွဲဒၟံင် ညံင်ညးဖရာဲ။ ဗှ်ဇကုမွဲ လ္ၚုလောန်ကာဲ။ စံင်ခရာကီု တိင်ဓဂီုတာဲ။ တိင်ကြဵုလဒု စံင်ကျာံဗြုၚာဲ။ ဒွက်ဂိုန်ဂၠိုင်ဒၞာဲ ဂၠာဲနာဲအခိုက်။ ရမျာင်ကြဵုတိုန် တလိုန်သိုက်က်။ မိင်ရမျာင်ကၠာ ဒၞာဲအာဒးသ္ဍိုက်။ ညိဟွံဟိုတ်မာဲ ဇၟာပ်ဒၞာဲအခိုက်။ ညံင်ရှ်အမြိုတ် မိပ်စိုတ်ဒးသ္ဍိုက်။ တိင်သီုအခိုက် သော်ဂရိုက်ဆာဲ။ ရမျာင်ကဵုကွိင် မိင်ဂြိုဟ်ညံင်လာဲ။ စိုတ်သၠောင်ပူမဟ် ညံင်ကြံတ္ၜူမာဲ။ ကာလသၟိက်ဒှ် တဝှ်စလာဲ။ ဒါန်အတိက်အဵု ပ္ညုင်နင်ကဵုနာဲ။ သၟိက်ဒှ်စလာဲ နာဲဒကောင်ပိုန်။

မၞးတံကလင် ပင်မှိင်ကဵုဗိုန်။ တၞမ်ဆုအသဝ် ဂြိုပ်ဗဝဝ်ပိုန်။ ပ္ဍဲဂြိုပ်ဂှ်သွိုန် ဒှ်ကွိုန်ရုက္ခ။ နွံဇြဲသုံမွဲ သဂီုကၠီုယဲဆ။ ဘုံသဓုံဗျာင် မဂၠိုင်ကၞာင်သၠ။ ဒှ်လွဳမာန်အဴ ဒေဝတဴပၠ။ ဒေံဝတဴဂှ် ကြဳဇှ်က္ဍင်ပြ။ ဒှ်သၟိင်ကလော် မဇၞော်တေဇ။ ပိုင်ကလော်ဂၞိင် ဒှ်သၟိင်ယက္ခ။ တြုံကဵုဗြဴရ သၟိင်ဒေဝၜါ။ ဂွံကောန်ဗြဴပန် ရုပ်သာ်ကညာ။ ညံင်ထဝ်ဒကောင် ညံင်ဍောင်စမ္ၚာ။ အရံင်ဇကု အနုထာင်သွာ။ ကောန်ဗြဴပန်မာ နာမခုတ်လဝ်။   ။

မွဲဂှ်မြိုတ်တင် မွဲတယျင်ထဝ်။ ကောန်ၜါဆတ္တဝ် ညံင်သွဝ်ကေလာ။ မွဲထဝ်ဒကောင် မွဲဍောင်စမ္ပာ။ ယၟုခုတ်ကၠာ နာမဗြဴပန်။ သီုညးပန်ဂှ် ရုပ်ဂေါဝ်သၟဟ်သၟန်။ ကျိုင်ဒၟံင်ပၠန် သၟဟ်န်ညဳသာ။ မွဲလွဳမာန်ဘုံ ဇြဲသုံသေင်ဟာ။ ဇြဲဂှ်ဟွံသာဲ နူတာဲဂှ်ကၠာ။ ကောန်ဒေဝတဴ ဗြဴပန်ဂှ်မာ။ ဟိုတ်ဒါန်တမၠာ ဝါသၞာပ္ညုင်။ ညန်ကဵုတာဲပ္ညဳ ဒ္ၚဳဂါံကွာ်ကၠုင်။ သီုဗြဴပန်ပ္ညုင် ကွာ်ကၠုင်ညဳသာ။ ဒကောင်ပိုန်သွံ ထောံမတ်ညာတ်အာ။ ကျာံစံင်ခရာ ခါဂှ်ဂိုင်တိင်။ ဇိုင်ၜါသက်လက် တက်ခဍေဝ်သွိင်။ ပါင်ကြီုလဒု သီုဗရုကွိင်။ နာဲဒကောင်ပိုန် ဍိုန်န်ဂိုင်တိင်။ ဒေဝတဴပန် ရုပ်ကညာဂၞိင်။ ယာံမဂွံမိင် ကွိင်ပါင်ကွိင်တဲ။ စိုတ်ချဳလရု ညံင်ဆုရေရဲ။ ပၟတ်ရာဂ စံင်ပၠန်စိုတ်ပ္ဍဲ။ ပလိုတ်ဟွံမာန် တူသၠာန်ဟွံဟဲ။ ဂုဏ်ကိလေသ ကာမစိုတ်ပ္ဍဲ။ ညာတ်ရုပ်ဒးဂၞပ် ပ္ဍဲမတ်စပ်လဲ။ ဗရုပ်မိပ်ကၠာ ကတောဝ်ၜါမိင်သ္ကဲ။ သ္ဍိုက်သန်လောန်တဲ ပ္ဍဲဂှ်ညးပန်။ ဒါန်တမၠာသွံ သၟိက်ဂွံဆိုက်ညန်။ မွဲသၞာသတိက် သၟိက်ဂွံလီတ္ၜန်။ စဴအာပ္ညဳပၠန် ကျာ်ဂန်မဟာ။   ။

ယွံမိကဵု တၠဂုဏ်ၜါ။ ပ္ဍဲဂြိုပ်တေံဂှ် ကြဳဇှ်ပြာထာ။ မင်ဗၠာဲမွဲပၠန် နွံကဵုပညာ။ မၞုံလက်သန် ပြဲသန်သာ်လွာ။ နွံကဵုကျာ်သြဳ အိန်ရဳတပ္ပါ။ ရုပ်သာ်အဝဲ နဲညးကေလာ။ က္ၜိင်ပါင်ကွိင်တဲ ညးဟွံမွဲၜါ။ ပိုဲညာတ်မံင်ကၠာ စိတ္တာဟွံတန်။ ထုဲကြာန်ဓမာန် အာန်တၞာန်စိုတ်ပၠန်။ သၟိက်ဂွံဟုဲဟဟ် မွဲဟာန်သၟဟ်န်။ ဂကောံမင်ဗၠာဲ သၟိက်ဒိပ်ဒါယ်သန်။ ပိုဲဍိက်ညးပန် ပ္တီပၠန်မာတာ။ မိမၜါမိင် ချပ်တိုန်သိင်သာ။ ဟွံဒးပွ ဂွကဵုညးကၠာ။ မိကဵုမၜါ ဟီုဆေဝ်တာပၠန်။ ယွံလေဝ်ကောန်တံ မၞးတံညးပန်။ တေံကောန်ညးဟေင် ဇာတိတၟေင်သန်။ ညးဒှ်သက်သၟိင် ဇာတိမၞိဟ်ပၠန်။ ပိုဲဒှ်ကလော် လုပ်ဗော်ဓဇန်။ ကောန်ညးဇာတ်ညး ညးဂိုဟ်လောန်သန်။ လ္ပပြာပ်ညန် ပ္တန်လဝ်စိုတ်ညိ။ မိမၜါပၠန် ဝေတ်ဗ္တောန်စိ။ ဂၠိုင်ကဵုဝါရ ပ္တီမကဵုမိ။ ယွံမိကဵုမ တၠဣဒ္ဓိ။ ယာံဟွံဂွံညန် ပိုဲသ္ကန်ကလိ။ တ္ၚဲဏံဟာယး ပိုဲဒးစုတိ။ ကဵုအခေါင်ညိ ယွံမိကျာ်ဂန်။ မိကဵုမပၠန် သ္ဍိုက်ပ္ဍဲကောန်ဂၞဴ။ သီုညးပန်ကၠာ ချပ်ပိုင်ခြာတဴ။ ယာံဟွံဂွံရောင် အခေါင်ဆဴဆဴ။ စံင်တူလျးပၠိုတ် ဒးချိုတ်အာတဴ။ ပိုဲဒးဒှ်ကောံ သ္ၚောံဗွဲကြဴ။ ဟိုတ်ဒါန်ဍေံကၠာ တမၠာတေံအဴ။ ဇြဟာန်ဖ္အောဝ်လဴ ဒးဒှ်တဴရောင်။   ။

မိမၜါသ္ကဲ ချပ်တိုန်မွဲတောင်။ ဒးကဵုအခေါင် ခိုဟ်ရောင်သဘဴ။ ကောန်ဒေဝတဴပန် ရုပ်ကညာဗြဴ။ ဂွံအခေါင်အဴ ရဴဝွံစောန်စာ။ သီုပိုဲညးပန် သၟဟ်န်တဴကၠာ။ တြုံဝွံဂေါဝ်လောန် ညံင်ကောန်ကလေလာ။ ညံင်ကောန်သၟိင်အိန် ကၟိန်သွဝ်ၜါ။ ရမျာင်ညံင်ကွိင် ဟွံမိင်မွဲဝါ။ အခိုက်လေပ်သန် သန္ဒလင်္ကာ။ ကွတ်ပါင်ကွတ်တဲ ညးဟွံမွဲၜါ။ စံင်ဒြဝ်ကျာံရ ထဏခရာ။ ကွိင်သီုက်အခိုက် ရိုက်တိုန်ညှာညှာ။ ဂးရုပ်ဂေါဝ်သန် စဳကၠးပညာ။ ညံင်ပိုဲဂွံညန် ဂွံတန်မွဲသၞာ။ ပိုဲညးပန်ရ သ္ပလွဳပရာ။ ဟီုဇီုသၟဟ်န် တုဲချပ်စောန်စာ။ ပၠေင်ကၠေံရုပ်ကၠာ အခါဂှ်ပၠန်။   ။

ပၠေင်ကၠေံရုပ်ဗော် ကလော်ဓဇန်။ ပတုပ်မၞိဟ်ကီု ညဳသာသီုပန်။ ဒက်သော်ကျိုင်ကျဝ် မြမောဝ်တန်န်။ ဂစေံစလန် ဟုံဗော်ဂန္ဓာ။ မြမောဝ်ထီုဗး ပ္ဍးတၟာဲအာ။ ဂၞိန်ပုံဂၞိန်စက် ဖက်ခါန်ခါသာ။ လစိန်စရံက် သီုလကံက်ဂွါ။ ကျိုင်ကျဝ်တုဲပ္ညဳ ကျာ်သြဳဂေါဝ်ဂါ။ အရံင်ဇကု အနုထဝ်နှာ။ ဍောင်ပ္ကဴဇမ္ပာ ခါဂိုင်စရှ်။ ညံင်ညးချူပြေင် ဂေါပ်ဝ်တၟေင်တၟဟ်။ သီုညးပန်ဓဝ် ကျိုင်ကျဝ်တုဲဒှ်။ ပ္ဍဲကာလဂှ် ပြဟ်စဳရေင်ဖျာ။   ။

ယိုဟ်က္ၜန်ကွာင်ၜဲ စၞဖါပ်ပြဲဖါ။ စုတ်ဗပေင်ဟေင် မွဲနသေင်ဟာ။ ဇဗၠုသတ်ဆက် လက်ဖက်ပ္ကဴကၠာ။ ဂပဵုသၠဇေဝ် မွဲနတေဝ်ဏာ။ မြေက်လသိုန်ကၠေင် ကမၠေင်ကဝ်တာ။ ဂှ်မွဲနဟေင် စုတ်စဳရေင်ဗ္ဂါ။ ဖျုန်ဂမၠိုင်ကီု အိုဿီုနာနာ။ ပအၚောဝ်ပၠေဝ် ဖံက်သေဝ်ညးဖျာ။ ယဵုကေတ်နပၠန် သီုညးပန်ကၠာ။ သီုကဵုအိန်ရဳ ဒ္ၚဳဒ္ၚဳကွာ်အာ။ ညန်ကြပ်ကဵုတာဲ ကော်ကွာ်တိုန်ကၠာ။ ယွံညးမတိင် ကွိင်စံင်ခရာ။ ပိုဲကၠုင်သွံဖျာ ရာန်ဟာဂွံတိုန်။   ။

မမဂေါဝ်ဆာဲ နာဲဒကောင်ပိုန်။ ဟိုတ်ဒှ်ဒါန်ကၠာ တမၠာတေံဗိုန်။ မိင်ပါင်ဗြဴရတ် ရုပ်ကၞောတ်ကွိုန်။ ညံင်ကြဝိတ်ထဝ် အဝ်ဇဂြဴတိုန်။ ဒြာဲမဝိုတ်ရ ဘဲကၠလၟိုန်။ ညံင်က္ၜိင်အိန်ရ ထဏဥဒိုန်။ ဗရုတိုန်ကၠာ စိင်ဨကဝိုန်။ ညံင်ရမျာင်အဴ ဗြဴခၞောဝ်ကွိုန်။ လလောင်ပြာထော် ရမျာင်ကော်တိုန်။ မမဂေါဝ်ဆာဲ နာဲဒကောင်ပိုန်။ မိတ်တမၠာဆက် ဗက်ကၠုင်လၟိုန်။ ဆညိဟွံဇြိုန် လၟိုန်န်အဆက်။ သီုကဵုဗြဴပန် သၟဟ်န်သက်လက်။ ယာံဂွံမိင်ပါင် ရမျာင်ဗြဴဗက်။ ညံင်တင်လာဲကဝ် ပ္ဍဲကတောဝ်သက်လက်။ ရုပ်လှေံလှန်မတ် စိုတ်လယတ်ဗက်။ ထပိုတ်ဟွံမာန် အာန်ထနာန်ဆက်။ နူညာတ်ရုပ်ဗက် သက်စိုတ်စပ်အာ။   ။

နာဲဒကောင်ပိုန် ဒ္ၚဳဟီုတိုန်ကၠာ။ ယွံမိဗြဴပန် ဂေါဝ်သန်သာ်လွာ။ တိုန်ဒၟံင်ပ္ဍဲတာဲ နာဲတံပအာ။ ယာံဒးစိုတ်ရ အဲရာန်စမာ။ မိင်ပါင်ညးပၠန် သီုညးပန်ကၠာ။ ဒ္ၚဳတိုန်ကၠုင်ဟေင် တာဲနာဲသေင်ဟာ။ တုဲနာဲသၟာန်တိုန် ဟွံဂွံဇြိုင်ညှာ။ မူထာန်မကၠုင် ဍုင်ကွာန်အရာ။ ဒၟံင်ဍုင်ကွာန် မူထာန်နာဲသ္အာ။ တဝှ်မေခု ယၟုယမာ။ ဟီုညိခပ်သီ ပိုဲဂွံတီကၠာ။ မိင်လဟီုဗျာံ နာမ်ဗျာပ်လွောင်ဟာ။ ညးပန်တုန်ကၠာ သီုမယာဗြဴ။   ။

ယွံညးဇမ္ၚောဲ ညာန်ပြဲညက်လှဴ။ ညာတ်မုက်ဍိုန်ညံင် ညံင်ဗီုဍောင်ပ္ကဴ။ လဟီုကောဂၞဴ ဂၠာဲသၟာန်တဴကွာန်။ ယၟုယမာ နာနာဂၠာဲသၟာန်။ လဟီုကောဂှ် ဒှ်တဴဂလာန်။ လၟေင်ဒးသၟာန် သွံရာန်စကၠာ။ သာ်ဂှ်ဒးသၟာန် နိဒါန်ညးဖျာ။ သၟိက်ရာန်ရာန်ရ လပပၠံကာ။ ဟီုဂတဟေင် ဋ္ဌာန်တၟေင်ဂွံအာ။ ဒမံင်ပိုဲကၠာ ခန်လွာပိုဲဟေင်။ ပိုဲသ္ဂောံစဴအာ အရာထာန်တၟေင်။ ကောပဂၠာဲသၟာန် ဂလာန်ဟွံသေင်။ ညးမိင်ဂလာန် ကောသၟာန်ရိုဟ်ရေင်။ ညးပအရိုင် ဂြိုင်ဝေင်ကောဟေင်။ ပသၟာန်ရိုဟ်ရေင် တၟေင်ဂၠိုင်ကဵုဒၞာဲ။ မၞိဟ်တမြံအဵု ဓလဵုလောန်ကာဲ။ သာ်ဝွံတုန်ကီု ဟီုစရီုနာဲ။ ကောပဂၠိုင်ဂၠာဲ ဒၞာဲဝါဲဒေသ။ အိုတ်တၟံညး ဇၟာပ်ဍုင်ရးဗ္ၚ။ ဗာ်ဆုဒုန်ရ ဒေသဝွံသၟတ်။ အာကၠုင်တဝဵု ဟွံတီကဵုဗၞတ်။ ကေင်သွံကေင်ရာန် ထာန်ဝွံပယတ်။ ဟိုတ်ဂှ်အဆတ် မှတ်ကၠုင်သေင်ဟာ။   ။

ဗြဴပန်ဂှ်ကီု သီုကဵုမာယာ။ နာဲမိင်ပါင်ကၠာ သိုက္ခမာဗြဴ။ ဒ္ၚဳဟီုတိုန်ပၠန် ကဵုဗြဴပန်အဴ။ ယွံမိဗြဴပန် လက်သန်တ္ၜတ်သဴ။ အဲဟွံပ္တေံကီု လဟီုမိအဴ။ ကလော်တံကီု နဲကဲသတီုတဴ။ ပၠေင်ရုပ်ကလော် ဗော်ဒေဝတဴ။ ပရုပ်မၞိဟ်ဟေင် အတိုင်လၟေင်ဗြဴ။ ယဵုသွံဗြာတ်က္ၜဴ ပရဴညးဖျာ။ သကဲတာဲပ္ညုင် ကွာ်ကၠုင်ကွာ်အာ။ လေပ်ဒှ်ကီုဟေင် သာ်ဂှ်သေင်ဟာ။ ဟိုတ်ဂှ်ဒးသၟာန် ဂလာန်မေတ္တာ။ နူကောညာတ်ပၠန် မိညးပန်ကၠာ။ ဟိုတ်ဂှ်ကွေံကြာန် ဒါန်တၞံတမၠာ။ ညာတ်ဒးစိုတ်ဆာန် ဇြဟာန်စပ်အာ။ သၟိက်ဂွံရေင်ကာန် မွဲဟာန်မွဲသၞာ။ သၟိင်ဂွံပူဗန် သၟဟ်န်သာဓာ။ စိုတ်အဲဒှ်ဟေင် ဗွဲသၟတ်သေင်ဟာ။ ဟိုတ်ဂှ်အဲကၠာ အင်္ကာယုတ္တိ။ ဗွဲမသၟဟ်ကီု မိဟီုကဵုညိ။ ဗွဲစၟတ်ယုတ္တိ မိညးပန်ကၠာ။ ဟွံသေင်ကောန်နာ် ပ္ဍဲဍာ်ဂင်္ဂါ။ ပရုပ်ဖံက်သေဝ် ပၠေဝ်သွံစဖျာ။ အဲသင်္ကာအဴ သၠေဟ်တဴစၟာ။ မူဟိုတ်မ္ဂး အဲဒးသင်္ကာ။ ထာန်ဝွံဂြိုပ်ဂျိ ဇာတိတမၠာ။ ဋ္ဌာန်ကၠာထာန်ဗြန် ဇြုံကၠန်နာနာ။ ကၟီသြိုတ်လကိုဟ် ကလော်ဂြိုဟ်စာ။ ဟွံမွဲဒမံင် သၞေဟ်အံင်သၞေဟ်ဖျာ။ ဟွံမွဲဍုင်ကွာန် ဋ္ဌာန်ရညးဝါ။ ဇြဴဖံက်သေဝ်ကွေံ နွံမွဲလှ်ေဟာ။ ဟိုတ်ဂှ်အဲဂး အဒးသင်္ကာ။ သၟာန်အဲဝွံကၠာ သီုမေတ္တာရောင်။   ။

