Wikisource wawikisource https://wa.wikisource.org/wiki/Wikisourd:Mwaisse_p%C3%A5dje MediaWiki 1.47.0-wmf.6 first-letter Media Sipeciås Copene Uzeu Uzeu copene Wikisourd Wikisourd copene Imådje Imådje copene MediaWiki MediaWiki copene Modele Modele copene Aidance Aidance copene Categoreye Categoreye copene Oteur Oteur copene Pådje Pådje copene Indek Indek copene TimedText TimedText talk Module Discussion module Event Event talk 0 6770 36020 36019 2026-06-10T13:04:24Z Lucyin 29 36020 wikitext text/x-wiki {{modeyes|[[Lu pourcession du Sint-Sacrëmint|Feller]]}} {{tiestire | tite = Li porcession do Sint-Sacramint | oteur = Jean-Marie Adam | rortografiaedje = {{l-oteur|Lucyin Mahin}} | eplaideu = [[Li Rantoele]] {{l°|118}} | aneye = 2026 }} <div class=text> {{tite|Li porcession do Sint-Sacramint}} {{odio | Wa Adam Jean-Marie fiesse Sint-Sacramint.ogg | Schoûtez li scrijheu lu-minme li dire,<BR>(accint d' Hôt Fayi) }} Viyès uzances Li porcession do Sint-Sacramint Dji m’ vos va cåzer del porcession do Sint-Sacramint dins nosse viyaedje. Dji vos va raconter ça come dji l’ a viké, avou mes ouys d’ efant. Mins, pa des côps, dji frè ene refleccion d’ on vî ome ki dj’ so divnou. Dji sai bén ki m’ walon n’ est nén foirt academike, mins dji n’sai fé mî. Li fiesse do Sint-Sacramint, c’ e-st ene fiesse ki les catolikes avént stichî li deujhinme dimegne ki shût l’ Pintcosse. C’ e-st ene pormoennåde dins l’ viyaedje po-z aler mostrer çk’ on lome li Sint-Sacramint. Enute, ele n’ egzistêye pus. C’ est surmint pask’ on n’ a nén condjî l’ londmwin, come a Påke ‒ infén, dji di ça, dji n’ di rén, mi, hin. Les rpôzwers Mins rivnans a ç’ tins la. Po cmincî, fåt aprester ttafwait : monter les rpôzwers, aler cweri des mays ‒ les mays, c’ est nén des « mwaiyes »1, k’ on fwait l’ pwin, hin ; les mays, c’ est des ptits åbes ‒ rexhe les banires, netyî et decorer l’ dai et, po les gamenes, aler code des fleurs. Li djoû di dvant, li semdi don, les omes vont côper des mays e bwès ‒ les mays, come dji vos l’ dijheu, c’ est des djonnes bôles u des djonnes noejhtîs ‒ et i les rplantèt dins des trôs k’ i fjhèt tot do long del voye. Enute, dji n’ croe nén k’ on pôreut côper des bwès et les rplanter sins awè l’ DNF et l’ tchampete a ses guetes. Mins cwand dj’ esteu gamén, on pleut bén. Po les rpôzwers ‒ c’ est des sôres di ptits åtés ‒ c’ est les mnujhîs k’ on va cweri, todi les minmes. I gn a bén deus u troes po tchaeke ripôzwer. Et n’ pierd nén t’ tins a lezî vleur diner on côp d’ mwin ; i t’ ont vite dit k’ ti n’ î conoxhes rén. I savèt bén çk’ i fåt fé, on pô come les barakîs cwand i montèt les caroussels al grande dicåce ‒ inte di nozôtes, on les lome « les barakîs », nén pask’ i fjhèt des mwais toûs, mins pask’ i dmorèt dins des barakes. Les deus prumîs rpôzwers, i sont astotchîs a ene grande croes d’ bwès et l’ troejhinme est clapé a èn ouxh di gregne. Li dai, c’ e-st ene sôre di baldakin d’ bwès, tot blanc, avou des plomes ki rshonnèt ås plomes des djîles di Bince, mins on pô pus ptites, k’ on mete al copete des cwate cwins. Li toet, il est d’ toele. S’ i ploût, i n’ sieve a rén. Il est djusse la po ki l’ curé n’ atrape nén on côp d’ solea sul tchesse. Tins k’ les omes s’ ocupèt des mays et des rpôzwers, les ptitès gamenes ‒ pa des côps aidêyes pa kékes gaméns tot binåjhes d’ aler cori avou zeles ‒ vont code des fleurs dins les tchamps. Dins l’ tins, des fleurs, i gn è-n aveut tant k’ ti vous : on n' pulverijhive nén come enute. Et les cinsîs les laixhèt fé a condicion k’ ti n’ våye nén trop pesteler l’ tchamp. Cwand elle end ont plin leu ptit tchena, ele les ramoennèt amon l’ viye seur ki mete totafwait dins ene grande banse po l’ londmwin ‒ ene grande banse, c’ e-st on tchena tot plat avou deus pougneyes. Li djoû minme å matén Li dimegne å matén, tins k’ kékes femes achevèt di decorer li rpôzwer avou des carpetes, des mapes et des fleurs do corti, les omes netièt l’ voye. I gn a todi des flates a ramasser ‒ savoz bén : ene vatche, on côp k’ ele rexhe do ståve, porcession u nén, i fåt k’ ele flate, hin. On ramasse don l’ pus gros avou ene schoupe, on broushe çou k’ i dmeure, on strame on saeyea d’ soyoeres et l’ voye est prôpe. Ci n’ est nén po les solés do curé k’ on fwait ça, saiss ‒ c’ est cwanlminme nén lu ki les neteye ‒ mins c’ est po k’ on n’ aniche nén les tapis des rpôzwers, paski les femes, ki dvèt roister ttafwait après côp, ele ni srént nén foirt binåjhes. E-z alant a messe, les meres amoennèt les ptis gaméns et les ptitès gamenes dé l’ viye macherseur : ås gaméns, on passe ene grande rodje cote avou ene blanke tchimijhe padzeu. On les lome « des ptits curés ». On lzî dene ene clotchete et i sont fén presses. Les ptitès gamenes, mousseyes di blanc des pîs al tiesse, vinèt avou ene pitite coirbeye cweri ene pougneye des fleurs k’ elle ont stî code li djoû di dvant. Les deus pus grandès gamenes, les cenes ki pasront les prumires al porcession, ont droet a des blankès aiyes k’ on lzî cole dins l’ dos come a des andjes. Ele si leyèt fé. </div> [[Categoreye:Ouves sicrîtes e rfondou]] [[Categoreye:Crustinnisse]] [[Categoreye:Li Rantoele]] [[Categoreye:Ouves avou des eredjistrumints oyåves direk]] hh906hcwt5z7al6ltq51opyr6yyfswl