ယွံတြုံအသဝ် ရုပ်ထဝ်ဒကောင်။ နာဲစဳကၠးရောင်မွဲတောင်ဂးမာ။ နာဲတီညာတ်သၟတ် လိက်ပတ်ဝေါဟာ။ နာဲနွံတဴကၠာ ပညာဂှ်သၟတ် လဟီုအဵု ဟွံဒးကဵုဝတ်။ မသၠေဟ်ပၟာ နာဲပပြာကတ်။ နာဲဂၠာဲစဳစတ် သၟာန်စံၜတ်ကၠာ။ ဟွံသေင်ယောဂဳ ကောန်မှာဗဳသြဴ။ နာဲဂၠာဲဟီုဂှ် ဟွံဒှ်သဘဴ။ ဗတ်ပိုဲဒှ်ကၠာ ကောန်မှာဓနဴ။ ပၠေင်ကၠေံရုပ်အဴ တရဴကၠေံအာ။ ခဍေင်ရပ်ညး ကွေံဒဴဗၠးဟာ။ ဗတ်ဒှ်လကိုဟ် သ္ကာတ်ဂြိုဟ်စာ။ တာဲဟွံကဵုမံင် တံင်ဓဇက်ဏာ။ ဗတ်ပိုဲဒှ်ပၠန် ဗြဴကုံဘန်ကၠာ။ မတ်ဓလန်ဒ ညာတ်ဒညညှာ။ ဗတ်ဒှ်ကလော် သော်ညံင်ရိုဟ်တာ။ ဇကုကောအဲ ဓဇက်ဂြဲဏာ။ စဖျုန်သဂုတ် ဇုတ်ထောံလသာ။ ဗတ်ဒှ်ဗြဴနာ် ပ္ဍဲဍာ်ဂင်္ဂါ။ ဇကုကောအဲ ၜံက်ဂြဲလသာ။ ဟိုတ်ဒှ်မၞိဟ်သၟတ် ဗွဲအဆတ်ကၠာ။ လၟေင်သွံရာန် ပိုဲသၟာန်သၟုက်အာ။ ကောဟွံပိုင်ခြာ ဂတကၠာကြဴ။ ရာန်ပိုဲဂွံသွံ ဟွံရာန်ဂွံစဴ။ ထာန်တၟေင်သ္အာင်သွံ ပိုဲဂွံအာတဴ။ သီုဗြဴပန်အဴ ဟီုတဴမာယာ။   ။

နာဲဒကောင်ပိုန် သီုကွိုန်ပညာ။ မိင်ပါင်ဗြဴပန် ပ္ဍဲစိုတ်စန်စာ။ ထာန်ဝွံထာန်ဂျိ ဇာတိတမၠာ။ မၞိဟ်ဂးဟီုကွေံ နွံမွဲလှ်ေဟာ။ မၞိဟ်ဟွံဒှ်အဴ ဒေဝတဴမာ။ မတန်ဒှ်ရ ချပ်နပညာ။ နာဲတီကေတ်သၟတ် ဗွဲအဆတ်ကၠာ။ ဒဒှ်ကလောင် ဗြဴဗော်ယက္ခာ။ ၜိုန်တီကွေံကြာန် ဟိုတ်ဒါန်တမၠာ။ ဒှ်မၞိဟ်တၞံဂျ ဂၠိုင်ဘဝကၠာ။ ဟိုတ်ဒှ်မိတ်ဒါန် ညာတ်တုဲဆာန်အာ။ သ္ဍိုက်မၠိုက်ဖဳဒွါ သာဓာသၟိက်ညန်။ မိက်ဂွံသ္ဍိုက်ဆာန် ရေင်ကာန်သၟဟ်န်။ တံင်စိုတ်ဟွံမာန် မွဲဟာန်သၟိက်ညန်။ မဟီုတိုန်ပၠန် ကဵုဗြဴပန်ကၠာ။ ယွံမိညးပန် ရုပ်ညံင်ကညာ။ မိတံမဂး မၞိဟ်ကွေံရဟာ။ ပိုဲမိတံကၠာ သာဓာဒးရး။ ဇရေင်မိတံ ဆံလံလေင်လး။ ကောသမိက်ဇူကောံ ကရောံမိသ္အး။ ပသာ်သၟး စိုတ်ထဝ်ဂၠးရော။   ။

ယွံတြုံမပ တၠအယော။ ရာန်ပါင်စရော ကောဟွံဂးကၠာ။ ပိုဲတိုန်ကၠုင်ဟေင် တာဲကောသေင်ဟာ။ ရာန်လေဝ်ဟွံရာန် တၟေင်ဟီုကြာန်အာ။ သၟိက်ဂွံသၟဟ်န် မိက်ညန်သာဓာ။ သၟိက်ဂွံလီၜန် မိတ်တန်မွဲသၞာ။ ဟီုပကျာဗာ လီုအာဂလာန်။ ကောတံမတဴ တြဴသ္ၚောဲထာန်။ ပိုဲပ္တောဟ်ဂလာန် ဆာန်တုဲဗွဲကြဴ။ ထာန်တၞဟ်ဟေင် ညးကလေင်စဴ။ ပိုဲဒးဒှ်ကောံ သ္ၚောံဗွဲကြဴ။ ပါင်တြုံတံအဴ ပ္တေဟ်တဴဂွံဟာ။   ။

ယွံမိဗြဴပန် ရုပ်ပကညာ။ နူကောညာတ်ကၠာ ရုပ်သာ်လွာနာဲ။ ဂကောံမိတံ မဇၟံစရာဲ။ မိက်ဂွံမံင်ရ သၟိက်ပဒိပ်ဒါယ်။ ထာန်မိကဵုမ ဟွံစဴရနာဲ။ ကောံဟွံမိက်သာဲ နူနာဲတံဟေင်။ ကောဟီုဗိုန်ဇၟံ ဟွံသ္ပံတၟေင်။ ညံင်ဗီုဂြင်စိင် ဂၠိင်တိတ်ဗွဲလွေင်။ ဟွံဂၠံကလေင် လုပ်ပၠန်သေင်ဟာ။ ညံင်ဗီုသာ်ဂှ် တန်ဒှ်ဟွံခြာ။ ပ္တိတ်ပါင်တုဲမာ ဟွံမုသာကွေံ။ ဒှ်ဗိုန်စၟတ်ရ မိပသလှ်ေ။ လဟီုကောကွေံ မိဟွံပ္တေဟ်ဟာ။   ။

ယွံကောမပ တလပညာ။ ကောကလင်ကၠာ ပုံတမၠာအဴ။ ညးဟီုသေင်ဟာ က္ၜဴၜါတြုံဗြဴ။ သီုၜါသၟဟ်န် သ္ဍိုက်မၠိုက်တန်တဴ။ ဂစေံကွဴဗြဴ ကြဴတန်ဂဗ္ဘ။ အၚပ်လအိတ် သတ်ကွိတ်သၟိက်စ။ ကွဴဗြဴတုန်ရ စကာတြုံအဴ။ တြုံအာတုဲဟေင် ဟွံကလေင်စဴ။ ဟွံဆာန်ဗြဴပၠန် တြုံဓဇန်တဴ။ မာတ်တြုံဟွံစိုပ် ဗဒိုပ်ကွဴဗြဴ။ အလုမ်ဂြိုပ်ဇၞော် ကွဴဗြဴကော်တဴ။ ကောပိုဲကောပိုဲ ဟိုဲကောညံင်စဴ။ စဵုလၟုဟ်အဴ ဗြုကော်တဴကၠာ။ ညံင်ဗိုကွဴဂှ် ဒှ်တဴပၟာ။ ပါင်တြုံတံရ ပတံသာဓာ။ စိုတ်တြုံတံကွေံ ပ္တေဟ်စဂွံဟာ။ ကောဒကောင်ဗိုတ် ဒေပ်လဝ်စိုတ်ၜါ။ သၟိက်ပကျာဗာ ပအာတံစၞာဲ။ ပါင်ဂစေံနေံ သၟိက်လှေံဒိပ်ဒါယ်။ ဇိုန်ဖျိုန်လမျီု ဟိုဇီုဂၠိုက်ဂၠာဲ။ ပိုဲတီဥပါဲ စိုတ်ကောဗၠာဲဟာ။   ။

ယွံမိဗြဴပန် ရုပ္ပကညာ။ မိဇက်နင်ကၠာ ပုံပၟာကွဴ။ ကွဴကၟက်ဓဇန် ဟွံတန်ဒှ်တဴ။ ကွဴကၟက်ဟွံစဴ ဒေံဗြဴတီဟာ။ ကွဴကၟက်သဘဴ ဟိုတ်ဆာန်ဗြဴကၠာ။ ဗြဴစကာဗက် ကွဴကၟက်ဒးအာ။ ဂၠာဲသတ်ကွိတ်ကိုပ် အလုမ်ဂြိုပ်ဝါ။ သတ်ကွိတ်ဂှ်ဟေင် ဟွံဂွံသေင်ဟာ။ ကွဴကၟက်ပဝ်အာ ကြာဥဒျာန်သၟိင်။ သတ်ကွိတ်မွဲတၞံ ဍုဟ်ဗြံသဝိင်။ ဥဒျာန်ဗျိင် သၟိင်ကဵုမင်တဴ။ သၟာပၞောဟ်ရ သၟာတ္ၚတံအဴ။ ပၟင်ဥဒျာန် ဟီုပါန်ကမြဴ။ မင်မွဲဗိုန်တဴ ကွဴကၟက်အာညာတ်။ သၟိက်သ္ဂောံသတ်ကွိတ် လအိတ်သေသာတ်။ သ္ၚဳရံင်ကွိတ်ကၞောတ် ညာတ်သၟာတ္ၚ။ လုပ်ကေတ်ကွိတ်ပၠန် ဖေက်အိုတ်ခန္ဓ။ စဴသၟးသွံ ဗြဴဟွံဂွံစ။ ဗှ်သမ္ဘာဆာန် ဇြဟာန်မူလ။ ဟွံရိုဟ်စကီု ကဵုလမျီုရ။ ကွဴကၟက်ဂှ်သွံ ဟွံရောံဒည။ ပဝ်လုပ်လအိတ် စိုပ်တၞံကွိတ်ရ။ သၟာတ္ၚပၠန် ပန်စုတ်ချိုတ်ဒး။ ကွဴကၟက်ဆာန်ဗြဴ ချိုတ်တဴဘဲလၟ။ ဟွံဂွံကလေင် ကဵုဗြဴဟေင်ရ။ ဗြဴဟွံတီကီု တြုံလီုခန္ဓ တြုံအောန်သစ္စ ဟီုဗျံက်ဗျတဴ။   ။
မာတ်တြုံဟွံစိုပ် ဗဒိုပ်ကွဴဗြဴ။ အလုမ်ဂြိုပ်ဇၞော် ဗြုံကော်ဓဝဴ။ ကောပိုဲကောပိုဲ ဟိုဲကောစဴပြဟ်။ စဵုကဵုလၟုဟ်ဝွံ ဗြုကော်တဴကၠာ။ စလာဲပုံကွဴ နွံတဴသေင်ဟာ။ ဒေံဗြဴတုပ်ကၠာ ပၟာကွဴဗြဴ။ ကောတုပ်သက်လက် ကွဴကၟက်သဘဴ။ ကွဴကၟက်ဒးချိုတ် ဟိုတ်နူဆာန်ဗြဴ။ ကောမတုပ်တဴ ကွဴကၟက်သေင်ဟာ။ ညာတ်ညးတံဂှ် သၟဟ်န်ညဳသာ။ သၟိက်ဂွံရေင်ကာန် ဆာန်ကၟိန်သာဓါ။ သၟိက်ဂွံလီၜန် တန်မွဲသၞာ။ လမျီုကောကၠာ ၜိုန်ဂိုဟ်ခါဂှ်။ ကောဇိုန်ကွာဲဟေင် စိုတ်ဟွံတၟေင်တၟဟ်။ ဗွဲကွဴဂှ်ရော စိုတ်ကောမဒှ်။ ကောဟွံလဖှ် ဒဒှ်စရာဲ။ ဂကောံနာဲရော ကောသၟိက်ဒိပ်ဒါယ်။ ပသာ်စိုတ်နာဲ ဂွိုင်စရာဲရော။   ။

ယွံညးမပ တၠအဃော။ ပါင်တြုံတံရော ယောသောတၟေင်အာ။ ပါင်ဟီုတၞဟ် စိုတ်တဏဟ်ခြာ။ ဗီုဥပ္ပမာ သာ်လွာ်ထိုင်အဴ။ သၟိင်ထိုင်ပဝ်လှောင် ဂၠာဲဇာပ်ဍောင်ပ္ကဴ။ ဂွံရှ်ပ္ကဴဟေင် ပဝ်ကလေင်စဴ။ ရှ်ပ္ကဴအိုတ်သွံ ဟွံမိက်ဇာပ်တဴ။ ဟွံဗၠန်သ္ၚဳအဴ ဍောင်ပ္ကဴဂှ်ကၠာ။ ဍောင်ပ္ကဴသ္အာင်ဟေင် ဂၠာဲဇာပ်သေင်ဟာ။ နဲသၟိင်ထိုင်ကီု တုပ်ဗီုပၟာ။ တြုံတံတုန်ကၠာ ဝါစာဂလာန်။ လဟီုဍာတ်ကြောံ သၟိက်သ္ဂောံရေင်ကာန်။ ကၠုင်ဖျိုန်ဂလာန် နိဒါန်ဟုဲဟဟ်။ ရေင်ကာန်ဖဲအဴ ကြဴပမတ်ၛဟ်။ ထာန်တၟေင်တၞဟ် ဂၠာဲလဖှ်အာ။ ပါင်တြုံတံကွေံ ပ္တောံစဂွံဟာ။ ကောဒကောင်ဗိုတ် ဒေပ်လဝ်စိုတ်ၜါ။ သၟိက်ပကျာဗာ ပအာစိုတ်စၞာ။ ဟီုဇီုစေံနေဴ လှေံပဒိပ်ဒါယ်။ သၟိက်ဖျိုန်လမျီု ဟီုဇီုဂၠိုက်ဂၠာဲ။ မိတီဥပါဲ စိုတ်ကောဗၠာဲဟာ။   ။

ယွံမိဗြဴရတ် ကၞောတ်ရုပ္ပါ။ မိဇက်နင်ကၠာ ဗိုပမာဏ။ မိဖျောပ်ပိုဲတြုံ နင်ဒုဟ်သဗ္ဗ။ မိကလင်ကၠာ ပၟာထာဏ။ စရိုတ်ကောဂၞဴ ရစၟခြ။ စၟခြဂှ် ပဒှ်ဒေသ။ ဍေံညာတ်ကေတ်သၟတ် လျးပၟတ်ရ။ သာ်လျးဝွံပၠန် ဂေါဝ်သန်ယဲသ။ အာကေတ်ဗိုန်ဇၟံ လျးဝွံမးလ။ လျးဝွံကဵုအြ ကဵုဒှ်မွဲရ။ ဍေံဂးတုဲကွေံ ဆင်စှ်ေဒေါဝ်လ္ၚ။ လမျီုခန္ဓ ဟွံရိုဟ်စကၠာ။ စၟခြဟေင် သာ်ဂှ်ဟေင်ဟာ။ အဲနဲဂှ်ကီု တုပ်ဗီုပၟာ။ ညာတ်ရုပ်မိတံ သိပ်ဇၟံပြာထာ။ သၟိက်ဂွံရေင်ကာန် ဆာန်ကၟိန်သာဓာ။ သၟိက်ဂွံသၟဟ်န် ညန်မွဲသၞာ။ လမျီုကောကၠာ ၜိုန်ဂိုဟ်ခါဂှ်။ ကောဇိုန်ကွာဲဟေင် စိုတ်ဟွံတၟေဟ်တၟဟ်။ ဗီုစၟခြ စိုတ်ကောမဒှ်။ ကောဟီုလဖှ် တိုင်လွဟ်စလာဲ။ ပသာ်စိုတ်နာဲ ဂွိုင်စရာဲရော။   ။

နာဲဒကောင်ပိုန် ဒတိုန်အဃော။ ကဵုဗြဴပန်ရော ဟီုထောပဏာ။ သၟတ်ဗြဴပန် ရုပ္ပကညာ။ ၜိုန်သ္ဍိုက်နာဲလောန် သၟိက်ညန်သာဓာ။ ဟီုပ္တိုန်ဖအာ ဟွံဂွံခြာဒင်။ ဗြဴပန်ဂှ်မာ ညာဏ်ညံင်မှာဂင်။ နာဲနွံပညာ ညံင်သာ်လွာသြင်။ ပုံကၞက်အဂီု ဗီုမိဂၠာဲနင်။ နာဲဟီုခၠေဝ်ဇိုတ် အိုတ်အာလင်င်။ ညံင်လပှ်ကၠာ အိုတ်အာပ္ဍဲသြင်။ ဗြဴပန်သွဳသွပ် မိင်ဒးကၞပ်သၠင်။ သွက်ဂွံခၠေဝ်ဒင် ဗီုပြင်ကဵုမ။ ပုံကၞက်တုန်ရ ညိညအိုတ်အာ။ နာဲဒကောင်ပိုန် ဒဵုဟီုတိုန်ကၠာ။ ယွံမိဗြဴရတ် ကၞောတ်ရုပ္ပါ။ နာဲဖျေံမေတ္တာ ညံင်ဟွံခြာသာဲ။ လမျီုခန္ဓ ကောပတၟာဲ။ ကဵုဂွံဇူကောံ ကရောံဒဴနာဲ။ ကဵုဂွံဒိပ်ဒါယ် ကရောံနာဲညိ။   ။
ဗြဴပန်ဂွံမိင် ကွိင်ပါင်ကောမိ။ စံင်တူစိတ ဒမၠိတ္ၜူမှာဲ။ ပါင်တြုံအသဝ် ဗီုဂတဝ်သာဲ။ ရမျာင်အမြိုတ် မိပ်စိုတ်ဒးလာဲ။ ကြုတ်ဏာဗဇဴ ဂမ္ဘဴတ္ၜူမှာဲ။ ညာတ်ဗ္ၜူမတ် သြိုဟ်လယတ်ချာဲ။ ဝေင်ဗီုတ်ဟွံမာန် ဇြဟာန်လောန်ကာဲ။ ဗြဴပန်ဟွံဇြိုန် အီတိုန်ဖျာဲဖျာဲ။ ဗီုဇုက်လလဳ ကၞိင်ဗစဳချာဲ။ သီုဗြဴပန်ဂှ် သၟဟ်န်စရာဲ။ ဂလာန်စံက်ထေံ စေံနေံဂၠိုင်ဂၠာဲ။ မပဂေါဝ်ဆာဲ သီုနာဲဗြဴပန်။ သ္ဍိုက်မၠိုက်သာဓာ ညဳသာသၟဟ်န်။ ဆာန်ကၟိန်ပူဗန် လီၜန်တဴမံင်။   ။
မူညံင်မတုပ် ဥပ္ပမာဆံင်။ ပၟာတုပ်သၟဟ် ဒကှ်တမြံင်။ ဒေါဝ်လစဂွိုင် ကြာလိုင်လစံင်။ ယာံညာတ်အရံင် အံသဝ်တ္ၚဲဗၠာဲ။ ပၠိုဟ်ထာင်လပၠာင် ပံက်ထာင်ရာင်ဆာဲ။ ထိုက်ဍောင်အသဝ် မြမောဝ်တၟာဲ။ ရဴမရာဲကွာဲ သၟိင်တ္ၚဲဗၠာဲကီု။ မိတုပ်ဒကှ် တိုင်ထဝှ်ဗီု။ နာဲမတုပ်ကီု ဗီုသၟိင်တ္ၚဲဗၠာဲ။ မိတ်ဂွိုင်စရာဲ ကောန်ဗၠာဲလးလေင်။ မိင်ပါင်တြုံတုဲ စိုတ်သုဲကလေင်။ စိုတ်ဟွံဂွံဗၠေင် ဟွံဒစေင်အာ။ ပၠိုဟ်ထာင်ရာင်ဆာဲ ကွာဲစန္ဒိမာ။ ဗၠိုပ်လစသာင် ရမျာင်မေတ္တာ။ ပၠိုဟ်ထာင်ကြုတ်ဏာ ကွာဲထာင်ဃာန။   ။

ဒေဝပန်ပ္ညဳ ပဳတိက္ဍင်ပြ။ ညံင်ဇုက်လလဳ ကၞိင်ၜါစဳခၠ။ မဒကောင်ပိုန် ဒတိုန်ရုပ္ပ။ ဂကောံဗြဴပန် ပူဗန်လံလ။ တိက်မွဲဖုန်ဒၞဳ သ္ၚဳလဝ်ကာယျ။ တဲသွိင်လဗာင် ထာင်ဍောင်ပဒၟ။ မူညံင်မတုပ် ဥပ္ပပၟာဏ။ ညံင်ဇၞးဇၞူစှ်ေအာ ပ္ဍဲကြာလစ။ ဍောင်ဒကှ်ဗျိင် ဂိုင်ၜှ်သွိင်ပၠ။ ဇၟူဗၠာဲဂေင်က္ဍင် ဍာဲသြင်လစ။ ဇၟူလှိင်တဴစိုတ် ညံင်အမြိုတ္တ။ နာဲမတုပ်ဇၟူ တ္ၜူမာဲရုပ္ပ။ ဒကှ်တုပ်ရောင် သြိုဟ်ဍောင်ပဒၟ။ လပုဟ်တဲသၟိင် ကွိင်လုမ်ကာယျ။ ဂိုင်ၜှ်ပလှ် ဒကှ်မဒၟ။ နာဲမဟုဲဟဟ် သၟဟ်အမြိုတ္တ။ ဗြဴပန်ကျာ်သြဳ ဒ္ၚဳဇိုန်ကဵုမ။ နာဲဒကောင်ပိုန် ဒေါဝ်ကွိုန်ဘောဂ။ ဂကောံဗြဴပန် သၟဟ်န်စိတ္တ။ သ္ဍိုက်မၠိုက်လံလ ခယျသာဓာ။   ။
ဒကောင်ပိုန်အဵု ကဵုဗြဴပန်ကၠာ။ ဝေင်ဂြိုင်စံက်ထေံ။ စေံနေံစန်စာ။ သ္ဍိုက်မၠိုက်သၟဟ်န် တန်မွဲသၞာ။ ညံင်ဒကှ်ဗျိင် ကဵုသၟိင်တ္ၚဲကၠာ။ ညံင်ဂိတုဗျာင် ညံင်ဍောင်ထာင်သွာ။ ညံင်အိန်နာဲဗြီု ကဵုသုဇာတာ။ ဝတ်ပရေင်လိုက် သ္ဍိုက်မၠိုက်ညဳသာ။ ဟီုပ္တိုန်ဖအာ သာဓာလဗိင်။ စလောံကံဖဵု မုက်ကၞိင်ကဵုကၞိင်။ ပ္ဍဲတာဲဇမၠိင် ဒ္ၚဳလှိင်အာရောင်။   ။
ညးမသုန်ဂှ် သၟဟ်န်မွဲတောင်။ သီုဗြဴပန်ရောင် ဂွံအခေါင်တုဲ။ မိပ်စိုတ်လောန်သန် သီုပန်အီပြုဲ။ လွဳစိုပ်ဒတုဲ ဟိုတ်ဒါန်ပတုဲလဝ်။ မိနာံသာအိုတ် စိုတ်တြုံအသဝ်။ ဍေံလှေံလှန်စိုတ် ပၠာံစိုတ်ဆတ္တဝ်။ ဂမုင်စမ္ပါ စမ္ၚာမြမောဝ်။ ဂဇေင်ဇြင်ထောဲ လပေါဲဒၞာဲဂေါဝ်။ စလန်အဂၠဴ ရဴဍောင်ပ္ကဴထဝ်။ စုတ်ပ္ဍဲက္တောဝ်ၜါ နာဲသာဇံသဝ်။ စလန်မောဝ်ဟုံ ဖုံလဗိုဟ်လဝ်။ ကၠေင်သီုမြမောဝ် ပၠာံလဝ်သော်နာဲ။ ကွာင်ၜဲယိုဟ်က္ၜန် ဆန်ၜန်စုတ်ကွာဲ။ ဇၟၠုလက်ဖက် သွက်ကောဗၠာဲ။ သာ်ဝွံဇိုန်ကွာဲ ကဵုနာဲရောင်အဴ။   ။
နာဲဒကောင်ပိုန် ဒတိုန်ကြက်လှဴ။ ဒ္ၚဳဒ္ၚဳဍိုန်န် ဒယှ်ေတိုန်အဴ။ ရမျာင်ညံင်ကွိင် မိင်စိုတ်ဒမြဴ။ စံင်ဒြဝ်လဒု တိင်ဗရုတဴ။ ကွိင်ကဵုရမျာင် စလာင်နှဴရဴ။ ဗြဴဂွံမိင်အိုတ် မိပ်စိုတ်ထိုက်လဴ။ ဒေဝတဴဗြဴ ရဴစိုတ်ဟွံတန်။ သ္ဍိုက်မၠိုက်လောန်ကာဲ သီုနာဲဗြဴပန်။ ဝေင်ဂြိုင်အဵုဇိုတ် မိပ်စိုတ်လောန်သန်။ သ္ဍိုက်မၠိုက်ပူဗန် ညန်တ္ၚဲမသဝ်။ သွက်ညးအာဂြိုပ် ကၠုင်စိုတ်ဆတ္တဝ်။ ဍာ်အောဟ်ပုင်ကောံ ဒးတုက်ကောံလဝ်။ နာဲဂးတုဲကၠာ က္တဵုအာဆတ္တဝ်။ လာင်မုက်နာဲပၠန် ဗြဴပန်အသဝ်။ သာ်ဝွံဆတ္တဝ် ဟီုလ္ၚောဝ်ကွာဲ။   ။

ယွံကောန်သၟိင်ဓဝ် စက္ကဝဝ်ဗၠာဲ။ ပိုဲဍိက်ညးပန် ကၠောန်ပၠန်သၞးနာဲ။ ကောဂဇံရ လပဒွိင်ဒွာဲ။ ဂးတုဲဗြဴပန် သၟဟ်န်စရာဲ။ ဂၠာဲအောဟ်တုက်ဍာ် တောံပုင်ကွာ်ၚာဲ။ ပုင်စိန်တောံသွ ကပေင်ထၟာဲ။ စာင်အဒါအောဝ် မောဝ်ပ္ဍးဆာဲ။ ကွာင်သီုအမာဲ စဳရေင်ကွာဲလဝ်။ ဒးစဝ်ပၠန် ညန်တ္ၚဲမသဝ်။ ဂကန်ဖျုန်သၟတ် ကဵုတြုံဆတ္တဝ်။ ယွံကောသၟိင်ဓဝ် တြုံအသဝ်နန်။ ပိုဲစဴကၠာရ ကောပဝေါန်စန်။ ကောမစံင်တူ ပူဆာလ္ၚုလ္ၚန်။ စိုတ်ကောကဵုတန် ပချပ်တ္ၜန်တ္ၜုဲ။ နူပိုဲဍိက်ဗြဴ ဆာန်ကောဂၞဴတၟုဲ။ စိုတ်ဟွံတၟေင်တၞံ တံဇိုင်တြုံလွုဲ။ ဖျိုန်လမျီုတုဲ ဟီုဇီုဟုဲဟဟ်။ ပ္ဍဲကောနာဲသ္ၚိ စိုတ်ဟွံတၟေင်တၟဟ်။ ယးဂတပ္ညုင် ပိုဲစိုပ်ကၠုင်ပြဟ်။ သတ်ဗြဴဗြာတ်က္ၜဴ သိဠဴပဏဟ်။ မြာင်မ္ၚောဝ် ကြုက်ထဝ်နွံရှ်။ ဒရေဲဂၠံက်က္တဵု ဍုဟ်ဂဵုလတှ်။ သစ္ဆုမၞုံရှ် ပိုဲဂၠာဲၜှ်တဴ။ ပိုဲၜှ်နင်ရော သွက်နာဲကောဂၞဴ။ လ္ပဒွိင်ဒွာဲ နာဲဍောင်ပ္ကဴ။ ဗကန်တုဲအဴ ဒ္ၚဳက္တဵုစဴတုန်။   ။

လဣနင်ဒဴ လထဴနွံဂုဏ်။ သၟတ်ဗာ်ဆုဒုန် တမ်ညဝ်တုန်သ္အး။ တုင်င်တိင်င် ဂြိင်င်ဒေါံနး။ ဂြံဂြံဒေါံနး နူယးဒဵုသဝ်။ လ္ၚဵုဗာက်ဖ္ဍိုက် လ္ၚဵုဂှ်ယိုက်ဗဝ်။ လ္ၚဵုဂှ်ကုတ်ဒုန် ဖန်ဖက်ၜတ်လဝ်။ လထဴၜတ်လဝ် စွံဗွဝ်တရေင်။ သဏကဵုစိင် ဂၠိင်ဂၠေံဗွဲလၟေင်။ ဒယိုင်တဝ ၜတ်ပၠလဝ်ဟေင်။ ဒမင်ကၞံင်ရေင် လၟေင်ရတ်မူလ။ လဣနင်ဒဴ ထဴပြေင်စွံပၠ။ မာတ်တ္ၚဲသဝ်အာ ညန်ကၠုင်ကာလ။ မြာ်ဂြဴလဓဵု ဍေင်ကြဵုအဝ်ဇ။ တ္ၚေက်ပဝ်စဴရ ဒေသပနာင်။ စာင်ဍာ်ဗြုကြဵု ကွက်ကွက်ကဵုပါင်။ လိုက်ထောဝ်စလာင် ကဵုပါင်ရုရု။ ကွဴဂြဴဂဍုတ် ဖဝ်ရဂုတ်ဗြု။ ခနှေင်စက်စာန် ထာန်ကံလဒု။ ဗၜဵုကော်ကောန် ယောန်သၟဝ်တၞံဆု။ စိုပ်ဂွာံဥတု စနူသန်ၛာ။   ။

သၟိင်တ္ၚဲဆတ္တဝ် မညန်သဝ်အာ။ လဣနင်ဒဴ လထဴနာဲသာ။ ကော်ကောန်ရဲတုဲ ဒ္ၚဳသုဲစဴအာ။ စိုပ်တာဲတုဲဒှ် ဟုံဍာ်အောဟ်ကၠာ။ ဟုံဍာ်တုဲကိုပ် စိုပ်တာဲဒၟံင်ဗ္ဂါ။ ကောန်ရဲကောန်သာ လုပ်အာဖဴပ္ညုင်။ ပံက်ကၠာင်ညာတ်က ပံက်နညာတ်ပုင်။ ညာတ်အမာဲပၠန် လပန်ဓလုင်။ နာဲစဳရေင်အဵု ကဵုညးဟာပ်ပုင်။ စာင်အဒါအောဝ် မောဝ်ပ္ဍးတလုင်။ သွက်နာဲရဲကၠာ စုတ်ဏာသွပုင်။ ထဴဂဇံၚုင် ညာတ်ပုင်အမာဲ။ သၠေဟ်တဴပၟာ ဗ္စါရဏာဂၠာဲ။ ဗၠာဲဂမြိုဟ်ကံ ဂဇံစၚာဲ။ ထိုင်သးနာဲကၠံင် ထေက်ကဵုမင်တာဲ။ ပုင်ကွာင်စၞ ဖျုန်ကဇၟာပ်ဒၞာဲ။ စဳရေင်ခိုဟ်က္ဍင် ကြိုက်ကဵုမင်တာဲ။ ခိုဟ်ဂးလောန်ကာဲ ထေက်မင်တာဲရောင်။ ညးဂမၠိုင်ဂး ထိုင်သးဂၠိုင်တောင်။ မူဒၞာဲမဂွံ ဇၟာပ်စၞဟွံယောင်။ ဂွံစဳရေင်လဝ် ဂွိုင်ထဝ်ဏှာသောင်။ သၟာန်အာစအာ ထိုင်သးဂြိုင်သၠောင်။ စဖဲတုဲရောင် ဍောင်ၜိုတ်သၠိင်အာ။   ။

တ္ၚဲဂှ်ယးကၠာ တၟာအာဒိုဟ်ပန်။ စဟာပ်တုဲကၠာ လုပ်အာဂြိုပ်ပၠန်။ ကောန်ဒေဝတဴ သီုကဵုဗြဴပန်။ ကျိုင်ကျဝ်တုဲဓဝ် ရုပ်ဂေါဝ်ဂါသန်။ ဒေဝတဴအဴ ပ္ကဴကြက်စလန်။ ကၠုင်ကယျိုင်ကၠာ တြုံသာရဲဇန်။ ၚဳစဲဂြးသော် ဟုံဗော်စလန်။ ဇဗၠုစုတ်လဝ် သၠိုင်ထဝ်သၠိုင်သြန်။ လီၜန်စံက်ထေံ စေံနေံသၟဟ်န်။ ရိုဟ်ဟ်တ္ၚဲဟေင် လၟေင်အလန်။ စဳရေင်ပုင်သွ အမာဲကဗျန်။ တ္ၚဲသဝ်သၟိက်စဴ နဲကြဴဂကန်။ နာဲနွံပညာ ခါဂှ်သၟာန်ပၠန်။ ရုပ်ညံင်ဍောင်ပ္ကဴ ယွံမိဗြဴပန်။ ကၠုင်တုဲစဴအာ ပသာ်လွာပၠန်။ နူကဵုဍုင်ကွာန် ထာန်မသ္ၚောဲညန်။ မိတံဟီုဂှ် ဒှ်ဟွံဒှ်ပၠန်။ အဲသၟိက်ညာတ်ညိ ယွံမိဗြဴပန်။ ဗြဴပန်တုန်ကီု မိလဟီုပၠန်။ ညးပန်ဟွံဇြိုန် ဟီုတိုန်ဟွံခၠန်။ ယဝ်သၟိက်ညာတ်ကၠာ ဖျာလွာဂၠိုင်တန်။ ပိုဲအာထ္ၜး ဍုင်ရးဂၠိုင်သန်။ လပဝေါန်စန် နာဲနွံပညာ။ ဒ္ၚဳဗက်အာပၠန် ဗြဴဒေဝပန် ဒ္ၚဳဗၠန်စဴအာ။   ။

ဍေံက္တဵုဗဒှ်ဟေင် လၟေင်သ္ၚိဖျာ။ ဖျာကွာင်ၜဲရ ဇဗၠုသၠကၠာ။ သ္ၚိဖျာဗြာတ်က္ၜဴ သတ်ဗြဴသတ်တာ။ မြာင်သတ်ကြုက် မုက်ဗဳလင်္ကာ။ ဂၠံင်တဵုပၞဟ် ဖျာဂှ်မွဲသာ။ ဖျာဂၠိက်ယာတ်ပၠန် ဂၠိုင်သန်နာနာ။ မဝါင်မအဳ မဇဳပေင်ဖျာ။ မုဲကွာန်ၜုန်မြ ဂတေက်ပၞုတ်ကၠာ။ ခဍောင်ကဝေဝ် တေဝ်လဝ်ပေင်ဖျာ။ ခပဳထဝ်ကီု သီုဝုန်ဂလာ။ ပညန်ဟအဳ ခပဳသွံကၠာ။ လမေင်လမေဝ် တရေင်ဏာဖျာ။ သ္ၚိထာန်အရာ ဘုတ်ဘာပေင်က္ဍတ်။ ဍေံက္တဵုဗဒှ်ဆာဲ နာဲဂွံညာတ်သၟတ်။ ဗဵုဒ္ၚောဝ်တုဲအိုတ် မိပ်စိုတ်လောန်ဗၞတ်။ နူဂှ်တုဲသၟတ် ပယျဝ်ရိုဟ်တ္ၚဲ။ ကွာ်ကၠုင်ဂၠောဲဂၠောဲ တ္ၚဲသဝ်စဴအာ။   ။

ဒေဝတဴဗြဴ စဴအာတုဲကၠာ။ ညးမအာဂြိုပ် စဴကၠုင်စိုပ်မာ။ နာဲစဳရေင်ရ ဗစညးကၠာ။ ပုင်သွအမာဲ ကွာင်သာဲသဂြာ။ ဖျုန်ဒြာဲဖျုန်ကၠိက် ခရိက်သီုခၞာ။ စာင်အဒါအောဝ် မောဝ်တၟာဲအာ။ စဳရေင်ကဵုကၠာ နာနာသာ်ပၠန်။ ဗဒုင်ကဵုသၟုတ် စုတ်နင်ပုင်သွ။ ညးပိညးပန် ဖန်ဖက်ကဵုရ။ ဇၟာပ်သွအမာဲ ဂၠာဲဆန်ကဵုစ။ စဟာပ်တုဲဂှ် ဒှ်သံဝေဂ။ လဣနင်ဒဴ ထဴဟီုတိုန်ပၠ။ ယွံလေဝ်မၞးတံ လၟုဟ်ဏံရ။ ပိုဲမကၠုင်စိုပ် ပ္ဍဲဂြိုပ်ဟေမ။ လၟုဟ်ဝွံသွံ ဟွံသ္ဍာံကံတ္ၚ။ ဟွံဒှ်ဒတောဝ် တၞောဝ်ဖျာက။ က္ၜိုင်,ပှ်,ဒြာဲအဵု စဳရေင်ကဵုစ။ ဖျုန်စာင်ဖျုန်ကၠိက် ခရိက်ဖျုန်က။ မောဝ်ပ္ဍးတၟာဲ အမာဲသဗ္ဗ။ ဖျာလွာသကဲ ဟွံမွဲညိည။ နိဂီုဍုင်ကွာန် သန္ထာန်ဒေသ။ အံသာဲကွာင်ကၠေင် ဂွံပေင်သီုန။ တၟေင်သန်ပြဝ ထဴတော်ဆကၠာ။   ။

ယွံမၞးတံအိုတ် ဟိုတ်နူဝွံမာ။ ညံင်သ္ဂောံတီကၠာ သာ်လွာဂွံပ။ ညးဂမၠိုင်ဂှ် ချပ်တုဲဒှ်ရ။ ယးကလဳလုပ်ဂြိုပ် ကိုင်အဒိရ။ အာတုဲကၠုင်ပၠန် အောပ်ဗ္ဒန်မံင်ပၠ။ ညန်တာဲအောပ်ဒၟဴင် ညံင်သ္ဂောံတီရ။ မမဂေါဝ်ဆာဲ ဒၟံင်ပ္ဍဲတာဲဂျ။ တိင်စံင်လဒု ဗရုထဏ။ ဒယှ်ေစလာင် ကဵုထာင်ဝါကျ။ ရမျာင်ကဵုကွိင် ယာံဂွံမိင်ပၠ။ ညံင်ဂတဝ်သာဲ တင်လာဲဒးကျ။ ညံင်အၚောဝ်သၟိင် ကွိင်ဥဒိုန်ရ။ ဂြေန်လဝ်စိုတ်ဇၟူ ဗၜူစိတ္တ။ ဗီုသာ်ဂှ်ကၠာ ဥပမာဏာ။ ဒေဝတဴပန် ဝုတ်ကညာဏ။ မိင်ဗရုကၠာ ကွိင်ဥဒါဟ။ စိုတ်ချဳဂတဝ် ကျိုင်ကျဝ်ဗြံက်ဗြ။ ကၠုင်စိုပ်တာဲကၠာ ဗြဴမှာဒေဝ။ လီၜန်ပူဗန် ဗၠန်ဝေင်ကာယျ။ လဗိင်သဍံက် ၜံက်ထေံလမ်လ။ ညးဂမၠိုင်ရ ခဏဂှ်အဴ။ ညာတ်ဗြဴပန်ပၠေ ကောန်ဒေဝတဴ။ ညံင်အဆေဝ်သွဝ် ဂပ်ဝ်က္ၜတ်သဴ။ လထဴညာတ်အဴ ရဴဝွံဂးကၠာ။   ။

ယွံကောန်ရြတံ မၞးတံညာတ်ဟာ။ မမဂေါဝ်က္ဍင် မင်တာဲဂှ်ကၠာ။ ကောန်ဗြဴကလော် လုပ်ဗော်ယက္ခာ။ ဟိုတ်ဂှ်ဖျုန်က ပေင်နသ္အဳဗ္ဂါ။ ဇၟာပ်အမာဲဟေင် ရိုဟ်တ္ၚဲသေင်ဟာ။ ပိုဲဝါတ်တုဲရ သိက်သ္ပရောမာ။ ကောန်ရဲတံမိင် ဇွိတ်သြိုဟ်သိင်သာ။ ဖံက်က်သ္ၚာတ်တ် ဂွံညာတ်တုဲမာ။ ကလော်ဗြဴပန် တ္ၚဲသဝ်ဗၠန်စဴ။
ညးဂမၠိုင်အဴ ညာတ်ဍေံစဴအာ။ ညးဂမၠိုင်ဟေင် စဴတာဲသေင်ဟာ။ စဴစိုပ်တာဲပၠန် ဒ္ၚဳချပ်စေါန်စာ။ ပိုဲဒၟံင်လံမ္ဂး ဟွံဒးသေင်ဟာ။ စဴပြဟ်ရောင်ဒး ဂးတုဲပိဒွါ။ ဆဗာ်ဂွံတုန် ဆုဒုန်ဇြိုင်သာ။ ဂိုင်ဖ္ဍိုက်ဂၠုင်ရ ခဏဂှ်ကၠာ။ ညးလ္ၚဵုဂှ်ယိုက် ညးလ္ၚဵုဖ္ဍိုက်အာ။ ဒုတ်တ်ဒီုဒီု ဟီုဇီုစောန်စာ။ ဖ္ဍိုက်တုဲဒှ်ပၠန် ကၟန်တိတ်အာ။  ။

ယာံဂၠုင်ဂကး ကၠေံသၞေဟ်ဂးကၠာ။ ဒေဝတဴပန် ရုပ္ပကညာ။ ဟိုတ်သ္ဍိုက်နာဲအဵု ဟွံမိက်ကဵုအာ။ ဍေံက္တဵုဗဒှ်ဟိုတ် ဗြဲလဗိုတ်ကျာ။ အလုမ်ဒိုဟ်ပန် ဂၠုဗဒန်အာ။ ဗြဲလဗိုတ်ကျာ ပိုက်အာသဴသဴ။ ကျာဗြုသဓီု လလောင်ကြဵုတဴ။ စံက်စေက်က္တဵုဒှ် လပှ်ကမြဴ။ လပှ်ဇီုဖျာ် ဍာ်လုပ်သဴသဴ။ ညံင်ဍောင်ပ္ကဴသွာ ဗြုကြဵုဇာတဴ။ ကျာရိုက်ထၟဴ ပိုင်ဖျဴဖက်ဖါ။ လပှ်ဇၞော်ကၠုင် ဇီုဂၠုင်ဖြာဖြာ။ ဂြိင်င်ဂြံဂြံ ကၠံထပ်လ္ၚီဝါ။ ပၠဳဒတုံသ္ကာတ် ဒြာတ်စှ်ေညံင်ဂွါ။ ဗြဴကျာလဒု ဒိုဟ်စှ်ဂၠုအာ။ ဂၠုင်ဟွံဂွံချဳ ဒှ်တဴဖဳဒွါ။ ဖံက်က်သ္ၚာတ်တ် ညာတ်လပှ်ကျာ။ ဒဝိင်လောန်ဗၞတ် ကင်ဇတ်ဇြဟာ။ ကောန်ဂၠုင်နာဲသာ ချပ်ဗစာရ။ လဣနင်ဒဴ ထဴမစဳခၠ။ ဟီုကဵုနာဲရ ခဏဂှ်အဴ။   ။

ယွံမဒယှ်တဴ စဴဒကောင်ပိုန်။ နာဲဟွံချပ်ဂိုတ် ပိုဲဒးချိုတ်ဗိုန်။ ဒးချိုတ်မွဲတဲ လၟုဟ်မွဲချိုန်။ ဂုဏ်နာဲပိုဲချိုတ် လမျီုအိုတ်ဗိုန်။ စဴလပဇြိုန် ဟီုတိုန်ညိကၠာ။ ပ္ဍဲဂှ်နာဲကီု ဟီုတိုန်ဟွံခြာ။ ယွံလဇုအဲ မပြဲပညာ။ ဟိုတ်နူအဲဟေင် ဒှ်ကွေံသေင်ဟာ။ အဲမွဲဟွံအာ တုဲအာမာန်ရ။ ဗွဲယုတ္တိပြဲ အဲတိတ်ဟီုပၠ။ လဣနင်ဒဴ ထဴညာဏ်စဳခၠ။ ဟီုတိုန်ကဵုစဴ ထဴနော်တြ။ နာဲမံင်ကၠာရ ပအာရစဴ။ ပြာ်လမျီုတုန် ပိုဲခၠေဝ်ဂုဏ်ကြဴ။ နာဲဟွံပြာ်အိုတ် ပိုဲချိုတ်ဆဴဆဴ။ ဒၟံင်ကၠာရစဴ ထဴဟီုတိုန်ရ။   ။

နာဲဒကောင်ပိုန် သီုကွိုန်တေဇ။ ကလေင်လုပ်ဒၞာဲ စိုပ်တာဲပၠန်ရ။ ကလော်ဗြဴပန်  ရုပ်ကညာဏ။ ကေတ်နင်ပုင်သွ သဗ္ဗအမာဲ။ ဖျုန်က္ၜိုန်ပှ်ကီု သီုကဵုဖျုန်ဒြာဲ။ စာင်အဒါအောဝ် မောဝ်ပ္ဍးတၟာဲ။ ကွာင်ၜဲယိုဟ်သာဲ အမာဲသဗ္ဗ။ က္ၜဴသတ်ဗြဴကဝ် ဗဒဝ်ပေင်န။ နာဲဒကောင်ပိုန် ဒတိုန်ရုပ္ပ။ စဳရေင်ဗျဳဗျာပ် ဆန်ဖါပ်ဗစ။ စဟာပ်တုဲပ္ညဳ ချပ်ယာယဳရ။ ဂကန်ကဵုစဴ ထဴဂှ်မူလ။ ယွံစဴတက ဒၟံင်ရစဴဂၞဴ။ နာဲပလ္ၚာပ်လ္ၚာ ပိုဲအာရစဴ။ လပစံင်တူ ပူဆာမှောဝ်မှဴ။ ပိုဲအာရစဴ နာဲဒၟံင်တဴရ။ နာဲဒကောင်ပိုန် ဒတိုန်ရုပ္ပ။ ဒ္ၚဳဟီုတိုန်ရ ခဏဂှ်ကၠာ။   ။

ယွံလဇုအဲ မပြဲပညာ။ လဇုစိုပ်အာ ခန်လွာမိဂၞဴ။ တဝှ်ခပ်သီ လဇုပ္တီတဴ။ အ္စာအဲပ္ညဳ သဳနော်လဗဴ။ လဇုပ္တီပၠန် ကျာ်ဂန်မိဂၞဴ။ ဒဒှ်ကောန်အဴ ဟွံဂွံစဴပၠန်။ ဒဒှ်ဟွံချိုတ် ကောန်ဟွံအိုတ်သ္ကန်။ ဒဒှ်ဒၟံင်တဴ ဂကောံဗြဴပန်။ ဟွံဒှ်ပရိုက် ဟွံယဲဒိုက်ပၠန်။ ဟီုမိကျာ်ဂန် အဲဂကန်ပြင်။ မိလပဒှ်ပၠန် လ္ၚုလ္ၚန်ဇွောဝ်လင်။ မိပစံင်တူ ပူဆာယာံကြင်။ မိပဇွောဝ်လင် ပဒွိင်ဘင်တဴ။ ဒဒှ်ဂကန် ပရိုင်ကောန်ဂၞဴ။ လဇုစဴစိုပ် ဗဒိုပ်မိဂၞဴ။ ဟီုလဴညိအဴ ကဵုမိဂၞဴအဲ။ ဂကန်ဖျန်တုဲ တြုံလွုဲမပြဲ။ ဒ္ၚဳပင်ပ္တိုန်တဲ အဲပရဲတဴ။ လ္ၚောဝ်ကၠုင်ဖိဖျ ဒၟံင်ဒၞာဲမိဂၞဴ။ ဖျေံက္ဍိုပ်ပိဝါ သီုဖဳဒွါတဴ။ ဟိုဇီုထုဲအဴ ထဴက္တဵုအာရ။   ။

ထဴကော်ဂကန် ဗၠန်ဂတးပၠ။ ယွံမသ္ဍိုက်လ ဒၟံင်ရစဴဂၞဴ။ မသ္ပလ္ၚာပ်လ္ၚာ ပိုဲအာရစဴ။ ညးဂမၠိုင်ပၠန် ကော်ဂကန်တဴ။ လ္ၚဵုဂှ်ဟီု၇ော ဒၟံင်ရကောဂၞဴ။ လ္ပဘိင်ဘင် လ္ၚာပ်လ္ၚာသၠင်တဴ။ လ္ၚဵုဂှ်ကော်လှေံ ယွံဒေံဍောင်ပ္ကဴ။ ပစံင်တူအဴ ကောဂၞဴအာရ။ လ္ၚဵုဂှ်ကော်ဂၠိန် ယွံကၟိန်တလ။ ဒၟံင်ကဵုခိုဟ်ကၠာ ပိုဲစဴအာရ။ သေဲသေဲဂၠိုင်သန် ကောန်ဂကန်ပၠ။ ဂကန်ကဵုဗျာံ နာဲသာစိတ္တ။ စှ်ေက္ဍိုပ်ဂၠုင်ပြဟ် ခဏဂှ်ရ။ ဗ္ဂန်တ္ၚိုက်တုဲဂျ တိုက်ဂမြံအာ။   ။

နာဲဒကောင်ပိုန် ဒတိုန်ရုပ္ပ။ ညာတ်ညးမစဴ တြဴခန်လွာ။ ဗှ်ကလောပၠန် ဗှ်သန္ထာန်ကၠာ။ ဗှ်သဳမူအဴ ဗဴလမွဲၜါ။ ဗှ်မိကျာ်ဂန် မဒးခၠန်ခြာ။ မုက်ချိုတ်စရိုတ် သြိုဟ်ညံင်သွာ်အာ။ ရမတ်ဇွောဝ်ဍုက် ပေင်မုက္ခဝါ။ ဂိုင်ကေတ်ယာတ်ပၠန် တြုံနွံပညာ။ ဇိုတ်ဍာ်ရမတ် ပ္ဍဲဂၠံမတ်ၜါ။ ဗှ်သၟာဟေင် မိဂၞဴသေင်ဟာ။ ဒဒှ်မိဆာန် ဇြဟာန်မေတ္တာ။ ဒဒှ်လွဳလဝ် ကောန်ဂၠုထဝ်နှာ။ ဒဒှ်ဖုံပၠဳ မိလွဳပရာ။ ဖရာဲမိသ္ဍိုက် ယိုက်ဒိုက်ဖဳဒွါ။ မိဖုံပၠဳဟေင် ရိုဟ်တ္ၚဲသေင်ဟာ။ မိအုဲအိက်သၟတ် ပတ်သမောဝ်ကၠာ။ တူထဝါဲတုန် ဒှ်ဖုန်သၞာ။ သော်မိသလဲ ဂေက်ဂြဲဟွံညှာ။ ကျာ်ဂန်လွဳလဝ် စဵုဇၞော်မောဝ်အာ။ ဟးဂန္ဓအဲ ဂုဏ်ဇၞော်ပြဲဖါ။ ဟွံဂွံရော်တုန် ဂုဏ်မိသေင်ဟာ။ ဗှ်မဒးကၠင် ခြာဒင်စာ်မြာ။ ဗှ်ဇကုမွဲ ပ္ဍဲရညဝါ။ ဗှ်တိုန်မိဂၞဴ သြိုဟ်ရဴသ္ပာ်အာ။ ဇွောဝ်လင်ကၠင်ဟဳ လၞီဖဳဒွါ။ ဇၟောဝ်ဍာ်ရမတ် ဇွောဝ်ပေင်မတ်ၜါ။ ယာံလင်ဇွောဝ်ဟေင် ဒၞာဲဂှ်သေင်ဟာ။ ဗြဴသိုက္ခမာ ဂွံညာတ်အာပၠန်။
ညာတ်တြုံမုက်ချိုတ် ပ္ဍဲစိုတ်လ္ၚုလ္ၚန်။ ညာတ်တြုံယာံတဴ ကညာဗြဴပန်။ ပခိုင်စိုတ်ဟွံမာန် ဟိုတ်ဆာန်တြုံလောန်။ ဗန်ကံတြုံအဴ ယာံတဴသောန်န်။ ဟးတၠသ္ၚိ ကောမိကျာ်ဂန်။ ကောပယာံရ ကောပဝေါန်စန်။ ကောပလ္ၚုလ္ၚန် ကောပ္တန်စိုတ်ညိ။ လ္ပဒွိင်ဒွာဲ နာဲသ္ၚိကောမိ။ ကောပလ္ၚုလ္ၚန် ပူဗန်ဖိဖိ။ ကောလပဒှ် ယဲပူမှ်ညိ။ ပတ္ၜူမာဲစိ ဒမၠိပူမှဟ်။ ပိုဲညးပန်ကၠာ နွံတဴခါဂှ်။ ဒၞာဲနွံပၟိက်ရော စိုတ်ကောမဒှ်။ စိင်ဂၠုင်ဍုင်ခွာ ရာစိုတ်ကောသၟဟ်။ စိင်ချေံဇၟာပ်စွံ သၟိက်ဂွံလ္ၚဟ်။ ကောပဒိုက်စိုတ် ဂွံအိုတ်ဗွဲပြဟ်။ ထဝ်သြန်မတ်ဗၠဲ ယာတ်ပြဲတံဂှ်။ ကဵုကျိုင်အဵုဇိုတ် ဆစိုတ်ကောဒှ်။ ပိုဲဇိုန်ကဵုအိုတ် ပၟိက်စိုတ်ကောသၟဟ်။ ကောပပူမှဟ် ကောပဒှ်ဒဝိင်။   ။

ကောပစံင်တူ ပူဆာဘင်ဘိင်။ မိမပိုဲဂှ် ညးမဒှ်သၟိင်။ ပိုင်ကလော်ကိုပ် အလုမ်ဂြိုပ်ဂၞိင်။ ကောဂွံပသၟိင် ဂွံဒှ်သၟိင်ရ။ ကော်ဗြဴပန် ယာံပူဗန်ထ။ လှေံလှန်စရိုတ် ဟီုပၠောင်စိုတ်မ။ မိင်ပါင်ဗြဴရတ် ကၞောတ်ရုပ္ပ။ ညံင်ဇၟူဂွံမိင် က္ၜိင်ဥဒိုန်ရ။ ဇၟူသၠိင်စိုတ် သၟဟ်အမြိုတ္တ။ ကလေင်ဟွံမာန် ဋ္ဌာန်တၞံမူလ။ ဒးဇၟူပင်မှိင် ရှ်ကွိင်သဒ္ဒ။ နဲဗိုဂှ်ကၠာ ဥပ္ပမာဏ။ ဂကောံဇၟူဗြဴ တ္ၜူမာဲတဴရ။ ရမျာင်ဒေံဗြဴ တုပ်ရဴထဏ။ ဟီုပၠာံဗဇးပၠန် လှေံလှန်စိုတ်မ။ ရှ်ရမျာင်ကွိင် နာဲဂွံမိင်ပၠ။ သ္ဍိုက်မၠိုက်ဗြဴပန် စိုတ်တန်အာရ။ တုဲကလော်ဗြဴ လှေံလှန်စိုတ်မ။ နာဲဒကောင်ပိုန် ဒတိုန်ရုပ္ပ။ ဂကောံဗြဴပန် သၟဟ်န်စိတ္တ။ ဒ္ၚဳစဴအာရ ခဏဂှ်ကၠာ။   ။

အာစိုပ်လွဳမာန် ထာန်ကလော်ဗြဴကၠာ။ ကလော်ဂမၠိုင် ကၠုင်ဗိုင်သ္အဳဗ္ဂါ။ ဝေင်ဒုင်စေံဏေံ လှေံလှန်နာဲသာ။ သၟိင်ကလော်ပ္ညဳ ခါံသဳနာဲၜါ။ ခါံသဳတြုံဗြဴ ညာတ်တဴနာဲကၠာ။ ညံင်ကောန်အိိန်ဗၠာဲ စရာဲရုပ္ပါ။ သ္ဍိုက်မၠိုက်လောန်ထောန် ညံင်ကောန်ဂၞဴကၠာ။ သၞေံသၞဴ ကော်တဴဖဳဒွါ။ ပၠာံဗဇးအိုတ် စိုတ်နာဲတုဲမာ။ တုဲသၟိင်ကလော် မဇၞော်အညာ။ ကော်ဍိက်သ္ကံကၠာ သီုတွဳဝါရ။ ဗလိုပ်ဖုံနာဲ နာဲစဳရေင်ပၠ။ ကလော်ဗြဴဂှ် ဝုတ်ထပှ်ဂျ။ လေင်နုင်ဂၠဟ်ထဝ် ကျိုင်ကျဝ်ဗြံက်ဗြ။ ကဵုတုက်ဍာ်သၟတ် အနုတတ်တ။ အာတုက်ဍာ်တုဲ သၟုဲစဴလျလျ။ ကော်လ္ၚီပ္ညုင် ကၠုင်သဳကၠဳဂျ။ ဗလပ်ဖုံရ ခဏဂှ်ကၠာ။   ။

ကဵုနာဲကျိုင်စိ ဂ္ညိဂ္ညာတ်ကြိယျာ။ ကဵုနာဲကျိုင်ကျဝ် ဂ္ညိဂ္ညာတ်မှောဝ်ဇာ။ ယာတ်ဒိပ်လၟေင် ဖေင်ဒိပ်နာနာ။ လစိန်စရံက် ဂြင်ဗြံက်တဲၜါ။ ၝောံကိုတ်ကီုဟေင် သီုဗြကၞေင်ကၠာ။ ကၞေဟ်လက်ကြာပ် နာံဗျာပ်ညဳသာ။ နာဲဝက်သၞေက်ဆာဲ စလာဲက္တောဝ်ၜါ။ စလန်အဂၠဴ ဟုံဗော်တဴကၠာ။ ပ္ကဴဒၞာဲမဂေါဝ် ဂညိက္တောဝ်ၜါ။ ကျိုင်ကျဝ်တုဲအိုတ် ဟွံတသိုဟ်ခြာ။ လျးရုပ်ကဵုရတ် က္ၜတ်သြဴညဳသာ။ ညံင်ကောန်အိန်ဗၠာဲ စရာဲရုပ္ပါ။ ကောန်ဗြဴသၟိင်ပန် ရုပ္ပကညာ။ ဗၠိုင်ဖုံကျိုင်ကျဝ် ထဝ်သြန်နာနာ။ လစိန်စရံက် သီုလကံက်ဂွါ။ သၞေက်ထဝ်ဖေင်ထဝ် ယာတ်ထဝ်သခါ။ စလန်အဂၠဴ ဟုံဗော်တဴကၠာ။ ရုပ်သာ်ဗြဴပန် သၟဟ်န်သာဓာ။ ညံင်ကောန်ခၞောဝ် ညးသွဝ်ကေလာ။ ဂေါပ်ဂဝ်လောန်သန် ကောန်ဗြဴယက္ခာ။ သၟိင်ကလော်ရ ယက္ခရာဇာ။ ထပ်တဲကောန်ဟေင် ကဵုနာဲသေင်ဟာ။   ။

နာဲဒကောင်ပိုန် ဒတိုန်ရုပ္ပါ။ ဇိုန်ကဵုပသၟိင် သၞိင်ခန်လွာ။ ကောန်ကဵုဓမာန် ရေင်ကာန်သာဓာ။ တူဒေန်ထဝ်ဒြင် သၟဝ်ဗတင်ဇာ။ ကောံဂၞကျာ်ပန် သၟဟ်န်ညဳသာ။ ကမၠောန်သ္အဳဂၠက် မသက္ကုခြာ။ သ္ဍိုက်ဗြဴပန်သၟတ် သ္အဳဂၠက်တဴကၠာ။ ညံင်အိန်နာဲမြု ကဵုသုဇာတာ။ ညံင်သၟိင်ရာံဖျာ် ဂၞကျာ်သဳဒါ။ ညံင်ကုသကၠာ ပြဘာဝတဳ။ ရေင်ကာန်သၟဟ်န် ဂွံတန်မွဲဒၞဳ။ ဒေါဝ်ဂၠံင်ကျာ်သြဳ ဃောဗနဳက္ၜိုန်။ ကောန်ညးဒင်မာဲ နာဲဒကောင်ပိုန်။ ဒါန်တၞံဆတ္တဝ် ဟိုတ်ပ္တုဲလဝ်ဗိုန်။ ဗြဴပန်ညံင်ထဝ် ဂွံဒ္ၚောဝ်လၟိုန်။ ဂွံဒှ်သၟိင်ဓဝ် ဒေါဝ်ကသဝ်ပိုန်။ ကုသဵုတၞံဗိုန် မဇိုန်ကဵုကၠာ။ ဂွံဒှ်သၟိင်ဟေင် ရောင်ဟွံသေင်ဟာ။ ဂြိုပ်သာဲလေဲဂှ် ဟိုတ်ဒှ်ခန်လွာ။ သၟိင်ဓဝ်သာဲလေဲ သေဲသေဲဟီုအာ။ ဒယှ်လအိတ် ဇမ္ဗုဒိပ္ပါ။ စဵုကဵုလၟုဟ်ဂှ် ဒယှ်ပြာထာ။ ဟိုတ်ဒါန်တမၠာ ဂွံမြာလွာရောင်။   ။

သၟိင်ဓဝ်ဗြဴပန် ဂွံညန်မွဲတောင်။ မၞိဟ်ဂမၠိုင်ရောင် အခေါင်စဴအာ။ လဣနင်ဒဴ ထဴသီုရဲသာ။ ကၠေံလဝ်တာဲတုဲ ဍိုက်ဂၠုင်သၞုဲအာ။ ဂတးက္ဍိုပ်ဂၠုင် သရုင်ဂင်္ဂါ။ ကာလကၠုင်သၟတ် ဗၞတ်စှ်တ္ၚဲကၠာ။ ကာလမစဴ နုဘဴယက္ခာ။ ဂၠုင်ဂြိုပ်ဂမြိင် ဟွံသဍိင်ခြာ။ ညံင်ပဝန်ကံ ဒြိပ်ဂမြံအာ။ စိုပ်သၞေဟ်ကွာန်ကၠာ ခန်လွာဒင်မာဲ။ ညးဂမၠိုင်စိုပ် ဗဒိုပ်ဒၞာဲဝါဲ။ အိုဟ်တၟိုဟ်ဆာဲ နာဲဂၠုင်ကောန်ဂၠုင်။ ကောန်သမ္ဘာညး စှ်ေဒစးဒုင်။ မိပ်စိုတ်မှောဝ်ဇာ စှ်ေအာဒဵုဂၠုင်။ ညာတ်ညးစှ်ေဂၠုင် ဝေင်ဒုင်လၟိုန်။ မိနာဲဂေါဝ်ဇြုင် စှ်ေကၠုင်ဟွံဇြိုန်။ ရံင်ကောန်ဟွံညာတ် သမ္ၚာတ်သုံသိုန်။ ပရိုင်ကောန်ဗၠာဲ ယာဲဇုသၟာန်တိုန်။ ညိဟွံဂွံသွိုန် ကောန်သၟာန်တိုန်ကၠာ။   ။

ယွံနာဲဂၠုင်အဲ မပြဲပညာ။ ကောန်သ္ဍိုက်ယာဲ မူဒၞာဲမအာ။ မူဟိုတ်မွဲကၠာ ဒှ်အာရောမ။ ဟွံသေင်ဗြံဂၠုင် ဒေါဝ်ကြုင်စာ်ခၠ။ ဟွံသေင်အိုတ်ဒဲ ဒးဘဲကျာံက။ ဟွံသေင်လုပ်ဒွီု ဒီုပ္ဍဲဟေမ။ ဒးဘဲသ္ဂးဟာ ဇာဒိသိုင်ကၠ။ ဟွံသေင်တိုန်ဆု ဒတုံဒုဒ။ ယဝ်ချိုတ်အာကီု နာဲဟီုညိရ။ ညးမအာဂြိုပ်ဂျိ စိုပ်သ္ၚိအိုတ်ပၠ။ ကောန်အဲမွဲဂှ် သာ်ဒှ်ရောမ။ ဥပ္ပတိကီု ဟီုပြဟ်ညိရ။ သီုမနရာတ် သွါတ်ဟဒယ။ ထဴမိင်ပါင်ရ ပ္ဍဲခၞဂှ်ကၠာ။ ပရိုင်ဂှ်သွံ ဟီုတိုန်ဟွံညှာ။   ။

ယွံမိနာမ ပယျာံပိုဲသ္အာ။ ကောန်တၠအဲ မပြဲသာ်လွာ။ ဗာ်ဆုဒုန်ကိုင် လုပ်ဂြိုပ်တိတ်ဝါ။ ဟွံဒှ်ကာဆာဲ ကဵုမင်တာဲကၞာ။ လံပိုဲစဴစိုပ် နူဂြိုပ်ဂှ်မှာ။ ဗရုလလံင် စံင်ဒြဝ်ဓရာ။ ဇုက်စံင်ဇက်တိုန် တလိုန်ညှာညှာ။ ဒယှ်ေရဴဂါံ တိင်ကျာံသာယျာ။ နဇိုင်တက်ခဍေဝ် ရမျာင်တေဝ်ဏာ။ မိပ်ဇြိပ်လောန်အဴ နွံတဴရှ်သာ။ ဒေဝတဴကိုပ် ထာန်ဂြိုပ်ဇီုဖြာ။ မိင်ရမျာင်နာဲ အကာဲကြုတ်ဏာ။ ဟီုဇိုန်ရိုဟ်ထာန် ဆာန်ကၟိန်သာဓာ။ ပုင်သွအမာဲ ဍာ်သာဲသဂြာ။ ပေင်ထးပေင်သၠိုင် ဂၠိုင်သန်နာနာ။ ဂကောံဗြဴပန် သၟဟ်န်သာဓာ။ ဆာန်ကၟိန်ဗိုန်က္ညန် တန်မွဲသၞာ။ ပိုဲစဴနူဂြိုပ် ညန်ပိုဲစိုပ်ကၠာ။ ဒေဝတဴဗြဴပန် ဍေံကၠေံဗ္ဒန်အာ။ ပိုဲစိုပ်တာဲရော စဟာပ်ဟောဒြာ။ ညာတ်အမာဲဂှ် က္တဵုဒှ်သင်္ကာ။ ပ္ဍဲဂှ်ပိုဲပၠန် ချပ်တိုန်စောန်စာ။ ယးလုပ်ဂြိုပ်အဵု ညံင်ကဵုမအာ။ ပိုဲကလေင်ကၠုင်ကၠာ အောပ်မာဗ္ဒမံင်။   ။

ပိုဲဂွံညာတ်ကၠာ သိင်သာတိုန်ကၠံင်။ ပိုဲဟွံဂံင်မံင် ဖေက်ဒမံင်တဴ။ ဒၟံင်ဟွံဒးပ္ညုင် ဍိုက်ဂၠုင်ဒဴစဴ။ စိုပ်ဒေါဝ်က္ၜဳအဴ ဒှ်တဴဗြဲကျာ။ လဗိုတ်လဒု ဒိုဟ်ပန်ဂၠုအာ။ လပှ်ဖက်ဖါ ညံင်သာ်လွာပ္ကဴ။ ဂၠုင်ချဳသမြုပ် ဍာ်လုပ်သဴသဴ။ ဂၠုင်ဟွံအာဟေင် ကာလကလေင်စဴ။ ဇကုနာဲဆာဲ ကွာဲဒေဝတဴ။ တုဲပိုဲဂွံစဴ စိုပ်ကောန်ဗြဴရောင်။   ။

တဝှ်အိုတ်သီု ထဴဟီုညံင်စောင်။ ယာဲမမိင်ရောင် အခေါင်ကောန်ဗၠာဲ။ တိင်င်တက်သြိုဟ် ဟးဖျုန်ဂြိုဟ်ယာဲ။ အဵုဒကောင်ပိုန် ဒတိုန်စရာဲ။ အဵုထဝ်ကမု မဂၠုကောန်ဗၠာဲ။ အဵုထဝ်ပၞာဲ မဂေါဝ်ဆာဲလောန်။ အဵုဂၠုလစောန် နာဲကောန်ကမၠင်။ အဵုထိုက်သမ္ၚာ ဂၠုရာဇာဝင်။ အဵုကောန်ကမၠင် မိဒးကင်ဇတ်။ အဵုကောန်အသဝ် ရုပ်ထတ်ထမၞတ်။ အဵုဂဍောင်မတ် ကၞောတ်ဇြဟာန်။ အဵုထဝ်ပဏာဲ နာဲတလဒါန်။ မိအာန်တၞာန် လောန်လာန်သန်ကောန်။ တက်သြိုဟ်တိင်င် ဒဝိင်လောန်ထောန်။ ဣဝီုဖ္အောန်န် တမောဝ်လောန်ဗၞတ်။ တမ်ကံဗတိုဟ် ဖျုန်ဂြိုဟ်တတ်တတ်။ တိင်လောတ်စှ်ေဂွိုင် ဇိုင်က္ၜဳဂှ်သၟတ်။ ယဝီုတတ်တ် ဖတ်တ်ဝိုတ်သ္တင်။   ။

မိဇြဟာန်လောန် ဟိုတ်ဆာန်ကောန်က္ဍင်။ သီုမဇွောဝ်လင် ဝိုတ်သ္ၚဳသတင်အာ။ ညးဂမၠိုင်ပ္ညုင် ဒြေပ်ကၠုင်ဟောဒြာ။ ညးလ္ၚဵုဂှ်ပင် ကေတ်နင်ဍာ်ကၠာ။ ပၠဳစုတ်မုက်ဂှ် သမ္ၚုဟ်တိုန်အာ။ ဂွံတိုန်သတိကၠာ ဗၞုဟ်ဗှ်သၞာကောန်။ အဵုဣတယာဲ မဂေါဝ်ဆာဲလောန်။ ဂြိုဟ်ယာဲသောန်န် ယွံကောန်ကမၠင်။ အဵုထဝ်ကမု ဂၠုကွးသၟိင်သင်။ အဵုကောန်ကမၠင် ရုပ်ခၠင်စရိုတ်။ အဵုဂဍောင်မတ် ရုပ်ကၞောတ်စိုတ်။ အဵုထဝ်ပဏာဲ နာဲက္ဍိုင်ၝောံကိုတ်။ အဵုဒကောင်ဗိုတ် ရုပ်ၝောံကိုတ်ယာဲ။ မိဂၠိုင်လောမ်လာဲ ဂုဏ်နာဲရောင်ကောန်။   ။

အဵုဒကောင်ရတ် ရုပ်ဗတ်ညးသောန်။ မိမွဲစောန်လောန် ကောန်ုးစာ်ခၠ။ ဂလာန်ထဴကွေံ မိဟွံပ္တေဟ်စ။ မိဟွံညာတ်မ ယာဲချိုတ်ရကောန်။   ။

အဵုထဝ်ကမု ဂၠုမဂေါဝ်လောန်။ ဟွံစိုပ်ယာဲပၠန် ကောန်မှာရုပ္ပ။ မၞိဟ်ဂွံဒၟံင်ကောံ ကရောံဒေဝ။ ဂလာန်ထဴရ ညးပ္တေဟ်စဟာ။   ။

လဣနင်ဒဴ ယွံထဴနာသာ။ ဗတ်ဒှ်ကၠစ ဗက်ဇွဟောဒြာ။ ညးတီညာတ်သၟတ် ဒုဟ်ပြာကတ်အာ။ သာ်ဂှ်ဒးဟေင် ဗၠးဒုဟ်သေင်ဟာ။ ယဝ်ရညးမွဲ ယဲဒိုက်ချိုတ်အာ။ ဂွံယိုက်ဇွပၠန် စံင်ဒန်ဟောဒြာ။ ဂွံတီညာတ်ဟေင် ဗၠးဒုဟ်သေင်ဟာ။ ဗက်ဒးဒှ်ရ ဒမၠမတာ။ ညးၜုင်တက်ချိုတ် ဟိုတ်ကံတမၠာ။ ယိုက်ဇွစံင်ဒန် တီဇၟာပ်ခန်လွာ။ ဒှ်သာ်ဂှ်ဟေင် ဗၠးဒုဟ်သေင်ဟာ။ ကောန်အဲတုန်မာ အာဂကောံထဴ။ ညးဂမၠိုင်သ္အဳ သီုဖ္အိုတ်ဗၠးစ။ ကောန်အဲမွဲအဴ ဟွံစဴစိုပ်အဲ။ ပွထဴဂှ်ကီု ဟီုကဵုနဲကဲ။ ကၠုင်ဟီုကဵုအဲ အဲပ္တေဟ်ကီုဟာ။   ။

လဣနင်ဒဴ ယွံထဴနာဲသာ။ ကလော်ဂွံဏာ သာဓါလုမ်လ။ ဟွံချိုတ်သဘဴ ဂျိုင်နွံတဴရ။ နာဲပိုဲဟီုဂှ် ဟွံဒှ်စၟတ်ပၠ။ ညာတ်နမတ်ကွေံ အဲပ္တေဟ်ကီုရ။ ဂလာန်ဂှ်ကီု မိနာဲဟီုပၠ။ မိင်ဂလာန်ရ လဣနင်ဒဴ။ သာ်ဝွံတုန်ကီု ဟီုတိုန်ဆဴဆဴ။   ။

ယွံလေဝ်နာဲဗြဴ ဒှ်တဴသင်္ကာ။ အဲအာထ္ၜး ယးလဳပိုဲအာ။ ယာဲနာဲမိင်အဴ ဂလာန်ထဴကၠာ။ စဳရေင်ဇွောံမ သီုကသပါ။ နာဲဂၠုင်ကောန်ဂၠုင် ပ္ညုင်ကဵုဟွံခြာ။ ယးစှ်ေက္ဍိုက်ဂၠုင် တုင်င်တိတ်အာ။ ဒျာန်တ္ၚိုက်ကၠာ ဂိုင်အာဂြုုဂြု။ တ္ၚဲဗတံ ဂမြံထဥ။ တ္ၚိုက်စလဝင် ကဵုပါင်လဒု။ ပၚောံစနု အနုဂင်္ဂါ။ ထောံနူဂှ်ကၠာ အာဒၟံင်သေဲသေဲ။ တုဲဂွံအာစိုပ် ထာန်ဂြိုပ်သာဲလေဲ။ ဆုဒုန်သ္တပ်သ္တေင် ဟွံဗၠေင်ဍုတ်ဍေဲ။ ဆုဒုန်သာဲလေဲ နဲဗီုသေဲပၠ။ စိုပ်သၞေဟ်တုဲကၠာ တိုန်အာတာဲရ။ လဣနင်ဒဴ ထဴညာဏ်စဳခၠ။ ဟီုထ္ၜးရ ဒေသအရာ။   ။

ယွံမိနာဲမွဲ မပြဲသာ်လွာ။ မမဂေါဝ်ဆာဲ ကောန်နာဲဂှ်မာ။ ကဵုမင်တာဲဟေင် ဒၞာဲဝွံသေင်ဟာ။ ကာလပိုဲအဴ မစဴဂှ်မာ။ ဒၞာဲဏံမံင်တဴ တုဲပိုဲစဴအာ။ နာဲဗြဴကော်စံ သ္ၚံသ္ၚံညိကၠာ။ မိင်ရမျာင်မိ ကလုက်ညိဟာ။ မိနာဲတုန်မာ ခါညာတ်ဒၞာဲကောန်။ လ္ၚုလ္ၚန်လောန်ကာဲ ပ္ဍဲစိုတ်ယာဲလောန်။ မိဒးအိုတ်ဒဲ တ္ၚဲဝွံရကောန်။ လၞီယာဲလောန် သွံမကောန်ဗၠဲ။ တိင်တင်တက်သြိုဟ် သြဖျုန်ဂြိုဟ်ယာဲ။ အဵုထဝ်ပဏာဲ နာဲမဂေါဝ်လောန်။ အဵုဂၠုလစောန် ဟးကောန်ကမၠင်။ အဵုထိုက်စမ္ၚာ ဂၠုရာဇဝင်။ အဵုကောန်ကမၠင် မိဒးကင်ဇတ်။ အဵုကောန်အသဝ် ရုပ်ထဝ်ထမၞတ်။ အဵုဂဍောင်မတ် ကၞောတ်ရုပ္ပ။ မိကၠုင်စိုတ်တာဲ ဒမံင်နာဲရ။ ယာဲသၟိက်ညာတ်မ ကၠုင်ညိရကောန်။   ။
အဵုဣတယာဲ ရုပ်နာဲထဝ်သောန်။ ကေင်ဂွံမိင်ပၠန် ရမျာင်ကောန်ဗၠာဲ။ ဗှ်ယာဲမိင်ကၠာ ကျာ်ခရာနာဲ။ ဒွက်ဂိုန်ဂၠိုင်ဒၞာဲ ယာဲမိင်ဒမၠိ။ လၟုဟ်ယာဲကၠုင်စိုပ် သန္ထာန်ဂြိုပ်ဂျိ။ တိင်ကွာဲကဵုမိ ယာဲမိင်ညိကောန်။   ။

အဵုဣတဇု ဂၠုမဂေါဝ်လောန်။ ကွိင်ကွိုက်လစောန် ကောန်ဂၠုတိင်တ္ၜာဲ။ မိင်ကွိင်နာဲပၠန် စိုတ်ၜိုဟ်လောန်လာဲ။ လၟုဟ်ယာဲပၠန် ဂၠိုင်သန်လောံလာဲ။ ကၠုင်တိင်ကွာဲမိ ညိရကောန်ဗၠာဲ။   ။

အဵုဣတဇု မဂၠုထဝ်ပနာဲ။ ဟွံဂွံညာတ်နာဲ ယာဲဒးဟောံဇြ။ ဒဒိုက်ယာဲလောန် ကၠင်ကၠောန်ယဲသ။ မူမတုပ်ကၠာ ဥပ္ပမာဏ။ ညံင်သွးဒေါဝ်က္ၜဳ ဟဳဒၟံင်လျလျ။ ဟွံမွဲသၞေဟ်သြင် တံပြင်ညိည။ ဗီုက္ၜင်ထဝ်ရ ဟွံမွဲသၠယာ။ မဒးဟဳကြင် ပ္ဍဲဒေါဝ်ဂင်္ဂါ။ မိနဲဂှ်ကီု တုပ်ဗီုပမာ။ ညံင်ဂစေံမွဲ ဟွံမွဲသၞေင်ၜါ။ ဒးသ္ကုတ်အဟာ ညန်မာရဏ။ နာဲခြာနူမိ မိအိုတ်ခန္ဓ။ နဲဂစေံရ ဂိုင်ပပမာ။   ။

အဵုဣတယာဲ နာဲဍောင်စမ္ပာ။ ဒဒိုက်ယာဲလောန် သွံကောန်ထဝ်နှာ။ ညံင်လၟမွဲ လွပ်တဲအိုတ်အာ။ ဒေင်သၠင်လ္ၚာပ်လ္ၚာ ပူဆာလောံလာဲ။ ညံင်သၟိင်နာဲမွဲ လုပ်တဲလၟာဲ။ စံင်တူဇြေဟ်ဇြာဲ လၟာဲဂွံဏာမိနဲဂှ်ကီု တုပ်ဗီုပမာ။ ညံင်သရာဲကၠာ လွဟ်ဟွံဏာရ။ ညာတ်သတြုကွေံ ဒးဖျေံက္ဍိုပ်ဂျ။ ညံင်ဒိုက်ဂတ်သၟတ် ဒမၠုမတ်ၜါ။ အာကၠုင်ဟွံဒး ယာံကြးဖဳဒွါ။ ညံင်ရဲညးက္ၜင် ဗြံဒေါဝ်ဂင်္ဂါ။ ညံင်ဗီုတၞံတာ မပိုတ်အာတၞုင်။ ညံင်ဗီုကျာံကျာ အိုတ်အာဝင်ကြုင်။ ဆုအိုတ်တၞုင် ကြုင်အိုတ်ကၞောတ်။ ညံင်နဲဂှ်ကီု တုပ်ဗီုအဆတ်။ ဝေင်အာနူနာဲ ကောန်တြုံယာဲသၟတ်။ ညိဟွံပဗၞတ် ကောန်ပၞတ်ကဵုယာဲ။   ။

အဵုကောန်ဗၠာဲဗၠာဲဗိုတ် ဂၠု​ၝောံကိုတ်ယာဲ။ ဓဇန်လောန်ကာဲ ထောံယာဲရောကောန်။ အဵုဒကောင်ထဝ် ရုပ်အၚောဝ်လောန်။ အဵုဒကောင်ဗၠဲ နာဲမွဲလောန်စောန်။ အဵုဂၠုလစောန် ကောန်သ္ဍိုက်ယာဲ။ အဵုထဝ်ပနာဲ နာဲလမာဂၞဴ။ မိဖံင်ဖနံင် ကော်မံင်ကဴကဴ။ ပနာဲကၞပ်တဴ ရောကောန်ဂၞဴယာဲ။ ၜိုန်မိကော်ဂၠာဲ နာဲဟွံမိင်ပါင်။ ပသာ်နာဲဒှ် တဝှ်တြုံသာင်။ ဟွံမိင်ရမျာင် ပါင်ဣတယာဲ။ မိကၠုင်ကော်ဂၠာဲ ပနာဲကၞပ်စု။ ဟွံသေင်တိက်သၠိင် သမၞိင်တၞံဆု။ ဒွံဘဲသတြု သ္ဂးဟာဂၠုယာဲ။   ။

အဵုကြက်စလန် မဂၠုကောန်ဗၠာြ။ မပၞက်ကဵုယာဲ ဗ္ဒာဲကဵုတၞံဆု။ အာအောပ်တဴရ ဟွံပၠဇကု။ ဝေင်ကၠေံနူနာဲ ယာဲသုန်ဂြာံလ္ၚု။ ကလောဟွံမွဲ ယာဲမွဲဇကု။ ထေဲကဵုယာဲဇု သ္ဂးဟာဂၠုယာဲ။   ။

အဵုထိုက်စမ္ၚာ လၟဴဂၞဴယာဲ။ တ္ၚဲသဝ်လောန်ကာဲ မိဂၠာဲကော်တဴ။ ဂစေံကၠံမွဲ ပဝ်ဂၠောဲကမြဴ။ ပမကောန်ဂၞဴ ဟွံစဴကဵုယာဲ။ အဵုပၞာင်တိုင်ထဝ် လၟောဝ်ဂြိုဟ်ယာဲ။ စၞဇၟာပ်ဒၞာဲ ပယျတ်ဂၠာဲနင်။ နာဲဟွံမွဲရ စၞဇၟာပ်တင်။ ညးဂှ်ဂၠာဲနင် ရောကမၠံင်ယာဲ။ ကောန်ခြာနူယာဲ ယာဲဒးကၠင်ပြဵု။ စဴကၠုင်ကဵုယာဲ ရနာဲဍောင်မ္ၚဵု။ လၞီကၠင်ပြဵု ဟွံဟဲကဵုယာဲ။ အဵုစမ္ပာထဝ် ရုပ်မဂေါဝ်ဆာဲ။ ချိုတ်အာကဵုယာဲ ဟာကောန်ဗၠာဲမိ။ မိကော်စလာင် ဟွံမိင်ပါင်ညိ။ ချိုတ်အာကဵုမိ ဟာပဳတိယာဲ။   ။

အဵုထဝ်ကမု မဂၠုကောန်ဗၠာဲ။ ဂျိုင်ကဵုကဵုယာဲ ပနာဲဟွံစဴ။ မဂၠုဒၟံင်တဴ ဟွံစဴကဵုယာဲ။ စှ်ဂိတုဓဝ် မိတန်ဂဝ်နာဲ။ ဖေက်ကောန်လီုပ္ဍြ မိမင်မွဲဂၠာဲ။ မရိင်ကတင်ဆာဲ မိနာဲဟွံစ။ ဍာ်ၜိုဟ်လောန်အဴ ဍာ်ဂမ္တဴပၠ။ ဖနုင်ဗစး ပါဲၜးစဗ္ဗ။ ဗတံတ္ၚဲ မင်မွဲတဴရ။ မိဟွံဂံင်သ္ပ ဂၠဣတယာဲ။  ။ 

အဵုဍောင်ကသဝ် ပၞာင်တိုင်ထဝ်ယာဲ။ မိသၠးဂဝ်နာဲ ယာဲဒးသ္ဍိုက်ဂွ။ ဒေါဝ်ကလောဂမၠိုင် နာံရိုင်မသ။ မိဒုင်သ္ဍိုက်ဂွ ဂုဏ်မသေင်ဟာ။ စဲကဵုဒဂိတ် ဟွံကဵုကိတ်ကၠာ။ ဟုံဍာ်ဟုံမိတ် လအိတ်ဟွံခြာ။ မိဖျီုဖအအ် လဴလကာဖါ။ ဂုဏ်ဟွံဗှ်သၞာ တီဟာကောန်ဗၠာဲ။ တှ်အမြိုတ်သာဲ ယာဲဖျုင်ဗမဴ။ ဂိုင်သ္ၚိဍာ်သၟတ် ကၞေံပဿဴ။ ဖုံပၠဳလွဳနာဲ ယာဲကၠောန်ၜိုတ်တဴ။ တူဒဳမိတုန် ဒှ်ဖုန်ခေါဇါ တီဟာကောန်ဂၞဴ။ ဟွံစဴကဵုယာဲ အဵုဒကောင်ပိုန် ဒတိုန်စရာဲ။ တိသတီလောန်ကာဲ ဗ္ဒာဲကဵုဂုဏ်မိ။ တိဒးကြဳအာ ဟွံဂံင်ပါမြိ။ ဟွံစဴရော်ညိ ဂုဏ်မိရောနာဲ။   ။

မှာသမိတ်ဂင် ဇြိုဟ်က္ဍင်လောန်ဗၞတ်။ ဗ္ဒာဲကဵုဂုဏ်သၟတ် ပ္တောံၜတ်ဂုဏ်မိ။ မှာသၟိတ်ကၠာ ကျအာဒမၠိ။ ဗှ်ခၠေဝ်ဂုဏ်မိ စဴကၠုင်ညိနာဲ။ သိန္နရာတ်ပ္ညုင် ဇၞော်သၠုင်လောန်ကာဲ။ ပ္တောံၜတ်ဇၟာပ်ဒၞာဲ ဗ္ဒာဲကဵုဂုဏ်မိ။ သိန္နရာတ်ကၠာ ကျအာဒမၠိ။ ပဟွံခၠေဝ်ညိ ဂုဏ်မိရောနာဲ။ အဵုဂၠုဂေါဝ်လောန် ကောန်သ္ဍိုက်ယာဲ။ ဗတဳဂင်ဆာဲ ဗ္ဒာဲကဵုဂုဏ်မိ။ ဗတဳဂင်္ဂါ ကျာအာဒမၠိ။ ဟွံစဴခၠေဝ်ညိ ဂုဏ်မိရောနာဲ။   ။

အဵုဒကောင်ပိုန် ထဝ်ဖ္ဍိုက်ယာဲ။ ဂစေံဇၟာပ်နာဲ ဟွံသာဲနူကောန်။ မိကဵုကောန်ဗၠာဲ ဒးသာဲလောန်စောန်။ မူဘဝကောန် ရောထဝ်သောန်ယာဲ။ အဵုဒကောင်ပိုန် ဒတိုန်စရာဲ။ ဆဵုဂၠုဂေါဝ်ဆာဲ နာဲထိုက်စမ္ၚာ။ ဂစေံပြဝါ ညိဟွံခြာသာဲ။ မူဘဝတၞံ ကံမိဂၠိုင်ဒၞာဲ။ ကောန်ဒးခြာယာဲ ကံယာဲသ္ဂးဟာ။   ။

ကြဝိတ်ဟွံဂြဴ ကွဴသာရိကာ။ ရိုဟ်တ္ၚဲဂြဴကၠာ သန်ၛာသဝ်တ္ၚဲ။ တ္ၚဲဂွံသ္ၚိတ်သ္ၚဲ မွဲဟွံဂြဴကၠာ။ မူကံတူယဲ ညံင်အဲကီုဟာ။ ဟးတ္ၚေက်ထဝ်ဗၠာဲ နာဲယာန်သၞေင်ၜါ။ စိုပ်ဃောသန်ၛာ ဟွံဂွံခြာဒွီု။ သဝ်တ္ၚဲဒှ်ဝွံ မွဲဟွံဗြုရ။ မၞးတံစိုတ်လီု ဗီုအဲကီုဟာ။   ။

ဟးစာင်ဍေဝ်ဂြိုပ် စိုပ်ဃောသန်ၛာ။ လရိုက်သၞေင်ၜါ ကြာထောက်စလာင်။ ထောံကၠေံပဏာင် အာဂြိုပ်သ္အာင်ဟာ။   ။

ဟးမြာ်ထဝ်ဗၠာဲ နာဲသတ်ဇိုင်ၜါ။ စိုပ်ဃောသန်ၛာ ပြာထော်စလာင်။ တ္ၚဲဝွံကၞပ်သၠိင် မွဲဟွံမိင်ပါင်။ ထောံကၠေံပဏာင် အာဂြိုသ္အာင်ဟ။   ။

ဂစေံလိုက်ထောဝ် ဗြုကြဵုမှောဝ်ဇာ၊ မာတ်အဲဗြဴကၠာ ကောန်ဒးခြာဒွီ၊ နာဲတံနွံရော ကလောစိုန်သ္ကီု၊ မိပ်စိုတ်ဂြီုဂြီု ကော်ကြီုသ္ဂးဟာ။   ။

တြုံဂေါဝ်ဗြဴဂံက် နာဲဗြုချံက်ချာ၊ မာတ်အဲဗြဴကၠာ ကောန်ခြာအာတွဵု၊ အဲကၠုင်ယာဲဂၠာဲ စိုပ်နာဲတံအဵု၊ နာဲပစရဵု ဗြုကြဵုဂြိုင်ဟာ။   ။

ခနေင်စံက်စာင် ထာက်ကံကြဵုဇာ၊ မာတ်အဲဗြဴကၠာ ကောန်ခြာတၟံ၊ အဲကၠုင်ယာံကော် ထာန်ဗော်နာဲတံ၊ မိပ်စိုတ်ဆံလံ တုဲတာန်ကံဟာ။   ။

အဵုထိုင်စမ္ၚာ မိဖဳဒွါကောန်၊ ယာဲတြုံဂုဏ်ကောန် ကၠင်ကၠောန်ဖိဖိ၊ ဍာ်ရမတ်ယာဲ ဇွောဝ်ဆာဲဒမၠိ၊ စဴကၠုင်ကဵုမိ ညိရလေဝ်ကောန်၊ ဟသေင်တမၠာ မိဂြိုဟ်စာလောန်၊ မတူဖျာ်ပၠန် ကောန်တ္ၚေက်သ္ဂးဟာ၊ ဗွဲတၟေင်သာ် ဖျာ်သာရိကာ၊ ဘဝတမ္ၚာ ဒးယာဲဟာကောန်။   ။

မိကြင်ကၠုင်စိုပ် ဒေါဝ်ဂြိုပ်စောန်လောန်၊ သၟိက်ဂွံညာတ်ကောန် ယာံဒက်ဒေါန်ကွာဲ၊ နာဲဟွံပၠမုက် ပနုက်ဟီုယာဲ၊ မိဟွံညာတ်နာဲ ယာဲချိုတ်ရောင်ကောန်။   ။

အဵုဂၠုသာ်ပ္ကဴ ညံင်စဴရကောန်၊ မိမွဲစောန်လောန် ကောန်ဒးခြာသာဲ၊ မိကၠုင်ဂၠာဲသွံ ဟွံဂွံညာတ်နာဲ၊ ဂၠုထဝ်ပဏာဲ ယာဲချိုတ်ရောင်ကောန်။   ။

ဒေါဝ်ဂြိုပ်ဒမျိ မိကၠုင်ဂၠာဲကောန်၊ မိယာဲဒက်ဒေါန် ကဵုကောန်တြုံမွဲ၊ မိဒးခြာဒင် ကြင်ဒၟံင်တူယဲ၊ ယာဲချိုတ်မွဲတဲ တ္ၚဲဝွံရကောန်။   ။

အဵုဂၠုဂေါဝ်ဇြုင် စဴကၠုင်ရကောန်၊ ဒေဝတဴပန် လှေံလှန်လဝ်နာဲ၊ ဂွံမိတ်မဆာန် ဇြဟာန်တ္ၜူမာဲ၊ မဂၠုကောန်ဗၠာဲ ဝိုတ်ယာဲဟာကောန်။   ။

အဵုဒကောင်ဗၠဲ မိမွဲစောန်လောန်၊ သ္ဍိုက်ယာဲလောန် ဗှ်ကောန်ဂၠုမွဲ၊ မဂၠုဟွံတီ ညံင်လၞီအဲ၊ မိချိုတ်အိုတ်ဒဲ ပြဲသန်ရကောန်။   ။

အဵုဒကောင်ဗိုတ် ရုပ်ၝောံကိုတ်လောန်၊ လေပ်ကွတ်စိစောန် လောန်ဋ္ဌာန်ယဲသ၊ ဗှ်ကောန်ဒးသာဲ မူယာဲမံင်ပ၊ ယာဲအိုတ်ဂန္ဓ ပြဲသန်ရောင်ကောန်။   ။

ပၟတ်လင်ကဝ် ဇၞော်မောဝ်လောန်ကာဲ၊ ဗြဲဇၞော်ဂူဆာဲ လင်ကဝ်ဆာဲပၠိုတ်၊ ဗှ်ကောန်ဒးသာဲ စိုတ်ယာဲဟွံဝိုတ်၊ လေင်ကဝ်စရိုတ် တီပၠိုတ်ရောကောန်။   ။

အဵုက္ၜင်ထဝ်ယာဲ ရုပ်ဂေါဝ်ဆာဲလောန်၊ က္ၜင်လီုမွဲတန် သာံပါန်ပၠန်စိုပ်၊ နာဲဒကောင်ဗၠာဲ သာဲနူဗဒိုပ်၊ က္ၜင်ထတ်ယာဲကိုပ် ဟွံစိုပ်ရကောန်။   ။

ဂိမှန်ဗဒိုပ် ဂြိုပ်တူလောန်ထောန်၊ ဇွဂၞိင်အိုတ်ပၠန် ပၟတ်ခၠန်ပၠိုတ်။ ဗှ်ကောန်အသဝ် ရုပ်ထဝ်လကိုတ်၊ လ္ၚပၟတ်စိုတ် တီပၠိုတ်ရောကောန်။   ။

အဵုဒကောင်ပိုန် ရုပ်ကွိုန်လစောန်၊ လၞီယာဲလောန် ဗှ်ကောန်သော်က္ဍိုပ်၊ ဗှ်ကောန်ခြာသာဲ လၞီယာဲကြိုင်၊ မူကာလကိုပ် စိုပ်ယာဲရောကောန်။   ။

သုကညာဗြဴ ကော်တဴသောန်န်၊ လစောန်လၞောန် အဵုဂၠုကောန်ဗၠာဲ၊ မိကော်စလာင် ဟွံမိင်ပါင်နာဲ၊ ဓဇန်ကဵုယာဲ လောန်ကာဲသွံကောန်။   ။

အဵုလၟာဂၞဴ ညံင်စဴရကောန်၊ ဒိုဟ်ဒးကၠဗြန် ဗြုပၠန်ကဵုယာဲ၊ မိကော်စလာင် ဟွံမိင်ပါင်နာဲ၊ ဓဇန်လောန်ကာဲ ကဵုယာဲသွံကောန်။   ။

အဵုဂၠုဍောင်ပ္ကဴ ညံင်စဴရကောန်၊ မိမွဲစောန်လောန် ကၠင်ကၠောန်ယဲသ၊ နာဲလသာလဝ် လင်ဇွောဝ်ဟောံဇြ၊ မိအိုတ်ဂန္ဓ ဂုဏ်နာဲရကောန်။   ။

အဵုဒကောင်ထဝ် ရုပ်အၚောဝ်သောန်၊ သိက်နာဲဓဇန် ဟွံပၠန်ကဵုမိ၊ မိကော်စလာင် ရမျာင်ဖိဖိ၊ ဟွံကလုက်ညိ ကဵုမိရောကောန်။   ။

သုကညာဗြဴ ယာံတဴသောန်န်၊ ယာံကြင်အာပၠန် ဗက်ကော်ကောန်ဗၠာဲ၊ ကွာ်အာသ္ၚံက်က် ဒိုဟ်ဗၟံက်တာဲ၊ ကြင်အာကော်ဂၠာဲ ယာံဂၠာဲကောန်ဂၞဴ၊ ဇၞတ်မကြင်အာ ကော်အာကဴကဴ၊ ဒဵုဆိုက်တၞံဇြဲ သကဲဂှ်အဴ၊ လစောန်လၞောန် ယာံဒက်ဒေါန်တဴ၊ သၟိင်ဓဝ်နာဲမည် တၠနန်ပ္ကဴ၊ မိင်ပါင်မိဂၞဴ ရဴဂတဝ်သာဲ၊ မိင်ပါင်မိသွံ ဟွံဂွံဟိုတ်မာဲ၊ ဒၚဳကလုက်ကွာဲ အဴအဴယာဲဇု၊ အဲဍိက်နွံသ္ကဲ ပ္ဍဲလွဳမာန်ဆု၊ ဒုင်ပါင်လဒု ဇကုဟွံညာတ်၊ မိမိင်ပါင်ကောန် လၞီသောန်ကၞာတ်၊ မိဟွံဂွံညာတ် သမ္ၚာတ်စိုတ်ယာဲ၊ အဵုထဝ်ပဏာဲ ကောန်ဗၠာဲဇြဟာန်၊ မိကၠုင်စိုပ်မ ဒုက္ခဂိက္တာန်၊ ဒေါဝ်က္ၜဳကထံင် ဂင်ခဏံင်ဟာန်၊ ဒေါဝ်ဂြိုပ်ဂမျိ ဒေါဝ်ဗယိဗြာန်။ ဒဒိုက်ဂိကတာန် ဟိုတ်မိဆာန်နာဲ။   ။

မိကၠုင်စိုပ်ရ ယွံဣတယာဲ၊ စှ်ေမိကၠုင်မိ ညိရကောန်ဗၠာဲ၊ မိဝွံညာတ်နာဲ လၞီယာဲမဟဲ၊ လၟုဟ်ဝွံသၟတ် ဝါကၞောတ်တဲ၊ ယာဲဗဵုနာဲမွဲ ဒဵုဖဲညိကေါန်။   ။

အဵုဣတဇု ဂၠုမဂေါဝ်လောန်၊ ညံင်စဴညိကောန် ဖဴမိပၠန်ရ၊ ဒေါဝ်ဂြိုပ်လ္ၚု စဏုကၟီကၠ၊ မူနာဲမံင်ပ စဴကၠုင်ရကောန်။   ။

သၟိင်ဗၠာဲမိင်ကီု ဟီုကဵုမိပၠန်၊ ယွံမိဇြဟာန် ကောန်ဆာဲယာဲလောန်၊ သၟိက်စဴလောန်ထောန် ကောန်ဗၠာဲဇြဟာန်၊ ဂွံသ္ဍိုက်ရေင်ကာန် ဆာန်ကၟိန်လေင်လ၊ ဒေါဝ်ကသဝ်နန် ဂွံညန်ဒးရး၊ ဆဂှ်ဟွံသေင် တၟေင်မူရဴဂး၊ သၟိင်ဣန်နာဲညး ဇၞော်ကၠးအညာ၊ ပ္တုဲလဝ်ဒါန်အဵု ကဵုသုဇာတာ၊ ဒ္စါံလက်ဗၠန် ကဵုပန်ကိုတ်ကၠာ၊ ဇမ္ၚောဲဂှ်ရော ဗၞတ်ယောဇနာ၊ ၜိုန်တဴသ္ၚောဲထာန် ဂွံဆာန်သာဓာ၊ ဂွံသ္ဍိုက်ရေင်ကာန် မွဲဟာန်မွဲသၞာ၊ ညံင်သုဓနု နာဲမြုပန်စာ၊ ကောန်ခၞောဝ်ကၠာ မိဏံင်ခရဳ၊ မသုန်ကၠံမှာ ယောဇနာပ္ညဳ၊ ဟိုတ်နူဒါန်ပၠန် ဂွံညန်မွဲဒၞဳ၊ စန္ဒဝတဳ ပ္ညဳကလော်ဗြဴ၊ သတ္တဓနု နာဲမြုဍောင်ပ္ကဴ၊ ကောံကလော်ဗြဴ နှဴရဴရေင်ကာန်၊ ညးမဟီုဂၠာဲ စလာဲနိဒါန်၊ ဟိုတ်ပ္တုဲလဝ်ဒါန် ဒါန်ဂှ်စဳရေင်၊ ပိုဲဍိက်တုန်ကီု တုပ်ဗီုဂှ်ဟေင်၊ ဒါန်တမၠာပြေင် စဳရေင်ပိုဲအဴ။   ။

ဒါန်ဒှ်ယုတ္တိ စၟတ်ရောင်မိဂၞဴ၊ ပ္ဍဲမိဂှ်ဗျိင် မိင်ပါင်ကောန်အဴ၊ ညံင်ရမျာင်ကွဴ ရဴရှ်အမြိုတ်၊ စိုတ်ဍိုန်အာဟေင် ဟွံဗၠေင်တသိုက်၊ ရမျာင်ကေါန်လွုဲ မိင်တုဲလုပ်စိုတ်၊ ညံင်ရှ်အမြိုတ် မိင်စိုတ်ဍိုန်အာ၊ မိမဂေါဝ်ဆာဲ နာဲသုကညာ၊ ဒၚဳဟီုတိုန်ဟေင် ကဵုနာဲသေင်ဟာ။   ။

ယွံဣတယာဲ ကောန်ဗၠာဲထင်ဏှာ၊ ရမျာင်နာဲကၠာ ခါမိင်ပါင်က္ညန်၊ ဒဒှ်ဟွံချိုတ် နာဲဟွံအိုတ်သ္ကန်၊ ယာဲဂွံပ္တေဟ်ပၠန် ဗိုန်က္ညန်တုဲရ၊ ဇကုနာဲမ ပၠညိကောန်ဗၠာဲ၊ မိသၟိက်ဗဵုဒၚောဝ် ရုပ်ထဝ်ပဏာဲ၊ စိုတ်မိဟဲရ လေဣတယာဲ။   ။

မိင်ရမျာင်မိ မဂ္ညိစရာဲ၊ တုဲသၟိင်ဓဝ်ဗၠာဲ ဟီုကဵုယာဲပၠန်၊ ဂုဏ်ဇၞော်ပြဲဂၠိ ယွံမိကျာ်ဂန်၊ ဇကုအဲပၠန် ဇြိုင်သန်ဂွံညာတ်၊ ညးဟွံကဵုညာတ် ဂွံညာတ်ဇြိုင်လောန်။   ။

မိင်ရမျာင်ကောန် ဟီုပၠန်မွဲတန်၊ ယွံမကောန်ဂၠု ဣတဇုအဲ၊ ဇကုနာဲကၞာတ် ဟွံညာတ်မွဲတဲ၊ တၞးဇိုင်ကီု သီုတၞးတဲ၊ မိဂွံညာတ်ညိ ရောင်စိုတ်မိဟဲ။   ။

မိင်ရမျာင်ယာဲ နာဲဒကောင်ဗၠဲ၊ တၞးဇိုင်တၞးတဲ ညံင်နဲဂၠးထဝ်၊ ထ္ၜးကဵုယာဲ နာဲဍောင်အသဝ်၊ ဇိုင်တဲသၟိင်ဓဝ် မိညာတ်လဝ်ရ၊ ယွံဣတယာဲ နာဲကောန်တၠ၊ ဂအဟ်အဲကီု သီုကဵုဗြဴပန်၊ ယာဲသ္ဂောံညာတ်ညိ ရောင်မိစိုတ်တန်၊ ဂအဟ်ဗြဴပန် ဟီုပၠန်မွဲတဲ။   ။

ယွံခါံသဳဗြဴ မိဂၞဴမပြဲ၊ ဇကုဇိုင်တဲ မိအဲဟွံညာတ်၊ ဆသော်ပိုဲသ္အး ပိုဲထ္ၜးကၞာတ်၊ ပိုဲကဵုမိညာတ် ခပ်ပြာတ်ဒဒှ်၊ ဒေဝဗြဴပန် သီုပန်ဟီုတွံ၊ သော်ဗီုကၠေင်သွဟ် ဗစဳမြဟ်ဆာဲ၊ တၠာဲဖျေံသၟတ် ဗၞတ်ပန်ဟတ်ဆာဲ၊ ဗြဴပန်မ္ဂး သှ်ထ္ၜးပၠာဲ၊ မောဝ်ပ္ဍးတၟာဲ အမြာဲဂန္ဓာ၊ မုဟ်သော်ဗစဳ သၟဟ်န်ညဳသာ၊ ခါံသဳဗြဴကၠာ ဂွံညာတ်ခါဂှ်၊ အိုဟ်တၟိုဟ်စိုတ် စရိုတ်ဟဲပြဟ်၊ မိကဵုကောန်ဂှ် ဟီုဇီုသှ်ၛာဲ၊ ဂအဟ်ပန်ကီု သၟဟ်န်ဟီုဂၠာဲ၊ အရေဝ်ဝတ်လိုက် သၟာန်သၟုက်ဂၠိုက်ဂၠာဲ၊ ဟီုဇီုသှ်ၛာဲ သၟိင်ဗၠာဲကျာ်သြဳ။   ။

ဂအဟ်ဗြဴပန် သၟဟ်န်အိန်ရဳ၊ စဳရေင်ဗိုန်ဇၟံ ကလံခါံသဳ၊ ကလံသာဲရ ဇၟာပ်သဗ္ဗဇဳ၊ သၠိုင်ထဝ်သၠိုင်သြန် တ္ၜန်တ္ၜောဲတဝဳ၊ ဖေဝ်ထဝ်ယာတ်ထဝ် ကေတ်နင်ဗဝ်သ္အဳ၊ ပ္ကဴဇဗၠုရ ပၞာင်ဗကဇဳ၊ ကလံခါံသဳ ဒ္ၚဳဒ္ၚဳဟီုတဴ။   ။
ယွံညးပြဲညိ မိခါံသဳဗြဴ၊ ဒုဟ်အတိက်အဴ တဴအနာဂတ်၊ ပစ္စုပန်ကၠာ ဒုဟ်နွံပြာကတ်၊ ပိုဲဍိက်ညးပန် သီုပန်အဆတ်၊ ဒုဟ်ဇၞော်ဒုဟ်သွတ် အဆတ်သဘဴ၊ ပိုဲဍိက်မံင်ဂြံ ကလံရအဴ၊ ဝွံဂအဟ်ဗြဴ ဒေဝတဴပန်၊ ကလံခါံသဳ ဖဳဒွါတဴပၠန်၊ မမဂေါဝ်ဆာဲ သၟိင်ဓဝ်နာဲမညိ၊ ကလံမိပၠန် သီုဂန္ဓနာ။   ။

ယွံမိကျာ်ဂန် ဒုဟ်ပၠန်ဇၟာပ်ရာ၊ အတိက်နာဂတ် ပစ္စုပန္နာ၊ ကာယဒွါကီု သီုဝါစဳဒွါ၊ မနောဒွါဂ္ညိ သီုပိပြကာ၊ ကေါန်ကလံကွာဲ ဒုဟ်ကဵုပါဲအာ၊ ဂုဏ်မိဂၠိုင်စွံ ကဵုကောန်ဂွံမြာ၊ သာ်ဝွံသၟိင်ဗၠာဲ ကလံယာဲကၠာ၊ ကလံတုဲမာ ခါဂှ်သၟိင်ဗၠာဲ၊ ဂၠိက်ယာတ်ဂၠိုင်သန် ထဝ်သြန်ဇၟာပ်ဒၞာဲ၊ ဗဝ်သ္အဝ်ကဵုယာဲ သ္ပတၟာဲဟေင်၊ ဇိုန်ကဵုယာဲရ သဗ္ဗတၟေင်င်၊ ကဵုတုဲဒှ်ဟေင် ပရေင်လိုက်ဗာ၊ ဂကန်ဖျန်ကီု ဟီုဇီုတုဲကၠာ၊ ကေါန်ဂကန်ပ္ညဳ ကဵုမိဖဳဒွါ၊ မိင်ဂကန်ကောန် ဂၠိုင်သန်အရာ၊ ဂကန်ဖျန်သၟဟ် တုဲဒှ်အိုတ်မာ၊ မိသၟိင်ဓဝ်ကၠာ က္တဵုစဴအာရ။   ။

ကွာ်ကလေင်ကၠုင် စှ်ေက္ဍိုက်ဂၠုင်ပၠ၊ ပ္ဍဲဂၠုင်တေံဂှ် မဒှ်ဒေသ၊ ကြဳဇှ်ကလော် မဇၞော်တေဇ၊ အမာဲပေင်ဂၠုင် ပုင်သွပေင်န၊ ကဖျုန်ဗြာတ်က္ၜဴ ပေင်တဴဗဝ်ရ၊ ဇဗၠုပေင်ဂၠက် လက်ဖက်ပေင်န၊ စလန်အဂၠဴ ပ္ကဴသဴသဗ္ဗ၊ တ္ၜန်တ္ၜောဲတဴရ ဇၟာပ်သဗ္ဗဇဳ။   ။

ကလော်ဂမၠိုင် ရိုင်င်သ္အဳသ္အဳ၊ ကၠုင်ကောံဒၟံင်ပၠန် တ္ၜန်တ္ၜောဲတဝဳ၊ ပလံင်ဖျေံရ ပေင်ဂျဇိုင်က္ၜဳ၊ မိင်သၟိင်ဓဝ်ရ တၠကျာ်သြဳ၊ နာဲဂၠုင်ကောန်ဂၠုင် က္ဍိုက်ဂၠုင်တဝဳ၊ လ္ၚောဝ်ရတ်ပိ မိမခါံသဳ၊ ဒေဝတဴဂြိုပ် က္ဍိုပ်တၟံကျာ်သြဳ၊ ကလံဗဇဴ ဒေဝတဴက္ၜဳ၊ ဂဇံတပ်သ္တေင် ဒၟံင်ရေင်တဝဳ၊ ချူသၞေဝ်ဟွံရပ် ဒၟံင်ကၞပ်သ္ၚဳ၊ ကြဳဇှ်ကလော် မဇၞော်ကျာ်သြဳ၊ ဂၠုင်ဂြိုပ်သဲဟာန် ထာန်အဒေါဝ်က္ၜဳ၊ ညးဂမၠိုင်ကၞောတ် ညာတ်ဂၠုင်ဒြိပ်ပ္ညဳ၊ မိပ်စိုတ်စရိုတ် အဵုဇိုတ်ကၠင်ဟဳ၊ လ္ၚဵုဂှ်လှ်ေ ဒယှ်ေသဳသဳ၊ လ္ၚဵုတက်တဲ ဂြီုဂြီုပ္ဍဲက္ၜဳ၊ သၟိင်ဓဝ်နာဲမည် ကော်ဂကန်ပ္ညဳ၊ အာရမိအဲ မပြဲကျာ်သြဳ၊ မိသၟိင်ဓဝ်ပ္ညဳ ဒ္ၚဳကော်ဂကန်၊ မံင်ရကောန်ဗၠာဲ အဵုနာဲဂေါဝ်လောန်၊ အဵုရုပ်လစောန် ကောန်သ္ဍိုက်ယာဲ၊ အဵုဣတဇု ဂၠုထဝ်ပဏာဲ၊ ဒးခြာနူနာဲ ယာဲအာရကောန်။   ။

မိင်ရမျာင်ယာဲ သၟိင်ဓဝ်နာဲမည်၊ စၟဳတဴပၠန် သၟန်သြန်က္ၜဳ၊ မိသၟိင်ဓဝ်ဗၠာဲ သာဲအာဒ္ၚဳဒ္ၚဳ၊ ညာတ်မိသ္ၚောဲက္ဍင် စိုတ်မကၠင်ဟဳ၊ လၞီလောန်ဗၞတ် ဍာ်ရမတ်နှဳ၊ နူဂၠံမတ်ၜါ ပြဟ်အာပြဳပြဳ၊ လံအာသ္ၚောဲအာ အကြာဇၟောပ်က္ၜဳ၊ သၟိင်ဓဝ်အဏံ ဂဇံစမဳ၊ ထာန်ဂှ်မေခုံ ဒုင်ယၟုက္ၜဳ၊ ပါင်ဂၠံစမဳ ခုတ်ပ္ညဳလဝ်။   ။

လၟုဟ်ဟီုမံင် ပါင်လံင်ဆတ္တဝ်၊ ဒဵုကဵုလၟုဟ်အဴ ဒှ်တဴအသဝ်၊ မာတ်သၟိင်ဓဝ်ဗၠာဲ ဆာန်မိကာကဝိ၊ သၟိင်စၟဳတဴ မိဂၞဴဆတ္တဝ်၊ စၟဳဟွံညာတ် သြိုဟ်သဗာတ်သ္အဝ်၊ လၞီကာဲကဝ် လင်ဇွောဝ်ဟောံဇြ၊ သမ်အိက်သမ်အဝ် ရမတ်ဇွောဝ်ပၠ၊ ဗှ်တိုန်မိရ သီုထသပါ၊ ဒဒှ်မိဆာန် ဇြဟာန်မေတ္တာ၊ ဒဒှ်လွဳလဝ် ကောန်ဂၠုထဝ်နှာ၊ဒဒှ်ဖုံပၠဳ မိလွဳပရာ၊ ဖရာဲမိသ္ဍိုက် ယိုက်ဒိုက်ဖဳဒွါ၊ ထွာဲမိတုန် ဒှ်ဖုန်သၞာ၊ သေင်မိဗလဲ ဂေက်ဂြဲဟွံညာ၊ ကျာ်ဂန်လွဳလဝ် စဵုဇၞော်မောဝ်အာ၊ မိကျာ်ဂန်အဲ ဂုဏ်ဇၞော်ပြဲဖါ၊ ဟွံဂွံရော်တုန် ဂုဏ်မိသေင်ဟာ၊ ဗှ်မဒးကၠင် ခြာဒင်စာ်ခြာ၊ ဗှ်ဇကုမွဲ ပ္ဍဲရညဝါ၊ ဗှ်တိုန်မိဂၞဴ သြိုဟ်ရဴပါ်အာ၊  ဇွောဝ်လင်ကၠင်ဟဳ လၞီဖဳဒွါ၊ ရမတ်ဇွောဝ်ဍေင် ပေင်သြိုဟ်သပါ၊ ယာံဇွောဝ်တဴဟေင် ဒၞာဲဂှ်သေင်ဟာ။   ။

ဗြဴသိုက္ခမာ ဝုတ်ကညာပန်၊ ညာတ်မုက်တြုံချိုတ် ပ္ဍဲစိုတ်လ္ၚုလ္ၚန်၊ ညာတ်တြုံယာံတဴ ကညာဗြဴပန်၊ ပခိုင်ဟွံမာန် ဟိုတ်ဆာန်တြုံလောန်၊ ဗန်ကံတြုံအဴ ယာံတဴသောန်န်၊ ဟးတၠသ္ၚိ ကောမိကျာ်ဂန်၊ ကောပယာံရ ကောပဝေါန်စန်၊ ကောန်ပလ္ၚုလ္ၚန် ပ္တန်စိုတ်ညိကၠာ၊ ယွံကောသၟိင်ဓဝ် ဒကောင်ထဝ်နှာ၊ ယွံတၠသ္ၚိ မဂ္ညိပညာ၊ ကောပစံင်တူ ကောပပူဆာ၊ ညံင်ပိုဲစဴအာ လွဳမာန်ကၠာရ၊ ဗြဴပန်ကော်ဖျဴ တြုံသ္ဍဴတေဇ၊ ကလော်ဂမၠိုင် ရိုင်င်လျလျ၊ ဗက်စဴအာရ တြုံတၠလွဳ၊ စဴစိုပ်ဒေန်ဟာန် လွဳမာန်ကျာ်သြဳ၊ ဂကောံဗြဴပန် သၟဟ်န်မွဲဒၞဳ၊ ပ္ဍဲဒေန်ကျာ်သြဳ သၟဟ်န်ညဳသာ၊ ခဍံက်လဗိင် သၠိင်မွဲသၞာ၊ စဵုလၟုဟ်ကၠာ ပြာကတ်ကၠုင်ကၠေဲ၊ ဟီုတဴဆတ္တဝ် သၟိင်ဓဝ်သာဲလေဲ၊ ဒယှ်ေသေဲသေဲ သၟိင်သာဲလေဲတုန်။   ။

သၟိင်ဓဝ်စဴကၞာတ် ပြာသာတ်နွံဂုဏ်၊ မိသၟိင်ဓဝ်တုန် ဂုဏ်ဒေဝတဴ၊ ဂၠုင်ဒြိပ်သွိင် ဟွံထဍိင်တဴ၊ ညံင်ပဝန်ကံ ဒြိပ်ဂမြံစဴ၊ ဇြဳဇှ်ဒေဝတဴ ရဴပရှ်ကျာ၊ တုဲစိုပ်သၞေဟ်ဟေင် ဗဒိုပ်သေင်ဟာ၊ စိုပ်ကွာန်ဒင်မာဲ ယာဲသၟိင်ဓဝ်မှာ၊ တိုန်စိုပ်သ္ၚိရ ခဏဂှ်ကၠာ၊ ကလောန်ဂမၠိုင် ကၠုင်ဗိုင်သ္အဳဗ္ဂါ၊ ဟီုဇီုရိုဟ်ထာန် သၟာန်သၟုက်ဖဳဒွါ၊ ပရိုင်ကောန်ဂှ် ဗီုဒဒှ်ကၠာ၊ ညံင်နာဲရဲဟီု ဒှ်ကွေံကီုဟာ။   ။

ယွံကလောတံ မဇၟံပညာ၊ ဒှ်ကွေံသေင်ဟာ လအာပါင်ထဴ၊ ညံင်ထဴဟီုဂှ် ဒှ်စၟတ်ကွေံအဴ၊ ကေါန်ဂၠုသာ်ပ္ကဴ ဒှ်တဴသၟိင်ဓဝ်၊ ဒှ်သၟိင်ကလော် မဇၞော်အသဝ်၊ ဂကောံဗြဴပန် သၟဟ်န်ဆတ္တဝ်၊ သမၞိင်လွဳမာန် ယာန်ဒိပ်အသဝ်၊ သ္ဍိုက်မၠိုက်တင်ဂၠဝ် ဂွံဒၚောဝ်တဴဟေင်၊ အဲစိုပ်ဇရေင် ထာန်ဂှ်ဟေင်ဟာ၊ မိင်ပါင်အဲတၟေင် ဟွံဗၠေင်တရဴ၊ ညံင်မိကျာ်ဂန် ကောန်စၟဳတဴ၊ ညံင်အဴညံင်အဴ မိဂၞဴကၠုင်စိုပ်၊ ဒၟံင်လွဳမာန်အဴ မိဂၞဴသော်က္ဍိုပ်၊ ယာဲပိုဲကၠုင်စိုပ် ဗဒိုပ်ပိုဲအဴ။   ။

ဂအဟ်အဲအဴ ဗြဴပန်ဆတ္တဝ်၊ ဝေင်ဒုင်ကော်ခဴ ပတဴအသဝ်၊ သီုညးပန်ဓဝ် ကော်ဇံသဝ်အဲ၊ ယွံခါံသဳဗြဴ မိဂၞဴမပြဲ၊ ဒၟံင်လွဳမာန်သ္တဲ ပ္ဍဲရုက္ခဇဵု၊ ညံင်အဴညံင်အဴ မိသ္ဍဴဍောင်မ္ၚဵု၊ မိကၠုင်စိုပ်အဵု တွဵုပိုဲကၠာ၊ ခိုဟ်သန်ခိုဟ်သန် ပူဗန်ဖဳဒွါ၊ ရမျာင်ညံင်ကွိင် မိင်ဖဲလဲအာ၊ ကလံအဲပၠန် ဂၠိုင်သန်ပြကာ၊ သၠိုင်ထဝ်သၠိုင်သြန် တ္ၜန်တ္ၜောဲနာနာ၊ ယာတ်မပြဲကၠာ ခါသာဖုံက်၊ ယာတ်ဒိပ်အသဝ် ၚုဟ်ထဝ်မွဲလက်၊ တယောဝ်လၜက် ဒုင်ကဵုသွက်အဲ၊ ထဝ်သြန်မတ်ဗၠဲ ကဵုအဲဂၠိုင်သန်၊ ပုင်သွကွာင်ဆာဲ အမာဲယိုဟ်က္ၜန်၊ ကဖျုန်ဗြာတ်က္ၜဴ သတ်ဗြဴပညောန်၊ ဇၟာပ်စၞပၠန် တ္ၜန်တ္ၜောဲဗစ၊ မွဲတ္ၚဲပိဝါ ဟွံခၠန်ကာလ၊ ရိုဟ်ဟ်တ္ၚဲရ စဟာပ်ဟွံမာန်။   ။

ဂလာန်လဖှ် ဂၠာဲပှ်ဂၠဟ်သၟာန်၊ ဟီုဇီုရိုဟ်ထာန် သၟာန်သၟုက်ဝေင်ဂြိုင်၊ မံင်ဂပ်လံကီု သီုညးဂမၠိုင်၊ မိပ်စိုတ်ဝေင်ဂြိုင် ကျိုင်ကျဝ်စတဴ၊ ကလေင်စဴပ္ညုင် စှ်ေက္ဍိုက်ဂၠုင်အဲ၊ ကြဳဇှ်ကလော် မဇၞော်နုဘဴ၊ ဂၠုင်ဒိုပ်သွိင် ဟွံသဍိင်တဴ၊ ညံင်ပဝန်ကံ ဒြိပ်ဂမြံစဴ၊ ကြဳဇှ်ဒေဝတဴ ရဴပရှ်ကျာ၊ တုဲဂွံကၠုင်ဟေင် စိုပ်သ္ၚိသေင်ဟာ၊ မိသၟိင်ဓဝ်ကၠာ ဗြဴမှာအသဝ်၊ ဟီုထ္ၜးကဵုရော ကလောဆတ္တဝ်၊ ကလောသၟိင်ဓဝ် မိင်အံသဝ်တဴ၊ မိပ်စိုတ်မပူမှ် လ္ၚတ်က္တဵုစဴ၊ ကလော်ဂမၠိုင် ဟီုထိုင်သးတဴ၊ နာဲဒကောင်ပိုန် ဒတိုန်ကြက်လှဴ၊ ကလောပိုဲဂှ် ဒှ်ဝေဝတဴ။   ။

ယွံနာဲသၟိင်ဓဝ် အသဝ်နုဘဴ၊ ပါရမဳသ္တိုတ် ဟိုတ်ကြံင်ဍုဟ်တဴ၊ ဂွံဒှ်သၟိင်ဆာဲ နာဲဒေဝတဴ၊ ဒေါဝ်ဗွဝ်ပိုန် ဒတိုန်ကြက်လှဴ၊ ဂွံစသိုင်တဴ နုဘဴပြာကတ်၊ ကလောဂမၠိုင် ထိုင်သးဂမ်အတ်၊ နာဲဒကောင်ပိုန် ရုပ်က္ၜိုန်ကၞတ်၊ ဂွံဒှ်သၟိင်ဓဝ် အံသဝ်ပြာကတ်၊ ဒေါဝ်ဗွဝ်ရတ် ကၞောတ်ဘောဂါ၊ ဂွံစသိုင်ဟေင် တသိုက်သေင်ဟာ။   ။

သမ္တီမၞးတံ တၟံညးလိုက်ဗာ၊ ဟိုတ်ဒါန်တၞံဟေင် ဟီုလဝ်သေင်ဟာ၊ ဂွံဒှ်သၟိင်ဓဝ် အံသဝ်ပြာထာ၊ ကမၠောန်သ္အဳဂၠက် မသက္ကုခြာ၊ ဍိက်တြုံဍိက်ဗြဴ တ္ၜန်တ္ၜောဲတဴကၠာ၊ ဂကောံဗြဴပန် ရုပ္ပကညာ၊ သၟဟ်န်မွဲဟာန် ရေင်ကာန်ညဳသာ၊ ညံင်အိန်နာဲမြု ကဵုသုဇာတာ၊ သုဓမ္မာကီု သီုသုန္ဒာ၊ သုစိတ္တပၠန် သီုပန်ပြကာ၊ ရေင်ကာန်သာဓာ ညဳသာသၟဟ်န်၊ သီုဂၞကျာ်ပန် ဂွံညန်မွဲဒၞဳ၊ ညံင်သာ်ဂှ်ကၠာ ဥပ္ပမာပ္ညဳ၊ ဒေါဝ်ဂၠံကျာ်သြဳ ဒေါဝ်ဗနဳကွိုန်၊ ကောန်ညးဒင်မာဲ နာဲဒကောင်ပိုန်၊ ဒါန်တၞံဆတ္တဝ် ဟိုတ်ပ္တုဲလဝ်ဗိုန်၊ ဗြဴပန်ညံင်ထဝ် ဂွံဒ္ၚောဝ်လၟိုန်၊ ဂွံဒှ်သၟိင်ဓဝ် ဒေါဝ်ကသဝ်ပိုန်၊ ကုသဵုတၞံဗိုန် ဇိုန်ကဵုသေင်ဟာ။   ။

တီတုဲမၞးတံ လ္ပသ္ပံသာ၊ ဂကောံမိတ်ဆာန် ဒါန်တၞံတမၠာ၊ ဟွံဒးသာဲအာ ဟွံဒးခြာသ္ၚောဲ၊ ကုသဵုဒါန်ရ ဂွံပနိဿဲ၊ ဒါန်ဒှ်ဒစုန် ဂွံဒုန်သလဲ၊ ဒါန်ဂှ်တုပ်နဲ ကောၝဲဂးမာ၊ ဒါန်ဂှ်သ္ၚဳရံင် ဒါန်ဂှ်ဍံင်သွာ၊ ဒဒိုခ်မွဲဂှ် ယာံက္တဵုဒှ်ကၠာ၊ ဒါန်ဂွံဆေတာ ဒၞါကဵုပယတ်၊ ဒါန်ဂွံဇိုန်ကဵု အိန်သွဵုဒြပ်ရတ်၊ နူပြိုတ်နရက် ဗၠးသက္ကုသၟတ်၊ ဒါန်ဂွံဗလး ဒါန်ပျးမုက်မတ်၊ ဒါန်တရံင်ပ္ညဳ ပါရမဳသၟတ်၊ ပိုန်ရုပ်ပညာ ကြဳဇှ်ပြာကတ်၊ ဂကောံမိဆာန် ပိုန်ဟာန်ဒြပ်ရတ်၊ ဒါန်ဇိုန်ကဵုဇၟံ အိုတ်တၟံသတ်၊ ကြဳဇှ်ဒါန်သၟတ် ပယတ်သိုက်လှိင်။   ။ 

သေဋ္ဌဳသမ္ၚေဟ် သ္ဂေဟ်သွဟ်ဒှ်သၟိင်၊ ဒါန်ပင်ပ္တိုန်အဵု ဇိုန်ကဵုအနိင်၊ ဒါန်ဇိုန်ကဵုကၠာ သွဝ်တာဝတိံ၊ ပြာသတ်ထဝ်တတ် ဒေန်ရတ်ဇမၠိင်၊ ဒေန်ထဝ်ဒၟံင်ဗ္ဂါ သၞာထဝ်ဗျိင်၊ ကဝ်လဗပြိုက် သတ်သဘိုက်တွိင်၊ ၜှ်ကေတ်ဟွံအိုတ် ဟွံတသိုက်သြိင်၊ ပုင်ဒိပ်ဍာ်ဒိပ် မိပ်ဟွံဒးဂွိင်၊ ယာတ်ဒိပ်ဖေင်ထဝ် ကျိုင်ကျဝ်လဗိင်၊ ဂကောဴမိတ်ဆာန် မဂွံဒျာန်က္ၜိင်၊ ဟိုတ်ဒါန်ပ္တုဲလဝ် သွဝ်တာဝတိင်၊ ချိုတ်ဟွံဒးဂွိင် သိုက်လှိင်တဴတုန်။   ။

==ဂလာန်နိဂိုမ်==
သတ်ပ္ဍဲလိုက်ဂှ် တိုင်ထဝှ်ဂုဏ်၊ ပသာ်ဒဒှ် ပိုဲဟီုတွံပ္ဍုန်၊ ဒးဂေတ်ဂၚေင်တုန် တိုင်ဂုဏ်သံသာ၊ လံစိုပ်နိဗ္ဗာန် ထာန်ကျာ်တမၠာ၊ ဟိုတ်နူအာရီု စိုန်သ္ကီုတဏှာ၊ ၜိုန်စဳကၠးသန် နွံကဵုပညာ၊ သ္ဍိုဟ်သ္ကေတ်ထတ်မြက် စဳကၠးမြက်စာ၊ ဟိုတ်မဒးလုပ် အကုပ်တဏှာ၊ ရုန်ဒဴဟွံဗၠး နူပးသံသာ၊ ဂရှ်တံဂှ် လဝ်ကဵုဒှ်ကၠာ၊ သၠောံသ္ၚာပ္ညဳ ခမဳပ္ဍဲဘာ၊ ပကင်ရင်သမတ် ပိဋကတ်မြာ၊ လအေင်ခန္တဳ သဳလပြဲဖါ၊ ဒေပ်စိုတ်ဗိုန်ကၠာ ပညာၜိုန်ချပ်၊ ရုပ်ဂေါဝ်ဒးဂၞင် ပ္ဍဲမတ်စပ်အာ။   ။

ယာံညာတ်ရုပ်ဗက် ဒွက်ပးသံသာ၊ အာရီုလိုက်လဴ စိုတ်စပ်တဴကၠာ၊ ရုပ်လှေံလှန်မတ် စိုတ်လယတ်အာ၊ ပညာၜိုန်ထတ် ဆေကြတ်ဓနာ၊ ဆေတာကွေံကြာန် ဟွံမာန်တုဲမာ၊ ဒးလသာလဝ် ဓဝ်သာသၞာ၊ ဒဒှ်ဟိန်ဗိန် သ္ၚိကၟိန်သေင်ဟာ၊ အိုတ်ဇၟာပ်ဘူဝတ် သတ်ပ္ဍဲသံသာ၊ ၜိုန်တိရစ္ဆာန် ဒဴဗၠးမာန်ဟာ၊ ဆဂှ်ဟွံသေင် တၟေင်ဥပ္ပမာ၊ သိက္ခာမုနိ ဣသိတမၠာ၊ ဒၟံင်ဂြိုပ်ပၠ ဟေမဝန်ဏာ၊ ရပ်ခန္တဳဗိုန် သွိုန်ဘာဝနာ၊ နစိုတ်ဗိုန်ဇၟံ ဟွံသပံသာ၊ ပ္ကင်ရင်လဝ်ကၠာ ဇၟာပ်သမာပတ်၊ ပ္ဍဲတိဟွံအာ ၛာန်ကာယျသၟတ်၊ လိုန်သၠဗာန်ကျာ ကလာင်ပြာကတ်၊ မိင်ရမျာင်ဗြဴ ရုပ်ထဝ်သ္ဍဴမတ်၊ အာရီုဗတိုက် စိုတ်ဂၠိုင်လျတ်၊ ၛာန်သရိုဟ်ကွေံ ဒတုံစှ်ေသၟတ်၊ ဣသိတံဂှ် ဒယှ်ပြာကတ်၊ ၜိုန်သဳလသ္ကီု ဒးလီုပယတ်၊ အိုတ်တၟံသတ် ပ္ဍဲသၟတ်သံသာ။   ။

ယာံရုပ်ဒွံဒး ပးစက္ခုဒွါ၊ အာရီုဓဇပ် သရပ်စိတ္တာ၊ ညံင်လွပ်ကလော် မဇၞော်အညာ၊ ထၞီမှဲတ္ၜိင် စိုတ်ဝိဝိင်အာ၊ ညံင်သၟိင်ဂိတ နာဲမြုထာင်သွာ၊ ကျိုင်ကျဝ်ဒးရး ကွာ်ဒးစးကျာ၊ ဒွံစုတ်မတ်ၜါ စိတ္တာစိုတ်နု၊ ညံင်ဍောင်ထာင်ကိုန် လျးဍိုန်လသု၊ မလုပ်သမၞိင် တဲသၟိင်ရာဟု၊ သၟိင်လျးကၟု ဇကုဓဇပ်၊ တေံသၟိင်တ္ၚဲကၠာ ရာဟုမရပ်၊ လေင်ဟွံလေပ်ဗၠး နူမဂးစပ်၊ ရာဟုစိုတ်ကီု ရုပ္ပရီုသၟပ်၊ ရုပ်သၞေဟ်ဒးဂၞပ် ယာံစပ်ဒးစိုတ်၊ သှ်ကွေံဟွံဗၠး ပးသုဘာသိုတ်၊ လောံလာဲတ္ၜးဘိုင် ဒဝိုင်လျးပၠိုတ်၊ ရုပ်ဒွံဒးမတ် မတ်ကသဳစိုတ်၊ ဂုဏ်မတ်ဒှ်ဟိုတ် စိုတ်တူသဏာန်၊ ပဳတိလဴဗ္ဂံင် စံင်ဗ္ဂဵုဝိညာန်၊ ညံင်ပၟတ်ကဝ် ဇၞော်မောဝ်လောန်လာန်၊ ဂၠံဟဒယ ဒုက္ခဝိညာဏ်၊ ပၟတ်ရာဂ စံပၠသန္ထာန်၊ ယက်ဗဂုဲသ္ဍိုက် တူဂၠိုက်သဏာ၊ နူဒွက်သံင်သာ ရုန်အာဟွံမာန်၊ ဒှ်သ္ဍိုက်ပၠန် တဏှာကွေံကြာန်၊ ဟွံဂွံစဴထာန် နိဗ္ဗာန်သေင်ဟာ။   ။

ဟိုတ်ဂှ်မၞးတံ တၟံလိုက်ဗာ၊ လံစိုပ်နိဗ္ဗာန် ထာန်ကျာ်တမၠာ၊ သမဇူဒၟံင် ပ္ဍဲခြိုင်သံသာ၊ ဒါန်ဂှ်ဒှ်ဗၞတ် မှတ်သလဲကၠာ၊ ရိုဟ်ဟ်တ္ၚဲသၟတ် ဒါန်မှတ်ပ္တုဲအာ၊ ရုပ်ကျာ်စေတဳ မှတ်လွဳပရာ၊ ဒဒန်ဇၞောဝ်က္ဍိုင် ကမၠိုင်ဍာ်ကၟာ၊ ရုင်ဒါန်ထၜုတ် ဇြပ်ကျာ်ဘုတ်ဘာ၊ ပုင်ဝတ်ရိုဟ်တ္ၚဲ ဒါန်ဍာ်ပြဲဖါ၊ ဂၞိင်-ကၞိင်ဟေင် ဗဗေင်သ္ၚာ၊ ဒါန်ကွာင်ယာဂု သတ်ဆုနာနာ၊ ဒါန်သတ္တာဖျာ် ဍာ်ယာမကၠာ၊ ဒါန်တောံသွဖျန် ဇဟန်သကာ၊ ဒါန်ဇဗၠုသတ် ဒါန်ဝတ်နာနာ၊ အိုတ်ဇၟာပ်ဒါန်ကၠာ ခါဂွံနိဿဲ။   ။

ဒါန်ဂှ်ဒစုန် ဒါန်ဒုန်သလဲ၊ ဒါန်ဂှ်ရောင်ပြဲ ညံင်တ္ၚဲမယး၊ ဒါန်ဂှ်သ္ၚဳရံင် ဒါန်ဂှ်ဍံင်ပျး၊ ဒဒိုက်ဇၞော်ကၠး ယာံဒးဒှ်ကၠာ၊ ဒါန်ဂွံဆေတာ ဒနာဂပဝ်၊ ဒါန်ရောင်ဇိုန်ကဵု အိန်သွဵုဍုင်သွဝ်၊ နူအပါဲကၠာ ဂွံဗၠးအာဓဝ်၊ ဒါန်မိန်ဂပဝ် ဆေဒဝ်အဆတ်၊ ဂုဏ်ဒါန်ဂွံဗၠး ဒါန်ပျးကဵုမတ်၊ ဒါန်တရံင်ပ္ညဳ ပါရမဳသၟတ်၊ ပိုန်ရုပ်ကညာ ကြဳဇှ်ပြာကတ်၊ ဒါန်ရောင်ဗိုန်ဇၟံ အိုတ်တၟံသတ်၊ ကြဳဇှ်ဒါန်ဒှ် ဒယှ်တှ်ကၞောတ်၊ ၜိုန်ကျာ်နာဲညး ကဵုဇၞးမာတ်သၟတ်၊ သက်သဳပဒး ဂွံဇၞးအဆတ်၊ ကြဳဇှ်ဒါန်ကၠာ မာဖေက်အာသၟတ်၊ ကျာ်ဇၞးမာသွံ ဂွံပပြာကတ်၊ ဒါန်ဇိုန်ကဵုပိုန် စိုန်သ္ကီုဒြပ်ရတ်၊ ကြဳဇှ်ဒါန်သၟတ် ပယတ်ဂွံလှိင်၊ သေဋ္ဌဳသမ္ၚေဟ် သ္ဂေဟ်သွဟ်ဒှ်သၟိင်၊ ဒါန်ဇိုန်ကဵုကၠာ သွဝ်တာဝတိင်၊ တူဖုန်ဝုန်ဏင် တူဒေန်ဂြင်စိင်၊ ဒါန်ရောင်ပင်ပ္တိုန် ဇိုန််ကဵုပသၟိင်၊ မိတ်မပြဲသွံ ဂွံဒ္ၚောဝ်သိုက်လှိင်။   ။

နာဲဒကောင်ပိုန် တြုံဒတိုန်သွိင်၊ ဂကောံဗြဴပန် ဝုတ်ကညာဂၞိင်၊ ရုပ်ညံင်ထဝ်ဂၠး ဇၟာပ်ညးတုပ်သြိင်၊ မဂွံသၟဟ်န် ဂွံညန်ဖလှိင်၊ ဒါန်ဏာဗစိုပ် ဒေါဝ်ဂြိုပ်ဇမၠိင်၊ ဒါန်သ္ဂန်ကံတဲ ဂြဲဏာအခိင်၊ ဂကောံမိသ္ဍိုက် ဂွံညန်သိုက်လှိင်၊ နာဲဒကောင်ပိုန် ဂွံတိုန်ဒှ်သၟိင်၊ ဒေါဝ်ဂြိုပ်ဇမၠိင် ဒှ်သၟိင်ဒေဝတဴ။   ။

သၟိင်ဓဝ်သာဲလေဲ သေဲသေဲဟီုတဴ၊ စဵုကဵုလၟုဟ်ဂှ် ဒယှ်ကမြဴ၊ ဇၟာပ်ဇန်တြုံဗြဴ မိပ်စိုတ်တဴကၠာ၊ ဒါန်ဇိုန်ကဵုဟေင် ရောင်ဟွံသေင်ဟာ၊ ဟိုတ်ဂှ်မၞးတံ တၟံလိုက်ဗာ၊ ဒါန်ရောင်ဒှ်ကြက် မသက္ကုခြာ၊ ဒါန်သၟတ်ပ္တုဲအာ ဂွံမြာသွာရောင်။   ။

(ကျာ်ဇၞော်ကုသလ-ဘာကျာ်သြဳမည်-ပါဠိတက္ကသိုလ် ဍုင်လ္ဂုင်)

==သွက်ဖါပ်ပူဇဴ သၟိင်မဒကောင်ပိုန်==
'''(၁)''' ပၞာင် ဍာ်မြမောဝ်- ပ္ကဴသဴ၊ ဇဗၠု-သတ်-ကလေင်၊ သဂြာ၊ သတ်ဗြာတ်၊ သတ်ဗြဴ၊ ကွာင်က္ၜဲ၊ လက်ဖက်၊ မပ္တံသတ်ဆု-သတ်ဒုန် ဗွဲမ္ဒးရးတံဂှ် ကြဴကြာတ်မသ္အးဇ္ၚးတုဲ၊ (ပိပ္ၚာန်) ဝါ- ပိပေါဲ၊ ပဳခဝ်၊ ပေင်သွက်သၟိင်မဒကောင်ပိုန်၊ ဒေသကၠောန်ကေင်ကာဂှ်- ပၟင်ဍုင်၊ ပၟင်ကွာန်၊ ပၟင်က္ၜဳ၊ မစပ်ကဵုဒေသပၟင်မွဲမွဲမၞုံမ္ဂး- မွဲမွဲ-(ပ္ၚာန်) ဒးကဵုရောင်။   ။

'''သွက်ဂွံစွံသတိ။''' 
'''(၂)''' ပ္ဍဲအခိင်မကၠောန်ကေင်ကာဂှ် မပ္တံအဟာရဟွံသ္အးဇၚး၊ မစပ်ကဵုအဟာရသတ်လမျီုတံဂှ်ကီု ၜဵုကီု သ္ပသတိတုဲ ဝေင်အိုတ်ညိ။   ။

'''အခိင်။'''
'''(၃)''' နူကဵုဂိတုဒ္ဂိုန်ပေင် စဵုကဵုစိုပ်ဝှ်ပေင်တေံ- ပွိုင် {၄} ဂိတုတံဂှ် အခိင် (ဝိကာလ) လောန်အာတုဲ သွက်သ္ဂောံဖါပ်ပူဇဴတံဂှ် ဝေင်အိုတ်ညိ။   ။
==နိဿဲ==
နူလိက်အုပ်မၞုံယၟု မဒကောင်ပိုန် (ကျာ်ဇၞော်ကုသလ-ဘာကျာ်သြဳမည်-ပါဠိတက္ကသိုလ် ဍုင်လ္ဂုင်)
[https://online.fliphtml5.com/yjjtg/kyty/ လိက်ဗွဟ် မဒကောင်ပိုန်]</text>
      <sha1>5p6y0eszahy8e11gv6evryppwv0wthm</sha1>
    </revision>
  </page>
</mediawiki>